Chris Patten nga Bundestagu gjerman jep alarmin për zgjedhjet në Shqipëri.
Kryekomisioneri europian sulmon ashpër qeverinë shqiptare për mungesën e zgjedhjeve të lira dhe mungesën e vullnetit për të luftuar krimin e organizuar.
Asnjë shans për të mbyllur negociatat për bisedime deri në zgjedhje të lira.
I ftuar nga komiteti parlamentar i çështjeve europiane të Bundestagut për të folur mbi politikën europiane për vendet e Ballkanit, komisari Patten, ka qenë më i shkoqur se kurrë në lidhje me Shqipërinë. "Unë duhet t'ju them se nuk shoh asnjë perspektivë për mbylljen e negociatave këtë vit, dhe gjatë vitit që vjen, pasi Shqipëria duhet të na provojë ende seriozitetin e saj për politikat europiane", ka deklaruar Chris Patten. Ai i ka siguruar parlamentarët gjermanë, se të gjitha shtetet anëtare të BE-së i kanë dhënë Komisionit Europian mandatin, që të mos mbyllë asnjë pjesë të negociatave, nëse Shqipëria nuk tregon kapacitetin e duhur për zbatimin konkret të pikave të marrëveshjes. Patten ka treguar në mënyrë të hapur para Bundestagut shqetësimin e tij për përmasat e krimit të organizuar në Shqipëri. "Unë duhet të pranoj se, për momentin, krimi i organizuar që buron nga Shqipëria është një problem i lemerishëm, i cili për më shumë eksportohet në shumë vende të Europës të Bashkuar" është shprehur Kris Pateni përpara parlamentarëve gjermanë. "Për momentin, unë nuk mund të pretendoj se në Shqipëri ekziston ndonjë evidencë e vullnetit politik për të shënuar progres në luftën kundër këtij problemi", ka sqaruar ai. Në përfundim të prezantimit të marrëdhënieve BE-Shqipëri, komisari Patten ka drejtuar një mesazh fshikullues për qeverinë shqiptare, duke treguar se zgjedhja është në duart e Tiranës. "Qeveria shqiptare, ose të bashkëpunojë me ne dhe të ecë përpara, ose mund të vazhdojë të injorojë mesazhet tona të qarta, dhe në këtë rast, unë mund të parashikoj vetëm stagnacion, apo amulli në proçesin e saj të integrimit europian", ka thënë Chris Patten. Ai nuk ka harruar të flasë edhe për vuajtjet e popullit shqiptar gjatë 50 viteve të komunizmit, ashtu si dhe për rolin konstruktiv të Shqipërisë në rajon, si dhe ndihmën e paharrueshme ndaj të dëbuarve nga Kosova në vitin 1999.
Mbasi ka folur për perspektivën e sigurt europiane të vendeve të rajonit, si dhe për angazhimin e vazhdueshëm të BE-së në lidhje me këto vende, komisioneri për marrëdhëniet me jashtë ka bërë një prezantim të shkurtër të marrëdhënieve të BE-së me secilin vend në rajon.
- Chris Patten në Bundestag.
Më lini që të parashtroj para jush analizat se si qëndrojnë marrëdhëniet tona me këto vende të rajonit. Fillimisht për Shqipërinë. Populli i këtij vendi vuajti më shumë se të tjerët nga regjimi komunist. Padyshim Enver Hoxha ishte një diktator më i egër edhe se Çaushesku, pasi vendi për disa dekada ishte krejt i shkëputur nga pjesa tjetër e botës. Liria e të menduarit dhe të shprehurit ishin shkatërruar kaq shumë, saqë ishte tepër e vështirë të ndërtoje një demokraci të qëndrueshme në këtë vend, pas kësaj trashëgimie të dhimbshme. Kështu që ne duhet të jemi realistë në këtë drejtim. Dëshira e tyre për anëtarësim është shumë e qartë, dhe ne si europianë duam që të shohim Shqipërinë duke bërë përparime në këtë proces. Të gjithë ne e mbajmë mend bujarinë e shqiptarëve të thjeshtë përkundrejt kosovarëve gjatë krizës së vitit 1999. Pa bujarinë e këtyre njerëzve të varfër, katastrofa njerëzore do të kishte qenë shumë më e madhe.
Pasi kam thënë këto të gjitha, dua të theksoj se jam shumë i shqetësuar për Shqipërinë. Është e vërtetë që ajo luan një rol konstruktiv në Kosovë dhe në rajon. Megjithatë krimi i organizuar është problem i tmerrshëm në Shqipëri dhe ky problem është eksportuar në shumë vende anëtare të BE. Në këtë moment nuk mund të pretendoj se ka një shfaqje të qartë të vullnetit politik të nevojshëm për t'u marrë me këtë problem. Në këto momente ne jemi duke negociuar me Shqipërinë për Marrëveshjen e Stabilizim-Asocimit. Shtetet anëtare na kanë dhënë neve mandatin negociues për të kërkuar nga Shqipëria të demostrojë kapacitetet e nevojshme për zbatimin e reformave, për të mbyllur këtë pjesë të negociatave. Më duhet t'ju them juve se nuk shoh asnjë perspektivë që negociatat në mbyllen brenda këtij viti. Kështu viti që vjen do të jetë vendimtar për Shqipërinë që të na tregojë neve që është me të vërtetë serioze në politikat e saj të integrimit. Tirana e ka vetë në dorë që të zgjedhë. Ajo mund të punojë me ne dhe të përparojë, ose mund të injorojë mesazhet tona të qarta, dhe në këtë rast unë mund të parashikoj vetëm stanjacion në procesin e integrimit europian.
Përgjigju Duke Cituar
Krijoni Kontakt