Plani francez per Tiranen

[Raku]

Pas një konkursi ndërkombëtar të nivelit të lartë dhe pas një përzgjedhjeje transparente, Bashkia e Tiranës prezantoi në prani të të ftuarve maketin përfundimtar të Planit Rregullues të Qendrës së Tiranës, përgatitur nga francezët e “Architecture Studio”.

Kryebashkiaku i Tiranës Rama u shpreh se “ne shpresojmë shumë që ky maket dhe ky plan të ketë hamornizuar në masën më të mirë të mundshme, të gjitha ato kërkesa dhe ekzigjenca që vijnë, qoftë në emër të së drejtës së pronës për t'u zhvilluar, qoftë në emër të së drejtës tonë dhe të fëmijëve tanë për të pasur sa më shumë hapësirë publike të gjelbër, qoftë edhe për të drejtën e kësaj gjenerate për të ëndërruar një qytet sa më ambicioz. Asnjëherë dhe asgjëkundi, qoftë edhe me përvojat më të shquara në vendet më të përparuara ekonomikisht dhe arkitektonikisht, ndodh që një plan apo një maket të mos ketë ata që janë pro dhe ata që janë kundër. Ajo që është shumë e rëndësishme, është që ne jemi të bindur që me këtë plan, i kemi dhënë jo vetëm qytetit, por të gjithë Republikës tonë, një shembull kuptimplotë për mënyrën se si do të ballafaqohemi me sfidat e periudhës në të cilën po kalojmë dhe në harmoni të plotë me ekzigjencat, ambiciet dhe objektivat e ekzekutivit shqiptar, të KRRTSH-së dhe të vetë opinionit, i cili nxit dhe kërkon sa më shumë planifikim urban, sa më shumë cilësi jete, sa më shumë mundësi për hapësira të përbashkëta; pra, besoj që kemi mundur të japim një shembull shumë të mirë. Nuk besoj se do të ishte e paudhë nëse unë do të thoja sot këtu që Tirana është i pari qytet i Shqipërisë, i cili e plotëson objektivin e vendosur nga KRRTRSH-ja për rreth 12 qytete, pas një konkursi ndërkombëtar të nivelit të lartë, pas një përzgjedhjeje transparente dhe shumë të goditur dhe pas një përvoje që do të shërbejë shumë edhe në të ardhmen. Ky plan tashmë bëhet pronë e publikut kryeqytetas dhe hyn në vazhdën e një trashëgimie, e cila do të shkojë natyrisht duke u pasuruar”.

Nga ana tjetër, Rama falenderoi të pranishmit duke u shprehur se: “pasi u bë përfundimtare dhe faza e përgatitjes së gjithë instalimit të kësaj vepre urbanistike, e pamë të arsyeshme që përpara se të vazhdonim me proçedurën normale në Këshillin e Rregullimit të Territorit të Tiranës, i cili pastaj do ta kalojë gjithë materialin për t'u pagëzuar nga Këshilli i Rregullimit të Territorit të Shqipërisë, të ftonim të gjithë të pranishmit. Ishte një obligim jo vetëm moral, që të pranishëm të ishin qoftë kryetari i Këshillit të Ministrave, i cili inicioi këtë proçes, me mendimin për nënshtrimin e të gjitha qendrave të qyteteve kryesore në një fazë studimore, që do të konkludohej me një plan të mirëfilltë urbanistik dhe me një maket, por gjithashtu edhe të gjithë ata pa të cilët ne nuk do të ishim këtu sot për të kremtuar këtë moment shumë të rëndësishëm, për të ardhmen e qytetit tonë. Këtu kam parasysh ambasadorin e Holandës, zotin Dangerberg i cili është një ndër mbështetësit kryesorë të këtij proçesi, pasi Qeveria Holandeze ka marrë pjesë në financimin e të gjithë këtij proçesi; do të falenderoja ambasadorin e Republikës Federale të Gjermanisë, i cili është pasardhës i zotit Shrëder, ambasadorit arkitekt që bashkë me zotin Dangerberg, ishte në bazën e nisjes së këtij proçesi që u financua nga Qeveria Gjermane dhe u zhvillua në bazë të një konsulence shumë profesionale me ekspertët e GTZ-së që përgatitën gjithë konkursin, që ngritën komisionin ndërkombëtar të konkursit dhe që do të vazhdojnë të punojnë me ne për kodin e implementimit të planit. Do të doja të falenderoja pa dyshim edhe të gjithë miqtë e tjerë, përfaqësuesin Bankës Botërore, i cili gjithashtu është pasardhës i zotit Skantie, që na ka mbështetur dhe na ka dhënë gjithë ndihmën e nevojshme. Do të doja të nënvizoja se të gjithë këta zotërinj të nderuar, po vazhdojnë të punojnë me ne për Planin Urbanistik të krejt qytetit të Tiranës, që gjithashtu do të dëshironim të na sillte përvojën e një studiojeje po kaq të mirënjohur në nivelin evropian dhe atë botëror, siç është “Architecture Studio”, përfaqësuesit e të cilës do të vijnë të shpjegojnë deri në detajet më të imta, të gjithë planin përpara KRRTRSH-së. Një falenderim do t'i bëja edhe ambasadorit të Shteteve të Bashkuara, zotit Xhefri, i cili ka ardhur sot për të marrë pjesë në këtë ceremoni. Nuk mund t'i rendis të gjithë miqtë e tjerë me emra të përveçëm, por këtu janë arkitektët shqiptarë që punojnë në Tiranë, janë një numër i konsiderueshëm përfaqësuesish të Shoqatës së Ndërtuesve, ashtu sikundër kemi ftuar arkitektë dhe urbanistë të rinj nga Fakulteti, për të qenë prezentë në këtë moment që do të mbetet në memorien të gjithëve, pasi siç thuhet, çdo gjeneratë ka të drejtën të ndërtojë qytetin e saj. Ky maket është qyteti i gjeneratës, e cila sot punon aktivisht për të mundur që të kalojë në të ardhmen e afërt, stafetën tek një gjeneratë më e re, që natyrisht do të vijë me ide të reja, me përvoja të reja, me nevoja të reja”.

Ndërsa kryeministri Fatos Nano u shpreh mes të tjerash se: “Jemi këtu për të bërë sëbashku zgjidhjen më të mirë në këtë partneritet për zhvillim, që integron administratën publike, integron ekspertizën më të mirë të kohës në kontinentin ku jetojmë, në zhvillimin urban, integron interesat e pronarëve të vjetër dhe të rinj, të sipërmarrësve, të konstruktorëve dhe të qytetarëve”. “Personalisht garantoj mbështetjen pa rezerva të këtij proçesi transparent të komunikimit me publikun dhe falenderoj edhe kryetarin e Bashkisë së Tiranës për mundësimin e këtij partneriteti midis organeve kombëtare të administrimit të territorit dhe organeve të pavarura dhe gjithnjë e më me shumë kapacitet të qeverisjes vendore; pra, të administrimit të territorit të bashkisë kryesore në vend, të metropolit kryeqytetas. Do të shkurtojmë ritmet e vendimmarrjes, si stimul që ju të rrisni ritmet e ndërtimit dhe të zgjidhjes së konflikteve”, u shpreh kryeministri Nano.

Në mbledhjen e Këshillit të Rregullimit të Territorit të Bashkisë së Tiranës, Rama u shpjegoi anëtarëve të këtij këshilli disa nga pikat kyçe të Planit për Qendrën e kryeqytetit:

- Plani harmonizon privaten me publiken

- Nuk do të lejohen godina banimi më të larta se 9 kate

- Kullat e larta paralele me njëra-tjetrën do të jenë të destinuara për veprimtari tregtare, administrative dhe kulturore

- Do të konservohet me pak ndryshime zona e ish-Bllokut, e cila do të bëhet aksesibël vetëm për këmbësorët, si dhe zona e vilave në Rrugën e Elbasanit

- Plani parashikon formimin e Parkut të Madh në qendër të Tiranës, që do të vijë nga shkrirja e Parkut Rinia dhe Parkut të Namazgjasë, si dhe ndërtimin e parkut matanë Stacionit të Trenit

- Zona jugore e qytetit kryesisht do të mbrohet, ndërsa zona veriore do të zhvillohet me godina banimi

- Sheshi “Skënderbej” do të jetë aksesibël vetëm për këmbësorët, me shumë gjelbërim dhe hije për qytetarët. Në shesh u jepet përgjigje hapësirave social-kulturore

- Me planin, gjen zgjidhje edhe ndërtimi i xhamisë për Komunitetin Mysliman, duke krijuar kështu bashkë me Katedralen Ortodokse dhe atë Katolike një trekëndësh të të tria religjioneve

- Plani parashikon edhe futjen në sistemin e transportit publik të një treni urban, me dy-tri vagonë, tepër ekologjik për ambientin

- Plani zgjidh edhe problemin e godinave me destinacion administrativ. Kështu, në ndërtesën e Selisë së Kuvendit (ish-Komiteti Ekzekutiv) është parashikuar të ndërtohet aula (salla e deputetëve) e re e Parlamentit. Teatri Kombëtar do të kalojë në mjediset aktuale të sallës së Parlamentit. Biblioteka Kombëtare do të harmonizohet në kullën që do të ngrihet brenda oborrit të Muzeut Kombëtar, duke u harmonizuar kështu me ndërtesën aktuale dhe duke u sintetizuar me ndërtesën e Hotel “Tirana”

- Gjithashtu plani parashikon edhe zgjerimin e mjediseve të Korpusit Universitar, duke krijuar kështu hapësirat e nevojshme për Universitetin.

- Në plan parashikohet rivitalizimi i Sheshit “Avni Rustemi”

- Sheshi “Nënë Tereza” do të bëhet vetëm për këmbësorë

- Plani parashikon ndërtimin e hapësirave për parkingje të mëdha nëntokësore

Sipas Ramës, ky është një projekt me vlerë, për faktin se mundëson fillimin menjëherë të punës, pasi nuk është një projekt utopik, as një projekt që rrezikon të mbetet thjesht dhe vetëm në këtë maket, por lejon menjëherë fillimin e punës me hapësirat publike. “Ne jemi duke e përfunduar proçedurën e financimit të projektit të Parkut Qendror, të cilin shpresojmë ta ndërtojmë me fondet tona vitin e ardhshëm, pasi kemi bërë projektin këtë vit. Ky plan lejon mundësinë e ndërtimit të atyre urave të librit mbi Lanë dhe të disa objekteve të tjera, investitorët e të cilave kanë aplikuar prej kohësh në Bashkinë e Tiranës dhe ishin në pritje të këtij plani. Qoftë në nivelin e investimeve publike, qoftë në nivelin e investimeve private krijon mundësinë e fillimit të menjëhershëm nga puna. Dhe nga kjo pikëpamje, mendoj se plani është mjaft realist”, u shpreh Rama.