Hobi dhe Biznes

[ganoid]

Geron Koço - 13/04/2004

“Citroen C3 Pluriel”, modeli më i dëshiruar nga të rinjtë

Mjafton ta shikosh dhe do të kuptosh që është prodhuar posaçërisht për ty


Me një mbulesë të sipërme, e cila hapet duke e shndërruar Plurielin në versionin kabriole, ajo të çorienton, sa mund të arrish ta zëvendësosh modelin tënd të makinës, e re apo e vjetër qoftë, me “Citroen C3 Pluriel”. Ky model është prodhuar për ata të cilët pëlqejnë të udhëtojnë nëpër rrugë të cilat kanë një panoramë të mrekullueshme. Versioni i saj berlina mund të kthehet në kabriole duke ulur sediljet e pasme dhe të shtrihesh për të shijuar panoramën që të rrethon. Është një model që kohët e fundit ka pasur një numër të madh kërkesash nga femrat. Po nuk nuk ngelen mbrapa dhe meshkujt, të cilët janë më të prirur drejt anës sportive. Në këtë rast ajo arrin t’i kënaqë të dyja palët, duke ofruar një gamë të gjerë opsionesh.


Përmasat e “Plurielit”
Një provë udhëtimi në një model “Pluriel” është krejt ndryshe nga të tjerat. Me përmasat e saj prej 3 metrash e 93 centimetra dhe me një gjerësi prej 1 metër e 70, mjafton të shtypësh pak më shumë pedalin e gazit dhe do ta shikosh veten pranë semaforit sa hap e mbyll sytë.


Në brendësi të “Plurielit”
Për të jetuar një jetë prej “Plureili”, duhet të mësohesh gradualisht. Brenda kësaj makine nuk e ke atë ndjenjën e një shoferi çfarëdo, pasi ajo të jep siguri, të bën të jesh snob, si dhe një person që kërkon gjithmonë të biesh në sy të të tjerëve, i cili hap dhe mbyll mbulesën e sipërme të makinës edhe kur je në dimër. Kjo si rrjedhojë e faktit se ajo është elektronike dhe nuk bën zhurmë kur e mbyll, megjithëse mund të jesh duke ecur. Kur ndodhesh brenda saj të krijohet ideja sikur je në makinë të vogël, me të cilën mund të udhëtosh vetëm në rrugë të ngushta. Në brendësi ka vetëm dy mbajtëse gjërash, të cilat ndodhen në krah të dyerve. Ato janë aq të mëdha, sa të krijojnë përshtypjen e çantave prej kashte që përdorin femrat kur shkojnë në plazh. Ajo ka gjithashtu edhe një bagazh goxha të gjerë, ku shumë mirë mund të vendosësh ato çfarë ke blerë në pazar. Për të hapur bagazhin, mjafton të shtypësh një buton, i cili është gati i padukshëm.

Kabriole
Nëse udhëton me të në opsionin kabriole, është mirë që të ecësh në rrugë dytësore. Duke ulur të dy xhamat si ato të pasmet, ashtu dhe ato të përparmet, të cilat kanë një mënyrë të veçantë uljeje. Ato fillojnë e futen në brendësi të derës në formë gjysmë rrethi. Kështu, pra, modeli “Pluriel” arrin të ofrojë një pamje të mrekullueshme nëse udhëton me të nëpër rrugët e Llogarasë.


Motori
Ky model mund të udhëtojë edhe me shpejtësi deri në 185 km/h, në autostradë është e shpejtë aq sa duhet. Modeli “Pluriel”, me të cilën janë bërë edhe prova, arrin një shpejtësi deri 160km/h. Nuk duhet harruar fakti që ajo është një model me 75 kuaj fuqi me një motor 1400 kubik. Ndryshe ndodh me versionin prej 110 kuaj fuqi. Ajo arrin të ecë me shpejtësi deri në 170km/h, me një motor 1500 kubik.
Një faktor tjetër tepër i rëndësishëm, që nuk duhet lënë pas dore, është edhe sistemi i frenimit. Ato janë aq shumë të ndryshuara dhe të forta. Kjo falë asistencës elektronike, e cila nuk kishte se si të mungonte edhe në këtë rast.
Një sistem amerikan për ndërrimin e marsheve e bën atë që të ketë 5 marshe të cilat mjafton t’i shtysh lehtë, vetëm me majën e gishtit dhe kështu ke ndërruar dhe shpejtësinë.
Për sa i përket konsumit, ajo arrin të shpenzojë nga 14.7 litra në versionin me 75 kuaj fuqi dhe 15.32 litra në atë me 110 kuaj fuqi. Kjo në lidhje me versionin me benzinë, deri sa të dal versioni me motor turbodiesel.


Çmimi
Fillon me një çmimi fillestar prej 14500 eurosh. Nëse je i interesuar për tipin “Pack Techno”, mund ta gjesh për 15500 euro. Kurse për modelin 1.6 me 16 valvola dhe me sistem të ndërrimit të marsheve të ndjeshëm, do t’u duhet të shpenzoni diçka më shumë, rreth 17500 euro.


Përgatiti: Geron Koço

[ganoid]

Dy vizionet e Audit A8: sportive dhe klasike




Makina e re Audi A8 është duke bërë paraqitjen e saj elegante në të gjitha rrugët e Evropës pas majit të këtij viti.
Audi A8 paraqitet me dy versione të saj: si makinë sportive dhe klasike. Për sa u përket karakteristikave teknike, kjo lloj makine është një konkurrente e fortë në të gjitha segmentet. Cilësia e markës është demonstruar e fortë në treg, megjithatë gjenerata Audi sa vjen dhe përmirësohet më tepër. A8 tashmë është një makinë super, sidomos për sa u përket linjave të saj elegante dhe të gjata. Gjatë prezantimit të Audi A8 janë vënë re 4 tipe stilesh me prioritet të ndërthurura mirë midis stilit klasik dhe atij sportiv. Me pak fjalë, harmonia e linjave të kësaj makine gjatë një udhëtimi të jep përshtypjen sikur ke hipur mbi një avion pasi je gjithmonë në fluturim. Kush hipën në timonin e një Audi A8, ndihet gjithmonë i mirëpritur. Ai është i lehtë dhe i prerë në kohë për sa u përket kthesave. Pamja e saj e jashtme është e stiluar nga linja shumë moderne. Sedilja e saj e mbrapme është e mbuluar mirë me një lëkurë të zezë, ndërkohë që profili i saj të jep një përshtypje dinamike dhe të fuqishme të kësaj veture të re. Pjesa e saj e mbrapme është e kompletuar mirë, e gjatë 3074 mm, i ofron pasagjerit mbrapa një sipërfaqe prej 1075 mm. Përmasat e një sediljeje në përgjithësi të konfirmojnë një dimension prej 130 mm hapësirë më shumë për sediljet e prapme, 10mm për mbështetjen, 7mm për shpatullat, si dhe e 5 mm për kokën. Audi A8 është e pajisur me katër boksera të fuqishëm, të cilët janë të lidhur me një sistem automatik me impiantin e përdorur me CD. Gjithashtu, sistemi i ajrosjes në këtë makinë është tepër komod pasi bën një shpërndarje të njëtrajtshme të ajrit në të. Në momentin e prezantimit në treg Audi A8 është paraqitur me dy motorë elastikë të fuqishëm njëri është V8, me 4.2 litri me një fuqi prej 246 kW(335 CV) dhe tjetri me 3.7 litri dhe me një fuqi 206 kW (280 CV). Motori i saj me naftë është i përbërë nga 6 cilindra TDI, injektim me gaz si dhe me një turbinë shkarkimi gjeometrike VTG, ndërkohë ajo ka 4 valvola për një cilindër, si dhe dy tuba për çdo linjë të cilindrit (DOHC). Një tjetër karakteristikë e Audit A8 është këmbimi automatik i 6 marsheve me një funksion të shpejtë. Në pamje të parë A8 të jëp shumë siguri, për sa i përket dhe madhësisë së saj si makinë. Një Audi A8 me një shpejtësi prej 100 km/h do vetëm 6,4 sekonda kohë të frenojë në vend gjë që bën më të sigurt përdorimin e kësaj makine. Kjo do të thotë që kjo makinë ka një sistem frenimi elektronik shumë të shpejt. Shoferi i një makinë të tillë e ka shumë të vështirë të zgjedhë midis një Audi klasik apo sportiv, megjithatë udhëtimi në të dyja makinat është i rehatshëm, por jo i njëjtë. Në një Audi A8 klasik ndihesh më komod për shkak të prezencës së saj mbretërore dhe komoditetit që të fal sipërfaqja e brendshme. Gomat e trasha eliminojnë mirë të gjitha lëkundjet e vështira që mund të ketë makina gjatë një udhëtimi. Ato janë të mbuluara mirë nga parafangot dhe janë të pajisura me disqe të forta. Një e veçantë e Audit janë dhe kapakët e gomave, që kanë një stil zbukurimi të veçantë nga makinat e tjera. Çmimi standard i një Audi A8 sportiv është 79.500 euro.


Një Audi A8 e pakompletuar peshon min/max 1705 kg.
Ndërkohë që një lloj i tillë i kompletuar peshon 2305 kg.
Bagazhi i saj suporton një peshë prej 525 kg.
Ndërsa kapaciteti i serbatorit për të mbajtur karburant është 90 kg.
Audi ka një shpejtësi maksimale 227 (225) km/h.
Konsumimi i karburantit min/max 1/100 km sekondë
Ce 93/116.


Marka Audi ka ardhur si origjinë nga gjuha latine. August Horch themeloi fabrikën e tij të automobilëve 1899 pasi kishte punuar për Benz. Gjithçka ndodhi mbas katër vjetësh, kur Horch u transferua në Zwickau, në Sanksoninë e Poshtme, ku dhe filloij punën për prodhimin e një makine të re. Në 1909 Horch largohet nga fabrika që ndërtoi vetë, por ia kishte dalë mbanë në prodhimin e një makinë fantastike me 6 cilindra. Megjithatë, deri në këto momente makina e prodhuar mbante emrin e të zotit Horch. Duhej një emër më i bukur për makinën, Horch nuk po tingëllonte mirë. Ndërkohë nipi i tij, i cili studionte latinisht, propozoi se Horch në latinisht do të thoshte Audi, e cila kishte kuptimin (dëgjo), kështu ai mendoi për një emër të ri të makinës.
Sapo u dëgjua ky version, që në ato momente asnjëri nuk foli më. Audi u prit me sukses pas prodhimit të saj të parë. Ajo renditej si një ndër makinat më të mira në treg në atë kohë. Në disa raste Audi u shpall rivalja kryesore e Benz-it, por megjithatë asnjëherë nuk arriti në përmasat e makinës gjigante gjermane.

[ganoid]

Treni më i shpejtë në botë, ku bashkohen dy portat e kohës




Shangai, prill 17 - Kishte diçka prozaike nga mënyra se si treni i bardhë doli nga terminali i qytetit: pa zhzhzhzh, dum-dum-dum ose çfarëdo lloj zhurme tjetër - vazhdoi përpara duke ndjekur një kurbë të gjatë dhe kaloi parqet e gjelbëruara përtej stacionit, tokat e punuara nga fermerët dhe pastaj disa fabrika. Ndjesia e të qenit brenda në atë tren ndryshoi menjëherë, ndërkohë që supermakina fitonte shpejtësi të pakontrollueshme. Të ndryshuarit gjendje emocionale ndërsa udhëtoje nuk lidhej me faktin se nuk ndieje kontakt me shinat, sepse shinat nuk ekzistojnë, por me sinjalizuasin e dritës së kuqe, që pulsonte nervozisht kur tregonte se si rritej shpejtësia: 100 km për orë; 200 km për orë, 300 dhe kështu në vazhdim.
Një grumbull pasagjerësh të huaj, duke folur secili në gjuhët e tyre: anglisht, italisht, kinezçe, mbetën të shtangur. “Eshtë kaq qetë”, - foli njëri. “Eshtë kaq i pastër”, - tha një tjetër. “Motorrët janë fantastikë”, - tha një burrë me theks gjerman me modesti, pasi teknologjia për trenin magnetik, komercializuar në Shangai të Kinës, vjen nga vendi i tij.
Pas momentit të shtangies shpërthyen fleshe aparatesh fotografike dhe pasagjerët filluar të merrnin njerëzit e tyre në telefon të zellshëm për të ndarë emocionin. Pamja jashtë dritares solli brenda kabinës së supertrenit një impresion artistik, që të shoqëronte valën e teknologjisë mbi të cilin kishim hipur. Modrian dhe Dali të vinin në mendje ndërsa tokat e punuara të fermerëve transformoheshin në abstraksione gjeometrike dhe koha dukej sikur përthyhej; duke fluturuar paralelisht me autostradën, e cila ishte mbytur nga makinat e ngecura në trafik.
Për një sekondë sinjalizuesi i shpejtësisë lexoi 432 kilometra në orë dhe një pasagjer tepër emocional bërtiti: “Ngadalësoni, është shumë shpejt! Nuk ka pushime fare?” Teknologjia e trenit më të shpejtë se plumbi është një mrekulli, por në tetë minuta udhëtim drejt aeroportit nuk ke kohën as kohën të mendosh dhe ndoshta kjo është një nga arsyet pse numri i pasagjerëve ka rënë që nga janari, kur koha e udhëtimit u shkurtua në 8 minuta. Mesatarisht në ditë treni merret vetëm nga 4000 udhëtarë, më pak se 1/6 e kapacitetit të tij. Nuk gjenden shkaqe të tjera për këtë mospreferencë, përveç faktit (edhe pse absurde ta mendosh) se treni është shumë i shpejtë; kjo mungesë është munduar të justifikohet me uljen e çmimit të biletës nga 10 $ në 6$, por ka edhe shkaqe të tjera si largësia e stacionit të trenit nga aeroporti dhe disa çrregullime në orare.
Mungojnë pothuajse krejtësisht shenjat treguese dhe udhëzuese brenda aeroportit, i cili duket si skena e një filmi futuristik. “Unë desha të kapja trenin, por nuk munda ta gjej”, - tregonte një rezident i Shangait ndërkohë që hipte në një taksi për të përshkuar qytetin e rënduar nga trafiku.
Në një qytet si Shangai, i etur për të grumbulluar superlativa, si: popullsia më e madhe dhe më e shëndetshme e një vendit ku ndërtesat janë më të lartat në botë - së fundi me trenin magnetik më të shpejtë - mund të të humbë kurioziteti dhe interesi e pastaj të lodhesh nga modernizimet dhe shpikjet pasi nuk ke as kohën të marrësh frymë? Ndjesia e përgjithshme e njerëzve ndërkohë që udhëtojnë është relaksimi; një lloj qetësie mendimtare e cila ndahet me veten duke ëndërruar me sfondi e lëvizshëm jashtë dritares.
Veçse magnetiku i Shangait nuk është ndërtuar për konfort, por për shpejtësi, ndaj nuk të lë kohë të ëndërrosh me sy hapur. Treni i varur mbi shina dhe i shtyrë përpara nga forcat magnetike, udhëton shumë më shpejt se trenat normalë për shkak të mungesës së fërkimit. Sediljet e brendshme janë të forta dhe mbështetëset nuk marrin formën e kurrizit; mungojnë tavolinat ku mund të vendosësh sendet.
Sikur të kishte më shumë udhëtarë si Zhou Hao- biznesmen 26-vjeçar- treni magnetik do të kishte një të ardhme brilante; ai kishte fluturuar një të shtunë në Shangai vetëm për një depozitim parash në bankë përpara se të mbyllte biznesin e tij për javën. Qëndronte i vetëm në platformë duke pritur trenin; i gjatë dhe i dobët, i veshur me kostum të zi hodhi me shpejtësi hapat për të hipur në tren. “Kam 30 minuta kohë më shumë, po të marr trenin dhe kostoja është e njëjtë edhe po të marr taksi”, - thotë ai duke shpjeguar zgjedhjen e tij për magnetikun. Por a nuk është jeta mjaftueshmërisht frenetike, duhet edhe të shpëtojmë 30 minuta? “Unë jam shumë i ri”, - përgjigjet ai. - “Po shpejtoj të bëhem i pasur.”

[ganoid]

Philips 535, më shumë se 100 imazhe në memorie

Së shpejti ky celular do të jetë pjesë e tregut shqiptar


Ndër të rejat që ka sjellë “Royal Philips Electronics”, një kompani shumë e njohur holandeze dhe një ndër shoqëritë më të mëdhaja në Europë në fushën e elektronikës, është Philips 535. Ky model është spikatur në kongresin botëror të Kanes 3GSM, një takim vjetor i industrisë së komunikimit për telefonat celularë, si i pari aparat që ka si ekskluzivitet të tij funksionin “Foto Talk”.
Falë këtij funksioni, Philips 535 i ri lejon personalizimin e lehtë të MMS-së. Deri tani, siç nënvizon edhe vetë Philips, individët humbisnin shumë kohë për të shkruar një mesazh ose për të dërguar një koment bashkangjitur një imazhi apo figure. Ndërkohë me anë të Foto Talk mund të regjistrohet zëri apo tingulli të cilin e dëshiron që në momentin që shkrepet fotografia, mund të ngjitet lehtësisht tek mesazhi i përgatitur dhe mund t’i dërgosh së bashku. Në këtë mënyrë secili mund të krijojë shumë mesazhe të veçanta e personale në një kohë shumë të shkurtër.


Një memorie fotosh që vlen të admirohet
Memoria e Philips 535 lejon që të memorizohen deri në 100 imazhe. Mjaftojnë vetëm dy klike të thjeshta për të shkrepur një foto e cila mund të fiksojë ndoshta një ndër momentet më të bukura të jetës suaj.
Celulari është i pajisur edhe nga një lloj pasqyre për të realizuar shkrepje automatike. Përveç kësaj, falë efekteve speciale me Philips 535 mund t’i bësh fotografitë akoma më origjinale dhe njëkohësisht më të lezetshme. Duke shtypur një numër të vogël tastash, numër i cili është më i vogël se në çdo celular tjetër, mund t’i bashkangjitësh fotos tënde një tingull dhe t’ua nisësh me anë të MMS-së miqve tuaj. Funksioni Night Mode (model nate) lejon që të shkrepësh një foto edhe natën. Fotografitë mund të shfaqen edhe me funksionin FotoCall (foto me zë). Ky funksion lejon që të paraqiten në ekran fotot në momentin që personi e thërret duke e bashkangjitur foton me zërin e një personi të vetëm apo me një grup personash. Kur telefoni bie, imazhi shfaqet në ekran, në mënyrë që të kuptohet menjëherë se çfarë lloj telefonate po të vjen. Në çdo lloj mënyre që të përdoret, me Philips 535 imazhet shfaqen gjithmonë të pastra falë ekranit TFT me 65K ngjyra.
Me Philips 535 mund të miksosh muzikë si një DJ i vërtetë
Por ndërkohë surprizat multimediale nuk mbarojnë këtu. Nëpërmjet një funksioni të ri të prodhuar nga vetë kompania e Philips-it, BeDJ, mund të krijosh muzikë duke përdorur këtë aparat si një aparat që mikson muzikën. Dëgjuesi mund të miksojë deri në nëntë nota muzikore, duke bashkëngjitur instrumente të ndryshme muzikale me nota të ndryshme dhe duke ndryshuar volumin dhe kohën e këtyre instrumenteve, plus faktit se mund të ndash me shoqërinë tënde krijime të shumta, kjo falë opsionit MMS. Nëpërmjet këtij opsioni mund të bëhen shumë të rinj DJ (miksues muzike). Shumë DJ profesionist e kanë vlerësuar këtë funksion të ri të nxjerrë nga Philips. Gjithashtu, duke u lidhur me internetin, Philips 535, është e mundur që të hedhësh në celular melodi të ndryshme. Të gjitha këto melodi mund të përdoren për të remiksuar muzikat e personalizuara ose mund t’u dërgosh pjesëtarëve të familjes apo dhe shoqërisë fotografi nëpërmjet MMS-së. Boksi i këtij aparati mund amplifikohet duke lidhur Philips 535 me një amplifikator të jashtëm.


Për sa i përket anës estetike, Philips-i i ri 535 është një celular kompakt dhe i lehtë (vetëm 95 gramë). Ai është elegant dhe i karakterizuar nga një formë moderne me konture metalike. Ai është i disponueshëm në dy ngjyra: të kuqe dhe blu. Bateria mund të zgjasë deri në 300 orë fuksion total, si dhe deri në 6 orë bisedë, duke garantuar në këtë mënyrë një përdorim të tejzgjatur ndërmjet një karikimi baterie apo një tjetri.


Përgatiti: Artiola Alimadhi

[ganoid]

N-Gage QD, e ardhmja e telefonisë celulare




Kompania e telefonisë celulare “Nokia” ka njoftuar për një produkt të ri N-Gage QD, që është zbulimi i saj i fundit. N-Gage QD është një produkt kompakt i pajisur me një aparat shumë të ndjeshëm (MMC), që bën të mundur kohëzgjatjen më të madhe të baterisë, ka lojëra më efikase, e bën ekranin më të ndritshëm, rrit shpejtësinë dhe funksionet e produktit të vjetër N-Gage Arena. Lojtarët mund t’i përdorin të gjithë telefonat N-Gage që preferojnë, të lidhen me rrjetin botëror të lojërave me telefon nëpërmjet N-Gage Arena dhe të marrin pjesë në lojëra me shumë lojtarë që sigurohen nga teknologjia pa kabëll Bluetooth. Telefoni i ri N-Gage QD do të dalë në treg me një çmim prej 199 dollarë këtë muaj në Europë, Afrikë dhe Azi-Paqësor dhe në qershor të po këtij viti në Amerikën Veriore dhe Jugore. N-Gage QD do të ketë dy versione: njëri është GSM 900/1800 (Europë, Afrikë dhe Azi-Paqësor), ndërsa tjetri GSM 850/1900 (Amerika Veriore dhe Jugore). “Gjashtë muaj pas nxjerrjes në treg të telefonit N-Gage, donim të zgjeronim gamën tonë të telefonave në bazë të kërkesave që kemi marrë”, - ka pohuar Ilkka Raiskinen, zëvendëspresident i lojërave “Nokia”. “Në sajë të përmirësimit të teknologjisë lojtarët tani mund të zbaviten më shumë duke shtypur vetëm një buton dhe duke vazhduar të luajnë lojën”. Është shtuar edhe një mbajtëse e jashtme për aparatin MMC dhe është rritur kohëzgjatja e baterisë. Për telefonatat është ndryshuar modeli me altoparlant dhe mikrofon për të bërë të mundur “bashkëbisedimin klasik”. Telefoni i ri N-Gage QD i përmban të gjitha lojërat e telefonit N-Gage, disa lojëra të veçanta që do të dalin së shpejti, si: Ashen, Pathway, Glory dhe Pocket Kingdom. Aparati i ri do të ketë edhe suksese të tilla si The Sims. Aparati i ri MMC që i shtohet telefonit N-Gage, do të bëjë të mundur hyrjen e lehtë në të gjitha N-Gage Arena-t. Është një lloj programi që është instaluar në aparatin N-Gage QD dhe që u lejon lojtarëve që të hyjnë me lehtësi dhe në mënyrë të drejtpërdrejtë në të gjitha rrjetet e lojërave N-Gage Arena. Sapo instalohet ky program, del një ikonë në menunë kryesore të telefonit, që është e ngjashme me programin tjetër N-Gage. Duke përdorur këtë program me anë të lidhjes GPRS, të gjithë përdoruesit e telefonisë celulare N-Gage Arena mund të komunikojnë midis tyre, të marrin pjesë në veprimtari të ndryshme dhe shumë gjëra të tjera. Ata që janë të pajisur tashmë me një telefon N-Gage mund të përdorin aparatin e ri nëpërmjet faqes së internetit www.n-gage.com duke filluar që nga ky muaj. Telefoni i ri N-Gage QD ka edhe funksione të tjera më të avancuara që e bëjnë “më të zgjuar”, si drejtimi i të dhënave personale, browser XHTML, mesazhe me linjë elektronike dhe mundësinë për të shkarkuar dhe instaluar përdorime të tjera të Serisë 60. N-Gage QD do të prezantohet për herë të parë në panairin Electronic Entertainment Expo (E3) në Los Anxhelos, Kaliforni në datat 12 dhe 14 maj 2004. Në këtë panair do të paraqiten edhe risitë e fundit dhe sukseset e mëdha të “Nokias”.

[bebushe]

Sa qef i kam ato telefonat qe mund te xhirosh filma , hallall ku ka vajtur teknologjija

[ganoid]

"Biznesi" - 31/05/2004

Makina luksoze e BMW-së, suksesi i fundit i serisë 7




Makina e fundit në serinë e modeleve BMW (760i) është versioni i ri i modelit të suksesshëm 745i. Modelit 745i i janë shtuar 6.0 litër për motorin me 12 pistona me injeksion të drejtpërdrejtë. Motori i modelit tjetër 760 Li ka një fuqi prej 438 kuaj fuqi, rrota të rënda dyfishe prej rreth 30 centimetrash dhe një mori pajisjesh të tjera të reja. Ka qenë hera e parë që ky model (i serisë 7) me 12 pistona ka qenë i suksesshëm në Shtetet e Bashkuara, duke përfaqësuar shprehjen e përvojës më të fundit në drejtimin e saj. Çmimi i kësaj makine është 110 mijë dollarë, duke përfshirë destinacionin dhe shpenzimet e administrimit.
Motori i përbërë prej 12 pistonave i modelit 760i përdoret me injeksion të drejtpërdrejtë njëlloj si motori i modelit 760Li. Fuqia e tij është 438 kuaj fuqi dhe me një vëllim pistonash deri në 6.0 litra, 4 shufra me gunga (testata) dhe 4 valvula për çdo piston. 12 pistonat janë rregulluar në mënyrë harmonike me njëri-tjetrin. Megjithëse ka kaq shumë pistona përshpejtimi i saj është shumë i lehtë. Motori i modelit 760i mund të niset nga 0-100 km vetëm për 5.4 sekonda.
Si të gjitha modelet e serisë 7, 760i ka një kuti shpejtësie automatike me 6 marshe. 6 llojet e shpejtësive sigurojnë gjithmonë drejtimin e duhur për situatën e duhur. Kutia e shpejtësisë mund të drejtohet duke përdorur butonët e timonit sportiv, për të zgjedhur shpejtësinë e dëshiruar në drejtim. Ky model ka sjellë shumë risi me kombinimin e pjesëve mekanike dhe hidraulike; pakësimin e pajisjeve të jashtme të kontrollit; pakësimin e harxhimit të karburantit; zvogëlimin e tendencës së moskontrollit gjatë dehjes me anë të një drejtimi elektrik.
Modeli i ri ka goma të dyfishta (stili 149) me përmasa 9 x 20-inch (1 inch=2.4 centimetra) për të përparmet dhe 10 x 20-inch për të pasmet.
Modeli 760i ka elementë të shumtë që mund të mos përdoren në modelin 745i, si amortizimi i pasmë, kontrolli elektronik i lagështisë, ndenjëse të rehatshme, me ventilim aktiv, një sistem Hi-Fi me gjashtë vende CD-sh. Ndenjëset janë të veshura me lëkurë që nuk mund të gjendet lehtë.
Disa nga pajisjet që gjenden tek të gjitha modelet e serisë 7 të BMW-së janë dritat e përparme që nivelohen automatikisht, pajisje kontrolli për distancën e nevojshme në parkim, pajisje të ndjeshme ndaj shiut, telefon që mund të përdoret pa ndihmën e duarve, disk frenash me përmasa të bollshme.


Timon shumëfunksional
Timon të ndihmon t’i mbash të dyja duart në të duke mundësuar në të njëjtën kohë rregullimin e zërit të radios me anë të butonave që ndodhen në timon; gjithashtu mund të flasësh në telefon pa shumë probleme; mund të zgjedhësh një program vetë dhe ta përdorësh.


Kutia e shpejtësisë
Kutia e shpejtësisë është e përbërë me gjashtë marshe dhe është automatike. Përzgjedhja e marsheve bëhet me anë të një pajisjeje elektronike të veçantë që quhet seleksionues. BMW seria 7 është makina e parë që është prodhuar me gjashtë marshe që punojnë në mënyrë automatike. Drejtimi i makinës në mënyrë elektronike mundëson një ecje të lehtë dhe të shpejtë.


Ekrani
Ekrani punon së bashku me sistemin e kontrollit. Në ekran shfaqen informacione në lidhje me: rrugën, temperaturat, zërin, si dhe informacione të tjera në lidhje me kompjuterin.


CD player-i
Makina është e pajisur me një CD player që të mundëson t’i ndryshosh CD-të në mënyrë të menjëhershme.


Dritat e shkurtra dhe të gjata
Dritat e shkutra dhe të gjata mundësojnë një ndriçim të qartë të rrugës përpara dhe anash. Gjithashtu, makina ka edhe një pajisje automatike për nivelimin e dritave.


Aparati për ndjeshmërinë ndaj shiut
Ky aparat përdor rrezet ultravjollcë të dritës për matjen e sasisë së shiut. Me anë të këtij aparati fshirëset xhamit lëvizin vetë në intervale kohore të përshtatshme.


Tavani prej xhami
Tavani i rrëshqitshëm mund të tërhiqet prapa ose mund të lihet hapur deri në atë masë sa të drita dhe ajri i pastër (sipas dëshirës), ndërsa një reflektor për erën ndihmon që era të mos hyjë brenda. Ka edhe një pajisje të brendshme për mbrojtjen nga dielli.


Xhamat
Xhami i pasmë dhe dy xhamat e pasmë që ndodhen anash sigurojnë një mbrojtje optimale nga dielli dhe nxehtësia. Drita në vendet e pasme mund të rregullohet me anë të një butoni, i cili mund t’i errësojë ose mund t’u japë atyre ndriçim.

[Cofferati]

A ka ndonje njeri qe ka provuar te importoje makine per ne amerike nga evropa?Me sa di une ka rregulla te forta nga epa dhe nevojiten 10,000 dollar per te konvertuar dhe per taksat....Mirepo kam degjuar qe ka amerikane qe actually kursejne leke duke blere nje bmw ose mercedes ne gjermani dhe jo ne amerike nga bmw usa ne spartansburg etj....Di gje ndonje njeri?

[ganoid]

Eltion Hoxha - 28/09/2004

Qytetet më të shtrenjtë në botë




-Tokjo dhe Londra janë dy qytetet më të shtrenjtë në botë, ndërsa Asunsion i Paraguajt është më i liri.
-Tre nga pesë qytetet më të lira europiane u përkasin vendeve të cilat hynë në maj në familjen e përbashkët europiane.
-Dublini renditet i katërti, si qyteti më i shtrenjtë në 25 vendet e BE-së.
-Qytetet australiane dhe neozelandeze u ngritën shumë në renditje, pas vlerësimit të monedhave vendëse kundrejt dollarit amerikan


Edhe për këtë vit Tokjo renditet si qyteti me koston më të shtrenjtë të jetesës. Sipas vëzhgimit të bërë nga Mercer Human Resource Consulting, Londra është zhvendosur pesë vende në renditje, duke u pozicionuar në vendin e dytë, e ndjekur nga Moska, e cila për vitin 2004 është zhvendosur një vend më poshtë. “Kanë ndodhur disa lëvizje dramatike këtë vit në renditjen botërore, të cilat janë shkak i luhatjeve të mëdha të monedhave, veçanërisht të dollarit amerikan dhe euros”, shprehet Marie-Laurence Sepede, drejtuese e kërkimeve pranë Mercer Human Resource Consulting. Me Nju Jorkun, marrë si qyteti bazë, me 100 pikë, Tokjo ka mbledhur 130.7 pikë dhe jetesa aty është rreth tri herë me e kushtueshme se në Asuncion (Paraguaj), që ka një indeks prej 42.7 pikësh. Diferenca mes qyteteve më të shtrenjtë dhe atyre më të lirë është ngushtuar vetëm në përqindje këtë vit, me më pak se dy pikë krahasuar katër pikëve të vitit të kaluar dhe 15 pikëve në vitin 2002.


Vëzhgimi
Vëzhgimi përfshin 144 qytete dhe mat kostot krahasuese të mbi 200 artikujve në çdo lokalitet. Këtu përfshihen banimi, ushqimi, veshmbathja, mallrat shtëpiake si dhe transporti dhe zbavitja.
Për shembull, qiraja e një aparamenti lukzos me dy dhoma gjumi, i pakompletuar, në Londër kushton 1 950 paund në muaj, 840 paund (1 250 euro) më Dublin, 1 311 në Paris dhe 908 paund në Romë.*
Një vakt në fast-food në Dublin kushton 6.5 euro, që renditet i treti për nga shtrenjtësia në 144 qytetet e marra në vëzhgim. Kostoja në Nju Jork është 4.63 euro, Sidnei, 3.65 euro dhe në Pekin 1.93 euro.
Një kafe e shërbyer në tavolinë kushton 2.75 euro në Dublin dhe Nju Jork, 6.60 euro në Tokjo dhe 1.32 euro në Buenos Aires.


Europa
Londra është qyteti më i shtrenjtë europian, me 119 pikë. Niveli i lartë i akomodimit dhe kostot e transportit së bashku me vlerësimin e paundit kundrejt dollarit amerikan kanë shtyrë qytetin lart në renditje. Gjithësesi, Sepede shprehet se ”pikët janë bazuar në koston e jetesës për emigrantët, të cilët janë të lokalizuar në Londrën Qendrore, ku akomodimi është më i shtrenjtë”. Glasgou dhe Birmingam renditen më poshtë në renditjen britanike, përkatësisht në vendin e 41 dhe 51 me nga 84.1 dhe 82.8 pikë. Pas Londrës, Gjeneva është qyteti i dytë më i shtrenjtë europian, e pozicionuar në vendin e gjashtë në renditjen botërore me 106.2 pikë, ndjekur nga Kopenhagen në vendin e 8-të me 102.2 pikë. Të tjerë qytete në toplistë janë:Zyrihu në vendin e 9-të me 101.6 pikë, Milano në vendin e 13-të me 98.7 pikë, Dublini në të 14-in me 96.9 pikë, Oslo e 15-ta me 96.2 dhe Parisi në vendin e 17-të me 94.8 pikë. Sepeded komenton se “që nga hedhja në qarkullim e monedhës së përbashkët, euro, shumë qytete europiane kanë pësuar ngritje në renditjen botërore”.


Ekstremi
Në ekstremin tjetër, tre nga pesë qytetet më të lira europiane u përkasin vendeve që u anëtarësuan në BE majin e shkuar. Bukureshti është qyteti më i lirë europian, i renditur në vendin e 129-të me 60.1 pikë, dhe Limasoli i Qipros, që ndodhet në vendin e 95-të me 70.3 pikë. Sipas Sepede, në të ardhmen pritet që këto qytete të ngrihen në renditje, për shkak të rritjes së investimeve në sektorin e tregtisë dhe rritjes së standardeve të jetesës”


SHBA dhe Kanadaja
Nju Jorku mbetet qyteti më i shtrenjtë në Amerikën e Veriut, duke u pozicionuar në vendin e 12-të , me 100 pikë. Në qytetet e shtrenjta përfshihen Los Anxhelos, i 27-I me 86.6 pikë. Çikago renditet në vendin e 35-të me 84.5 pikë dhe San Francisko i 38-i me 84.3 pikë. Pitsburgu është qyteti më i lirë nga qytetet e Amerikës së Veriut, i renditur në vendin e 112-të me 66.5 pikë. Të gjitha qytetet e SHBA-së kanë pësuar rënie në renditjen botërore, si shkak i zhvlerësimit të dollarit kundrejt monedhave.
“Diferencat në koston e jetesës brenda qyteteve amerikane krahasuar me metropolet e tjera në botë mund të jenë më të mëdha, kjo për shkak të variacioneve në kostot e akomodimit”, shprehet Sepede.
Gjithashtu kostoja e jetesës në qytetet kanadeze ka pësuar një rritje, duke bërë kështu që ato të pësojnë një ngritje në renditjen botërore, si shkak i forcimit të dollarit vendës. Toronto është pozicionuar në vendin e 89-të me 71.8 pikë, duke u bërë kështu më e shtrenjtë se shumë metropole të Shteteve të Bashkuara. Otava është qyteti më pak i shtrenjtë kanadez, duke u renditur në vendin e 124 me 62.6 pikë.


Amerika Latine dhe Qendrore
Që nga zhvlerësimi i monedhës argjentinase në 2002-in dhe krizave të vazhdueshme financiare, qytetet në Amerikën Latine janë bërë ndër më të lirat e vëzhgimit. Asunsion zë vendin e fundit në renditjen globale, i 144-ti me 42.7 pikë. Qytete të tjera të lira janë Montevideo, Buenos Aires dhe Bogota përkatësisht në vendin e 143(472. pikë), 141(47.7 pikë) dhe 139(48.6 pikë). Në ekstremin tjetër është kryeqyteti i Perusë, Lima, që konsiderohet si qytet më i shtrenjtë në Amerikën Latine e pozicionuar në vendin e 118 me 63.6 pikë.
San Huan në Porto Riko është qyteti më i shtrenjtë në Amerikën Qendrore dhe Karaibe, i renditur në vendin e 65-të me 77.9 pikë. Santo Domingo në Republikën Domenikane është më i liri, në vendin e 142-të me 47.3 pikë, kjo si shkak i zhvlerësimit të monedhës vendëse, inflacionit të lartë dhe krizave bankare që goditën këtë vend vitin e shkuar.


Azia
Katër ndër qytet më të shtrenjta të botës ndodhen në Azi, me Tokjon, e cila renditet për disa vite radhazi në toplistë, si qyteti më i shtrenjtë në botë. Osaka qëndron në vendin e katërt me 116.1 pikë e ndjekur nga Hong Kongu në të pestin me 109.5 pikë dhe Seuli në vendin e shtatë me 104.1 pikë. Qytetet kineze megjithë shpenzimet e vazhdueshme, kanë rënë nga klasifikimi aziatik, pas mbivlerësimit të monedhës vendëse kundrejt dollarit amerikan; Pekini pozicionohet në vendin e 11-të me 101.1 pikë dhe Shangai në të 16-in me 95.3 pikë.


Australia dhe Zelanda e Re
Siç edhe shihet nga tabela qytete australiane kanë pësur një ngritje në rendijen botërore, si shkak i forcimit gjatë këtij viti të monedhës vendëse ndaj dollarit amerikan. Sidnei është qyteti më i shtrenjtë në Australi dhe rajon, duke “kërcyer” nga vendi i 67—të në 2003-in, në të 20-in këtë vit me 92.8 pikë. Të tjerë qytete me pikë të larta janë edhe Melburni dhe Brisbein, përkatësisht në vendin e 67-të(77.5 pikë) dhe 87-të(72.7 pikë). Aukland është qyteti më i shtrenjtë i Zelandës së Rë, i renditur në vendin e 80-të me 74.2 pikë. Megjithëse kanë pësuar ngritje në renditjen globale si qytete të shtrenjtë, ato pozicionohen ndër qytetet me cilësinë më të lartë të jetës.


* 1 Paund= 1.47 Euro, 1 Paund=1.8 USD, 1 Euro= 1.23 USD, 1 USD= 0.813 Euro

[ganoid]

Biznes+

"Biznesi" - 04/10/2004

Poshtë fustanit… Një celular

Prezantim i Nokia 7280: para se ta konsiderosh si telefon, do të duhet të mendosh me çfarë rrobash të shkon më shumë. Celulari i ri nga Nokia ka formën e një ore, shumë elegant, funksional dhe i shtrenjtë. Do të jetë në treg në fillim të vitit të ardhshëm


A do të pëlqehet apo jo nga klientët, kjo nuk dihet ende, por që tani ndihen ethet e kuriozitetit për Nokia 7280- modeli më i fundit i Shtëpisë Finlandeze. Krijuesit e Kompanisë Nokia kanë arritur qëllimin: të fshehin funksionalitetet e një celulari nën një veshje krejtësisht të veçantë. I parë nga jashtë, Nokia 7280 mund të duket gjithçka, veçse telefon celular. Ky lloj terminali do të pëlqehet sidomos nga ata që mbi të gjitha duan një objekt për ta ekspozuar, sesa një mjet të thjeshtë komunikimi.
Profili estetik i këtij aparati dallohet sidomos nga detajet e rafinura dhe shkëlqyese, të kunturuara nga material në lëkurë. Por ajo që bie më shumë në sy është etiketa “Nokia”, punuar në material cope, njëlloj si përdoret në veshjet e shtrenjta të firmave.
Përmasat e terminalit kushtëzohen në përmasat “extra small”: 115 x 32 x 19 mm, me peshë 84 gramë. Mbi të gjitha- ajo që çudit që në fillim, është mungesa e një ekrani të mirëfilltë dhe tastierës alfanumerike.
Për vizualizim të plotë, Nokia 7280, përdor një pasqyrë të vogël i cili mund të transformohet në një ekran, me ndezjen e terminalit (për kërë është e mjaftueshme të hapësh kapakun e aparatit). Ndërsa tastiera është zëvendësuar nga dy butona vendosur në fund të ekranit; dhe nga dy taste shumë të vegjël të vendosur anash. Gjithashtu janë të aktivizueshme edhe komanadat zanore.
Përsa i përket funksionalitetit të modelit, do të duhet të presim debutimin e tij zyrtar në treg (i pritur në fund të vitit në Europë).
Gjithsesi, përmasat e vogla të celularit N. 7280 nuk ndikojnë në aftësitë e tij për të realizuar të gjitha funksionet e një mjeti komunikues. Në të janë integruar 3 banda marrëse Gprs, dhe Gprs, Hscsd dhe brouzer xHtml; bashkë me një konektivitet të lartë ndihmuar dyfish nga Bluetooth dhe rrezet infra të kuqe. Një nga funksionet më të dashura është gjithashtu kamera Vga dhe radio FM sterio.



Karakteristikat teknike:


- Përmasa: 115 x 32 x 19 mm;
- Volumi: 64 cc;
- Pesha: 84 g;
- Tri-band Gsm 900/1800/1900 MHz;
- Ndezje e menjëhershme me hapje të kapakut;
- Antene e brendshme;
- Ekran me pasqyrë me 65.536 ngjyra (104 x 208 pixel);
- Sms, mms e amr;
- Fotocamer Vga e integruar;
- Konektivitet Hscsd, eGprs, Gprs;
- Bluetooth;
- Infrakuq;
- Broser xHtml;
- SyncMl për sinkronizimin e të dhënave;
- Nokia Collector më lidhjen me terminalet Apple;
- Mundësi për të shkarkuar muzikë, lojëra etj.;
- Video;
- Aktivizim i komandave zanore;
- Altoparlant vivavoce;
- Lidhje me Wireless Image Headset;
- Radio Fm e integruar;
- Autonomia e baterisë (bateria Li-ion 700 mAh): deri në tre orë duke foluar, deri në 240 në pauzë.