Shqipetaret ne MZ kerkojne autonomi

[iliria e para]

LIDERËT POLITIKË TË SHQIPTARËVE NË MAL TË ZI, FERHAT DINOSHA DHE MEHMET BARDHI U TAKUAN ME ZYRTARË TË LARTË TË KOSOVËS

Shqiptarët në Mal të Zi, status autonomie


Prishtinë (KosovaLive) - "Shqiptarët në Mal të Zi duhet të kenë statusin e një autonomie, ndërsa Kosova brenda mundësive që ka, duhet të ndihmojë përmirësimin e statusit politik të shqiptarëve", ka thënë Mehmet Bardhi, kryetar i LD në MZ, gjatë takimit që zhvilloi me kryetarin e Kuvendit të Kosovës, Nexhat Daci.
Dy palët u dakorduan që ndërmjet Malit të Zi dhe Kosovës të shpeshtohen kontaktet, sepse, siç u tha, ekzistojnë shumë mundësi bashkëpunimi me interes të dyanshëm.
"Kosovën e shohim si një prej subjekteve që duhet të ndihmojë në përmirësimin e statusit të shqiptarëve në Mal të Zi", ka vlerësuar Bardhi.
Ndërkaq, në takimin me kryeministrin e Kosovës, Ramush Haradinaj, dy liderët politikë të shqiptarëve në Mal të Zi konsideruan se pavarësia e Kosovës do të jetë ndihmesë e madhe edhe për realizimin e aspiratave të shqiptarëve në Mal të Zi.
Nga ana e tij, Haradinaj tha se Qeveria e Kosovës do tzi trajtojë të gjitha kërkesat që vijnë nga shqiptarët në Malit të Zi dhe gjithashtu premtoi bashkëpunim edhe më të
ngushtë, në të gjitha fushat.
Kryetari i UDSH-së, Ferhat Dinosha duke përgëzuar kryeministrin Haradinaj për detyrën e re, tha se nga puna e tij do të varet shumë situata në Kosovë, e cila sipas tij, reflektohet në gjithë rajonin.
Dinosha dhe Bardhi u takuan gjatë vizitës së tyre në Kosovë edhe me kryetarin e Kosovës, Dr. Ibrahim Rugova.
Kryetari Rugova u ka thënë atyre se populli i Kosovës do të mbështesë shqiptarët në Mal të Zi në zgjidhjen e çështjes politike dhe kulturore.
Me këtë rast Rugova i dekoroi liderët shqiptarë me Medaljen e Artë të Lidhjes së Prizrenit.