Kongresi amerikan: Ok Shqipërisë për në NATO

[Albo]

422 vota në Kongresin Amerikan

Shqipëria në NATO para vitit 2007

422 anëtarë të Kongresit Amerikan i kanë kërkuar dje Presidentit Bush që të kontribuojë që Shqipëria, Maqedonia dhe Kroacia të jenë pjestare të NATO-s përpara vitit 2007.

Sipas njoftimeve pranë shefit të ekzekutivit, gjatë votimit në sallë ka qenë i pranishëm edhe Nano i cili ka ndjekur debatin në Kongres lidhur me këtë çështje, e cila është diskutuar vetëm një ditë pasi 7 nga 10 vendet e Grupit të Vilnusit iu bashkua NATO-s si anëtarë me të drejta të plota. Nano ishte i ftuar në këtë seancë nga Kryetari i maxhorancës në Dhomën e Përfaqësuesve, Tom Delay.

Ndërkohë, kryeministri Nano është takuar gjithashtu dje në Departamentin e Shtetit në Uashington me Sekretarin Amerikan të Mbrojtjes, Donald Rumsfeld. Ai ka shprehur angazhimin e plotë të Shqipërisë në luftën globale kundër terrorizmit, si nëpërmjet pjesëmarrjes në Afganistan dhe Irak, ashtu dhe forcimit të kontrollit të brendëshëm.

Nano ka marrë pjesë dje edhe në takimin e organizuar nga Qëndra për Politika Perëndimore me temë “Shqipëria, Ballkani dhe proçeset e integrimit euro-atlantik”. Në fjalimin e mbajtur me këtë rast, Kryeministri Fatos Nano është shprehur se Shqipëria e ka lënë pas të kaluarën misterioze dhe të heshtur, kufijtë e mbyllur dhe të paprekshëm, izolimin dhe armiqësinë, skllavërimin e gjysëmshekullit totalitarist. Tashmë është ngritur një demokraci e re në Europën Juglindore e cila është jashtëzakonisht krenare që renditet mes demokracive të reja në botë. “Dje në Shtëpinë e Bardhë, ndërsa ne festuam anëtarësimin e europianëve më të rinj në NATO, unë u ndjeva shumë krenar për rrugën që ka përshkuar Shqipëria dhe përparimin që ajo ka bërë”, tha Kryeministri Nano.

[ilirkapedani]

nje pyetje kisha po pati mundesi. kush eshte burimi i ketij lajmi te lutem? jam thjesht kurioz ta lexoj ne ndo nje gazete te huaj ose shqiptare.

[dodoni]

Pothuajse të gjitha agjensitë shqiptare të lajmeve e kanë trasmetuar këtë lajm. Poashtu edhe Zëri i Amerikës në shqip.

Urime gjithë shqiptarëve sepse është një ditë e madhe dhe shumëpritur por që ishte e ditur nga të gjithë se do të vij.
Tung

[dodoni]

Mendoj se Majko me deklaratën e tij se Berisha dhe PD janë nismëtar të anëtarësimit të Shqipërisë në Nato ka bërë një hap që është shumë për t'u vlerësuar. Kështu duhet të jenë politikanët shqiptar, mirënjohës ndaj punës edhe të opozitarëve. Duhet të kenë më shumë respekt ndaj njëri tjetrit dhe jo të shkojnë me sulme të parreshtura banale ndaj njëri tjetrit sepse kjo në rradhë të parë kontribuon në stabilitetin e vendit, uljen dhe zhdukjen e tensioneve politike, inkurajim dhe motivim pune për gjithë politikanët.

[Llapi]

Prill 5, 2004


KE: 51 MILIONE EURO PER KOSOVEN

NATO lë Serbinë jashtë Partneritetit për Paqe

BRUKSEL

NATO lë Serbinë jashtë programit "Partneriteti për Paqen". Shkak për këtë është bërë mungesa e theksuar e bashkëpu-nimit të Beogradit me Gjykatën e Hagës. Sipas agjencisë së lajmeve ANSA, gjithçka do të zyrtarizohet në samitin e Stambollit që do të zhvillohet në muajin qershor. Pikërisht në këtë samit, shteti serbo-malazez nuk do të pranohet në programin rajonal të sigurisë së NATO-s, pas mosdorëzimit të të akuzuarve për krime lufte si dhe mbështetjes që Beogradi vendosi t'i japë Millosheviçit dhe të akuzuarve të tjerë. "Bashkëpunimi me Hagën është i një rëndësie të madhe për anëtarësimin në Partneritetin për Paqe", tha sekretari i përgjithshëm iNATO-s, Shefer, në Bruksel. "Gjërat në Serbi nuk po ecin në këtë drejtim, por në të kundërtin. Për këtë arsye, s'mund t'ju them datën e saktë të pranimit të Serbisë në programin e aleancës", shtoi ai përpara medias. Vendimi i fundit i NATO-s vjen menjeherë pas ngrirjes së një ndihmë të posaçme të SHBA-së për Serbinë, pasi parlamenti serb miratoi ligjin për të ndihmuar financiarisht të akuzuarit e Hagës. Ndërkohë që Serbisë vazhdojnë t'i reduktohen ndihmat e komunitetit ndërkombëtar, strukturat europiane kanë konfirmuar një ndihmë më të madhe financiare për Kosovën. Komisioni Evropian miratoi dje Programin vjetor për Kosovën, në kuadër të të cilit, krahinës do t'i jepen 51,5 milionë euro për të mbështetur reformat dhe përpjekjet për modernizim të saj. Programi për vitin 2004 përqendrohet kryesisht në ndërtimin e institucioneve, zhvillimin e ekonomisë dhe përmirësimin e kapacitetit qeverisës të Kosovës, në mënyrë që administrata e Kombeve të Bashkuara të përgatitet drejt kalimit në sistemin e një ekonomie tregu dhe kështu për t'i dhënë një impuls integrimit të Kosovës në kuadër të rajonit të Ballkanit dhe në strukturat e Bashkimit evropian.

gazeta shqiptare

[Llapi]

200 trupa komando në Irak pas kërkesës së aleatëve

Lajmi i ores 8:15 AM


TIRANE (6 Prill) - Shqipëria do të rrisë prezencën e trupave të saj në Irak. Burime ushtarake të misionit shqiptar pranë NATO-s konfirmojnë se po ndiqet një politikë e zgjerimit të prezencës së ushtarëve shqiptarë atje. Bëhet fjalë për rreth 200 trupa komando nga Shqipëria që priten të vendosen në Irak. Sipas zyrtarëve të lartë shqiptarë, asgjë nuk ka marrë formë definitive. Por rritja e prezencës me ushtarë shqiptarë në Irak mund të jetë një realitet i një të ardhmeje të afërt. Aktualisht, në misionin paqeruajtës në Irak operojnë 73 trupa komando shqiptare, ndërsa pritet që numri i tyre të shkojë deri në 200, një shifër kjo ende e pakonfirmuar nga Ministria e Mbrojtjes e Republikës së Shqipërisë. Shefi i Shtabit të Përgjithshëm gjeneral Pëllumb Qazimi thotë për Gazetën Shqiptare se "janë duke u parë mundësitë për rritjen e prezencës së trupave shqiptare në misionin e Irakut". Gjenerali nuk jep asnjë numër, ndërsa konfirmon se në fillim të javës që vjen do të bëhet edhe ndërrimi i trupave, duke ardhur në Shqipëri 73 trupat komando që janë atje dhe duke u zëvendësuar me të tjerë. "Rritja e prezencës është një kërkesë e bërë për të gjitha vendet e koalicionit kundër terrorizmit nga vendet që marrin pjesë në këtë koalicion. Kjo do të bëhet në bazë të mundësive që ka secili vend", thotë Gjeneral Qazimi, ndërsa konfirmon faktin se është kërkuar rritja e prezencës së trupave në Irak nga të gjithë vendet. Në bazë të një vendimi të qeverisë shqiptare, të gjithë ushtarët që operojnë në Irak paguhen me 100 dollarë në ditë nga qeveria shqiptare. Nëse numri i tyre do të shkojë në 200 atëherë do të rriten edhe shpenzimet. Por për zyrtarë të administratës së lartë shqiptare një shifër e tillë, sado që të jetë, ndoshta nuk do të jetë problem. Mbështetja e fituar në të tilla raste do të jetë një ogur i mirë për Shqipërinë. ro/ro (GazetaShqiptare/BalkanWeb)