KE: Po vazhduat kështu, do tu ndërpresim ndihmat

[Albo]

Ambasadori Salzman paraqiti raportin e KE për procesin e integrimit në kryesinë e Kuvendit

BE thirrje për dorëheqje të Nanos

Ambasadori i Komisionit Evropian, Lutz Salzman prezantoi raportin vjetor mbi marrëveshjen e Stabilizim-Asociimit në kryesinë e Kuvendit. Në prani të një grupi deputetësh, përfaqësues të komisioneve që merren direkt me çështjen e integrimit, ai bëri të njohura konkluzionet e një viti për reformat në kuadër të kësaj marrëveshjeje. Ai tha përpara deputetëve se vendi ynë ka bërë një progres të kufizuar drejt këtij procesi. "Në 31 janar 2003, Presidenti i Komisionit Evropian, Romano Prodi, hapi zyrtarisht negociatat për Marrëveshjen e Stabilizimit dhe Asociimit (MSA). Deri më sot, janë zhvilluar nëntë raunde negociatash. Gjatë këtyre raundeve, është bërë i mundur diskutimi i pjesës më të madhe të çështjeve që përmban MSA-ja. Megjithatë, reformat e ndërmarra nga Shqipëria janë të pamjaftueshme për të garantuar zbatimin e drejtë të MSA-së. Shqipëria duhet të shpejtojë ritmin e reformave që, në përfundim të procesit të negociatave, të japë garanci se është në gjendje të zbatojë si duhet Marrëveshjen," thuhej në raportin e KE. Salzman tha se duhet më shumë punë në drejtim të zbatimit të reformave, e sidomos për të luftuar korrupsionin, krimin e organizuar, trafiqet dhe pastrimin e parave. "Sistemi gjyqësor dhe administrata publike, duhet të jenë më efikase dhe më të pavarura përballë ndërhyrjes politike, duke i hapur rrugën funksionimit të institucioneve demokratike në vend," theksoi Salzman.

Gjatë paraqitjes së këtij raporti ata kanë vlerësuar se përmirësimi i procesit zgjedhor sipas standardeve ndërkombëtare mbetet një nga pikat e dobëta të evidentuara në këtë raport. "Shqipëria mbetet një demokraci e re dhe relativisht e paqëndrueshme. Interesat afatmesme të vendit shpesh sakrifikohen përballë interesave afatshkurtra dhe të ngushta politike. Konsolidimi i kulturës demokratike është thelbësor për kryerjen e reformave të domosdoshme. Shqipëria adoptoi një kod të ri zgjedhor bazuar në rekomandimet e bëra nga bashkësia ndërkombëtare. Megjithatë, zgjedhjet vendore të zhvilluara në tetor 2003 nuk i arritën standardet ndërkombëtare. Nevojitet më shumë vullnet politik për të siguruar zgjedhje të lira dhe të ndershme. Shteti ligjor në Shqipëri vazhdon të ketë mangësi. Organet e zbatimit të ligjit nuk garantojnë ende një zbatim të plotë të ligjit sipas standardeve ndërkombëtare. Korrupsioni i shumëpërhapur dhe krimi i organizuar vazhdojnë të përbëjnë një kërcënim serioz për stabilitetin dhe përparimin e vendit. Përpjekje të mëtejshme janë të domosdoshme për të siguruar respektimin e plotë të të drejtave të njeriut," theksohej në raport.

Raportin e plote mund ta lexoni ne kete adrese.

Tema

[Albo]

Në BE, me punë, jo me premtime

Chris Patten

Pas pak javësh, 10 vende do të bëhen anëtare të reja të Bashkimit Evropian. Ato e kanë fituar anëtarësimin e tyre me punë dhe angazhim të madh. Anëtarësimi në BE do të thotë përparim më i madh, liri më e madhe dhe një vend në njërin prej klubeve më të rëndësishme të botës, por në të njëjtën kohë, do të thotë të jetosh sipas disa standardeve mjaft kërkuese ekonomike dhe politike.Për këto 10 anëtare të reja, kjo ka qenë një rrugë e gjatë, por njëkohësisht edhe një udhëtim i vlefshëm. Eshtë kjo e njëjta rrugë në të cilën po ecin aktualisht edhe vendet e Evropës Juglindore. BE-ja ka premtuar që secili nga vendet e këtij rajoni mund të aspirojë për anëtarësim - për sa kohë që ato do të bëjnë ndryshimet e duhura për të përafruar ekonomitë e tyre nga njëra anë, por edhe respektimin e demokracisë, të drejtave të njeriut dhe shtetit ligjor, nga ana tjetër, me standardet tona...

...Komisioni Evropian synon t’i ndihmojë ato në çdo hap përgjatë kësaj rruge. Kjo është arsyeja përse ne përgatisim raportet vjetore për të theksuar ku është bërë progres, dhe ku, për të qenë të sinqertë, nuk ka pasur të tillë. Po për këtë arsye, këtë vit, ne kemi krijuar një Partneritet të ri Evropian me secilin nga vendet e rajonit, të modeluar sipas partneriteteve me të cilat ndihmuam në të kaluarën 10 vendet e reja anëtare. Këto Partneritete përcaktojnë prioritetet më të ngutshme për veprim në secilin prej vendeve, dhe ato do të ndihmojnë BE-në të orientojë ndihmën e vet financiare atje ku është më e nevojshme për t’i afruar këto vende më pranë BE-së.

Dje, ne publikuam raportin tonë, si edhe Partneritetin tonë për Shqipërinë. Më vjen keq të them se, raporti i këtij viti është shumë i ngjashëm me atë të vitit të kaluar, dhe atij të vitit para të shkuarit. Shqipëria thotë që Evropa është prioriteti kryesor për të, por veprat nuk u përgjigjen fjalëve. Reformat reale për të nxitur një përparim thelbësor janë thuajse të pamjaftueshme.

Shqipëria nuk do të ecë përpara në rrugën drejt Evropës, nëse nuk lufton krimin e organizuar dhe korrupsionin me vendosmëri të vërtetë politike. Ata që përfitojnë nga veprimtaritë e paligjshme e çojnë vendin mbrapa dhe heqin shanset e Shqipërisë për të zhvilluar një sektor të shëndetshëm biznesi. Eshtë e domosdoshme për Shqipërinë të përfitojë nga ky rast, që të ndreqë këto probleme në 2004-ën. BE-ja kërkon që, në 12 muajt e ardhshëm, të shohë një shprehje të vërtetë të vullnetit politik dhe forcim real të sistemit gjyqësor e ligjor.

Një tjetër prioritet shtysë për Shqipërinë është reforma në administratën publike të vendit. Nuk mjafton vetëm të bëhen marrëveshje me BE-në: makineria e qeverisë duhet të jetë në gjendje t’i kthejë premtimet në realitet.

Duken fjalë të rrepta? Por, ja që ndonjëherë miqtë duhet edhe të kritikojnë me sinqeritet. Ne duam ta shohim Shqipërinë të ketë sukses dhe është bërë jetike për Shqipërinë t’i përballojë që tani këto probleme të mbartura.

Ja, sipas mendimit tonë, një kalendar veprimi për Shqipërinë për vitin 2004: Të miratoni legjislacionin e nevojshëm për të lufuar korrupsionin dhe ta vini atë në jetë. Të forconi profesionalizmin dhe autoritetin e gjyqtarëve tuaj nëpërmjet emërimit të tyre me procedura të rrepta. Të forconi policinë dhe të siguroni që policët e përfshirë në veprimtari kriminale të ndiqen penalisht. Të zbatoni Ligjin për Shërbimin Civil dhe të garantoni bashkërendimin e duhur ndërmjet ministrive. Të përgatisni zgjedhjet e ardhshme në kohën e duhur, duke marrë në konsideratë të metat e identifikuara në zgjedhjet lokale të 2003-shit. Të përmirësoni mjedisin tuaj për biznes, duke hequr barrierat burokratike dhe duke vendosur rregulla e procedura të qarta e të thjeshta. Të përmirësoni menaxhimin e kufinjve dhe të luftoni krimin e organizuar si edhe të gjitha llojet e trafikimeve me vendosmëri të plotë. Të nxisni lirinë e medias dhe respektimin e të drejtave të njeriut në përputhje me konventat ndërkombëtare që keni ratifikuar.

Unë besoj fuqimisht se harta e BE-së nuk do të jetë e plotë derisa të mos jenë përshirë në të, të gjithë vendet e Ballkanit Perëndimor. Komisioni Evropian po bën gjithçka ka në dorë që të mundësojë një gjë të tillë. Por sidoqoftë, nuk mund t’ju japim ne vullnetin politik. Vendosmëria për të bërë këto reforma sfiduese duhet të burojë nga vetë qeveritë – dhe duhet të kërkohet nga të gjithë ata që shpresojnë që një ditë, të jenë qytetarë të Evropës.

[angeldust]

Unë besoj fuqimisht se harta e BE-së nuk do të jetë e plotë derisa të mos jenë përshirë në të, të gjithë vendet e Ballkanit Perëndimor. Komisioni Evropian po bën gjithçka ka në dorë që të mundësojë një gjë të tillë. Por sidoqoftë, nuk mund t’ju japim ne vullnetin politik. Vendosmëria për të bërë këto reforma sfiduese duhet të burojë nga vetë qeveritë – dhe duhet të kërkohet nga të gjithë ata që shpresojnë që një ditë, të jenë qytetarë të Evropës.

Ahhh... dhe une qe po kerkoja t'i permendej emri Nanos! Po nejse, e shenon pak dmth.

Deri tani po perpiqeshin t'i servirnin popullit karten e BE-se apo NATO-s si garanci qe qeverisja e tyre po ecte sic duhej, edhe pse brenda vendit ka polarizim te tmerrshem te gjendjes ekonomike te shqiptareve, korrupsion, monopole nga Albtelekomi, mosrespektim te ligjit edhe ne strukturat me te larta te shtetit etj.

BE-ja po iken, NATO-ja shyqyr qe i ndihmuan Amerikes ne luften kunder terrorizmit se ndryshe...

Kjo qe ndodh me ne eshte nje fatkeqesi. Ne rradhe te pare nuk mund te shkohet asgjekund pa nje proces zgjedhor te rregullt ne perputhje me standartet evropiane. Fatkeqesisht historia e kaluar me ben te dyshoj se cilado force politike, si socialistet ashtu edhe demokratet, jane ne gjendje te garantojne nje gje te tille.

Sidoqofte, Nanoja eshte dhe ngelet dhelpra me dinake ne politiken shqiptare, dhe si i tille eshte rrjedhshmerisht me i rrezikshmi per popullin pasi mendon vetem per perfitime personale. Prandaj Nanoja eshte i pari politikan i korruptuar shqiptar qe duhet me patjeter te ike.

[dodoni]

Prodi-Shqipëria të ndihmojë vetveten


Zoti Prodi tha se Shqipëria ka nevojë për stabilitet
Komisioni Evropian i ka bërë një thirrje të fuqishme Shqipërisë që të shpejtojë me zbatimin e reformave drejt integrimit në Bashkimin Evropian.
Në një intervistë ekskluzive për BBC-në pas botimit të raportit në të cilin Shqipëria vlerësohet se po bën progres, por jo të mjaftueshëm, presidenti i Komisionit Evropian, Romano Prodi tha se rruga e Shqipërisë drejt integrimit në BE është e gjatë.

Me zotin Prodi bisedoi Faik Luta dhe fillimisht e pyeti se çfarë dmth kjo, se Shqipëria ka shënuar progres, por jo të mjaftueshëm

Prodi: Progres, por jo mjaft. Është shumë thjeshtë. Le të themi, kemi filluar të punojmë për marrëveshjen për stabilizim dhe asociim. Këto janë rregulla të përpikta dhe është bërë progres sidomos në legjislacion, por jo sa duhet, sepse zbatimi i këtyre rregullave është shumë i ngadalshëm. Tensioni dhe mungesa e stabilitetit të sistemit vazhdojnë të jenë brengosëse. Prandaj ne i bëjmë thirrje, vërtetë i bëjmë thirrje Shqipërisë që të vrapojë më shpejt.

BBC: A do të thotë kjo se rruga e Shqipërisë drejt BE-së do të jetë e gjatë?

Prodi: Po, është e gjatë, por është shumë me rëndësi që filloi. Unë desha që ajo të fillojë. Në samitin e Selanikut, ishte befasi e madhe që arritëm marrëveshjen që nesër, natyrisht jo sot, të kemi mundësinë që të kemi të gjitha shtetet ballkanike brenda BE-së, sepse kjo është zgjidhja e vërtetë politike. Nuk mund të keshë stabilitet afatgjatë nëse nuk ke këtë raport me BE-në, për arsye ekonomike dhe politike. Këtë ia thashë Shqipërisë, por është edhe rrugë e gjatë, sepse vendi duhet të bëjë reforma dhe t'i zbatojë ato. Ne e bëmë planin e marrëveshjes së stabilizim-asociimit, por zbatimi i këtij plani nuk është siç kam shpresuar. Por kjo nuk do të thotë se drejtimi është i gabuar. Drejtimi është i mirë, por shpejtësia nuk është e mirë.: Tensioni dhe mungesa e stabilitetit vazhdojnë të jenë brengosëse


Romano Prodi

BBC: Gjatë vizitës tuaj të fundit në Tiranë ju keni dhënë këtë këshillë - Stabilitet, stabilitet, stabilitet. A mendoni se Shqipëria ka patur stabilitetin e duhur gjatë kësaj periudhe?

Prodi: Po ta vizitoj Shqipërinë tani siç shpresoj të bëj, sepse gjithmonë më pëlqen të shkoj në Shqipëri, edhe vetë ndihem si në shtëpi, unë do të përsëris stabilitet, stabilitet dhe stabilitet, sepse vërtetë nuk ka stabilitet brenda dy partive të mëdha dhe prandaj nuk ka stabilitet në vend. Çdo ditë tensione, probleme, konfrontime, përleshje dhe kjo nuk është ajo që duhet për vendin. Vendi ka nevojë për reforma dhe zgjidhje demokratike të problemeve. Në jetën politike duhet patur më shumë marrëveshje dhe më pak korrupsion. Që më pak të përdoren instrumentet publike për qëllime private apo qëllime partiake. Për këtë arsye duhet stabilitet, stabilitet, stabilitet

BBC: Zoti Prodi. A jeni i kënaqur me atë që po bëjnë udhëheqësit politikë shqiptarë në kuadër të integrimit të mëtejmë të Shqipërisë në Bashkimin Evropian?

Prodi: Unë tashmë e shpjegova vetë duke thënë se dua që ata të luftojnë më shumë korrupsionin dhe të luftojnë më shumë për ndërtimin e institucioneve. Institucionet duhet të jenë të fuqishme. Parlamenti, institucionet gjyqësore, të respektohen nga të gjitha palët, në të gjitha anët e vendit dhe Shqipëria ka bërë progres. E dini, në Shqipëri ka jetë. Kur shikoj vendet e tjera dhe i krahasoj me Shqipërinë, Shqipëria është vend i gjallë. Nuk është vend i vdekur. Dhe kjo është shumë me rëndësi. Por pengesa është se kjo jetë nganjëherë nuk drejtohet në drejtimin e duhur dhe kjo e bën jetën demokratike aq të trazuar siç është në Shqipëri.

BBC: A po bën BE-ja mjaft për të ndihmuar Shqipërinë drejt integrimit?

Prodi: Më duhet të bëj përpjekje të jem i sinqertë kur flas edhe për veten time. Qëkur kemi filluar t'i afrohemi Shqipërisë, Bashkimi Evropian ka dhënë rreth 1 miliardë euro. Kjo është shumë e jashtëzakonshme dhe kemi filluar një dialog shumë produktiv politik. Edhe në samitin e Selanikut, unë dhe ne, u angazhuam për Shqipërinë. Natyrisht. Kurrë nuk është mjaft, sepse edhe për nga sasia, dimensioni, është e qartë se vendi mund të absorbojë më shumë, por kjo ishte puna maksimale që mund të bënim brenda kësaj periudhe dhe është në linjë me ndihmën për qeveritë e shteteve të tjera në atë zonë. Por ajo që do të doja të theksoj është se - thashë më parë se Shqipëria është shoqëri vitale - dua të përsëris këtë, sepse kur shkoni në vende të tjera, problemi është se keni shoqëri që nuk kanë mobilitet, nuk kanë fermentim njerëzish. Shqipëria i ka këto dhe problemi është të vihen në drejtimin e duhur. Ne po bëjmë përpjekje të ndihmojmë për këtë. Natyrisht nuk mund të ndërhyjmë në jetën e përditshme politike të Shqipërisë. Shqipëria është shtet sovran. Ne duam të ndihmojmë Shqipërinë të jetë sovrane, autonome, e fuqishme brenda strategjisë evropiane, por jo të zëvendësojmë veten me institucione. Këtë nuk mund ta bëjmë.

BBC: Kur flitet për integrimin e BE me shqiptarët, gjëja e parë që ngrihet, sidomos tek të rinjtë shqiptarë, është liria e lëvizjes e cila sipas tyre do të zgjidhte shumë probleme përsa i përket situatës së tyre aktuale. Pse BE nuk u ofron shqiptarëve viza më të relaksuara? A mendoni ju se me një regjim më të relaksuar të vizave, tragjedi si ajo e Karaburunit nuk do të ndodhnin? Problemi i vizave duhet zgjidhur së bashku


Romano Prodi

Prodi: Problemi i vizave është shumë delikat, sepse është simbol. Nuk është e vërtetë, por merret si simbol i paritetit të një vendi. E kuptoj këtë, por dua të them se unë kam qenë mbështetës për të ndihmuar Shqipërinë që të ketë një ndryshim të shpejtë të regjimit të vizave, por më duhet t'ju them se në këtë situatë është shumë vështirë dhe ju më pyetët përse. Sepse na duhet një premtim që flet për luftën e fuqishme kundër krimit të organizuar. Na duhet një premtim nga një sistem gjyqësor që funksionon sipas rregullave të përpikta e të rrepta. Ne na duhet një premtim se po bëhet luftë kundër korrupsionit. Unë gjithmonë përpiqem të dëgjoj ndonjë lajm të mirë nga Shqipëria. Dëgjon një lajm të mirë e pastaj një episod në të cilin sheh se kriminaliteti nuk pengohet. Na ndihmo Shqipëri. Shqiptarë, na ndihmoni sepse unë jam gati, derisa të jem në Komisionin Evropian që të pranoj çdo sinjal të mirë për të çuar procesin e vizave përpara. Por çdo herë që kam filluar këtë, më është dashur të tërhiqem për shkak të problemeve reale objektive të policisë dhe kontrollit të kriminalitetit dhe sjelljeve. Pra, problemi i vizave duhet zgjidhur së bashku. Unë kurrë nuk mendoj se viza është instrument i përshtatshëm në raportet midis shteteve. Më i rëndësishëm është bashkëpunimi i policisë. Por deri në momentin kur nuk kemi këtë bashkëpunim, viza mendohet se është instrumenti i vetëm në duart tona. Pra, le të punojmë së bashku. Unë do të isha njeriu më i lumtur që të pezulloja regjimin e vizave.

BBC: Cili është mesazhi juaj për shqiptarët, për udhëheqësit shqiptarë dhe qytetarët shqiptarë në këtë moment?

Prodi: Keni një rast të madh, sepse për herë të parë në historinë tuaj të re keni mundësinë të hyni hap pas hapi njëherë në një zonë e pastaj në një Bashkim në të cilin siç e shihni ekziston një paritet i vërtetë. Ne jemi zgjeruar tani dhe kemi nga një komisioner për çdo shtet anëtar. Një komisioner për Gjermaninë me më shumë se 80 milionë njerëz dhe një komisioner për Maltën me më pak se 400 mijë banorë në mënyrë që të ruajmë paritetin dhe dinjitetin e vendit. E keni këtë rast dhe ju lutem kuptoni. Duke hedhur shikimin nga historia e juaj dhe nga e ardhmja drejt këtij rasti, ju lutem, mos hezitoni që në jetën tuaj politike të keni më shumë transparencë. Të na besoni se jemi seriozë. Ndihmoni veten dhe përgjigja ime është se ndihma jonë do të rritet.

BBC: Ju faleminderit për kohën!

Prodi: Ishte kënaqësi e imja. Unë e konsideroj veten se... jam qytetar nderi i Vlorës dhe në një mënyrë, unë jam qytetar shqiptar.




Mendoj se kjo intervistë e Prodit është shumë e drejtë dhe më se me vend. Partitë politike shqiptare duhet të punojnë, punojnë sa më shumë që të jetë e mundur dhe pastaj ata që punojnë më mirë edhe e marrin pushtetin e jo të luftojnë për pushtet pa punuar hiç fare sepse vetëm po krijojnë tensione dhe jostabilitet në vend, po dëmtojnë veten dhe gjithë shoqërinë shqiptare. Poashtu edhe shtypi shqiptar, duhet t'i kontribuoj më mirë interesave të vendit e jo të bëhet dorë e zgjatur e luftës së pakuptimtë të partive për pushtet, duhet të krijoj raporte më të mira ndërpartiake dhe inkurajoj punën e jo luftën e pakuptimtë të partive për pushtet pa punë. Qytetarët e thjeshtë duhet të ndihmojnë politikën në ecjen përpara sepse edhe partitë pa vullnetin e popullit nuk e çojnë dot vendin para, është populli ai që në rradhë të parë duhet t'i luftoj të këqiat e shoqërisë sonë.


Tung

[Albo]

KE: Nëse s’ecni, do presim fondet

Kërkohen rezultate kundër korrupsionit dhe krimit

Nga Brukseli, Ernest Bunguri

Publikimi i raportit të tretë vjetor për Shqipërinë është shoqëruar kësaj radhe me propozimin e Komisionit Evropian për fillimin e “Partneritetit Evropian” me vendin e shqiponjave, por edhe me secilin prej vendeve fqinje në Ballkan.

I frymëzuar nga procesi i “Partneriteteve për Bashkim”, roli i të cilit ishte ndihmesa në të kaluarën e vendeve kandidate për të pregatitur anëtarësimin e tyre në BE, “Partneriteti Evropian” me vendet e Ballkanit synon përqendrimin e përpjekjeve dhe burimeve financiare të qeverive ballkanike në zbatimin e shpejtë dhe konkret të reformave më thelbësore në vend. Të hartuara sipas veçorive dhe nevojave të secilit shtet, zbatimi i prioriteteve të përcaktuara në këtë proces ndahet në dy kohë: 12 deri në 24 muaj për reformat që duhet të kryhen në një periudhë afatshkurtër, dhe nga 3 deri në 4 vjet për prioritetet, zbatimi i të cilave kërkon një periudhë më të gjatë. Për Shqipërinë dhe vendet e tjera të Ballkanit, dokumenti i “Partneritetit Evropian” bazohet në raportin vjetor të sapopublikuar nga Komisioni, dhe identifikon prioritete, të cilat me aksion të vërtetë, Shqipëria mund t´i plotësojë realisht brenda afateve të mësipërme, ose të përparojë në mënyrë thelbësore në këto fusha gjatë viteve që vijnë, me qëllim afrimin e mëtejshëm të saj me BE-në. Demokracia dhe shteti ligjor, të drejtat e njeriut dhe mbrojtja e minoriteteve, bashkëpunimi rajonal, tregtia e lirë dhe reformat strukturale, bashkëpunimi në fushën e drejtësisë dhe atë të punëve të brendshme, janë disa prej prioriteteve ku pritet të fokusohet qeveria shqiptare për plotësimin e tyre në terma afatshkurtra. Më konkretisht: rezultate në luftën kundër korrupsionit, krimit të organizuar, reformën e administratës publike etj., të gjitha pikat kyçe ku puna e qeverisë ka ngecur dhe që raportet e njëpasnjëshme të Komisionit Evropian kanë evidentuar për çdo herë. Për hyrjen në veprim të “Partneritetit Evropian”, autoritetet shqiptare duhet në fillim të adoptojnë një plan pune të detajuar, i cili përveç axhendës, duhet të përfshijë edhe masat konkrete për zbatimin e prioriteteve, si dhe të tregojnë se sa burime njerëzore dhe financiare kërkon zbatimi në kohë i secilit prioritet. Por vendimi i fundit shoqërohet edhe me kërcënime të hapura. “Nëse Shqipëria dhe fqinjët e saj nuk shënojnë progres, veçanërisht në zbatimin e prioriteteve specifike të përcaktuara në kuadër të këtij procesi, Këshilli i Ministrave mund të ndërpresë ndihmën financiare”, shkruhet ndër të tjera në dokumentin e Komisionit.

[Albo]

ZYRTARET E KORRUPTUAR "NON GRATA" NE PERENDIM

Edlira Prenga

Ne raportin e fundit te Bashkimit Europian per Shqiperine kritikohet ashper lidhja e politikes me grupet mafioze, trafiku i influencave dhe lloje te tjera te abuzimeve te politikes me postet shteterore. Edhe nje jave me pare ishte organizata nderkombetare "Transparency International", qe e renditi Shqiperine ne listen e dhjete vendeve me te korruptuara ku politika dhe krimi kane interesa e monopole te perbashketa. Kritika te ashpra kane ardhur edhe nga diplomate te tjere nderkombetare, si edhe nga deklarimet e fundit amerikane te Keshillit Kombetar Shqiptaro-amerikan. Brenda vendit akuzat me te ashpra per lidhje te krimit me politiken erdhen fillimisht nga media dhe me pas nga shoqatat joqeveritare, si shoqata "Mjaft" dhe sidomos Zyra per Mbrojtjen e Qytetareve.

Te gjitha keto deklarime dhe alarme er lidhjet e forta te krimit me politiken jane shtuar sidomos pas zgjedhjeve te fundit lokale ku disa kandidate konkuruan ne emer te partive te medha politike pa qene anetare te saj, por duke patur lidhje te forta politike dhe akuza per abuzime me ligjin. Ishte vete ambasadori amerikan ne Tirane, Xhejms Xhefri, i cili vetem pak kohe me pare shpalli nisjen e luftes se ashper ndaj mafias dhe baroneve te droges. Atehere ai tha se "i njohim kush jane keta barone" dhe premtoi ndjekjen e tyre deri ne eliminimin e plote. Pak dite me pare, perseri ambasadori e konfirmoi vazhdimin e kesaj lufte duke permendur edhe dy rastet me te bujshme te krimit te organizuar. Por deklarata me e ashper per lidhjen e krimit me politiken dhe zgjerimin e grupeve kriminale ishte ajo e komisionierit europian, Cris Patten, dhene ne te njejten dite me daljen e raportit te BE-se per Shqiperine.

Kjo situate ka vene ne pikepyetje autoritetin dhe marredheniet midis zyrtareve te ndryshem, institucioneve dhe ambasadave perendimore ne Tirane. Prej kohesh perflitet per mundesine e refuzimit te vizave te sherbimit per zyrtaret e akuzuar per korrupsion dhe lidhje me krimin, sic eshte vepruar me pare edhe ne Kosove, ne Bosnje, ne ish-Jugosllavi dhe ne Maqedoni. Shembulli me i fresket i refuzimit te vizave te udhetimit per zyrtaret ishin festat e muajit mars. Tre delegacione te medha te tre ministrive nuk u lejuan te shkojne per pushime me rastin e festave te marsit, pasi ata nuk ishin ne gjendje per te treguar burimet financiare te te ardhurave e shpenzimeve te tyre te planifikuara. Deklarimet e tyre per te ardhurat nuk ishin te njejta me ato te deklaruara ne Inspektoratin e Larte te Deklarimit te Pasurise dhe ne institucionet e tjera kontrolluese te shtetit. Si te tille, ata u konsideruan te padeshiruar dhe u ndaluan te marrin vize shengen per te udhetuar per pushime kolektive ne vendet e Bashkimit Europian. Lajmi kaloi ne heshtje, por, sic duket, refuzime te tilla do te kete edhe ne te ardhmen.

[gene]

eshte paksa normale qe lajmi te kaloje ne heshje


E di se cfare kerkesash duhe te plotesosh per te marre nje vize shengen turistike?
E di se sa para duhet te kesh depozituar ne banke per te marre nje vize te tille?

Mos bej sikur nuk e di se si veprohet zakonisht ne shqiperi per te marre nje vize (nuk behet fjale ketu per vizita diplomatike por per turizem te organizuar)!

Sigurisht qe rroga e marre e deklaruar nuk do te mjaftoje kurre per te dhene garanci e per te marre nje vize
nje shqipetar qe kerkon nje vize, ose merr parate borxh sa per t'i deklaruar ose merr nje deklarate fallco nga banka. (edhe keto raste jane shkelje ligji)
Ketyre "nuk i ka ecur" sepse, fatkeqesisht, egzitonte nje burim informacioni per te kontrolluar te ardhurat (deklarimi i pasurive i bere me pare) - dhe kjo nuk ka lidhje me faktin se keta jane te korruptuar (qe 90% eshte i vertete)

Nuk dua te them se faktikisht ata nepunes nuk ishin te korruptuar
Dua te them se ne shqiperi dihet si shkojne punet me ambasadat dhe nuk eshte ndonje zbulim i madh - Kjo nuk verteton as korrupiminin a atyre nepunesve shteterore e as egzistencen e ndonje incidenti diplomatik apo sanksionesh nga BE

Nuk e di se ku jeton ai qe ka shkruar me siper por, ose nuk i pelqen te shohe realitetin me ambasadat, ose nuk e njeh fare ate (dhe ne kete rast ben mire te mbylle gojen)

Dy here te besojne kur therret Ujku Ujku
Heren e trete nuk te beson njeri dhe ujku punon i qete
Kjo po ndodh ne shqiperi
Qeveritaret e nepunesit vjedhin te qete sepse ka njerez si ai qe ka shkruar me lart, te cilet nuk dine c'flasin.
Pastaj, KUR VIJNE MENDT S'I HANE AS QENT

[Iliriani]

Une mendoj se nuk eshte ne interesin e kesaj qeverie ngritja e vendit te standartet e shoqerise evropiane ose sic shkruhet ne tabela-VAJTJA NE EUROPE.
Menyren se si erdhen ne pushtet,kush i ndimoi,prejardhja e ture politike dhe interesat e tyre ekonomike e tregojn qarte kete.Europa nuk eshte te vesh ne hene,ne europe jemi e ne zemer bile,mjafton te kemi drita,uje,rend,rruge e jemi mu brenda.Me beri pershtypje reagimi i 'ministres' Meksi e disa te tjereve qe ne vend te jipnin llogari e me minimalja eshte dorheqja nuk u preken fare.Kjo kupton dy gjera o jane te papergjegjshem o e dyta e bejne me qellim se keshtu u intereson e keshtu i porosisin ata qe u rijne nga pas e qe i mbeshtetin te rine ne 'pushtet'.Mbase keta njerez duan ta mbajne keshtu shqiperine per interesat e tyre. Sa te kemi kete qeveri nuk presim ndonje lajm te mire.

[Duke_Of_Arberia]

Shume shpresdhenes artikujt qe lexova ne kete teme. Ka disa dite qe nuk isha fare ne brendesi te situates politikes Shqiptare. Shpresojme ne nje presion gjithmone e me te madh te BE-se ndaj qeverise Nano.