85 milion leke vidhen nga Banka e Kursimeve

[Brari]

panorama
----------

vjedhja e bankës




hetimi


Dyshohet se ka marrë 85 milionë lekë. Dëshmitë e fqinjve në pallat: ka fituar llotarinë


Vjedhja në BK, zhduket arkëtarja
Liljana Menga u largua drejt SHBA-së më 1 mars


Vladimir KARAJ & DORINA TOPOLLAJ

Ikën në Amerikë punonjësja e Bankës së Kursimeve që dyshohet për vjedhjen e 85 milionë lekëve të reja.

Liljana Menga, rreth 50 vjeçe, me detyrë arkëtare në degën numër 4 në Tiranë, është larguar nga Shqipëria në mëngjesin e 1 marsi të këtij viti, me një avion drejt kryeqytetit të Sllovenisë, Lubjanë. Burime nga Drejtoria e Kufirit në Ministrinë e Rendit konfirmojnë largimin e saj, ndërkohë që këtë e vërtetojnë edhe burime të tjera. Vetë drejtori i Përgjithshëm i Bankës së Kursimeve, Ardian Kamberi, tha për gazetën "Panorama" se Menga kishte marrë lejen e zakonshme dhe e ka filluar më 1 mars, por pa shtuar më tej se cila ishte vendndodhja e saj. Por, lajmin në fjalë e përforcojnë fqinjët e Mengës në pallatin 18/1 në rrugën "Sali Nivica", pranë tregut elektrik, në lagjen "Ali Demi". Fqinja e familjes Menga në katin e pestë të këtij pallati, deklaroi dje për gazetën "Panorama" se Liljana ishte larguar në drejtim të SHBA-së bashkë me familjen, pasi kishte fituar llotarinë. Të njëjta fjalë thotë edhe një burrë i moshuar, që banon një kat më poshtë. Pa dhënë identitetin, ai shprehet se kjo familje kishte ngritur plaçkat prej tre javësh, gjë që korrespondon me të dhënat e mësipërme. Liljana Menga dyshohet se ka dorë në zhdukjen e 85 milionë lekëve nga agjencia katër e Bankës së Kursimeve të Tiranës. Ajo u pushua nga puna si arkëtare në agjencinë katër, pas një kontrolli nga Banka Qendrore e Kursimeve, që gjeti shkelje në dokumentacion vetëm në këtë degë. Rezultatet e grupit të auditimit thonë se nga agjencia janë vjedhur apo janë zhdukur 85 milionë lekë. Ndërkohë që janë vënë re shkelje të ndryshme në dokumentacionet e kësaj agjencie. Nga burime të ndryshme konfirmohet se Menga ka marrë leje të zakonshme, në momentin kur ka filluar kontrolli në këtë degë të Bankës së Kursimeve dhe kur drejtori i Përgjithshëm dha urdhër për bllokimin e parave dhe fillimin e kontrollit në të gjithë degët e bankës. Ky kontroll duket se e ka trembur arkëtaren dhe ka bërë që ajo të largohej nga Shqipëria. Pas këtij kontrolli rezultoi se vetëm dega katër, në kryeqytet, kishte probleme. Trokasim në derën e apartamentit përballë shkallëve, në katin e pestë të pallatitt 18/1, në rrugën "Sali Nivica", ku jetonte arkëtarja e agjencisë katër të Bankës së Kursimeve në Tiranë. Askush nuk përgjigjet. Një komshi na thotë se aty nuk banon më njeri dhe se çelësat i janë lënë në dorë njërit nga të afërmëve të familjes. "Po bëhet rreth një muaj, që janë larguar me lloto për në Amerikë", tregon ajo ndërsa zbret shkallët, por nuk pranon të identifikohet. Trokasim sërish në derë, por askush nuk e hap. Një kat më poshtë një tjetër fqinj, na konfirmon faktin e largimit të tyre. "Fituan llotarinë dhe u larguan", thotë fqinji i moshuar, duke na konfirmuar se pikërisht në derën ku sapo kishim trokitur banonte ish-punonjësja e bankës. 100 metra nga hyrja e pallatit, ku më parë jetonte Liljana Menga, jeton vëllai i bashkëshortit të saj. Gruaja e këtij të fundit që na hap portën e jashtme të shtëpisë, konfirmon faktin e largimit të Liljanës dhe Bashkimit dhe vajzës së tyre Irisit, për në SHBA, me anë të llotarisë. Ajo nuk pranon të flasë rreth dyshimeve të hedhura kohët e fundit për Liljanën si ish-punonjëse e Bankës së Kursimeve, duke thënë se nuk ka dëgjuar asgjë.



Prokuroria bllokon dokumentacionin

Prokuroria e Tiranës bllokon dokumentacionet e agjencisë numër 4 të Bankës së Kursimeve Tiranë. Denoncimi për shkelje dhe pasaktësi në mbajtjen e dokumentacioneve, është bërë katër ditë më parë nga drejtori i Përgjithshëm i BK-së, Ardian Kamberi. Ky i fundit ka akuzuar dy arkëtaret e agjencisë numër 4, Liljana Mengën dhe Fiqirete Bicin, të cilat i ka denoncuar në prokurori si punonjëset kryesore që kanë vjedhur shumën prej 85 milionë lekësh. Hetimet kanë filluar fill pas kallëzimit të Drejtorit Kamberi. Ndërkohë ka nisur shqyrtimi një e nga një i të gjithë veprimeve të arkës, dokumenteve dhe firmave të hedhura, pasi dyshohet se marrja e shumës së parave është bërë nëpërmjet falsifikimit të firmave dhe dokumentacioneve. Këtë çështje, po e heton një grup special i përbërë nga prokurorë të antikrimit ekonomiko-fianciar si dhe ekspertë kontabël. Gjithashtu ka filluar procedimi penal, pasi pas hetimeve paraprake, janë gjetur elementë të veprës penale. Deri më tani nuk është ndaluar asnjë person, pasi brenda pak ditësh priten të dalin të dhëna të sakta nga hetimet.



Pushohet stafi ku u bë vjedhja

Stafi i vjetër i agjencisë numër 4 në “Rrugën e Durrësit”, është larguar nga puna. Katër punonjës janë shkarkuar, ndërsa shtatë të tjerë janë pezulluar. Kjo masë e drejtorit të Përgjithshëm të Bankës, ka ardhur si rezultat i shkeljeve dhe pasaktësive të mbajtura në dokumentacione, që çuan në humbjen e 85 milionë lekëve. Ndërkohë që në këtë agjenci, që prej dy ditësh është ngritur një staf i ri, por akoma nuk është angazhuar në punë. Agjencia është e mbyllur, dhe të gjitha dokumentet janë të bllokuara. Ato i kanë kaluar Prokurorisë për të bërë verifikimet e nevojshme.



Si u zbulua skandali në Bankën e Kursimeve
Një punonjëse "spiunoi" vjedhjen

Një telefonatë anonime, bërë në Drejtorinë e Përgjithshme të Bankës së Kursimeve, përbën dhe fillimin, nga i cili u zbulua skandali në Bankën e Kursimeve. Sipas burimeve nga Prokuroria e Tiranës, ka qenë një anëtare e stafit të degës numër 4 të Bankës, e cila kishte dyshuar për disa veprime bankare të kryera më 28 shkurt të këtij viti. Informacioni është vlerësuar shumë nga drejtuesit e Bankës në qendër dhe menjëherë është dërguar një grup kontrolli. Menjëherë është bllokuar puna dhe janë ngrirë të gjitha paratë që ishin në arkë. Verifikimet i shtuan dyshimet, pasi një pjesë e dokumentacionit nuk ishte i rregullt. Ndërkohë edhe paratë nuk korrespondonin me shumën që duhet të ishte. Konkluzioni i parë ishte se aty kishte patur një vjedhje dhe duke qenë kështu Drejtoria e Përgjithshme nisi një grup të dytë kontrolli. Edhe ky grup nxori në dritë shkelje të reja, sidomos në një llogari bankare, transferimi i të cilës duhej të ishte bërë me tre firma, por, në fakt, ishte bërë me një. Çështja mori karakter serioz dhe, po me urdhër të Drejtorisë së Përgjithshme, kontrolli nisi në të gjitha pikat e Bankës së Kursimeve në të gjithë vendin. Ndërkohë u morën edhe masat e para. U shkarkuan katër punonjëse të stafit të degës nuëmr 4 dhe shtatë të tjera u pezulluan. Ndërkohë, të gjitha dokumentet shkresore i kaluan për hetim Prokurorisë së Tiranës.



Kronologjia

28 shkurt 2004
Një punonjëse i agjencisë numër 4 të Bankës së Kursimeve në Tiranë, lajmëron drejtorin e Përgjithshëm, se në sportelet e agjencisë ku punonte, janë bërë shkelje në dokumente. Gjeneralitetet e këtij personi nuk janë bërë të ditura. Pas lajmërimit, drejtori urdhëron menjëherë ngrirjen e veprimeve në arkë dhe nisjen e një kontrolli, i cili vërteton se ka patur falsifikime në dokumentacion.

1 mars 2004
Punonjësja e agjencisë numër 4 të Bankës së Kursimeve, Liljana Menga, merr zyrtarisht lejen e zakonshme. Nga burime jozyrtare, bëhet e ditur se në mëngjesin e kësaj dite, është nisur për në Ljubjanë, për të shkuar më pas në Amerikë. Në Drejtorinë e Përgjithshme të Bankës së Kursimeve, hidhen dyshime për implikimin e kësaj punonjësje në falsifikimin e dokumenteve.

10 mars 2004
Drejtori i Përgjithshëm i Bankës, Ardian Kamberi, urdhëron Drejtorinë e Kontrollit dhe Auditit, të inspektojë të gjitha degët e kësaj banke në vend. Nga kontrolli i bërë, rezulton se vetëm në degën numër katër në Tiranë, ka shkelje dhe pasaktësi në mbajtjen e dokumentacioneve.

15 mars 2004
Denoncon në Prokurori humbjen e 85 milionë lekëve drejtori i Bankës së Kursimeve, Ardian Kamberi. Për këtë humbje, ai ka fajësuar dy arkëtaret e agjencisë numër katër, Fiqirete Bici dhe Liljana Menga, të cilat i ka denoncuar në prokurori si personat që kanë kryer vjedhjen e parave. Pushohen 4 dhe pezullohen 7 punonjëse të kësaj dege.

17 mars 2004
Lajmi për zhdukjen e 85 milionë lekëve bëhet publik. Drejtori i Bankës së Kursimeve, Kamberi, në një njoftim për median, ka deklaruar se në agjencinë numër katër kanë ndodhur shkelje dhe pasaktësi të mbajtjes së dokumentacioneve, duke shkelur rregullat e brendshme të Bankës.

18 mars 2004
Agjencia numër katër mbyllet, bllokohen të gjitha dokumentacionet, të cilat kalojnë në prokurori për t'u hetuar. Ndërkohë stafi i vjetër i kësaj agjencie është ndërruar. Policia konfirmon largimin nga Shqipëria për në SHBA të Liljana Mengës, punonjëses kryesore të dyshuar për vjedhjen e lekëve.



intervista


interviste/ Përse gjatë privatizimit të bankës mund të ketë abuzime


Guvernatori Shkëlqim Cani: Eshtë normale të vidhet tani

Vladimir Karaj

Guvernatori i Bankës së Shqipërisë, Shkëlqim Cani, ka kërkuar më shumë kontroll në Bankën e Kursimeve në kohën para privatizimit të saj.

Pasi, sipas tij, kjo është një periudhë që mund të shfrytëzohet për të bërë shkelje të ndryshme, me qëllime përfitimi. Madje, edhe rastin e zhdukjes së 85 milionë lekëve, nga agjencia numër 4 e Bankës së Kursimeve, ai e cilëson si normal, pasi kjo bankë po kalon nga një pronarë në një tjetër dhe kjo është një situatë e favorshme për manipuluesit. Guvernatori i Bankës së Shqipërisë, Cani, iu është përgjigjur dje për gazetën “Panorama” disa pyetjeve rreth çështjes në fjalë, duke deklaruar se rasti nuk është i veçantë. “Është narmale që kur ka privatizime të krijohen edhe hapësira të tilla për manipulim, pikërisht për këtë duhet të forcohet kontrolli”, tha Cani. Më tej ai shpjegoi se Banka e Shqipërisë ishte vënë në dijeni për rastin në fjalë.

Zoti Guvernantor, ditët e fundit është zbuluar një skandal në Bankën e Kursimeve, a keni dijeni për këtë ju si drejtues i Bankës së Shqipërisë?
Po, kemi marrë dijeni nga ato që ka thënë drejtori i Përgjithshëm i kësaj banke, që, me sa di unë, ka deklaruar se janë zhdukur para.

Sipas asaj që ju keni mësuar, a është vjedhur në këtë agjenci të Bankës së Kursimeve?
Po, sigurisht, deri sa vetë drejtori i Përgjithshëm bën publik këtë fakt, as nuk vihet në dyshim që është bërë vjedhje. Me sa di unë, bëhet fjalë për një shumë rreth 800 mijë dollarë, që është zhdukur.

A ka Banka e Shqipërisë të drejtë kontrolli mbi Bankën e Kursimeve?
Po, sigurisht, ne kemi të drejtë të kontrollojmë këtë bankë, por jo për këtë rast, pasi banka ka edhe kontrollin e brendshëm. Nuk mund të kontrollojmë ne për dokumente të falsifikuara nga një punonjëse, këtë duhet ta bëjë kontrolli i brendshëm. Ndërkohë që në këto raste kontrolli ushtrohet nga të tjera institucione dhe nga grupi i auditimit të vetë Bankës së Kursimeve.

Ju si Guvernator e cilësoni si normale rastin e zhdukjes së 85 milionë lekëve, a mund të ndodhë diçka e tillë?
Po, kjo është normale, dhe ndodh shpesh në situata të tilla kur banka kalon nga një pronar në një tjetër, apo kur bëhet privatizimi i saj dhe them se mund të ketë ndodhur edhe herë të tjera. Në këto raste duhet forcuar më shumë kontrolli, pasi janë pikërisht situata që mund të shfrytëzohen.



Kamberi informon instancat e larta të shtetit

Drejtori i Përgjithshëm i Bankës së Kursimeve, takime informuese me drejtues të Ministrisë së Financave dhe Bankës së Shqipërisë. “Kam zhvilluar takime të tilla, ku kam dhënë informacione për vazhdimësinë e punës së bankës deri tani”, tha Ardian Kamberi. Ai theksoi se kontroll i tillë është zhvilluar edhe në degë të tjera të bankës. Ndërkohë, sipas tij, deri tani është bërë kalimi i dokumentacionit të agjencisë katër në rrugën e “Durrësit”, përballë Ministrisë së Arsimit, në kryeqytet, në dorë të Prokurorisë së Rrethit të Tiranës, e cila po procedon me hetimet e mëtejshme. Kamberi konfirmoi se ka bërë pushimin e katër punonjëseve të kësaj agjencie dhe pezullimin e shtatë të tjerave. Sipas tij, këto të fundit do të qëndrojnë të pezulluar deri në sqarimin e plotë të rrethanave të ngjarjes dhe gjetjes së autorit të vjedhjes së 85 milionë lekëve. Ndërkohë,, ai tregoi se është marrë direkt me kontrollin e kësaj njësie dhe se ka bërë vetë shkarkimin e katër punonjëseve në bazë të materialeve të siguruara nga kontrolli i brendshëm i bankës. Megjithatë, ai tha se nuk mund të përcaktojë se cili është fati i 85 milionëve dhe se kjo i përket të zbulohet nga organet kompetente, në këtë rast Prokuroria e Tiranës. Ardian Kamberi, drejtor i Përgjithshëm i Bankës së Kursimeve, ishte i pari që bëri publik rastin e zhdukjes së sasisë së parave nga dega katër e Bankës së Kursimeve për Tiranën. Ai njoftoi gjithashtu edhe shkarkimin nga detyra të punonjëseve të kësaj dege.



Skandalet në banka

mars 1992
Shpërthen skandali i mbiquajtur “Arsidi”. Sipas hetimeve të Prokurorisë, një francez, me emrin Nikolas Arsidi, 74 vjeç, mori përsipër shlyerjen e borxhit të jashtëm të Shqipërisë, duke përfituar në formë honorari një kambial prej 1.6 milionë dollarë. Kjo është cilësuar shkelje e hapur e ligjeve të shtetit shqiptar dhe me urdhër të prokurorisë u arrestuan pesë zyrtarë, mes të cilëve Kryeministri Vilson Ahmeti, guvernatori Ilir Hoti dhe tre bankierë. Ata u dënuan nga 12 vjet burg, por, falë amnistive të bëra në vitin 1997, të gjithë të mësipërmit u liruan. Çështja “Arsidi” ka qenë një nga çështjet më të përfolura në qarqet politike të asaj kohe. Në një intervistë të tij, ish-ministri Genc Ruli ka deklaruar se skandalin e Arsidit do ta zbulojnë plotësisht vetëm socialistët kur të vinin në pushtet. Por, në fakt të majtët nuk e rihapën këtë çështje.

shtator 1998
Tentohet të vidhen në Bankën Kombëtare Tregtare 5 milionë dollarë nëpërmjet zyrës së transfertave SWIFT. Stafi drejtues i Bankës zbulon skandalin, i cili ishte kryer gjatë trazirave të 14 shtatorit në Tirana pas vrasjes së deputetit Azem Hajdari. Pas hetimeve të Prokurorisë së Tiranës, u zbulua se dy punonjës të kësaj banke kishin bërë dokumentacionin për transfertë nga kjo bankë në një bankë të Parisit për llogari të një firme amerikane. Por, kapja shumë shpejt e skandalit ndihmoi që paratë të mos kalonin. Megjithatë, çështja u kalua në Gjykatën e Tiranës, e cila dënoi me 2 vjet burg në mungesë dy punonjësit, pasi ata ishin arratisur në Kanada dhe Amerikë.

shtator 1999
Një person me emër të rremë kërkon të marrë në një llogari bankare rreth 1 milion marka nga Banka e Kursimeve. Falë një zbulimi që bëjnë drejtuesit e punonjëit, skandalin e merr në dorë Prokuroria e Tiranës. Sipas hetimeve të kryera, rezultoi se personi në fjalë kishte falsifikuar dokumentet bankare si librezën dhe gjeneralitetet për të tërhequr paratë. Por, gjithçka është zbuluar në momentin e fundit, kur do të tërhiqeshin paratë. Prokuroria e Tiranës pas gjashtë muajsh hetime nuk arriti të zbulojë identitetin e vërtetë të këtij personi misterioz. Por, e rëndësishme është që edhe pse u tentua, nuk u arrit të vidhej banka.

mars 2000
Policia zbulon vjedhjen e 25 milionë lekëve të reja në një nga agjencitë e Bankës së Kursimeve në bulevardin “Zogu i Parë” në kryeqytet. Sipas hetimeve paraprake, një 25-vjeçar, nga Tirana, me emrin Kejdi Kote, kishte falsifikuar të gjithë dokumentacionin e një llogarie bankare, duke e bërë të vdekur pronarin e saj. Policia arrestoi Koten dhe dhjetë persona të tjerë që ndihmuan Koten. Mes të arrestuarëve ishin disa arkëtare, një badigard, shoferi i taksisë, me të cilin kishte transportuar paratë. Pas një hetimit disamujor, gjykatat e dënuan me 11.5 vjet burg dhe tani vuan në Burgun e Vaqarrit.

[Brari]

tema shkruan.

-------
Në agjensinë nr.4 janë shkarkuar katër punonjës, ndërsa janë pezulluar deri në sqarimin e çështjes shtatë të tjerë

Paratë e Kursimeve "fluturojnë" në Amerikë

Kunata e Liljana Mengës thotë se ajo dhe familja e saj janë larguar në Amerikë dy javë më parë. Edhe fqinjët në pallatin nr.18, në rrugën 'Sali Nivica', ku banonte familja Menga, konfirmojnë të njëjtën gjë. Ndërsa ka kontradikta me disa fqinj të tjerë që thonë se Liljana Menga dhe bashkëshorti Bashkim Menga janë parë ditën e djeshme në lagje.

Drejtori i Bankës së Kursimeve Ardian Kamberi në kallëzimin penal të dërguar në Prokurorinë e Tiranës përmend dy emra si përgjegjës të mundshëm të skandalit të zhdukjes së 850 milion lekëve të vjetra nga agjensia bankare nr.4 e Bankës së Kursimeve. Liljana Mengas dhe Fiqirete Bicit, dy llogaritare të agjensisë bankare, u janë dërguar emrat në Prokurori për hetim.

Fqinjët e familjes Menga thonë se ka më shumë se dy javë që Liljana Menga dhe Bashkim Menga, bashkëshorti i saj, janë larguar me familje për në Amerikë. Të njëjtën gjë thotë edhe bashkëshortja e vëllait të Bashkim Mengës, e cila banon në afërsi të apartamentit të Liljanës. Ajo thotë se është në dijeni të lajmit të përhapur për zhdukjen e 850 milionë lekëve të vjetra nga Banka e Kursimeve, por thotë se nuk ka dijeni se çfarë lidhje ka Liljana me këtë skandal.

Prokuroria e Tiranës ka nisur hetimet dhe ka regjistruar procedimin penal menjëherë pas përhapjes së informacionit për skandalin nga ana e Drejtorit të Bankës së Kursimeve. Ata thonë se deri në këto momente nuk kanë arritur në ndonjë konkluzion se kush janë autorët e vjedhjes.

Drejtori i Bankës së Kursimeve Ardian Kamberi thotë se vjedhja është bërë me anë të falsifikimit të mandateve dhe paratë janë zhdukur. Kjo sipas tij është gjetur nga kontrolli që ushtron drejtoria e auditimit dhe Kontrollit në Bankën e Kursimeve. Guvernatori i Bankës Kombëtare Shkëlqim Cani thotë se është e sigurt që 800 mijë dollarët janë zhdukur nga Banka e Kursimeve dhe është detyrë e institucionit të Prokurorisë të zbardhë çështjen.

Policia e Tiranës nuk është e angazhuar në këtë çështje. Burime pranë kësaj policie thanë se gjithçka tashmë është në dorë të Prokurorisë. Ata thonë se nuk kanë shoqëruar dhe nuk kanë pasur ndonjë urdhër nga Prokuroria për shoqërimin e dy grave të përmendura në kallëzimin penal dorëzuar në Prokurori nga ana e drejtorit të Bankës së Kursimeve Ardian Kamberi.

* * *

Shtëpia e Liljana Mengës, e paditur nga Banka e Kursimeve së bashku me Fiqirete Bicin, për përvetësimin me anë të falsifikimit të rreth 85 milion lekëve të reja, është në rrugën 'Sali Nivica', në pallatin nr.18/1. Rruga e përdredhur që të çon në këtë pallat është e mbushur me banesa të reja të sapondërtuara, që janë të vendosura përkrah pallateve të vjetra e vështirë të gjetshëm.

Rrugës për te pallati, të gjithë e njohin Bashkimin, bashkëshortin e Liljanës që punonte në Bankë. Në kat të pestë, të fundit në pallat, është edhe hyrja e Liljanës. Një fqinje e saj, që del nga dera ngjitur me hyrjen, thotë se ata nuk janë në shtëpi, madje kanë hequr edhe plaçkat. "Mos trokisni kot, Bashkimi e Liljana kanë ikur familjarisht në Amerikë, rreth një muaj më parë," thotë gruaja tek kalon dhe zbret nga pallati për në punën e saj. Ndërsa nga hyrja përballë me atë të Liljana Mengas del një burrë i moshuar. Edhe ai konfirmon fjalët e zonjës, me një ndryshim në kohë. "Janë larguar dy javë më parë për në Amerikë. Nuk ka njeri në atë hyrje. I kam parë vetë tek nxirnin edhe plaçkat. Ju po deshët prisni, por kot e keni," thotë burri i moshuar.

Teksa del nga pallati, pak metër më larg, një mesoburrë që po rregullon makinën e prishur, thotë se ka dëgjuar që do të iknin në Amerikë familjarisht, por shton se Liljana Menga dhe Bashkim Menga, janë parë tek lëviznin me makinë në lagje. Ai drejton gishtin tek një shtëpi private, para portës të së cilët është ulur një fëmijë i vogël që lodronte. Ajo është shtëpia e vëllait të Bashkim Mengës. Në portën e oborrit del një grua, e cila thotë se familja e kunatit është larguar dy javë më parë në Amerikë. "Unë nuk di t'iu them asgjë për ato që janë folur, por Liljana me Bashkimin ka mbi dy javë që janë në Amerikë" thotë ajo dhe mbyll derën e hekurt të oborrit.



Drejtori Kamberi: Paratë janë zhdukur nëpërmjet falsifikimit

Ardian Kamberi, drejtor i Bankës së Kursimeve, dje ka pasur një ditë të ngjeshur me takime në drejtorin e Bankës së Kursimeve të Tiranës e më pas edhe një takim në Ministrinë e Financave. Ai thotë se paratë janë zhdukur dhe kjo është vërtetuar nga Drejtoria e Kontrollit dhe Auditimit në Bankën Kombëtare të Kursimeve. Sipas tij nuk është aspak e vështirë tërheqja e parave nga banka nëse mandat arkëtimet janë falsifikuar. Sipas tij ajo që është e sigurt, është se janë falsifikuar mandatet dhe më pas janë tërhequr 850 milion lekët. Kamberi thotë se nuk mund të vërë gishtin tek asnjë njeri për të thënë se ky është hajduti, por thotë se me këtë duhet të merret Prokuroria. Për të krijuar mundësitë që të sqarohet më shpejt çështja, Kamberi thotë se janë shkarkuar katër punonjës në agjensinë nr. 4 të Bankës së Kursimeve në Tiranë dhe janë pezulluar nga puna shtatë të tjerë. Sipas drejtorit Kamberi pezullimet janë bërë për deri në momentin, kur kjo çështje do të jetë sqaruar përfundimisht.



Prokuroria: Po hetojmë për falsifikim dokumentash

Prokuroria e Tiranës ka regjistruar dje procedimin penal tri ditë pas mbërritjes së kallëzimit penal për zhdukjen e 850 milion lekëve të vjetra. Burime në institucionin e akuzës në kryeqytet thonë se filloi dje procedimi penal pa pasur ndonjë emër të veçantë për t'i atribuar akuzën. Procedimi ka filluar pasi në këtë çështje është vënë re se ka pasur konsumim të elementëve të veprës penale, konkretisht të falsifikimit të dokumentave. Prokuroria thotë se nuk ka identifikuar ndonjë emër që është përgjegjës për këtë skandal, por ka marrë parasysh emrat e paraqitur nga Drejtori i Bankës së Kursimeve, atë të Liljana Mengas dhe Fiqirete Bicit. Burime në Prokurorinë e Përgjithshme thonë se janë të angazhuar që në bashkëpunim me Prokurorinë e Tiranës të zbardhin nëse janë vjedhur paratë apo jo, mekanizmin e vjedhjes, personat që kanë konsumuar këtë vepër penale, si dhe destinacionin e parave.



Cani: Manovra të zakonshme në rastet e privatizimeve

Guvernatori i Bankës Kombëtare Shkëlqim Cani thotë se është e sigurt që rreth 800 mijë dollarë janë zhdukur nga Banka e Kursimeve. Ai bazohet tek denoncimi që kanë bërë vetë drejtuesit e Bankës së Kursimeve. Sipas guvernatorit Shkëqim Cani manovra të tilla të vjedhjes së parave në banka janë të zakonta në raste privatizimi, jo vetëm në vendin tonë por edhe në vendet e tjera të botës. Cani thotë se nuk është në kompetencën e Bankës Kombëtare ushtrimi i kontrollit nëpër bankat e nivelit të dytë, siç është Banka e Kursimeve, në drejtime të tilla si rasti i fundit. Ai shprehet se konstatimi që ka bërë Drejtoria e Kontrollit dhe auditimit në Bankën Kombëtare të Kursimeve, duhet të shoqërohet me veprimin e organeve të tjera shtetërore si Prokuroria, për të zbardhur këtë çështje e për të vënë para përgjegjësisë personat që kanë kryer vjedhjen.

Bankia Kombëtare e Kursimeve është privatizuar nga Banka austriake "Reiffeisen Bank" disa muaj amë parë. Ajo është vetmja e llojit të saj në tregun bankar shqiptar.



Agjensia nr. 4 mbyllet përkohësisht pas skandalit

Ditën e djeshme janë ulur edhe grilat në dyert e agjensisë bankare nr. 4 të Bankës Kombëtare të Kursimeve. Kjo ka ndodhur menjëherë pas publikimit të informacionit nga ana e drejtorit të Bankës, për zhdukjen e 850 milion lekëve të vjetra nga kjo agjensi bankare. Mbyllja e agjensisë lidhet edhe me bllokimin e të gjithë dokumentacionit, nga ana e Prokurorisë së Tiranës, e cila filloi hetimet për këtë çështje. Gjithashtu mbyllja e agjensisë bankare nr.4 ka lidhje edhe me pushimin nga puna të shumë punonjësve të këtij filiali të Bankës Kombëtare të Kursimeve. Drejtori Kamberi tha se janë pushuar nga puna katër punonjës, mes të cilave edhe Liljana Menga dhe Fiqirete Bici. Shtatë të tjerë janë pezulluar përkohësisht nga puna deri në momentin e sqarimit të plotë të çështjes. Por bëhet e ditur se në këtë agjensi bankare kanë filluar të punojnë disa punonjës të rinj, për të plotësuar kuadrin e nevojshëm të punonjësve.

...

[Hyllien]

Brravo qeveria shqiptare, me turp nuk ka ku te vej. Nje levizje tjeter qe mos te lejoj privatizimin e bankes nga austriaket. Rrezik do ja japin grekeve dhe Bankes se Pireut. Po tentojn ta zhveshin fare tani para se ta nxjerrin ne ankand per greket.

100 here me mire ta merrte Austriaku se sa ndonje shtet si Greqia apo Italia.

[Orku]

Leket jane vjedhur gjate 97 por vjedhja u zbulua pas 7 vjetesh ...

[angeldust]

Pyetje:

A s'mund ta kapin kete te tillen nqs. qeveria apo policia shqiptare informon imigracionin amerikan nepermjet ambasadave? Ata te emigracionit e marrin parasysh nese ke dosje ne polici apo je akuzuar per krime ne vendin qe ke lene.
Kaq e veshtire qenka? Dmth. di dikush nese eshte teknikisht e mundur te behet nje gje e tille?

[Llapi]

TIRANE (23 Mars) - Arratisen tri arkëtaret e dyshuara për vjedhjen e 85 milonëve në degën numër 4 të Bankës së Kursimeve. Policia ka arritur të kapë vetëm njërën prej katër arkëtareve të akuzuara. Valbona Tirana është vënë në pranga mbrë-mjen e së dielës, por agjentët e policisë së Tiranës nuk kanë gjetur tri koleget e saj. Ndërkohë që identitetet e këtyre nuk jepen për arsye hetimi, burime të policisë shprehen se ka informacione të sigurta që njëra prej arkëtareve është larguar jashtë. Sipas burimeve, nuk është konfirmuar ende largimi i dy arkëtareve të tjera. Për to ka informcione që janë të strehuara në periferitë e kryeqytit. Deri në orët e mbrëmjes së djeshme agjentët vazhdonin me klasifikimin e këtyre informacioneve, por pa mundur të kryenin lokalizimin e saktë të ndonjërës prej tyre. Ndërsa Valbona Tirana është siguruar dje në ambientet e paraburgimit të Burgut 313,ajo nuk e ka pranuar akuzën dhe ka kërkuar të flasë vetëm në prani të avokatit. Banesa e saj në Rrugën e Barrikadave, pranë kryqëzimit me rrugën e Dibrës, ka qenë e "braktisur". "Siç duket e kanë pasur të vështirë të qëndronin në lagje, prandaj kanë ikur", ka thënë për Gazetën njëra prej fqinjëve të hyrjes së Tiranës. Bashkëshorti, Thomai, ka marrë dy fëmijët 10 dhe 7 vjeç dhe është larguar për te të afërmit e tij. Gjithsesi, fqinjët shpreheshin të habitur për arrestimin e Valbona Tiranës, lajmin e të cilës e kishin marrë nga mediat. ro/ro (GazetaShqiptare/BalkanWeb)

[Shpirt Njeriu]

Arkëtarja: Ja skema e vdjedhjes së Bankës së Kursimit



Lidhur me zhdukjen e 850 milionë lekëve (të vjetra), arkëtarja vetë ka shpjeguar se përgjegjëse janë koleget e saj dhe jo ajo


TIRANË - Gjykata e Shkallës së Parë e Tiranës, i ka komunikuar dje masën e sigurisë "burg pa afat" Valbona Tiranës, arkëtares së Arkës Nr. 4 të Bankës së Kursimit, të akuzuar për vjedhjen e 850 milionë lekë (të vejtra). Gjatë komunikimit të masës së sigurisë, e akuzuara nuk ka pranuar akuzën për vjedhjen e kësaj shume, ndërsa ka shpjeguar se përgjegjësia për zhdukjen e 850 milionë lekë (të vjetra) është e kolegeve të saj.

Para trupit gjykues të kryesuar nga Agim Bendo, prokurori ka parqitur akuzat e tij për "shpërdorim detyre" dhe "vjedhje në bashkëpunim" të shumës së 850 milionë lekë (të vjetra). Duke u ndalur në akuzën ndaj Valbona Tiranës, prokurori ka shpjeguar se kjo arkëtare është përgjegjëse për zhdukjen e 13.5 milionë lekë (të vjetra" nga Arka Nr. 4 e Bankës së Kursimeve.

Lidhur me zhdukjen e kësaj shume, arkëtarja vetë ka shpjeguar se përgjegjëse janë koleget e saj dhe jo ajo.

Në shpjegimet e saj para Gjykatës, Valbona Tirana ka treguar momentin e zhdukjes së 13.5 milionë lekë (të vjetra). Sipas arkëtares, mësohet se para disa kohësh, në sportelin e Arkës Nr. 4 të Bankës së Kursimeve, ishte paraqitur një klient, i cili kishte depozituar 1.35 milionë lekë (të vjetra). Atë ditë, arkëtarja Valbona Tirana, ka shpjeguar se ajo nuk kishte qenë në sportel. Pak ditë më vonë, sipas arkëtares, i njëjti person që kishte depozituar shumën prej 1.35 milionë lekë (të vejtra), ishte paraqitur në sportelin e të njëjtës arkë, ku këtë herë ndodhej Valbona Tirana.

Klienti kishte kërkuar të tërhiqte shumën që kishte depozituar. Arkëtarja ka saktësuar dje, se sipas dokumentave të bankës ajo i kishte kthyer atij 13.5 milionë lekë (të vjetra), pra 10 fishin e shumës reale që ai kishte depozituar pak ditë më parë. Arkëtarja ka këmbëngulur se në falsifikimin e kësaj shume ajo nuk kishte përgjegjësi dhe se kjo përgjegjësi binte mbi koleget e saj që kishin qenë në sportel ditën e depozitimit të 1.35 milionë lekë (të vjetra).

Shpjegimi i arkëtares nuk ka bindur Gjykatën, e cila ka vendosur dje ta lërë atë në "burg pa afat". Edhe gjatë pyetjes së saj në Prokurori, arkëtarja Valbona Tirana nuk kishte pranuar akuzat ndaj saj.

Menjëherë pas arrestimit të saj, midis mesnatës së shtunë e të dielë, arkëtarja Valbona Tirana, u muar në pyetje nga hetuesit e çështjes. Pas komunikimit të akuzave të ngritura nga Prokuroria e rrethit të Tiranës, nga ana e saj, Valbona Tirana nuk ka pranuar asnjë prej tyre, duke u deklaruar e pafajshme për vjedhjen e 850 milionë lekë (të vjetra). Në vijim të qëndrimit të saj, ajo nuk ka pranuar të firmosë as procesverbalin, e mbajtur nga grupi hetimor, duke këmbëngulur në pafajësinë e saj.

Valbona Tirana u arrestua mesnatën midis të shtunës e të dielës, nga agjentët e Antikrimit Ekonomik, të Drejtorisë së Policisë të Qarkut të Tiranës. Arrestimi i saj u bë, pasi Gjykata e Shkallës së Parë e Tiranës kishte marrë masën e sigurisë "burg pa afat" për atë dhe për tre arkëtaret e tjera, të akuzuara për vjedhjen e 850 milionë lekë (të vjetra), por që ende nuk kanë përfunduar në pranga.