Kuvendi aprovon legalizimin e shtesave te pallateve

[Albo]

Kuvendi hedh poshtë projektligjin e qeverisë, voton propozimin e PD për legalizimin e shtesave pa leje

Kuvendi, shpërbëhet maxhoranca socialiste

Në seancën e djeshme parlamentare u diskutua për shtesat dhe legalizimet e ndërtimeve pa leje. Gjatë kësaj seance pati mendime të ndryshme për mënyrën se si ishte formuluar projekt-ligji "Për legalizimin e shtesave në ndërtime". Opozita kishte mbështetur propozimin e shoqatës së ndërtuesve për të legalizuar këto ndërtime me një kosto të ulët, duke arritur deri në katër për qind. Kurse socialistët kanë paraqitur një projektligj ku legalizimet duhej të bëheshin në masën 20 për qind për shtesat e banimeve dhe 50 për qind për dyqanet. Duke u shtuar atyre dhe tatimin mbi vlerën e shtuar, atëherë çmimi i legalizimeve rritej me 20 për qind.

Por në fund gjatë votimit është vendosur që të miratohet propozimi i PD, edhe pse socialistët kanë paraqitur një tjetër draft ku çmimi i legalizimeve ishte një e mesme mes tarifave të paraqitura nga PD dhe tarifave të qeverisë. Menjëherë pas votimit ka reaguar kreu i grupit parlamentar të PS-së, Gramoz Ruçi, i cili ka kërkuar që votimi të përsëritet. Por edhe pse votimi është përsëritur, sërish është votuar pro variantit të paraqitur nga opozita. Deputeti demokrat Ritvan Bode është shprehur se normalizimi i situatës për legalizimin e shtesave pa leje të bëra në ndërtesat me leje mund të bëhet e mundur vetëm nëpërmjet amnistisë. Sipas tij vendimi i marrë në komisionet e përhershme parlamentare në lidhje me gjobën prej 20 për qind për shtesat për banim dhe 50 për qind për shtesat që kanë të bëjnë me biznesin, nuk është asgjë më shumë e as më pak se një vendim politik. Ndërkohë Bode ka shtuar se një vendim i tillë ka patur për qëllim t'i thotë opozitës se pavarësisht se ju zhvilloni takime me biznesin, jemi ne ata që vendosim nivelin e gjobave. Ai ka shtuar gjithashtu se nuk është një veprim i drejtë që të ndëshkohet vetëm biznesi në këtë drejtim pasi, sipas tij, përgjegjësi kanë dhe strukturat e shtetit të ngarkuara me këtë detyrë. "Në momentin që këto ndërtime janë bërë, strukturat e shtetit të ngarkuara me këtë detyrë, duhet të kishin realizuar kontrollet e nevojshme dhe jo të merrnin rryshfete," është shprehur Bode. Ndërsa kryedemokrati Berisha ka kërkuar që të merren masa ndëshkuese për strukturat shtetërore përgjegjëse. Kërkesës së Berishës, Ministri i Rregullimit të Territorit dhe Turizmit, Bashkim Fino, i është përgjigjur duke i thënë se bashkitë i kanë të evidentuara të gjitha firmat, të cilët kanë shkelur lejet e ndërtimit dhe kjo gjë bën të mundur që paratë të mos u merren banorëve, por ndërtuesve. Deputetët gjatë seancës së djeshme kanë shqyrtuar dhe projektligjin "Për funksionimin e pushtetit vendor". Në këtë projektligj është parashikuar që vendimet në këshillat bashkiakë të merren me 50 për qind të të pranishmëve plus një votë. Ndërsa deputetët e opozitës kanë kërkuar që vendimet për çështje të rëndësishme si ajo e tjetërsimit të pronave publike duhet të merren me 3/5 e votave të këshillit bashkive apo të komunave. Në seancën e djeshme parlamentare nuk u diskutua për rezolutën çame, pasi u vendos që të mos ketë diskutime për këtë çeshtje. Diskutimet fillestare në këtë seancë u përqendruan në hartimin e një deklarate për gjendjen në Kosovë.

Kuvendi miraton me 71 vota raportin e KKRTV-së

Kuvendi miratoi dje me 71 vota pro dhe 36 kundër raportin e Këshillit Kombëtar të Radio Televizioneve. Në seancën parlamentare të ditës së hënë, kryetari i këtij institucioni ka raportuar në Kuvend për situatën e shtypit dhe të shkruar, radiove dhe televizioneve në Shqipëri. Deputetët e pozitës dhe të opozitës kanë miratuar dje pa debat raportin e KKRTV-së.

[klevis2]

Me duket se dje parlamenti ka rivotuar projektligjin mbi shtesat pa leje duke aprovuar kerkesen e Rames per gjoba 20% dhe 50 % per ndertuesit. Ne kete votim nuk kane marre pjese deputetet e PD-se