Zjarr ne ministrine e jashtme

[Shpirt Njeriu]

Agim Lami do të mbetet një polic anonim. Një polic nga ata që marrin një rrogë sa për tu ushqyer dhe me reston për të bërë asgjë. Por në rastin më të parë të dhënë, ky brum polici, që ndeshet shpesh, u kthye në hero të vërtetë. Nga ata që mund të preken. Rreth orës 11.15 të ditës së djeshme ai ndodhej në furgonin e grupit të gatshëm, që mbërriti i pari pranë ndërtesës 7-katëshe përbri Ministrisë së Jashtme, kati i parë i së cilës po shkrumbohej. Aty kishin mbërritur njëkohëshisht me të disa drejtues e policë të Komisariatit 1, të cilit i përkiste edhe Lami. Të gjithë sa ishin futen në ndërtesë duke trokitur derë më derë. Kur vuri re shefat e tij N. Zykon, L. Voglin dhe N. Balën të futeshin mes tymit, Agimi nuk ishte ndalur. Urdhëri momental kishte qenë të nxirreshin poshtë banorët, sa të mundeshin, ndërsa pjesa tjetër të strehohej në katin e sipërm, mundësisht në tarracë. "Në katin e dytë gjeta një plak, që kishte thyer këmbën. E morra në krahë dhe u sula drejt derës. Por rugës ndesha me një grua, që nuk mund të ecte. Tymi e kishte bllokuar, ashtu si po më bllokonte edhe mua. Plaku më tha ta lëshoja, se mund të ecte pak vetë. Mora gruan në krahë dhe vura plakun përpara", ishte rrëfimi i Agimit, si një pjesëz e historisë së madhe të ngjarjes së djeshme. Kolegët e tij më tej treguan se Lami me të nxjerrë në dritë gruan dhe plakun, ishte futur sërish brenda, ku kishte mbetur i asfiksuar nga tymi.

Pragtragjedia

Agim Lami ishte një nga ata njerëz, që gjatë ditës së djeshme mund të kishte humbur jetën. Në vendngjarje, nëdrkohë që tymi i magazinës me tapete e sixhade kishte marrë qiellin, kishin mbërritur capak drejtues e policë të Komisariatit 1 të policies, që ndodhet në afërsi. Të cilët nuk kishin në dispozicion asnjë mjet ndihmës. Pak minuta pas tyre, pikërisht në momentin që 4 policë për pak u safiksuan në brendësi, mbërriti zjarrfikësja e parë, uji i së cilës sipas dëshmive nuk i guduliste fare flakët. Zjarri kishte përfshirë gjithë sipërfaqen prej gati 400 metra katror të magazinës dhe tymi i çliruar futej në dritaret dhe hyrjet e pallatit, dyert e të cilave ishin hedhur përtokë nga policia, që kërkonte të izoluarit. Pasi ishin nxjerrë 7-8 banorë dhe disa të tjerë ishin ngjitur në katin e fundit, Drejtori i Policisë së Tiranës A. Dervishi kishte qenë njeriu fjala e të cilit do të jepte vërtet alarmin. Me 4 policë të plagosur, (Agim Lami, Servet Ricku, Myzafer Hoxha dhe Hektor Ymeri) disa banorë në të njëjtën gjendje dhe situatë të panjohur për ata që ndodheshin ende në brendësi, drejtori kërkoi ndihmë nga të gjithë. Së pari aty mbërritën forcat speciale të të gjitha llojeve të drejtuara nga Artan Didi, specialistë të Mbrojtjes Civile, ushtarë etj. Ndërsa specialët u futën nga kati i dytë, specialistët e Mbrojtjes Civile, të vetmit që kishin mjete, u futën në mes të tymit.

Situata nën kontroll

Forcat speciale dhe Mbrojtja Civile nxorrën edhe 7-8 banorët e fundit të bllokuar në katet e sipërme të pallatit. Në katin e pestë specialistët e Mbrojtjes Civile gjetën dhe shpëtuan një grua gjysmë të asfiksuar dhe fëmijën e saj 1.5 vjeç. Ndërkohë një helikopter që u përqas mbi ndërtesë, por nuk pati fatin të jepte ndihmën e tij. Pasi u kontrollua dhomë më dhomë i gjithë pallati, rezultati i ka gëzuar të gjithë, filluar që nga Ministri i Pushtetit Vendor Ben Blushi, që ishte në vendngjarje. Por të gjithë ishin të bindur se kësaj radhe më shumë i kishte ndihmuar fati. Alarmi nuk ishte dhënë në kohë, zjarrfikëset nuk kishin mbërritur në kohë, uji i tyre bënte pak efekt në flakë të tillë, policëve u mungonin mjetet etj. Pra një situatë aspak e llogaritur për t'u përballuar. Fati ndihmoi edhe policët e banorët, që u bllokuan në brendësi së bashku me heroin tonë Agim Lami, të cilin shokët e gjetën të përmbysur dhe pa ndjenja në katin e dytë.


Arrestohen punëtorët që dyshohen për zjarrin

Policia e Tiranës ka vënë në pranga katër persona të dyshuar si shkaktarët e zjarrit. Ata janë katër punonjës izolues të kartoserës, të cilët po punon mbi një dritare të magazinës. Sipas burimeve të policisë së Tiranës, nga veprimet e kryera nga policia kriminale e Komisariatit numër 1, ka rezultuar se vatra e zjarrit është pikërisht poshtë dritares ku po punohej. Hetuesit, të ndihmuar edhe nga ekspertët zjarrfikës, kanë përjashtuar mundësinë e shkaktimit të zjarrit nga një defekt elektrik. Në fakt rrjeti ka ndihmuar më pas në përhapjen e flakëve. Katër izoluesit e çative ishin të parët që sinjalizuan për zjarrin. Nga veprimet paraprake të hetuesve ka rezultuar se zjarri është shkaktuar aksidentalisht nga aparati ngrohës që përdonin izoluesit. Gjithsesi, deri në orët e vona të mbrëmjes së djeshme, policia ka vendosur ndalim e tyre. Fati i mëtejshëm i punëtorëve do të vendoset nga rezultati i ekspertizës.


"News 24" transmetoi drejtpërdrejt ngjarjen

Televizioni "News 24" ka arritur të kenë një numër rekord tele-shikueshish gjatë ditës së djeshme, pasi ka arritur të japë drejtpërdrejt ngjarjen e djegies së magazinës në afërsi të Ministrisë së Jashtme. Duke patur mundësinë të instalojë studion lëvizëse në kohën e duhur në afërsi të objektit, që ishte duke u shkrumbuar gazetarët arritën të përcillnin ngjarjen drejtpërdrejt me të gjitha zhvillimet e saj. Madje u bënë pjesë të saj. Në një moment gazetari i televizionit Ilir Mati hyri në ndërtesë me një maskë antigaz, të cilën më pas zgjodhi t'ia jepte një ushtari që po futej në brendësi për të ndihmuar një qytetar.

[Shpirt Njeriu]

Ka nisur si një re tymi në brendësi të magazinës së orendive shtëpiake dhe për më shumë se dy orë ka kërcënuar plot 14 jetë njerëzish. Zjarri i rënë nga pakujdesia për pak nuk është kthyer në një tragjedi njerëzore. Banorët e pallatit në fund të bulevardit "Bajram Curri", të tmerruar kanë braktisur shtëpitë e tyre dhe kanë dalë jashtë për të shpëtuar jetën. Ndërkohë, nga brenda pallatit vinin britma dhe ulërima të njerëzve që kërcënoheshin nga flakët. Fatmirësisht në atë orë shumë prej banorëve ishin jashtë, por pranë pallatit. Ata kanë vrapuar fillimisht për t'u ardhur në ndihmë punonjësve të magazinës. Më pas, kur kanë parë se zjarri ka përfshirë të gjithë pallatin kanë vrapuar për të nxjerrë fëmijët dhe banorët që ishin brenda në shtëpitë e tyre. Ata kanë shkuar vetë kat më kat duke trokitur në çdo derë për të lajmëruar për rrezikun që u kanosej. Banorët kanë nxjerrë sa kanë mundur, ndërkohë që të pafuqishëm nga reja e madhe e tymit dhe në mungesë të aparaturave të posaçme janë tërhequr duke ndjekur veprimet e policisë që mori në dorë situatën.
Elvana Hoxha, banore në katin e shtatë të pallatit, ka rrëfyer për Gazetën ato momente të tmerrshme, kur, pasi ka parë pallatin të marrë flakë, ka vrapuar dhe ka nxjerrë nga shtëpia fëmijën 3 vjeç, vjehrrën dhe vjehrrin.

Si ndiheni tani që ka është shuar zjarri?
Nuk di çfarë të them. Po mundohem të mble-dh veten pasi kam parë tmerr me sy. Dhe të mendosh se në mes të atij zjarri ishte fëmija dhe dy prindërit e bashkëshortit tim.

Mund të na tregosh se çfarë keni parë?

Isha përpara hyrjes kur pashë që nga magazina poshtë pallatit të dilte tym. Nga britmat e punonjësve atje e kuptova që diçka e keqe po ndodhte, por nuk më shkonte në mendje se puna do të shkonte deri aty. Nuk kanë kaluar shumë minuta dhe zjarri mbuloi të gjithë magazinën dhe filloi të ngjitej në kat të dytë.

Ju si vepruat?
Ndoqa fqinjët e mi që u ngjitën me vrap nëpër shkallë për të lajmëruar për zjarrin dhe për të nxjerrë ata që ishin brenda. Jam ngjitur deri në katin e shtatë ku banoj dhe aty kam marrë fëmijën tim për ta nxjerrë poshtë. Në shtëpi kisha dy prindërit e bashkëshortit të cilët nuk lëvizin dot sepse janë në moshë të thyer dhe të sëmurë.

Kush ju ndihmoi?

Kur dola poshtë me fëmijën tymi kishte mbuluar të gjithë hyrjen. Bërtisja për ndihmë dhe kur e pashë që të gjithë ishin të zënë duke zbritur të tjerë, kam vajtur vetë dhe e kam zbritur vjehrrën time duke e mbajtur në shpinë. Për vjehrrin më ndihmuan disa policë, të cilët nuk më lanë të ngjitesha më, por shkuan dhe e morën vetë.


Specialistët: Edhe 30 minuta zjarr, ndërtesa do ishte shembur

Pak e pabesueshme, por disa specialistë që njohin ndërtimet, mes tyre një inxhinier, pohuan se me ndërtesën 7-katëshe mund të kishte ndodhur një tragjedi e përmasave të mëdha. Inxhinieri, i cili nuk dëshiroi të identifikohej, kishte vënë re se hekuri i shtyllave të betonit në katin ku shpërtheu zjarri ishte deformuar ose kishte filluar të deformohej. Po kështu inxhinieri pohoi se edhe vetë betoni nga flakët ishte zbutur e thërrmuar, pasi kishte humbur fortësinë. "Nuk di të them me saktësi, por për mua po të kishte vazhduar zjarri i fortë edhe 30 minuta, ndërtesa do të ishte shembur", pohoi për Gazetën inxhinieri. Sipas tij, shtyllat prej betoni nuk do të kishin duruar peshën nëse hekuri do të vazhdonte të nxehej më tepër, duke rrezikuar shembjen katastrofike të ndërtesës 7-katëshe. "As më pak dhe as më shumë, një fenomen i ngjashëm me atë shembjes së kullave binjake në Nju Jork", përfundoi inxhinieri.


Vlera e mallrave të djegur, 25 milionë lekë

Dëmi i shkaktuar nga zjarri në magazinën e orendive shtëpiake llogaritet në 25 milionë lekë. Shifra është deklaruar nga vetë përfaqësues të firmës dhe po verifikohet nga hetuesit e policisë. Ndërkohë, magazina e shitjes së tapeteve dhe orendive shtëpiake, e cila figuron me pronar Hamit Allkën, nuk është siguruar për mallin në raste vjedhjesh apo fatkeqësish të tilla. Sipas pretendimit të policisë, nga aksioni për lokalizimin dhe fikjen e zjarrit është shpëtuar një e treta e vlerës së mallit. Vlera e dëmit shtohet akoma më shumë po t'i shtojmë edhe dëmet e shumta të pësuara në banesat mbi magazinën. Dy kate janë bërë fare të pabanueshëm dhe banorëve nuk u është dhënë asnjë zhdëmtim apo ndihmë tjetër kompensuese nga shteti. Ndërkohë që dëmtime serioze ka patur edhe vetë pallati, të cilat po studiohen nga ekspertë të ndërtimeve.

[Shpirt Njeriu]

Ka mjaftuar nje zjarr i rene ne nje dyqan dje ne afersi te ministrise se Jashtme ne Tirane, qe te gjithe ne, te shikonim "live" ne ekranet tona televizive, gjendjen reale te strukturave te shtetit shqiptar. Te cilat edhe duke e ditur se po monitoroheshin nga dhjetra kamera dhe syte e qytetareve, kane dhene proven me te mire, te nje shteti te organizuar ne menyren me te keqe te mundur. Nje shfaqje qe gjithkush pas kesaj mund ta marre me mend, se si mund te perfundojne histori te ngjashme, apo tragjedi te permasave edhe me te medha, qe luhen cdo dite jashte unazes se kryeqytetit.

Lajmi per renien e zjarrit, ka shkuar me shpejt ne redaksite e mediave se ne rajonet e policise, apo te zjarrfikesve. Gazetaret kane mberritur ne vendngjarje, shume me shpejt se shumica derrmuese e efektivave qe paguhen per evitimin e fatkeqesive natyrore ose jo, si ajo e djeshmja. E si te mos mjaftonte vetem kjo, ne vendin e zjarrit ka filluar nje operacion i corganizuar, ne menyre te organizuar. Askush nuk u kujtua te rrethoje menjehere vendin, per te mbajtur larg jo vetem mediat, por mbi te gjitha sehirxhinjte dhe kalimtaret. Tubat e zjarrfikesve rezultuan te cara, ata nuk kishin qofte edhe nje shkalle te vetme per te shpetuar banoret, pale kundragaze, maska speciale apo doreza pune kunder zjarrit. Gje qe mund ta shnderronte ngjarjen, ne nje tragjedi te vertete, nese flaket do te zgjateshin edhe pak metra me tutje, tek nje pike karburanti, qe si edhe 40 te tjera ne Tirane, jane ndertuar poshte dritareve te pallateve te banimit.

E si te mos mjaftonin te gjitha keto, "turmes se shtetit" me uniforma police, zjarrfikesish, forcash speciale, te nderhyrjes se shpejte, ushtrise e gjithfaresh, iu shtuan edhe kostumet e zinj te disa drejtuesve te pushtetit lokal e qeverise. Te cilet,- ashtu si edhe Nano gjate tragjedise se Selenices,- vrapuan te tregonin "shqetesimin" dhe "fytyrat e pikelluara" para njerezve te tragjedise dhe medias. Ata nuk kane pse shkojne te jene prezent ne ngjarje te tilla. Mjafton qe te kryejne detyren per te cilen jane votuar e paguhen nga taksapaguesit: Te krijojne struktura dhe institucione efikase, qe ne cdo kohe e situate, secili te dije detyren dhe ta beje ate me shpejtesine dhe perpikmerine maksimale. Ne te kundert, do te vazhdojne te japin spektakle si ai i djeshme, te nje shteti prej kartoni, qe shkrumbohet dhe rrezikon te digjet, edhe nga disa shkendija saldatriceje.