Fotis Andropulos, Vampiri i Ballkanit

[Brari]

gsh
--------
RREFIMI I MUNIRE LEKES: NUK KAM SHITUR ASNJE FEMIJE

"Andropulos do më merrte foshnjën"
Nëna: Si u gjenda në klinikën e mjekut në Janica


--------------------------------------------------------------------------------

Granit Sokolaj


TIRANE

Ezmer, me mjekër të gjatë e të zezë dhe i shëndoshë si një ari". Kështu e përshkruan mjekun grek të dyshuar për trafik organesh që tashmë njihet me emrin Fotis Andropulos, njëra nga gratë, emri i të cilës është në listën e policisë greke, servirur disa ditë më parë Gazetës Shqiptare. Bëhet fjalë për 35-vjeçaren nga Dibra, Munire Leka, nëna e pesë fëmijëve, tre prej të cilëve është akuzuar se i ka shitur (të tre i ka me burrin e dytë, Aqif Iskurti). Në një intervistë dhënë dje për Gazetën, gruaja emigrante në Greqi ka treguar se nuk është e vërtetë se ajo ka shitur ndonjë nga fëmijët e saj. Sipas Munires të gjithë fëmijët ajo i ka në shtëpi shëndoshë e mirë. Ndërsa fakti i përfshirjes së emrit të saj në listën e botuar në Gazetë ka lidhje pikërisht me tentativën e mjekut grek Fotis për ti marrë një nga fëmijët. Gruaja tregon si "u implikua" në këtë trafik dhe përshkruan hollësisht si mjeku grek Andropulos tentoi t'i merrte pikërisht vajzën me të cilën përdore erdhi në Gazetë. Gruajaka treguar se si e ka vjedhur fëmijën e saj në befotrofin e Athinës dhe për këtë, burri i saj ndodhet prej tri javësh i arrestuar.

Kur ke ikur në Greqi?
Kam disa vite, në mos gaboj ne vitin `95. Kam ikur me burrin tim, Aqif Iskurtin.

Ku u vendoset?
Kam qëndruar në Athinë, më pas në një fshat afër saj.

Pse akuzoheni se keni shitur fëmijët?
Nuk e di përse më kanë akuzuar, kjo nuk është e vërtetë.

Si jeni gjendur në klinikën e Fotis në Janica të Greqisë?
Historia është pak e gjatë. Vajzën e parë (me burrin e dytë), Arjolën e kam lindur më 14 janar 1997 në Peshkopi pasi kisha ardhur nga Greqia. Edhe të dytën, Rudinën e kam lindur në Peshkopi, më 1 korrik 1998. Pas lindjes qëndrova 2-3 javë në Shqipëri ndërsa burrin e kisha në Greqi me fëmijët e tjerë. U nisa për atje ilegalisht. Ndërsa burri do më priste matanë kufirit. Në Korçë gjeta disa njerëz, emrat nuk ua di, që me thanë se do më kalonin kufirin kundrejt pagesës. Ecëm 2 orë në këmbë dhe hipëm në makinë me ata që na siguruan rrugën. Rrugës u bashkova edhe me burrin. Taksixhiun, me të cilin udhëtuam nga Korca, e quanin Kristo, mbiemrin nuk ia kujtoj. Na dërgoi për në Janica dhe na tha: "Mos rrini në rrugë se ju kap policia. Futuni në këtë klinikë se është e një mikut tim dhe këtu do të vijë t'ju marrë taksia tjetër". Ne do të shkonim në Athinë. Hymë brenda dhe qëndruam në sallon. Pas pak, nga një korridor doli një vajzë e re greke, infermiere, dhe më pyeti për foshnjën. Në atë moment ma mori në krah dhe më tha se kishte dëshirë ta ndërronte. I'a lashë fëmijën, sepse ishte 3-javëshe dhe vërtet kishte nevojë të ndërrohej, nuk mendova të keqen. Më pas nga një derë doli një çift, burrë e grua, nga Korça dhe më pyetën se nga vija. Femra më tha se kishte lindur fëmijë në klinikë. Kur e pyeta se çfarë kishte lindur, ajo m'u përgjigj: "Nuk e di, unë e kam shitur fëmijën dhe për këtë do të merrte lekë". Më zuri frika për foshnjën. Shkova të marr vajzën, por infermierja më doli përpara duke më bërtitur duke më thënë se "ju shqiptarët po i masakroni fëmijët, po bëni krime me ta, lëreni këtu, sigurojani jetën...". Në atë moment e kapa për flokësh infermieren, doja ta mbaja si peng, se kisha frikë se mos më morën fëmijën. Zbrita poshtë nëpër disa shkallë me flokët e grekes në duar që nuk i lëshoja, duke i bëritur burrit: "Hajde se po na marrin vajzën!" Infermierja bërtiste shumë. Bërtisnim të dyja. Në atë moment doli doktori me vrap. Sa hyri burri brenda, ai goditi me kokë burrin tim. Më pas erdhi policia, të cilën e lajmërova unë, pasi dola në rrugë dhe kërkova ndihmë. Policia na mori dhe në atë moment e sollën fëmijën.

Thuhet se Andropulos ju ka ofruar lekë për ta lënë fëmijën në klinikën e tij dhe ju i keni refuzuar...
Pas sherrit, burri më tregoi se mjeku i klinikës i kishte thënë: Mos u bëj budalla, lere fëmijën këtu se të jap shumë para. Madje, në momentin e sherrit, në tokë kam parë shumë dhrahmi. Nuk e di të kujt ishin. Unë me vete kisha 400 mijë dhrahmi, të cilat policia m'i dha në fund. Për të tjerat nuk di gjë.

Ç'ndodhi pas sherrit?
Na çuan në biruca. Policët e rrihnin burrin tim, duke i thënë se çfarë kishte kërkuar në atë klinikë. Ne i sqaruam, por nuk na besuan asgjë. Në bënë gjyqin dhe na dënuan me nga 18 muaj burg secilin, ose duhet të paguanim nga 600 mijë dhrahmi. Paguam paratë, që na i dhanë disa miq, dhe dolëm. Nuk kishim ç'bënim. Dëshmitë tona dhe të dy dëshmitarëve që i solli avokati nuk u morën aspak për bazë.

Mjeku erdhi në seanca?
Asnjëherë. Vetëm dëgjoja të flitej për të dhe që i përmendnin emrin Fotis.

Po vajza juaj?
Na thanë të merrnim vajzën në një spital shtetëror, ku e kishin mbajtur. Kur shkuam doktori që do firmoste u vonua. Kishte edhe mjaft kamera televizionesh. Kur po prisnim, erdhi policia dhe na tha se gjykata ka vendosur që duhet gjyq tjetër për të marrë fëmijën. Vazhduam gjyqet, hymë borxh për avokatin. Por vajzën nuk e mora dot.

Çfarë bëre më tej?
Në fund, vajzën e vodha. Nuk ma dhanë mua, por e lanë në një shtëpi fëmijësh në Athinë, ku kisha të drejtë ta shikoja 2 herë në ditë, në orën 9.00 dhe 15.00. Ishte 21 mars `99. Shkova ta takoja vajzën. Një punonjëse që më jepte dokumentin të futesha në befotrof, më tha se edhe tri ditë mund ta shikoja, pasi shtëpia e foshnjës do ta jepte për birësim. Më 22 u mundova ta vidhja, por nuk e mora dot. Më 23 e mora në krah dhe ika. Zoti më ndihmoi. Mora një taksi dhe qëndrova e fshehur 3 ditë te një shqiptar, sepse nuk shkoja në fshat pasi kisha frikë? Pas tri ditësh mora përsëri një taksi dhe erdha në Shqipëri ku ndenja deri në vitin 2001.

Ku ndodhet burri juaj tani?
Para tri javësh e kapi policia në Athinë, pasi nuk kishte dokumentet. Emrin e tij e kishte pasur të regjistruar policia për çështjen e fëmijës që unë mora nga jetimorja, pasi nuk kishim ndjekur edhe gjyqet.


Dëshmia e dytë për mjekun grek të trafikut të bebeve, Fotis

Kjo është dëshmia e dytë autentike që akuzon mjekun grek të trafikut të bebeve shqiptare, të njohur me emrin Fotis Andropulos. Munire Leka 35 vjeçe, një grua nga Peshkopia, me akuzën e saj risjell në skenë trafikun e bebeve shqiptare në drejtim të Greqisë dhe fatin e panjohur të tyre. Pak ditë më parë Gazeta publikoi dëshminë e një tjetër gruaje nga Korça, Donika Ajdinit, e cila pasi përshkroi klinikën e tmerrit në Janica të Greqisë, tregoi me gisht fotografinë e mjekut grek që blinte bebet shqiptare të njohur si Fotis Andropulos. Pra tashmë janë dy dëshmi të publikuara që akuzojnë të njëjtin person që në shtetin fqinj gëzon liri dhe shëndet të admirueshëm. Dy vjet më parë në Shqipëri pati një sërë procesesh gjyqësore dhe në burg përfunduan disa sekserë të grave shqiptare që shisnin fëmijët e tyre në Greqi, pikërisht në klinikën e mjekut Fotis. Por askush nuk u mundua që hetimi të shtrihej edhe përtej kufijëve shqiptarë. Do të mjaftonte një dëshmi e vetme e mirëadministruar nga organet e drejtësisë greke, që mjeku Fotis të mbërthehej nga akuza. Një hap i tillë do të vinte një gur të madh në themelin e hakmarrjes së drejtësisë lidhur më këtë çështje. Sipas një liste të publikuar nga Gazeta janë të paktën 20 gra shqiptare që kanë shitur fëmijët e tyre në këtë klinikë. Ndërkohë që mjeku i tmershëm Fotis është dënuar vetëm me 12 muaj burg, pa shkuar asnjë ditë të vetme në qeli. Sipas një raporti të freskët të Ministrisë së Brendëshme italiane pikërisht ky mjek famqkeq ka në projekt dhe ka filluar zbatimin për ndërtimin e e funksionimin e dy klinikave mjekësore në Shqipëri.

-----------

[miko]

hi.persa i perket kesaj ceshtje mesa di une nuk eshte marre asnje mase konkrete nga ana e drejtesise greke,ceshtja eshte kaq sa e pershkruan autori i ketij shkrimi por mund te them se eshte akoma me tragjike jane shume e me shume femije te shitur tek ky person.kjo ceshtje kur ne shqiperi ulerijne faktet ne greqi neglizhohet ose me mire thene mbulohet ashtu sic po behet avash avash dhe ne shqiperi se nqs donin autoritetet e dy vendeve atehere ishin marre masa ndaj ketij personi,por ja qe ne te vertete sic tregon dhe vete autori i tekstit ky person eshte akoma i lire.le te shpresojme qe do te ndali kjo tragjedi dhe me se fundi do te funksionoje drejtesia

[StterollA]

Gjendet mjeku që i shet foshnjat

Gjendet mjeku grek që ka shitur dhjetra fëmijë shqiptarë. Njeriu i njohur me emrin Fotis Andropulos, i dënuar në vitin 2002 vetëm me 12 muaj burg dhe me kusht deri në vitin 2005, është identifikuar në një zonë në afërsi të qytetit të Selanikut, ku mbahet nën vëzhgim nga policia greke.
Kundër njeriut që quhet Fotis, por që thuhet me bindje se "Andropulos" nuk është mbiemri i tij i vërtetë, tashmë janë duke u dokumentuar akuza të tjera për shitjen e fëmijëve shqiptarë, më të rënda e më bindëse se ato të dy viteve më parë, të cilat mundën ta dërgonin në burg vetëm për pak ditë.
U grumbulluan fakte që vërtetonin se bëhej fjalë për shitje foshnjash, porse ishte e vështirë të vërtetohej nëse këta fëmijë ishin përdorur për trafik organesh.
Gazetarët kontaktuan me të vetmen grua që ka denoncuar shitjen e fëmijës së saj te mjeku grek me emrin Fotis Andropulos. Donika Ajdini nga Korça ishte njeriu i parë pas denoncimit të së cilës në vitin 2002 mori udhë hetimi i famshëm i trafikut të fëmijëve shqiptarë në drejtim të Greqisë. Gruaja, që jeton ende në Korçë, u kontaktua nga gazetarët me një qëllim të paracaktuar.
Menjëherë pas kontaktit, gruas iu treguan disa foto të ndryshme mes të cilave ajo duhet të gjente atë të mjekut të quajtur Fotis Andropulos. Asnjëherë, askush nuk ishte munduar të bënte një lidhje mes këtij mjeku të akuzuar dhe fëmijës së shitur të Donika Ajdinit. Mjeku Fotis ishte denoncuar në vitin 2002 nga një tjetër grua me banim në Peshkopi. Por, duke patur miq të fuqishëm në Greqi, ai pothuaj kishte dalë i palagur.
Ndërsa kishte fotografitë përpara, Donika Ajdini, pa u menduar shumë, tregoi pikërisht foton e grekut Fotis, duke thënë: "Këtij njeriu i shita foshnjën. Nuk e harroj asnjëherë, për shkak se ai ka këmbëngulur shumë që unë të bëhesha operacion, ndonëse nuk kisha asnjë problem gjatë shtatzanisë. Si të thuash, ishte një operacion i detyrueshëm, për të më thënë më pas se fëmija më vdiq".

Lobi