“Eagle Mobile”, të hënën merr licencën

[ganoid]

“Eagle Mobile”, të hënën merr licencën

“Kompania e tretë e shërbimit celular do të ofrojë tarifa më të ulëta se AMC dhe “Vodafone””

Bledjana Beqiri

Celularët

“Eagle Mobile” ditën e hënë merr licencën për të hyrë në tregun shqiptar. Kompania e tretë e telefonisë celulare pritet që të marrë në fillim të javës së ardhshme licencën nga Enti Rregullator i Telekomunikacioneve. Këtë e ka pohuar dje në një konferencë për shtyp ministri i Transporteve dhe Telekomunikacioneve, Spartak Poçi, sipas të cilit tregu shqiptar së shpejti do të ketë edhe një kompani të re celulare. "Ditën e hënë do të bëhet zyrtar dorëzimi i licencës së miratuar nga Enti Rregullator i Telekomunikacioneve dhe këtë licencë unë do t'ia dorëzoj personalisht drejtorit të përgjithshëm të Albtelekomit",-deklaroi dje Poçi. Sipas tij, me marrjen e kësaj licence, “Eagle Mobile” ka të drejtë që të operojë menjëherë në treg. “Operatori i tretë i telefonisë celulare do të fillojë nga puna, brenda gjashtëmujorit të parë të këtij viti”, -sqaron ministri i Telekomunikacioneve, duke shtuar se pas dorëzimit të kësaj licence, Albtelekom nuk ka asnjë pengesë ligjore për të filluar nga puna si operatori i tretë celular. Megjithatë, ministri sqaron se nuk është e lehtë që “Eagle Mobile” të fillojë aktivitetin, pasi ai do të ndikojë në të gjithë tregun e brendshëm të komunikacioneve . “Albtelekom do të fillojë këtë aktivitet me tarifa më të ulëta, sesa dy operatorët e tjerë celularë, “Albania Mobile Communication” dhe “Vodafon Albania”, duke ndikuar në këtë mënyrë edhe në tarifat, që do të ofrojnë më pas këta dy operatorë”, -theksoi ministri.
Operatori i 3-të celular
Albtelekom pasi ka regjistruar në gjykatë shoqërinë e re të telefonisë së lëvizshme, pritet që brenda tre ditësh të marrë nga Enti Rregullator i Telekomunikacioneve licencën përfundimtare. Operatori i tretë i telefonisë celulare do të hyjë në treg me tarifa më të ulëta, duke bërë të mundur që brenda një periudhe të shkurtër të thithë 100-150 mijë abonentë nga “Albania Mobile Communication” dhe nga “Vodafone Albania”, -pohojnë pranë Albtelekom. Ato sqarojnë se nëpërmjet shfrytëzimit të infrastrukturës ekzistuese, kostoja e shërbimit celular do të jetë më e ulët. Kompania e re celulare pritet që të luajë në treg me tarifa tepër të ulëta më krahasim me dy operatorët e tjerë, duke ngjallur kështu më shumë konkurrencë, si dhe uljen e çmimeve në treg. Specialistët pohojnë se Shqipëria mbahet si një nga vendet me tarifa më të larta të telefonisë celulare në rajon, por edhe në Europë, edhe pse niveli i jetesës është më i ulët. Sipas tyre, kjo vjen sepse në tregun shqiptar operojnë vetëm dy kompani, të cilat mbajnë pothuajse të njëjtat çmime, duke mos ofruar tarifa më ekonomike për klientët e tyre.
Si lindi “Eagle Mobile”?!
Albtelekom në 24 tetor të këtij viti regjistroi si person juridik në Gjykatën e Shkallës së Parë Tiranë shoqërinë e re “Eagle Mobile”, në formën e shoqërisë anonime pa ofertë publike. Burime pranë Drejtorisë së Përgjithshme të Albtelekomit pohojnë se ky institucion zotëron 100 për qind të aksioneve të operatorit të tretë të telefonisë celulare dhe është në pritje të licencës së Entit Rregullator të Telekomunikacioneve (ERT). “Presim nga ERT për të marrë licencën, duke zbatuar në këtë mënyrë tërësisht kuadrin ligjor për këtë shoqëri”, -pohojnë pranë Albtelekomit, duke shpjeguar se tashmë është hartuar edhe plan-biznesi i shoqërisë së re “Eagle Mobile”. Në këtë plan-biznes janë vënë në dukje kapacitetet ekzistuese të Albtelekomit, studimi mbi plan-marketingun ku përshihen studimet objektive, zonat e mbulimit, analiza e konkurrentëve, plani strategjik për arritjen e objektivave, si dhe marrëdhëniet me operatorët e huaj GSM.
Investimi për operatorin e tretë
“Në fazën e parë ne mendojmë që të investojmë 15-20 milionë euro, të cilat do të përpiqemi t’i sigurojmë përmes një kredie afatmesme ose nëpërmjet burimeve të brendshme të Albtelekomit”, -pohojnë zyrtarë pranë Albtelekomit. Sipas tyre, në fazën e parë parashikohet që të realizohet mbulimi i ultësirës perëndimore të Shqipërisë, si dhe disa qytete kryesore të vendit, ku synimi ynë është që të shkojmë në 100 mijë abonentë. “Futja sa më shpejt në treg është detyra kryesore e Albtelekomit, sepse shpejtësia është një pjesë e rezultatit që ne mund të arrijmë në konkurrencë me dy operatorët e tjerë”, -sqarojnë drejtuesit. “Eagle Mobile” do të shfrytëzojë infrastrukturën ekzistuese të Albtelekomit, duke pasur mundësi që kostoja e shërbimit celular të jetë më e ulët. “Operatori i tretë celular do të funksionojë si të gjithë operatorët e tjerë, me klientë me kontratë dhe me kartë të parapaguar. Asnjë ndryshim nuk do të ketë mes operatorëve AMC dhe “Vodafone”, përveç tarifave, të cilat do të jenë më të ulëta”, -sqarojnë pranë Albtelekomit.

Tarifat

Poçi: “11 variante për tarifat e reja të Albtelekomit”

Specialistët e Albtelekomit kanë propozuar 11 variante të reja tarifash për telefoninë fikse, duke paraqitur çmime më të ulura për abonentët familjarë. Kështu ka deklaruar dje ministri i Transporteve dhe Telekomunikacioneve, Spartak Poçi, në një konferencë për shtyp. Ai u shpreh se “janë gati për diskutim 11 variante të kombinuara tarifash, nga të cilat do të zgjidhet varianti më i përshtatshëm”. Sipas ministrit Poçi, këto variante janë të gjitha në përputhje me orientimet e qeverisë, të shprehura në mbledhjen e Komitetit Ndërministror të Politikave Ekonomike. Mbledhja e Këshillit Mbikëqyrës të Albtelekomit, do ta saktësojë këtë problem dhe brenda kësaj jave do të vendoset për tarifat e reja.

[antip]

Shpresojme se kjo kompani te trajtoje me mire klientin dhe te fuse dicka vertet te re ne rrjetin GSM. Vecse kam nje medyshje: Fakti qe eshte nen pronesi te Albtelekomit nuk me inkurajon te kem "besim" te madh ne kete rrjet te trete. E them kete duke patur parasysh te kaluaren tallese dhe vjedhese te Albtelekomit ndaj klienteve te saj fikse. Nuk shoh arsye perse me klientet mobile te sillet ndryshe, por shpresoj qe konkurrenca me e madhe ne kete sektor te ndikoje pozitivisht.

[ganoid]

Ulen tarifat e “Albtelekom”-it

Tarifat e shërbimit për abonentët familjarë janë ulur nga 300 lekë në muaj në 200 lekë. Tani 2 minuta kohë bisede lokale do të kushtojë 3 lekë nga 6 lekë dhe 10 minuta do të kushtojë 7 lekë nga 30 lekë që ka qenë më parë


Ulen tarifat e telefonisë fikse. Tani abonentët familjarë do të kenë mundësinë për të folur më shumë dhe për të paguar më pak se një muaj më parë. Kështu, tarifat e shërbimit për abonentët familjarë janë ulur në 200 lekë në muaj nga 300 lekë që ishte, 2 minuta kohë bisede lokale do të kushtojë 3 lekë nga 6 lekë dhe 10 minuta të bisedës lokale do të kushtojnë 7 lekë nga 30 lekë që ishte që nga 1 dhjetori i vitit të kaluar. Një gjë e tillë është bërë e ditur nga kryetari i Këshillit Mbikëqyrës të “Albtelekomit”, Ilir Ciko. Sipas tij, në lidhje me bisedat lokale, nëse këto telefonata do të bëhen në harkun kohor nga ora 22.00 deri në orën 8 të mëngjesit, do të kushtojnë vetëm 5 lekë.
Për sa u përket tarifave të pajtimtarëve të tjerë, Ciko shtoi: “Pajtimtarët jofamiljarë do të pësojnë një ulje më të vogël tarifash: 2 minuta kohë bisede do të kushtojnë 4.5 lekë nga 6 lekë që është dhe një gjë e tillë vlen për periudhën e komunikimit nga ora 08.00 – 20.00. Për 10 minuta bisede nga 30 lekë që ishte, do të bëhet 10.5 lekë. Ndërsa për sa i përket periudhës së komunikimit të reduktuar nga ora 20.00 – 08.00, kjo ulje tarifash do të variojë për bisedat 2-minutëshe do të bëhet 3 lekë nga 6 lekë që është dhe për intervalin kohor prej 10 minutash nga 30 lekë në 7.5 lekë. Tarifat ndërurbane dhe ndërkombëtare nuk do të ndryshojnë, pra do të mbeten ato që u vunë që më 1 dhjetor të 2003-it, ku pësuan një ulje të ndjeshme në krahasim me ato të mëparshmet”. Sipas Cikos, tarifat do të kenë ulje 2-3 herë, por kjo ulje mund të shkojë dhe deri në 8-9 herë, në varësi të bisedës që do të bëjë konsumatori. Synimi i Këshillit Mbikëqyrës të “Albtelekomit” është që të mos ketë diferencime tarifash, pra të bëhet stimulimi i konsumatorit në mënyrë që të bëjë biseda telefonike me çmime sa më të arsyeshme. “Pra, sa më shumë që të flasësh, aq më të ulura do të jenë çmimet e bisedave telefonike”, - është shprehur Ilir Ciko.
Gjithashtu, kryetari i Këshillit Mbikëqyrës lidhur me aplikimin e sistemeve u shpreh se është aplikuar edhe sistemi stimulues në lidhje me ditët e javës. Kështu, të shtunave dhe të dielave do të ketë një ulje të tarifave të telefonisë fikse në krahasim me ato të ditëve të tjera të javës.



Ciko: “Publiku dhe mediat ndikuan në uljen e tarifave të telefonisë fikse”


Reagimi negativ i konsumatorit shqiptar, i institucioneve të pavarura shtetërore apo joqeveritare, si dhe kontributi i drejtpërdrejtë i mediave kanë qenë, sipas kryetarit të Këshillit Mbikëqyrës të “Albtelekomit”, Ilir Ciko, faktorët kryesorë që kanë ndikuar në uljen e tarifave të “Albtelekomit”. Tarifat e reja të telefonisë fikse vijnë si rrjedhojë e verifikimit të tyre pas rritjes që u është bërë që nga 1 dhjetori i vitit të kaluar. Këto tarifa nuk dhanë efekte pozitive si për shoqërinë e telefonisë fikse, ashtu edhe për konsumatorin

[antip]

Sigurisht, kjo pritej! Fitimet e Albtelekomit, pas rritjes se tarifave, jo vetem qe nuk u rriten, por madje paten nje renie te dukshme. Por tashme ka humbur shume me teper besimin ne popull dhe kjo ulje e deklaruar nuk besoj se do ta riktheje situaten si me pare (jo se me pare ishte nje kompani-engjell, por te pakten ishte me e permbajtur ne cmime...)