Calcio Mercato

[Eros]

Georgatos tek Aek i Athinës

Këtë herë nuk do të kthehem më tek Interi. Grigorios Georgatos ka firmosur një kontratë 3-vjeçare me mundësi për edhe një tjetër, me Aek të Athinës, ku do të marrë 350 mijë euro në sezon. I lënë i lirë nga klubi i Interit, lojtari ka qenë i destinuar të kthehet përsëri në athe. Klubi që u interesua menjëherë për të, ishte Aek. Në 28 ndeshje në kampionat, me dy gola në sezonin 1999-2000, ka qenë dhe aventura e grekut Georgatos

[SUPERSTAR_N1]

Milan Blen Rivaldon
Ka një kampion tjetër bote në ekipin e Milanit. Rivaldo, 30 vjecc, brazilian i lindur në Reçife, ka shënuar pesë gola në botërorin e fundit të fituar nga kombëtarja e tij. Shtatë orë bisedime dhe më pas vjen lajmi pozitiv: menaxherët e Rivaldos kanë rënë dakord me kuqezinjtë dhe tashmë pritet vetëm firma e futbollistit, që nuk do të vonojë. Ariedo Braida, drejtuesi kuqezi, Ernesto Bonzeti, i dërguar i Milanit, Perdro de Filipe, menaxher i FIFA-s dhe mik i ngushtë i lojtarit, dhe avokati i Rivaldos, Karlos Arini, kanë diskutuar deri në orën 23.15 të së mërkurës. Të gjitha vështirësitë për sa i përket transferimit të Rivaldos te Milani pas lënies jashtë skuadre nga Barcelona kishin përfunduar me kohë dhe është diskutuar gjatë vetëm për disa detaje të vogla.
Vështirësia e fundit ishte ajo e kontratës. Arini, në emër të futbollistit të tij, kërkonte 6 milionë euro për tre vjet. Ndërsa Milani ishte dakord me shifrën, por kërkonte një kontratë dyvjeçare. Më pas u gjet një rrugë e mesme, ndaj Rivaldo do të luajë te Milani për tre vjet, por do të përfitojë 4.5 milionë euro në sezon, shifër që mund të rritet për shkak të sponsorëve të ndryshëm që u afrohen kuqezinjve pas ardhjes së Rivaldos. Arini, gjatë bisedës për të shtuar sasinë e parave në kontratë, ka përmendur edhe interesimin e Mançesterit për brazilian, por më pas, gjatë bisedës, është marrë vesh se Aleks Fergusoni është më shumë i tërhequar nga Hernan Krespo. Pas mbledhjes u vendos që Rivaldo të vinte në San Paolo vetëm për të firmosur. Këtë e ka bërë të ditur vetë avokati i tij, Arini. Vetëm ky formalitet është akti i fundit i transferimit të bujshëm të Rivaldos te kuqezinjtë. Nuk ka shërbyer as ndërhyrja e Zinedin Zidanes për marrjen e Rivaldos nga Reali i Madridit. Zidane kishte thënë: "Jam gati ta ul rrogën po mori Reali një lojtar të tillë." Por me sa duket, Florentino Perezi nuk ka qenë dakord me këtë transferim. Presidenti i Realit e mbajti fjalën dhe e la Milanin të vepronte i qetë, duke mos e përsëritur rastin e bujshmë të blerjes së Luis Figos nga Barcelona. Me Realin jashtë lojem për Milanin qe më e lehtë ta mbyllte një tratativë të tillë, sepse konkurrentët e tjerë ishin shumë poshtë emrit të kuqezinjve.
Rivaldo kishte vite që kërkonte të vinte në Itali. Milani e kishte kërkuar që në qershor të vitit 2000, kur dukej se ai do të largohej nga Barcelona. Rivaldo, më pas, kërkoi të qëndronte te Barça dhe rinovoi kontratën me ekipin katalonjas. Por Milani nuk u dorëzua dhe vetëm katër ditë pas largimit të Rivaldos nga Van Gali, Berluskoni ndërhyu, duke bërë të tijin brazilianin.
Tashmë derbi Milan-Inter do të jetë edhe derbi i dyshes Rivaldo-Ronaldo. Rivaldo kuqezi dhe Ronaldo zikatër. "San Siro" ëndërron që tani. Detyrën e vështirë tani e ka Ançeloti. Vërtet që Rivaldo është një kampion i madh, por Milanit nuk i mungojnë kampionët në atë rol. Shevçenko, Inzagi e Tomasoni i kanë bllokuar rolet e sulmit dhe Rui Kosta, Sedorf dhe Pirlo janë tre emrat që mund të luajnë rolin e fantazistit. Por vendi për Rivaldon nuk mungon dhe kjo është ëndrra më e madhe e tifozëve kuqezinj, që Rivaldo të luajë në krah të Rui Kostës, pasi vetë Galiani e ka siguruar portugezin se te Milani ka vend për të dy.

[SUPERSTAR_N1]

Guidoliniua përqendrim
Tekniku kuqeblu Françesko Guidolin nuk ka besim te rezultati 2-0 i arritur në ndeshjen e parë në Dall Ara dhe u kërkon djemve të tij përqendrimin maksimal edhe në ndeshjen e Bjellorusisë, kundër Bate Barisovit në turnin e tretë të Intertotos: "Historia e futbollit është e mbushur me surpriza të tilla dhe kthesa rezultatesh në kupat e Evropës. Shkojmë të luajmë me një skuadër që e njohim pak dhe në një vend që nuk e njohim aspak. Në rast se mendojmë për kundërshtarin tjetër, do të pësojmë një disfatë të rëndë." Bolonja shkon në Bjellorusi me një të dëmtuar, pikërisht pa kapitenin Xhuzepe Sinjori.

[SUPERSTAR_N1]

Lacio, mjaft afer shitja e Lopezit
Fakti që Lacio do të luante pa disa nga kampionët e saj vitin e ardhshëm për të përmirësuar bilancin dhe për të mbushuar arkën e boshatisur, ishte një diçka që dihej. Masimo Kranjoti vazhdon të mbajë të mbërthyer në kryeqytet Nestën dhe po mendon për shitjen e lojtarëve të tjerë. Pas tratativave për Sorinin dhe Kraspon, duket se një tjetër argjentinas do t'i lërë bardhekaltrit. Bëhet fjalë për Klaudio Lopezin. Për të ka ardhur një ofertë nga Çelsi dhe klubi i Londrës është gati të shpenzojë 25 milionë euro për të dërguar Lopezin nën urdhrat e Ranierit. Por për të ulur sasinë e milionave, në tratativë mund të futet islandezi Gudjonsen, që ka kërkuar të largohet nga Londra. Një tjetër lojtar që kërkohet nga Çelsi është Dino Baxho, por anglezët nuk japin para, por kërkojnë vetëm një ndërrim me Ambrozetin. Lacio mbetet e tërhequr nga paratë në dorë dhe mund të shesë Baxhon te Totenhemi, i cili ka bërë një ofertë zyrtare pak ditë më parë.

[SUPERSTAR_N1]

Bisedimet që do ta çonin Ronaldon drejt Realit të Madridit janë në prag të përfundimit. Në fakt, sipas disa burimeve të marra nga shtypi brazilian dhe të konfirmuara nga agjenti i "Fenomenit", Martins, "merenguesat" dhe zikaltrit, gjatë këtyre ditëve, do të nënshkruajnë marrëveshjen e shumëpërfolur. Vetë Martinsi konfirmoi edhe se dy klubet janë takuar me njëri-tjetrin për të diskutuar për të ardhmen e brazilianit edhe përpara disa ditësh, ndofta në Majorka. Strategjia është gjithnjë e njëjta: Reali përgënjeshtron përmes Valdanos që t'i ketë parashtruar ndonjë ofertë Moratit për Ronaldon, por ndërkohë drejtuesit e Interit dhe Realit vazhdojnë matrapazllëqet rreth tryezës së rrumbullakët. Interi nuk ka aspak ndër mend t'i japë duart Ronaldos, por mosmarrëveshjet e numrit 9 me Kuperin dhe kriza e marrëdhënieve të brazilianit me klubin duhet t'ia kenë mbushur mendjen përfundimisht Moratit se, tekefundit, shitja e tij nuk do të përbënte ndonjë dramë. Ndaj pengesa e fundit, me sa duket, mbetet vetëm koha. Reali, nëse ka seriozisht ndër mend ta blejë Ronaldon, duhet ta bëjë një gjë të tillë medoemos brenda 31 gushtit, çka shkon në përputhje me afatin e fundit të caktuar nga UEFA për federimet e lojtarëve në Ligën e Kampioneve. Dhe, duke përfituar nga kjo domosdoshmëri e "këmishave të bardha", Interi është duke e zvarritur enkas marrëveshjen, në mënyrë që të përfitojë sa më shumë euro. Hëpërhë, oferta është 50 milionë euro, plus Makelelen. Ndërkohë, nuk përbën më asnjë sekret fakti se zikaltrit kanë piketuar si pasardhës të Ronaldos tek Interi sulmuesin e Parmës, Marko di Vaio. Po vetë Ronaldo, çfarë thotë? Ai as që do t'ia dijë. S'i bëhet vonë për asgjë, por do vetëm që kjo çështje të mbyllet sa më parë. Por që synon të largohet nga Milano, kjo është e sigurt. Roni e konsideron të mbaruar "martesën" me Interin dhe tashmë mezi pret të transferohet në Spanjë. Pikërisht për këtë arsye, u ka lënë liri të plotë veprimi agjentëve të tij, sidomos Martinsit, i cili, siç e përmendëm edhe më lart, është i gatshëm që pas pak ditësh të pozojë përkrah klientit të tij me fanellën e kampionëve të Evropës. Ndaj dhe ekziston përshtypja se java e ardhshme do të përcaktojë shumë gjëra. Ndofta nuk do të mjaftojnë dy ditë që marrëveshja të nënshkruhet, por kjo tashmë është punë e mbaruar. Kësisoj, përvoja e "Fenomenit" te zikaltrit do të ketë një fund të hidhur.

[SUPERSTAR_N1]

Mesfushori francez shpalos ambiciet dhe flet për sezonin e tij të tretë me Interin
Dalmat: Të fitojmë për presidentin dhe tifozët
Megjithëse është vetëm 23 vjeç, Dalmati ka ndërruar shumë skuadra përpara se të mbërrinte në Itali, në gjirin e ekipit të Hektor Kuperit. Gjatë verës u përfol shumë për një transferim të tij te Lacio, në kuadër të bisedimeve që do të sillnin Nestën në "San Siro", por pas ndërhyrjes së presidentit Morati, futbollisti "u blindua", duke u cilësuar i pashitshëm. Dalmati është një mesfushor mjaft i shpejtë dhe teknik, me tipare sulmuese. Nga dinamika e driblimeve të tij, nga zotërimi dhe shumë veprime të tjera me topin, specialistët e kanë krahasuar me Ronaldon. Por në Francë ka edhe nga ata që i varin te Dalmati shpresat për të parë pas disa vjetësh një Zidane të dytë. Gjatë një interviste që u transmetua dje në televizor gjatë emisionit sportiv italian "La Domenica Sportiva", Stefan Dalmati foli për sezonin e tij të tretë me fanellën zikaltër.
- E keni nisur sezonin si mesfushor i qendrës. Si ndiheni në këtë rol?
- Mirë, është roli ku mund ta ndihmoj më shumë skuadrën. Gjatë sezonit të kaluar, luajta disa ndeshje si anësor, por këtë vit trajneri më tha se donte që unë të luaja në qendër.
- Në Francë thuhet se mund të jeni pasardhës i Zidanes. Ju çfarë mendoni?
- Mendoj se kemi karakteristika të ngjashme, por unë jam Dalmat, kurse ai është Zidane. Më duhet të punoj dhe të bëj shumë sakrifica që të arrij nivelin e tij. Gjithsesi, shpresoj që të paktën brenda dy-tre vjetësh të jem po aq i zoti sa dhe ai.
- Pas zhgënjimit të Francës në Botëror, shpresoni te thirrja në kombëtare?
- Shpresoj shumë që të luaj në kombëtare dhe mezi e pres thirrjen e Santinisë. Disa prej ndeshjeve të mia të mëparshme janë ndjekur nga një vëzhgues i posaçëm i kombëtares franceze. Tashmë gjithçka varet nga unë dhe nga ajo që do të bëj me Interin.
- Flitej për një ndryshim të mundshëm të numrit të fanellës suaj, por në fund mbajtët 18-ën?
- Më pyetën nëse doja 10-ën, por gjatë këtyre viteve më ka ecur mirë me 18-ën, ndaj parapëlqeva ta mbaj.
- Sivjet do të luani kampionatin e tretë me fanellën e Interit. Cilat janë synimet tuaja?
- Skuadra që kemi është mjaft konkurruese. Dëshira jonë e përbashkët është që të fitojmë kampionatin, pasi ndihemi borxhlinj ndaj vetvetes, ndaj publikut dhe ndaj presidentit, pas asaj që ndodhi vjet.

[SUPERSTAR_N1]

Gjermani flet për aventurën e re italiane me Kievon
Bierhof: Erdha për t'u zbavitur
Një nënkampioni bote te Kievo. Oliver Bierhof, 34 vjeç, ka zgjedhur Veronën për aventurën e tij të katërt në Itali, pas atyre në Askoli, Udine dhe Milano, në radhët e kuqezinjve. Shtatlarti që sezonin e kaluar luajti në Francë me Monakon, ka nënshkruar një kontratë njëvjeçare me klubin e presidentit Kampedeli. "Në radhë të parë, gëzohem shumë që ndodhem këtu, - deklaroi ai. - Mendoj se me përvojën time mund t'i jap diçka më shumë kësaj skuadre. Për sa i përket kontratë sime, nënshkrova vetëm për një vit, sepse, duke pasur parasysh edhe moshën që kam, mendova se është më e drejtë kështu." Më pas, Bierhofi e falënderoi publikisht trajnerin Del Neri. "E falënderoj sepse qe ai që e kërkoi me këmbëngulje ardhjen time në "Bentegodi". Ai më shpjegoi lojën e skuadrës dhe metodat e punës, të cilat më kanë pëlqyer shumë. Dua që karrierën time ta mbyll sa më mirë dhe mendoj se këtu ekzistojnë të gjitha kushtet për një gjë të tillë. Nuk është e lehtë për një ekip që një vit më parë mbërriti nga kategoria e dytë, që sivjet të konkurrojë si në kampionat ashtu edhe në kupat e Evropës. Gjithsesi, unë ndihem i gatshëm për të dhënë kontributin tim dhe mendoj se do të zbavitem pa masë. Dua ta ndihmoj sa më shumë Kievon. Kush më njeh mirë, e di se jam një lojtar shumë punëtor. Vjet ekipi u rendit i pesti, sivjet mund të bëjë edhe diçka më shumë," - përfundoi gjermani.

[SUPERSTAR_N1]

Fenomeni" shtyn Mutunë drejt Parmës
Arritja e mundshme e marrëveshjes mes Ronaldos dhe Realit të Madridit do t'i hapte dritën jeshile "valsit" të një vargu sulmuesish, që do të fillonte me transferimin e pykës së Parmës, Marko di Vaio tek Interi. Ndërkohë, verdheblutë, që tashmë e kanë fjetur mendjen për largimin e sulmuesit të tyre kryesor, kanë filluar bisedimet për të gjetur pasardhësin e golashënuesit të rritur në radhët e Lacios, që ka gjasa të jetë rumuni Adrian Mutu, i cili me zor po e kapërdin "ferrin" e kategorisë së dytë me skuadrën "mike" të Veronës, që edhe sezonin e kaluar u tregua shumë bujare ndaj parmensëve.

[SUPERSTAR_N1]

Roberto Baxhios i sekuestrohet topi
"Roberto Baxhio dhe Luçiano Spaleti janë dy çamarrokë." Kanë qenë këto fjalët e rojes së një plazhi, i cili është detyruar t'iu sekuestrojë topin, ndërsa ata po luanin futboll-tenis në Tealro, në rrethinat e Çinkue Terres. Trajneri i Udinezes dhe fantazisti i Breshias po dhuronin spektakël për plazhistët e tjerë, por përgjegjësi i plazhit është afruar, i ka thënë diçka futbollistit dhe i ka sekuestruar topin. Gjithçka sipas rregullores. Megjithëse gjyqtari nuk kishte "bluzë të zezë", Spaleti dhe Baxhio janë njohur qysh tani me rregullat e reja dhe të rrepta që do të aplikohen edhe në kampionatin e ardhshëm italian, në këtë rast nga Kolina me shokë