Solana: $100 milion per standartet ne Kosove

[Albo]

Përfaqësuesi i Lartë i BE-së përfundon vizitën e tij në Kosovë

Solana: BE-ja, 100 milionë euro për Kosovën

Bashkimi Evropian do t'i ofrojë mbështetje politike dhe ekonomike Kosovës në rrugën e saj drejt plotësimit të standardeve, ka thënë dje gjatë vizitës së tij të paralajmëruar prej kohësh në Prishtinë, përfaqësuesi i lartë i BE-së për Sigurinë dhe Politikën e Jashtme, Havier Solana.

Solana i ka bërë këto komente pas takimit të zhvilluar me Presidentin e Kosovës, Ibrahim Rugova. Përfaqësuesi i lartë i BE, që në fillim të bisedës ka shprehur "kënaqësinë e veçantë që ka njohur anëtarin e nderit të Parlamentit Evropian nga Kosova, Ibrahim Rugovën, dhe me të e ka analizuar progresin, i cili vërehet në çdo hap në Kosovë". Unë kam insistuar te Presidenti Rugova që institucionet e Kosovës të angazhohen shumë seriozisht në përmbushjen e standardeve, tha më tej Solana, duke theksuar se BE-ja do të jetë tërë kohën mbështetëse e procesit implementues: "Në emër të Bashkimit Evropian, unë i kam treguar atij se ne do të vazhdojmë me mbështetjen tonë, jo vetëm politike, por edhe mbështetje ekonomike, për çka do t'iu ndajmë dhe 100 milionë euro për procesin e përmbushjes së standardeve", theksoi Solana. Ndërkohë, theksoi ai, gjatë këtyre viteve të fundit, Bashkimi Evropian ka shpenzuar në Kosovë një shumë prej rreth 900 milionë euro, si ndihmë për Kosovën, tha ai. Duke pasur parasysh se sivjet në Kosovë do të mbahen edhe zgjedhjet e lira, unë i sugjerova zotit Rugova, që lidershipi kosovar të përqëndrojë tërë energjinë në plotësimin e standardeve, tha ai më pas, në mënyrë që zgjedhjet të mos ndikojnë në këtë proces. Me plotësimin e standardeve, pohoi Solana, BE-ja nuk nënkupton një status të caktuar për Kosovën, por nënkupton fillimin e definimit të këtij statusi, dhe cilido që të jetë ai, duke i përmbushur standardet, Kosova, sipas tij, do të ishte pjesë e një Evrope të integruar. Presidenti i Kosovës, Ibrahim Rugova, nga ana tjetër, tha se e kishte njoftuar Solanën për arritjet në Kosovë, si dhe rëndësinë e vazhdimit të procesit të privatizimit. Për sa i përket çështjes së standardeve, Rugova tha se një pjesë e tyre është plotësuar që tashmë, kurse të tjerat, do të plotësohen në vijim, siguroi ai.

"Ne do të vazhdojmë me plotësimin, përmbushjen e standardeve. Një pjesë e kemi përmbushur, ndërsa ato duhet të vlerësohen. Dhe, gjithsesi, ne do të punojmë së bashku me UNMIK-un si partnerë në këtë plan dhe në zhvillimin e Kosovës", tha Presidenti Rugova, i cili edhe këtë herë përsëriti qëndrimin e tij, se një Kosovë e pavarur dhe e integruar në të gjitha strukturat euro-atlantike, do ta qetësonte tërë rajonin. Ndërsa në lidhje me dialogun Prishtinë-Beograd dhe implikimeve të mundshme që rrjedhin prej tij, tashmë me përfshirjen e socialistëve në qeverinë e Serbisë, Rugova tha se ky fakt gjithsesi nuk do të ketë ndonjë efekt të veçantë, ndërkohë që Solana u shpreh se dialogu, si një prej standardeve që duhet të përmbushen, për Prishtinën është i domosdoshëm që të mbahet. Më pas, zoti Solana është takuar dhe me kryeparlamentarin Nexhat Daci, me liderët e partive politike kryesore në vend, Hashim Thaçi i Partisë Demokratike (PDK) dhe Ramush Haradinajn të Aleancës për Ardhmërinë e Kosovës (AAK). Solana ka pasur edhe një takim me përfaqësuesit e serbëve të Kosovës, pas të cilit ai është shprehur se u ka sqaruar atyre rëndësinë e pjesëmarrjes në procesin e standardeve, duke u ofruar dhe 12 milionë euro si ndihmë konkrete financiare, për kthimin e të zhvendosurve, por në fund, theksoi ai, serbët vetë duhet të vendosin për këtë çështje.

Ndërsa Oliver Ivanoviç, tha se pjesëmarrja e serbëve në procesin e standardeve duhet të ndërlidhet me rolin e posaçëm të serbëve në grupet e punës, duke sqaruar para gazetarëve, se pavarësisht insistimeve të Solanës, liderët serbë nuk kanë vendosur ende, nëse do të jenë pjesë e këtij procesi të nisur.



BE: Përkrahje perspektivës evropiane të Kosovës

Në mbledhjen e fundit të ministrave të Jashtëm të BE-së, në Bruksel, shefat e diplomacive evropiane i kanë dhënë mbështetje të plotë planit për përforcimin e përkrahjes së BE në zbatimin e standardeve për Kosovën dhe për "perspektivën e saj evropiane", përfshirë këtu edhe fillimin e "partneritetit të veçantë evropian" për Kosovën. Planin e ka hartuar përfaqësuesi i lartë i BE, Havier Solana. Kosova, me rastin e aprovimit të raportit vjetor për procesin e stabilizimit dhe të asociimit për secilin nga shtetet e Ballkanit Perëndimor, muajin e ardhshëm, për herë të parë do të përfshihet si tërësi e veçantë. Ajo do të jetë e inkuadruar në aksionet kryesore të BE në rajon, do të marrë pjesë në marrëveshjet rajonale multilaterale dhe në instrumentet dhe programet e reja të BE, ku BE e përfshin Ballkanin Perëndimor. BE do të ofrojë ndihmë të veçantë në aftësimin e pushteteve lokale në Kosovë, dhe "sipas nevojës, të sigurohet përfaqësimi i Kosovës në mbledhjet në nivel të lartë dhe ministror të BE, që organizohet për rajonin e Ballkanit Perëndimor". Gjithashtu thuhet se fillimi i procesit politik, lidhet ngushtë me zbatimin e standardeve".

[Kosovari_78_Ca]

Solana ka propozuar një partneritet evropian për Kosovën para ministrave të BE-së
Bruksel, 24 shkurt - Në Bruksel po i zhvillon punimet takimi dyditor i ministrave të jashtëm të Bashkimit Evropian. Ndër temat që u diskutan ditën e parë ishte edhe Ballkani dhe kryesisht për zhvillimet e fundit në Kosovë dhe Serbi. Bëhet e ditur se ministrat e jashtëm të vendeve të BE-së kanë kërkuar angazhim më të madh nga vendet e BE-së për t'i ndihmuar institucionet e Kosovës në çështjen e standardeve.
Shefi i Politikës së Jashtme të BE-së Havier Solana në këtë takim ka paraqitur një raport të posaçëm kushtuar situatës në Kosovë. Ministrat theksuan se politika e OKB-së në implementimin e standardeve dhe udhëzimin e BE-së të promovojë perspektivën evropiane për Kosovën dhe që ta përforcojë dhe përfaqësojë në mënyrë paralele të njëjtin proces.
Me këtë rast u përkrah në tërësi synimi i shefit të UNMIK-ut Hari Holkeri që të prezentojë planin për implementimin e standardeve.
Ministsrat e
Bashkimit Evropian kanë përshëndetur dhe mirëpritur këtë raport të Havier Solanës dhe u kanë bërë thirrje institucioneve përkatëse të BE-së që të shqyrtojnë propozimet e tij dhe në bazë të tyre të marrin vendimet e duhura. Ministrat kanë nënvizuar se përmbushja e standardeve në Kosovë dhe përpjekjet për promovimin e perspektivës evropiane për Kosovën janë elemente përforcuese të një procesi të njëjtë. Nga ana e tij, Solana ka propozuar edhe një partneritet evropian për Kosovën, duke nënvizuar se perspektiva e integrimit të Kosovës në Bashkimin Evropian sikur dhe pjesët e tjera të rajonit të Ballkanit, është esenciale për stabilitetin afatgjatë të rajonit. Havier Solana nesër do të vizitojë Kosovën ku do të përcjellë të njëjtat porosi për plotësimin e standardeve në Kosovë.
Ky raport u paraqit në prag të vizitës së Solanës në Kosovë, ku ai do të zhvillojë bisedime me përfaqësuesit e institucioneve të Kosovës. Zyrtarët nga nga kabineti i tij kanë bërë të ditur se Solana gjatë ditës së sotme në Prishtinë do të inkurajojë kosovarët që ata të merren me implementimin e standardeve dhe të kërkojë nga ata që të vazhdohet me procesin e negociatave me Beogradin për çështje praktike, pavarësisht nga trazirat politike që aktualisht sundojnë në Serbi.