Tragjedi ne afersi te Tetoves

[iliria e para]

Ja nje artikull nga gazeta Shekulli, nuk mund ta kuptoj se a jane vet shqiptaret qe vrasin njeri tjetrin apo.......?
A din kush s ecka eshte keta?


E shtuna e përgjakshme në fshatin Reçicë e Madhe në afërsi të qytetit të Tetovës
Plumbat shkaktojnë tre të vdekur dhe katër të plagosur
Ylber Lili

Fundjava në Tetovë ka qenë më e përgjakshmja që nga koha e konfliktit të armatosur, si pasojë e breshërive të kallashëve ku kanë mbetur të vdekur tre shqiptarë, ndërsa katër të tjerë janë plagosur. Gjithçka ka ndodhur brenda pak minutash në fshatin Reçicë e Madhe, vetëm 2 km larg nga qendra e Tetovës. Drejtoria e Policisë së Tetovës ka konfirmuar dje për “Shekullin” se bilanci i masakrës të mbrëmjes së të shtunës është tre të vdekur dhe katër të plagosur. Të vdekurit rezultojnë të moshës prej 20 deri 25 vjet që të gjithë nga lagjja Reçicë e Madhe. Ngjarja, sipas policisë ka ndodhur kur tre persona të panjohur nga një veturë taksi pronë e kompanisë “ATA” nga Tetova, kanë shtënë me armë zjarri në drejtim të kafenesë “Sharr”, në të cilën ka patur shumë njerëz. Përfaqësuesit e drejtorisë së policisë së Tetovës dje dhanë detaje lidhur më këtë tragjedi të kobshme, që ndodhi një ditë më parë në Reçicë të Vogël. “Të shtunën rreth orës 18 e 50, minuta në Reçicë të Madhe ka ndodhur një rast tragjik ku kanë mbetur të vrarë tre persona dhe katër të plagosur, të gjithë nga Reçica e Madhe, me përjashtim të njërit i cili është nga Tetova” konfirmoi inspektori i lartë i policisë së Tetovës Lulzim Shabani. Sipas versionit policor, një person i panjohur, në afërsi të restorantit “Mema”, që ndodhet në brendi të qytetit ka urdhëruar taksistin e kompanisë “ATA” të Tetovës, Taxhedin Deari, që ta dërgojë në afërsi të tregut të kafshëve në Reçicë të Vogël. “Pasi vetura ka mbërritur në atë vend, aty kanë hipur edhe dy persona të tjerë, të panjohur, të cilët e kanë urdhëruar taksistin të drejtojë automjetin në drejtim të Reçicës së Madhe. Pasi vetura ka mbërritur në Reçicë të Madhe, në afërsi të kafenesë “Sharr” ata e urdhërojnë shoferin të ndalë makinën duke thyer xhamat e saj. Menjëherë atentatorët kanë lëshuar breshëri plumbash në drejtim të kafenesë “Sharr” ku në momentin tragjik ka patur shumë njerëz” deklaroi inspektori i policisë Lulzim Shabani. Pas breshërive të automatikëve, në vendin e ngjarjes ka vdekur një person, kurse dy të tjerë kanë ndërruar jetë gjatë rrugës për në spital.

Tragjedi me motive enigmë

Përfaqësuesi i policisë tetovare bëri të ditur se personat e panjohur pas kryerjes së këtij akti kriminal kanë urdhëruar shoferin e veturës të lëvizë në drejtim të fshatit Pallçisht. Por pa mbëritur në Pallçisht, tha Shabani, ata kanë detyruar shoferin të ndalojë afër fushës së futbollit në Reçicë, dhe në këmbë janë larguar në drejtim të panjohur. Nga ana e organeve kompetente është bërë ekspertizë në vendin e ngjarjes nga inspektorët, gjyqi hetues dhe prokurori publik. Bashkë me ekipin e ekspertizës, kanë qenë edhe përfaqësues të misionit policor të BE-së, PROKSIMA. Policia bëri të ditur se ka marë të gjitha masat që i ka në dispozicion për kapjen e autorëve të krimit dhe për hir të hetimeve që janë në procedurë e sipër nuk jepen detaje tjera për rastin. “Nuk mund të them se kush janë këto persona për shkak të hetimeve që janë në procedurë e sipër. Ne jemi duke punuar në terren për kapjen e këtyre personave dhe me detaje tjera, do të paraqitemi kur të përfundojnë hetimet” tha inspektori i policisë Lulzim Shabani. Nga ana tjetër policia e Tetovës nuk pranoi të komentojë motivet e këtij rasti. Inspektori i policisë Lulzim Shbani tha se nuk ka informata të sakta në lidhje me motivet dhe shkaqet që kanë sjellur deri te ky incident. Shabani tha se nuk mund të japim të dhëna për shkak të hetimeve, por nuk përjashtohet kjo. Ai gjithashtu tha se drejtuesi i taksisë, Taxhedin Deari, është në duar të sigurta. Vetura nga e cila kishin gjuajtur personat e panjohur dje ishte e parkuar përpara objektit të policisë së Tetovës dhe nga ajo që mund të shihej, disa dritare të saja ishin tërësisht të thyera.

Kush janë të vrarët

“Ka mjaftuar breshëria e dendur e plumbave të dalë nga kallashi dhe e një pistolete që Nargim Hazbiu, nga Reçica e Madhe, i lindur në vitin 1975, të gjejë vdekjen e menjëhershme, ndërsa janë plagosur rëndë Milaim Tairi (28) dhe Satki Asani, (31), nga Reçica e Madhe. Por këta të dy për shkak të plagëve të rënda kanë ndërruar jetë gjatë rrugës duke i dërguar në spitalin e Tetovës” bëri të ditur inspektori i lartë i policisë së Tetovës, Lulzim Shabani, në konferencën e djeshme për gazetarë. Për shkak të plagëve të rënda Festim Ramadani, i lindur në vitin 1983, është dërguar në spitalin e Shkupit, kurse Rexhep Selmani (19), Festim Arifi (18) dhe Fatmir Rexhepi (26) të gjithë nga Reçica e Vogël janë dërguar në spitalin e Tetovës. Drejtori i spitalit të Tetovës Shenasi Gafuri tha dje se tre të lënduarit në incidetin e Reçicës që janë shtrirë në spitalin e Tetovës janë jashtë rrezikut për jetë. “Personat Rexhep Selmani, Festim Arifi dhe Fatmir Rexhepi kishin marrë plagë të rënda trupore nga arma e zjarrit dhe pas intervenimit mjekësor, gjendja e tyre është jashtë rrezikut për jetë”,- tha Gafuri. Ndërsa ende nuk ka informata për gjendjen shëndetësore të Festim Ramadanit, i cili është dërguar në spitalin e Shkupit.

Fshati që fatalisht u vesh në zi

Në Reçicë të Madhe dje ishte ditë zie dhe askush nga banorët vendas nuk pranonte të prononcohej se si ka ndodhur ngjarja. Të gjithë thonin se janë të shqetësuar dhe të trishtuar nga vrasja e tre të rinjve dhe plagosja e katër të tjerëve. Nëpër rrugët e kësaj lagjeje kishte shumë njerëz, kurse xhamat e thyer të lokalit dje ishin riparuar, ndërsa gëzhojat ishin mbledhur policia kriminale e Tetovës, pasi ishte kryer ekpertiza ligjore. Dëshmitarët e rastit të cilët nuk pranonin t’u publikohen emrat, thonin se bilanci i të vrarëve mund të kishte qenë shumë më i madh, për shkak se në momentin kur është gjuajtur nga vetura taksi, në çajtore ka patur njerëz të të gjitha moshave. Ata nuk pranuan të flasin për gazetarët, por vetëm pohuan se ky rast tragjik i ka tronditur shumë.
23/02/2004