Ulet ndjeshëm zhdoganimi i cigareve

[Blendi]

Sasia e cigareve të zhdoganuara në Shqipëri, gjatë periudhës janar-qershor 2002, arriti në 1.121 tonë. Sipas burimeve nga Drejtoria e Përgjithshme e Doganave, shifra e zhdoganimeve për këtë periudhë është rreth 9 tonë më e ulët se periudha janar-qershor e një viti më parë, kur u zhdoganuan rreth 1 130 tonë cigare. Importi i cigareve ka ardhur vazhdimisht në rritje gjatë viteve të fundit. Kështu, gjatë vitit 1995, zhdoganimet për këtë artikull ishin 705 tonë, ndërsa në vitin 1996, sasia e zhdoganimeve arriti në 942 tonë. Ndërkohë, në vitin 1997 u regjistrua një ulje e ndjeshme e importeve legale. Gjatë këtij viti importet e cigareve ishin 116 tonë, ndërsa në vitin 1998 ishin rreth 579 tonë. Gjatë vitit 1999, sasia e cigareve të zhdoganuara ishte 2115 tonë.Ndërkohë, përfaqësuesit e kompanive më të mëdha importuese të cigareve në Shqipëri kanë kërkuar nga Drejtoria e Përgjithshme e Doganave një kontroll më të rreptë nga strukturat shtetërore për të luftuar kontrabanden.