Faqja 8 - AKTUALITET Shkurt 21, 2004
ANGLI/ U QELLUAN NGA TRUPAT E ALEATEVE
Ushtarët e UÇK, në gjyq me Anglinë
Tre kosovarët kërkojnë dëmshpërblim nga ushtria
--------------------------------------------------------------------------------
Nga Londra Muhamed Veliu
Tre ish-ushtarë të UÇK-së hedhin në gjyq ushtrinë angleze. Familjarët e ushtarit Fahri Muhameti, i cili vdiq pasi u qëllua nga forcat angleze në Kosovë së bashku me dy ushtarë të tjerë, do të përballen me drejtësinë e shtetit-ishull. Ngjarja ka ndodhur në 2 korrik të vitit 1999, kur Fahri Muhameti u qëllua nga forcat aleate angleze, pasi nga makina me të cilën ai udhëtonte po qëllohej në ajër me automatik. Fahriu së bashku me dy kushërinjtë e tij Muhamet Bici dhe Skënder Bici nuk i janë bindur urdhërit për të ndaluar, teksa kanë qenë duke festuar armëpushimin me serbët.
Ngjarja
Me mijëra shqiptarë kishin dalë në rrugët e Prishtinës më 2 Korrik 1999 për të festuar marrëveshjen e pushimit të luftës midis forcave të UÇK-së dhe atyre serbe, e nisur nga NATO dhe trupat britanike në terren. Muhamet Bici po udhëtonte së bashku me viktimën Fahri Muhameti dhe Skënder Bici. Ata kanë qenë në të njëjtën makinë. Muhameti i ka shpëtuar vdekjes për fije të perit, pasi një plumb e goditi në nofull, duke i shkaktuar dëmtime. Në bazë të dëmtimit që ai pësoi, kërkon dëmshpërblim. Ndërsa Skënder Bici akuzon ushtrinë angleze se pas incidentit ai ka pësuar trauma psiqike dhe duhet që të dëmshpërblehet.
Procesi
Gjykata e Lartë Britanike për shtatë ditë rresht ka dëgjuar edhe pretendimet e avokatëve të palës shqiptare dhe atyre të Ministrisë së Mbrojtjes rreth kërkesës së paraqitur për dëmshpërblim nga tre ish-ushtarët e UÇK-së. Protagonistët kryesorë në këtë proces gjyqësor janë Muhamet Bici dhe Skënder Bici, kushërinj të viktimës Fahri Muhameti, të cilët kanë ngritur akt-padinë mbi trupat parashutiste angleze. Ata pretendojnë se trupat parashutiste kanë shkelur rregullat, duke hapur zjarr pa të drejtë ndaj makinës së tyre, ku gjeti vdekjen njëri prej tyre. Gjatë procesit në Londër gjykatësi Justice Elias ka dëgjuar se viktima ishte një ushtar i UÇK-së në kohën kur ata luftonin për liri nga Serbia dhe supozohesh që të ishin të çarmatosur. Në automatikun e viktimës janë gjetur shenja gishtërinjsh të Muhamet Bicit, i cili mohon faktin se në momentin kur i kanë bërë shenjë për të ndaluar ishte duke qëlluar në ajër. Menjëherë pas icidentit dhe plagosjes së rëndë të Muhamet Bicit ai së bashku me Skënder Bicin dërgohen urgjentisht në Britaninë e Madhe, pasi kishin rrezik për jetën. Më pas ata kurohen falas nën kujdesin e mjekeve anglezë. Faturat mijërapaundëshe të kostos së operacionit u paguan nga shërbimi shëndetësor anglez NHS. Ata më pas janë vendosur në West Yokshire, pranë qytetit të Lidsit, ku më pas Muhametit iu bashkua e shoqja me dy fëmijët.
Procesi i ushtarëve të UÇK-së, precedent për civilët e vrarë
Nëse Gjykata e Lartë Britanike do të vendosë në favor të palës shqiptare për një dëmshpërblim që arrin në mijëra paund, atëherë ky vendim do t'i hapë rrugën çështjeve të ngjashme të kësaj natyre. Në fakt gjatë luftës së Kosovës nuk kanë munguar edhe viktimat në radhët e civilëve. Nuk kanë qenë të pakta rastet kur gjatë bombardimeve të NATO-s të jenë shkaktuar dëme në njerëz. Por që nga vitit 1999, kur iu dha fund luftës në Kosovë, asnjë nga këta të dëmtuar nuk i ka hedhur në gjyq forcat e NATO-s. Ndërsa një process i tillë mund të përbëjë një precedent që mund të ndiqet nga të tjerë. Kur ish-ushtarët e Ushtrisë Çlirimtare të Kosovës hodhën në gjyq drejtësinë angleze, një gjë e tillë u shoqërua me habi. Ky lajm ka shkaktuar çoroditje në qeverinë angleze dhe në veçanti në Ministrinë e Mbrojtjes (MOD).
Gjyqtari: Ne i kuruam dhe ata tani na hedhin në gjyq
Një nga anëtarët e grupeve ligjore në këtë çështje është shprehur se "një process i tillë është shumë i habitshëm. Djali goditet, ne e sjellim për kurim në Angl, i duke i vënë në dispozicion disa nga kirurgët tanë ndër më të mirët në botë. Dhe ai tani akuzon. Madje, ai gjen ndihmë dhe mbështetje ta bëjë akuzimin e tij ndaj atyre që e qëlluan i financuar nga Legal ID me paratë e takspaguesve. Kjo për mua është e çuditshme" ka përfunduar ai. Protagonistët e kësaj ngjarjeje, pasi janë konsultuar me avokatët e tyre, këta të fundit kanë bërë të mundur që i gjithë procesi gjyqësor tejet i kushtushëm të paguhet nga fondi (Legal ID) i financuar nga buxheti i shtetit anglez. Megjithatë, një proces i tillë ende nuk dihet se si do të pritet në Angli, apo se cila do të jetë jehona e tij. Ndërsa ish-ushtarët e UÇK-së janë të vendosur t'i shkojnë procesit deri në fund.
Përgjigju Duke Cituar
Krijoni Kontakt