Strehimi

[ganoid]

Strehimi, ja cilat familje do të përfitojnë banesa me qera të ulët

Për blerjen dhe ndërtimin e banesave për të pastrehët në buxhetin e shtetit për vitin 2004 janë akorduar 444 milionë lekë


Familjet e pastreha, familjet që banojnë me qira dhe janë nën nivelin minimal të jetesës dhe familjet me një handikap në familje pritet të përfitojnë strehim në banesa me qira të ulët nga shteti. Numri i familjeve që do të përfitojnë banesa sociale do të varet nga fondi që do të përcaktojë çdo vit buxheti i shtetit.
Ministria e Rregullimit të Territorit dhe Turizmit (MRRTT) ka paraqitur dje projektligjin i cili përcakton se si do të zgjidhet problemi i strehimit. Kështu, sipas këtij projektligji, problemi i mprehtë i strehimit pritet të zgjidhet duke dhënë banesa me qira lehtësuese që janë në pronësi të shtetit, por që ndërtohen nga kompanitë private të ndërtimit.
“Buxheti i shtetit për vitin 2004 i ka akorduar 444 milionë lekë MRRTT për blerjen dhe ndërtimin e banesave për të pastrehët”,- është shprehur Doris Andoni, drejtoresha e Strehimit pranë Ministrisë së Rregullim Territorit dhe Turizmit. Sipas saj, projektligji i ri për strehimin pritet të rrisë bashkëpunimin e shtetit, me firmat private për ndërtimin e banesave, të cilat do të shiten me koston e tyre të ndërtimit. Projektligji ka marrë miratimin nga Këshilli i Ministrave, por akoma nuk ka një afat se kur do të kalojë në Parlament.
Studimi “Profili i vendit në sektorin e strehimit”
Banesat sociale, mirëmbajtja e banesave dhe problemet e bashkëpronësisë në banesa janë çështjet kryesore të identifikuara nga MRRTT që po diskutohen në takimin dyditor, i cili organizohet me qëllim zgjidhjen e problemit të strehimit. Ky studim është prezantuar nga MRRTT-ja në bashkëpunim me UNECE (Komisioni Ekonomik për Europën, i Kombeve të Bashkuara).
Studimi, i hartuar edhe për 7 vende të tjera në tranzicion, analizon kuadrin institucional, financiar dhe ligjor të strehimit dhe jep rekomandime të vlefshme mbi veprimet ligjore, të cilat duhet të ndërmerren nga nivele të ndryshme për adresimin e problematikave të hasura.
Ky studim është një vështrim i përgjithshëm i sektorit, i cili është trajtuar mbi pikëpamjen e kuadrit makroekonomik.
Ai përshkruan gjendjen e stokut të banesave ekzistuese, tregun e lirë të banesave dhe industrinë e ndërtimit. Përshkruan gjithashtu kuadrin ligjor të strehimit dhe të fushave që lidhen me këtë sektor: planifikimi urban, ligjet mbi tokën, mbi barrën siguruese, qiranë, bashkëpronësinë etj.
Një përbërës tjetër është edhe kuadri institucional, brenda të cilit vepron sektori i strehimit që nxjerr në pah dobësitë e tij. Element kryesor në këtë studim mbetet përshkrimi i kuadrit financiar të strehimit, duke përfshirë buxhetin e shtetit, të njësive vendore, sistemin bankar dhe atë të taksave, i cili vë në dukje dobësitë e këtij sektori.
Problemet kryesore që trajton ky studim
Disa nga problemet më të rëndësishme që ky studim trajton janë: adresimi i shtresave të varfra dhe të prekshme të shoqërisë dhe sigurimi i aksesit në strehim minimal dhe të përshtashëm për kushtet e tyre sociale dhe ekonomike. Kështu, banesat sociale me qira rekomandohen si instrument i politikave sociale që strehim. Gjithashtu, problem janë edhe vendbanimet ilegale dhe nevojat për adresimin me politika specifike për integrimin juridik, social, urban dhe ekonomik të këtyre zonave. Një problem tjetër i rëndësishëm është edhe ai i çështjes së pronësisë mbi tokën, siguria e pronës, regjistrimi, kalimi i pronësisë së tokës dhe objekteve publike organeve të pushtetit vendor etj. Këtu paraqesin problem edhe mirëmbajtja e banesave dhe problemi i pazgjidhur ende i krijimit të ansambleve të bashkëpronësisë; si dhe dobësia e sistemit të kredimit dhe financimit të strehimit e orientimit të ndihmës së shtetit për familjet që nuk janë në gjendje ekonomike e sociale për të përballur çmimet e tregut të lirë.

Projektligji
Ja cilat familje mund të përfitojnë shtëpi me qira lehtësuese
Neni4
1. Familjet që klasifikohen për t’u trajtuar me programe sociale të strehimit miratohen me vendim të këshillit bashkiak sipas kritereve të mëposhtme:
a) Familje që nuk dispojnë në pronësi një banesë
b) Familje që dispojnë sipërfaqe banimi nën normat e strehimit të përcaktuara për atë kategori sociale dhe ekonomike që bëjnë pjesë këto familje.
c) Familje që përfshihen në pikat a dhe b që kanë të ardhura të pamjaftueshme sipas përcaktimeve të nenit 6 të këtij ligji
d) Familjet që kanë ngelur të pastreha si rezultat i fatkeqësive natyrore.
2. Adminstrimi i kërkesave për programet sociale të strehimit dhe caktimi i prioriteteve bëhet nga organet e qeverisjes vendore.
3. Dokumentacioni që duhet të paraqesë familja për t’u strehuar në banesa sociale me qira dhe afati i paraqitjes së tij përcaktohen me vendim të Këshillit të Ministrave.
4. Normat e strehimit sipas pikës pikës 1.b të këtij neni përcaktohen me Vendimi të Këshillit të Ministrave.

Neni 5
Kriteret e përzgjedhjes së përfituesve
Me përparësi klasifikohen për t’u trajtuar individë ose familje që kanë specifikat si më poshtë:
a) Familje të cilat vërtetojnë se nuk kanë përfituar nga ligji nr.7652,datë 23.12.1992 “Për privatizimin e banesave shtetërore”;
b) Familje ku kryefamiljari është grua e ve ose e divorcuar;
c) Familje njëprindërore që kanë në ngarkim fëmijë;
d) Të moshuar që kanë mbushur moshën e pensionit dhe që nuk përzgjidhen për t’u strehuar në institucionet publike të përkujdesit shoqëror;
e) Individë me aftësi të kufizuara të cilët gëzojnë statusin e të verbrit të grupit të parë, të invalidit paraplegjik ose tetraplegjik, të invalidit të punës, të invalidit të Luftës Nacionalçlirimitare;
f) Familje me shumë fëmijë;
g) Çifte të reja me moshë totale deri në 55 vjeç;
h) Familje që kanë ndryshuar vendbanimin për efekt punësimi;
i) Individë më statusin e jetimit që nga momenti i daljes nga jetimorja ose përkujdesit e deri në moshën 30 vjeç.