Amfiteatri antik i Durresit

[Qerim]

Durrës- Amfiteatri antik i Durrësit së shpejti do të kthehet në një arenë të spektakleve të llojeve të ndryshme, falë një financimi të rëndësishëm të qeverisë shqiptare dhe organizmave ndërkombëtar, i cili vazhdon të rritet. Ndërkaq, po përgatiten premisat edhe për zbulimin përfundimtar të krahut lindor të amfiteatrit. Organizatorët e spektaklit botëror të bukurisë Mis Globi 2004 kanë mbërritur këto ditë në Durrës, duke vendosur organizimin e këtij spektakli në amfiteatrin, që synon të bëhet së shpejti një qëndër artistike e rëndësishme.



Bashkepunim per rikonstruksionin

Kryetari i bashkisë, Lefter Koka tha se deri tani vlera e investimit për rikonstruksionit të amfiteatrit antik ka arritur në rreth 600 mijë euro. Përveç financimit të qeverisë shqiptare bashkia e Durrësit do të shfrytëzojë 26 milion lekë, të cilat ishin destinuar më parë për teatrin veror të qytetit, në projektin e shndërrimit të amfiteatrit në një hapësirë të zbavitjes, përmes koncerteve dhe spektakleve të gjinive të ndryshme. Shkallarët portativë do të mirëpresin rreth 5 mijë spektatorë njëherësh, ndërsa parashikohet një sistem ndriçimi modern për zhvillimin e spektakleve verore, të cilat do të jenë një mundësi mjaft tërheqëse për turistët vendas dhe të huaj. Një grup arkitektësh, arkeologësh dhe artistësh po përgatit një projekt të detajuar për të ardhmen e amfiteatrit, ndërsa vazhdojnë përpjekjet për tërheqjen e donatorëve të tjerë në zbatimin e këtij projekti.



UNOPS-PASARP, mbeshtetes i nismave

Silvia Fadda, shefe e Programit UNOPS-PASARP pranë prefekturës së Durrësit, tha se megjithëse nuk është përcaktuar ende shifra e saktë, prania financiare e këtij programi në projekt që është iniciuar nga bashkëpunimi me Ministrinë e Kulturës, Rinisë dhe Sporteve do të jetë mjaft i rëndësishëm dhe do të përbëjë një vazhdim të projektit "Durrës". Vitin e kaluar Departamenti arkeologjik i Durrësit, Universiteti i Parmës dhe Muzetë e Udinës, me financimin e qeverisë italiane mundësuan hapjen e një fotoekspozite në galeritë e këtij amfiteatri, zhvillimin e një cikli konferencash shkencore brenda dhe jashtë vendit, si dhe përgatitjen e Hartës së rrezikut arkeologjik në Durrës.



Amfiteatri, pergatitet zgjidhja per familjet mbi te

Ndërkaq bashkia e qytetit ka evidentuar numrin e familjeve që vazhdojnë të jetojnë mbi arenën ose mbi muret ende të pazbuluara të amfiteatrit, duke krijuar kushte për zbulimin e plotë të monumentit më të rëndësishëm të antikitetit në qytetin-port. Kryetari Koka tha se bashkia e qytetit bregdetar në bashkëpunim me Entin kombëtar të banesave po kërkon zgjidhje edhe për zhvendosjen e afro 20 familjeve, që banojnë ende mbi muret e krahut lindor të amfiteatrit të ndërtuar në fillim të shekullit të dytë pas erës sonë. Duke vlerësuar shkallën e lartë të mirëkuptimit me këto familje. Koka shtoi se ato do të sistemohen gjithashtu në lagjet qëndrore të qytetit antik, duke respektuar edhe dëshirën e tyre.



Perurim me Mis Globi!?

Ndërkaq në bashkinë e qytetit kanë mbërritur edhe organizatorët e "Mis Globi 2004", të clët kanë kërkuar informacion si dhe bashkëpunim, lidhur me zhvillimin e spektaklit të bukurisë botërore, në shtator, në arenën e ardhshme të këtij amfiteatri. Dhe në se gjithçka shkon sipas parashikimeve në shtatorin e ardhshëm misset nga e gjithë bota do t’i tregojnë hiret e tyre në mjediset ku dikur të drejtën e shfaqjeve e kishte vetëm forca e gladiatorëve dhe e kafshëve.