Skandal ne Albtelekom: $50 milion abuzimet vjetore

[Albo]

Shkarkohet drejtori i Telekomunikacioneve në ministri, Pirro Xhixho. Nano kërkon shkarkimin e Alqi Biraqit

Telekom, dorëheqje dhe shkarkime

Apostol Noti jep dorëheqje, në vend të tij emërohet Ferhat Lukacaj, ish-zv/drejtor në Albtelekom

Bledjana Beqiri

Kreu i Albtelekomit dha dje dorëheqje të parevokueshme nga funksioni që kryente. Apostol Noti, ka deklaruar se “jap dorëheqje të parevokueshme për shkak të politizimit të tejskajshëm që i është bërë menaxhimit të shoqërisë Albtelekom dhe punës time si drejtor i përgjithshëm në drejtim të menaxhimit”. Por, përveç Notit, dje është liruar nga detyra edhe drejtori i përgjithshëm i Post-Telekomunikacioneve në Ministrinë e Transporteve dhe Telekomunikacioneve, Pirro Xhixho. Në mbledhjen e djeshme të Këshillit të Ministrave, kryeministri Fatos Nano, ka deklaruar se me ndërhyrjen e tij drejtori i përgjithshëm i Albetelekomit ka dhënë dorëheqjen, si dhe është shkarkuar drejtori i përgjithshëm i Telekomunikacioneve në ministri. Ndërkohë që Nano ka pohuar se do t’i kërkojë Kuvendit të Shqipërisë të ndërmarrë hapa ligjorë për shkarkimin e Alqi Biraqi, kryetar i Entit Rregullator të Telekomunikacioneve për shkak të moskryerjes së reformave dhe detyrave të planifikuara. Dje ministri Poçi, ka zhvilluar një takim urgjent me drejtuesit e Albtelekomit, me Drejtorinë e Përgjithshme të Post-Telekomunikacionit në ministri, me Këshillin Drejtues të Entit Rregullator të Telekomunikacioneve dhe me Këshillin Mbikëqyrës së Albtelekomit, ku ka kërkuar përshpejtimin e reformave në sektorin e telekomunikacioneve. Ministri ka kritikuar Entin Rregullator të Telekomunikacioneve (ERT) dhe Albtelekomin për mosrealizimin e reformave. “Nga analiza që i është bërë ecurisë së deritanishme konstatohet se roli i rregullatorit të tregut, ERT, në zbatimin e politikave për rregullimin e tregut është pothuajse inekzistent, si dhe përmirësimi i menaxhimit të Albtelekomit dhe përgatitja e saj për një privatizimin të suksesshëm lë për të dëshiruar dhe është larg arritjeve të objektivave të vëna”, -është shprehur Poçi. Pikërisht, pas kësaj analize të realizimeve dhe mosrealizimeve në sektorin e telekomunikaciomeve dhe pas bërjes së një bilanci për veprimatarinë e këtyre institucioneve gjatë vitit 2003, drejtori i Albtelekomit dha dorëheqjen.
Këshilli Mbikëqyrës i Albtelekomit ka pranuar menjëherë dorëheqjen e Notit dhe po në këtë mbledhje emëroi drejtor të përgjithshëm, Ferhat Lukaçaj, i cili më parë kryente funksionin e zv/drejtorit të përgjithshëm në Albtelekom. Kështu, inxhinieri Lukaçaj do të jetë kreu i ri i Albtelekomit, i cili do të marrë përsipër edhe barrën për të çuar këtë institucion drejt privatizimit dhe shëndoshjesh financiare. Burime pranë Ministrisë së Transporteve dhe Telekomunikacioneve pohojnë për gazetën “Shekulli” se “ndryshime do të ketë edhe në të gjitha strukturat e telekomunikacioneve për efekt të përshpejtimit të reformave”. “Ndryshime priten në administratën drejtuese, jo vetëm të Albtelekomit, por edhe në Entin Rregullator të Telekomunikacioneve”. Pas shkarkimeve të djeshme, pritet që radhën ta ketë Alqi Biraqi, i cili është emëruar rreth 3 muaj më parë nga Parlamenti shqiptar dhe është pikërisht ky i fundit që duhet të vendosë shkarkimin e tij.


Shkaku i shkarkimeve në telekomunikacione

Asnjë prej zyrtarëve të lartë nuk ka pranuar dje të japë komente rreth një raporti të Bashkimit Ndërkombëtar të Telekomunikacioneve, i cili është dërguar disa ditë më parë edhe në disa redaksi gazetash. Shtypi opozitar ka botuar dje vetëm faksimilen e kopertinës së këtij raporti duke e shoqëruar me një shkrim, sipas të cilit, në Albtelekom, shifra e abuzimeve vjetore është 50 milionë dollarë. Sipas këtij shtypi, ky raport i Bashkimit Ndërkombëtar të Telekomunikacioneve i është dërguar qeverisë shqiptare që në muajin shtator të vitit 2003, por kjo e fundit nuk e ka bërë publik.

[Albo]

Raporti i ITU-së: Marrëveshje e pandershme mes Albtelecom dhe Vodafone Albania

Dosja Telekom trondit familjen Nano

Në një raport të fundit të Bashkimit të Telekomunikacionit Ndërkombëtar (ITU), mbi marrëveshjen e interkoneksionit midis operatorëve të telekomit në Shqipëri, del në pah një marrëveshje interkoneksioni tejet e pandershme midis Vodafone Albania dhe Albtelecom, operator shtetëror i linjës fikse. Kushtet kryesore të interkoneksionit që përmenden në këtë raport të ITU përmbajnë:

-Vendosja e tarifave: Tarifat për thirrjet nga Albtelecom tek Vodafone janë sipas marrëveshjeve të rëna dakord nga të dyja palët, ndërsa tarifat për thirrjet nga Vodafone tek Albtelecom vendosen njëanshmërisht nga Vodafone.

-Thirrjet brenda vendit: Për thirrjet nga Albtelecom tek Vodafone, Vodafone merr 88 për qind të faturës, por jo më pak se 40 lekë për minutë (afërsisht 36 cent amerikanë) që do t’i paguhen Vodafon-it, madje dhe përpara se Telekomi të këtë mbledhur sasinë e parave nga klientët e tij. Trafiku në gjysmën e parë të vitit 2003 ishte 10,8 milion minuta. Për thirrjet nga Vodafone tek Albtelecom, Vodafone paguan 8 për qind Albtelecomit për tarifat e aplikuara, por me një minimum deri në 3 lekë (afërsisht 3 cent amerikanë) për minutë. Trafiku për gjysmën e parë të vitit 2003 ishte 4,3 milion minuta.

-Thirrjet ndërkombëtare: Për kushtin e thirrjeve ndërkombëtare nëpërmjet Albtelecomit tek Vodafone, të ardhurat ndahen; Vodafone 84 për qind dhe Albtelecom 16 për qind. Trafiku në gjysmën e parë të vitit 2003 ishte 63,8 milion minuta. Për thirrjet ndëkombëtare për jashtë të bëra nga Vodafone nëpërmjet Albtelecomit më pak se 5 për qind e pagesës së bërë nga klienti i Vodafone i jepet Albtelekom. Trafiku në gjysmën e parë të vitit 2003 ishte 5,9 milion minuta.

-Trafiku tranzit brenda vendit: Nuk ka asnjë kompensim për Albtelecom për trafikun tranzit midis dy kompanive të tjera celulare në Shqipëri AMC dhe Vodafone Albania. Në gjysmën e parë të vitit 2003 trafiku tranzit nëpërmjet telekomit nga Vodafone tek AMC ishte 23,1 milion minuta dhe nga AMC tek Vodafone ishte 22,6 milion minuta. Unë e kuptoj që një kompani telekomi të paguajë tjetrën me një kuotë tranziti, si një praktikë të zakonshme botërore dhe ka një mesatare pagese afro 5 cent për minutë, por të mos paguash kuotën e tranzitit duke përdorur shërbimet tranzit të një kompanie tjetër telekomi, është një praktikë tejet e pazakontë.

Kohëzgjatja. Marrëveshja e interkoneksionit është e vlefshme për një periudhë të fiksuar katër-vjeçare, katër herë më e gjatë se praktika standard e industrisë mbarëbotërore, që është kontratë një vjeçare.

Tema

[Albo]

Ferhat Lukaçaj është emëruar drejtori i ri i “Albtelekom”

“Jap dorëheqjen e parevokueshme, për shkak të politizimit të tejskajshëm, që i është bërë menaxhimit të shoqërisë "Albtelecom" sh.a., dhe punës sime si Drejtor i Përgjithshëm në drejtim të këtij menaxhimi", thuhet në tekstin e dorëheqjes së paraqitur nga Noti.

Alida Beqiri

Drejtori i Përgjithshëm i Albtelecom, Apostol Noti, jep dorëheqjen pas marrëveshjeve të përfolura mes institucionit që ai drejtonte dhe kompanisë së telefonisë celulare Vodafone. Kjo dorëheqje ka ardhur edhe pas protestave të organizatave jo qeveritare (një prej të cilave lëvizja “Mjaft”) kundër rritjes së çmimit të telefonisë fikse.

Kërkesën për dorëheqje të parevokueshme z.Apostol Noti e ka paraqitur gjatë gjatë mbledhjes së Këshillit të Drejtues të Entit Rregullator të Telekomunikacionit dhe në praninë e Ministrit të Transporteve z. Spartak Poçi.

“Jap dorëheqjen e parevokueshme, për shkak të politizimit të tejskajshëm, që i është bërë menaxhimit të shoqërisë "Albtelecom" sh.a., dhe punës sime si Drejtor i Përgjithshëm në drejtim të këtij menaxhimi", thuhet në tekstin e dorëheqjes së paraqitur nga Noti.

Në mbledhjen e Këshillit Mbikëqyrës u pranua dorëheqja e paraqitur nga ish drejtuesi Apostol Noti si dhe u bë zëvendësimi i tij. Në postin e Drejtorit të Përgjithshëm të Albtelecom u emërua z.Ferhat Lukaçaj.

Më 30 dhjetor 2003, shoqëria “Albtelecom” paralajmëroi rritjen e tarifave të telefonisë fikse në masën 69%. Ky vendim u kundërshtua ashpër nga qytetarët, OJQ-të si dhe opozita. Për këto arsye, Zyra për Mbrojtjen e Qytetarëve dhe Lëvizja ‘Mjaft’ organizuan protesta me të cilët u solidarizuan qytetarë të mbarë vendit. Por, duket se dokumenti i një institucioni vëzhgues ndërkombëtar mbi paligjshmërinë në lidhjen e kontratës mes Albtelekom dhe Vodafone Albania, që u bë publik nga opozita e çoi drejtorin e “Albtelekom” drejt largimit. Marrëveshja është bërë publike në sajë të një raporti të fundi të Bashkimit të Telekomunikacionit Ndërkombëtar (ITU), mbi marrëveshjen e interkoneksionit midis operatorëve të telekomit në Shqipëri.

Gjatë një seance parlamentare kryetari i Partisë Demokratike Sali Berisha e bëri publik një raport të tillë, nga ku del në pah një marrëveshje interkoneksioni midis Vodafone Albania dhe Albtelecom, operator shtetëror i linjës fikse.


Si e justifikoi Albtelekomi rritjen e tarifave

Menjëherë pas hyrjes në fuqi të vendimit për rritjen e tarifave të Albtelekomit, nëpërmjet një konference për shtyp më 2 janar 2004, Apostol Noti ka justifikuar rritjen e çmimit të bisedave telefonike duke thënë se është kusht i Bashkimit Europian për kryerjen e reformave

Drejtori i përgjithshëm i Albtelekomit Apostol Noti, në një konferencë për shtyp më 2 janar justifikoi rritjen e çmimit të bisedave telefonike duke thënë se është kusht i Bashkimit Europian për kryerjen e reformave. “Tarifa e pajtimit mujor ka qenë 94 lekë, tani bëhet 300, në një kohë kur kostoja reale është afërsisht 4000 lekë të reja. Kostoja reale është më e madhe se tarifa që ne ofrojmë sot, më e ulta se në të gjitha vendet qark nesh. Po përpiqemi që t’i afrohemi kostos reale, direktivë kjo e dhënë nga Bashkimi Europian për fushën e telekomunikacioneve. Reformat i kemi përpara, në Europë do të shkohet pikërisht duke zbatuar direktivat e Bashkimit Europian”, ka thënë kreu i shoqërisë telefonike duke theksuar se edhe çmimi aktual prej 3.61 lekë/minutë është nën koston reale. Kjo e fundit, sipas Notit kap shifrat 5.05 lekë/minutë. Në këtë mënyrë, vetë Noti justifikoi rritjen e çmimit që ishte menduar të plotësonte humbjet e mëdha financiare të Albtelekom.

Megjithëse Albtelekomi zyrtarisht njoftoi se nga 1 dhjetori do të rriteshin vetëm tarifat e bisedave ndërmjet telefonave fiks në një qytet dhe bisedat e tjera do të pësojnë ulje, ndodhi e kundërta. Thirrjet nga telefonat fiks në ata celularë që sipas zyrtarëve të kësaj kompanie do të pësonin ulje të ndjeshme mesatarisht nga 80 në 50 lekë në minutë, pësuan rritje të ndjeshme. Madje, specialisti i Marketingut Ruben Herri deklaroi se “Albtelekomi nuk ka rritur tarifën, por kërkon të ndryshojë mentalitetin e klientëve për përdorimin e telefonit. Kështu, u ndryshua “mentaliteti” i klientëve dhe u boshatisën xhepat e tyre: bisedat lokale ishin 1,6 lekë, u bënë 3 lekë, ndërsa ato kombëtare, ishin 1.8 lekë u bënë 10 lekë.

[Albo]

Letër drejtuar Kryetarit të "Vodafone Group", Lord MacLaurin of Nebworth, DL

Sipas ligjit, raporti duhej të ishte paraqitur për diskutim në parlament, gjë që nuk është bërë nga qeveria shqiptare

Qeveria fshehu humbjet e "Albtelekom"

Arsyeja e një fshehtësie të tillë është se zyrtarët shqiptarë nëpërmjet kontrollit nga ana e tyre të Albtelecom, kanë mundësi që falë kontributit të tyre për të shpërblyer Vodafone Albania, të mund të nxjerrin pagesa për bashkëpunimin e tyre, me vlera materiale të pameritura. Sokol Nano, djali i Fatos Nanos, kryeministri i Shqipërisë, është emëruar drejtor i marketingut për Vodafone Albania, edhe pse nuk ka patur kurrfarë përvoje më parë në sektorin e telekomit

Gary Q. Kokalari

I dashur Lord MacLaren

Po ju shkruaj për çështjen e përmendur më sipër, si dikush që e ka një përgjegjësi jo të drejtpërdrejtë për hyrjen e Vodafone në Shqipëri. E them këtë, nisur nga fakti se më 1999, Shqipëria ishte gati për t'i dhënë licencën GSM, që tashmë e ka Vodafone, asaj që sipas opinionit tim, ishte një operator telekomi i rremë, njohur si New World Telecom, (NWT). Deri kur i hyra unë kësaj çështjeje, Departamenti i Shtetit i SHBA-së dhe ai i Tregtisë, po e nxitnin agresivisht tek qeveria shqiptare NWT-në. Si rezultat i përpjekjeve të mia, qeveria shqiptare e ndryshoi qëndrimin e saj ndaj NWT dhe hapi atë që duhej të ishte një proces tenderimi transparent, që tek e fundit rezultoi në dhënien e licencës GSM në Shqipëri për Vodafone. Bashkangjitur keni më poshtë një kopje të artikullit tim "Shqipëria në shitje", që ka të bëjë më hollësisht me episodin e NWT.

Më ka tërhequr vëmendjen, që në një raport të fundit të Bashkimit të Telekomunikacionit Ndërkombëtar (ITU), mbi marrëveshjen e interkoneksionit midis operatorëve të Telekomit në Shqipëri, del në pah një marrëveshje interkonmeksioni tejet e pandershme midis Vodafone Albania dhe Albtelecom, operator shtetëror i linjës fikse.

Me sa kuptoj unë raporti i përmendur më sipër i ITU-së u është dërguar autoriteteve të larta qeveritare shqiptare në fillim të dhjetorit 2003. Por megjithëse kam hetuar në Shqipëri, nuk duket se ka ndonjë njohuri të publikut për këtë raport, pavarësisht faktit se Albtelecom është një kapital që operon për të mirën e popullit shqiptar. Mbështetur në kontaktet e mia me deputetë të parlamentit shqiptar, nuk duket që ky raport të jetë paraqitur në parlament dhe duket se nuk është ndërmarrë asnjë veprim për të hetuar mbi akuzat e bëra në raportin e ITU, si nga qeveria shqiptare, ashtu dhe nga Vodafone.



Arsyeja e fshehtësisë: Zyrtarët të implikuar në praktika korruptive

Ju duhet ta kini parasysh se ka patur mjaft spekulime për ata që e kanë parasysh raportin e ITU-së dhe industrinë e telekomit në Shqipëri, se zyrtarë të lartë të qeverisë shqiptare janë përfshirë fshehtazi për të strukturuar pagesat e interkoneksionit duke shpërblyer pandershmërisht Vodafone Albania në kurriz të Albtelecom. Arsyeja për një fshehtësi të tillë është se zyrtarët shqiptarë nëpërmjet kontrollit nga ana e tyre të Albtelecom, kanë mundësi që falë kontributit të tyre për të shpërblyer Vodafone Albania, të mund të nxjerrin pagesa për bashkëpunimin e tyre, me vlera materiale të pameritura, që ka rezultuar në skemën e sipërpërmendur.

Megjithëse unë nuk e kam informacionin për të mbështetur akuzat për bashkëpunim të fshehtë midis kompanive të telekomit në Shqipëri, që të mund t'jua jepja edhe juve me këtë rast, ju duhet të keni parasysh rrethanat e mëposhtme:

1.Zyrtarët e qeverisë shqiptare kanë qenë vazhdimisht në qendër të akuzave për praktika korruptive nga ana e zyrtarëve të BE-së dhe media.

2.Ka disa marrëdhënie që mund edhe të legjitimohen, por në sipërfaqe duken të dyshimta. Psh., Sokol Nano, djali i Fatos Nanos, kryeministri i Shqipërisë, është emëruar drejtor i marketingut për Vodafone Albania, dhe unë jam i informuar se ai nuk ka patur kurrfarë përvoje më parë në sektorin e telekomit. Për mua ka kuptim pse Dhimitraq Rafti, i njohur si një prej bashkëpunëtoreve të rrethit të ngushtë të Fatos Nanos, drejtoi Albatelekomin në atë kohë kur u "negociua" marrëveshja e interkoneksionit me Vodafone Albania dhe tashmë ai është zëvendës ministër i Telekomunikacionit.

3.Më 19 janar 2004 i dërgova një memorandum Departamentit të Drejtësisë së SHBA-së duke thënë se Fatos Nano ka një numër ilegal bankar tek 'Credit Suisse' dhe nëse kjo llogari ekziston, fondet në këtë numër llogarie mund të kenë ardhur prej praktikave korruptive në Shqipëri.

4.Duke konsideruar ndonjë marrëveshje të mundshme të fshehtë midis Albtelecomit dhe Vodafone Albania, - ju kujtoj se Departamenti i Drejtësisë i SHBA-së ka nisur së fundmi një hetim mbi operatorët e telekomit në Filipine, për të përcaktuar nëse ka ndonjë marrëveshje të fshehtë në vendosjen e pagesave për interkoneksion dhe veçanërisht për ato pagesa që kanë të bëjnë me thirrjet ndërkombëtare, për në / dhe prej, Shteteve të Bashkuara.

5.Ilir Meta, ish-kryeministri shqiptar, ka bërë akuza publike se ndoshta ka patur parregullsira përsa u përket procedurave të tenderit, që çuan në shpërblimin me licencë GSM për Vodafone.



Albtelekom drejt kolapsit të plotë

Mbështetur mbi mirëkuptimin ndaj raportit të ITU, kushtet e lidhjes së pandershme të bëra të ditur tashmë, do të kenë një efekt aq shkatërrues mbi telekomin sa mund të çojë në një kolaps të plotë të kësaj ndërmarrjeje shtetërore që nuk është tjetër veçse pronë e popullit shqiptar. Padyshim që kjo mund të ketë pasoja të rënda për sektorin e telekomunikacionit në Shqipëri dhe për gjithë ekonominë shqiptare. Dhe më shqetësuese, nëse konfirmohet se marrëveshje interkoneksioni të tilla të padrejta janë rezultat i praktikave korruptive, kjo do të çojë në kaos politik që do të trondisë ashpër stabilitetin politik në Shqipëri. Ju duhet të kini parasysh që më 1997, si rezultat i rënies së skemave piramidale që kishin shpërthyer në Shqipëri pati trazira civile masive në të gjithë vendin.

Po ju kërkoj me mjaft respekt që ju të kërkoni që hetimi për këtë çështje nga ana e Vodafone Group të përfshijë, por jo domosdoshmërisht të kufizohet në këto çështje:

Një rishikim të problemeve të dala në raportin e ITU-së nga një kontrollor financiar i jashtëm dhe i pavarur, në konsultim me ITU dhe me rezultate që do t'i dorëzohen bordit tuaj, qeverisë shqiptare dhe publikut shqiptar.

Nëse kontrolli financiar i operacioneve të Vodafone Albania konfirmon pretendimet e ITU për marrëveshje interkoneksioni të pandershme, duhet të kontrollohen të gjitha llogaritë e Vodafone Group, Vodafone Albania dhe Vodafone Greece, nëse ka ndonjë transferim ilegal fondesh direkt apo jo direkt në përfitim të zyrtarëve shqiptarë. Nëse zbulohen parregullsi të tilla, ky informacion iu duhet dhënë institucioneve të duhura të ligjit në Britaninë e Madhe, Shtetet e Bashkuara në Bashkimin Evropian dhe në Shqipëri.

Nëse problemet provojnë ekzistencën e marrëveshjeve të pandershme të interkoneksionit dhe të/apo parregullsive, Vodafone Group duhet të ndërmarrë veprime të menjëhershme për të vendosur në kushte të barabarta marrëveshjen e shpërndarjes së tarifave midis Vodafone Albania dhe Albtelecom ndërsa Vodafone duhet të rimbursojë Albtelecom-in për ato pagesa që janë hequr pandershmërisht në të kaluarën.

Do të vlerësohej shumë një përgjigje e juaj lidhur me një plan veprimi të Vodafone dhe do të isha mjaft i lumtur t'ju ofroja ndihmën time përsa i përket kësaj çështjeje.

[Albo]

Ish-kryeministri Meta tha se interesat politike dhe abuzive personale të drejtuesve më të lartë të maxhorancës, kanë sjellë këtë gjendje kritike

Telekomi, abuzuesit, drejtues të lartë të PS

Ish-kryeministri Ilir Meta tha në një prononcim për mediat se ndërrimet e shumta që po bëhen në kompaninë 'Albtelekom' nuk synojnë zgjidhjen e situatës së rënduar, por tentojnë që të fshehin problemet që ka patur ky institucion. Ai tha se mbi këtë institucion dhe të ardhurat e tij është abuzuar nga politika gjatë gjithë kësaj periudhe. Kundërshtari i Nanos në PS tha se largimi i drejtorit Apostol Noti është thjesht një episod i periudhës së keqmenaxhimit të këtij institucioni. Ai tha se interesat e ngushta dhe abuzive që e kanë sjellë Albtelekomin në këtë situatë. "Janë interesat politike dhe abuzive personale të drejtuesve më të lartë të maxhorancës dhe qeverisë së sotme që kanë sjellë këtë gjendje kritike. Dua t'ju kujtoj se në verën e vitit 2001 kur qeveria Meta vendosi pas privatizimit të suksesshëm të AMC-së dhe tenderit të hapur ndërkombëtar për licencën e dytë të operatorit celular, të privatizonte Albtelekomin, duke i dhënë atij edhe licencën e tretë si operator celular për të rritur vlerën në treg, ishin pikërisht këta drejtues të maxhorancës dhe qeverisë së sotme që e bllokuan këtë privatizim me pretekstin e shtirur të 'dhembshurisë' së tyre për pronën publike. Në këtë mënyrë, Albtelekom jo vetëm që nuk u privatizua, jo vetëm që tregu i telefonisë fikse dhe operatorëve celular nuk u liberalizua më tej, por përkundrazi, shembulli i Albtelekomit është ndër më spektakolarët përsa i takon abuzimit me pronën publike dukurinë e korrupsionit. Mjafton të verifikoni se cilët ministra apo zv.ministra e zyrtarë të lartë kanë lidhje me kompani private që operojnë në treg dhe që rrisin çmimet çdo ditë, duke shkatërruar Albtelekomin dhe duke penguar operatorë të tjerë që të hyjnë në treg," theksoi Meta. Ndërsa duke folur për largimin e Notit, Meta tha se: "Largimi i tij është thjesht një episod, i periudhës së keqmenaxhimit të Albtelekomit dhe që ka bërë që ky institucion të keqmanaxhohet në mënyrë të politizuar dhe abuzive gjatë gjithë kësaj periudhe. Ndërrimet e vazhdueshme të drejtorëve nuk besoj se e kanë zgjidhur dhe as do të zgjidhin situatën në të cilën është Albtelekomi. Ata synojnë të fshehin problemet që ka dhe keqmanaxhimin e Albtelekomit. Mendoj se janë interesa të ngushta dhe abuzive që e kanë sjellë Albtelekomin në këtë situatë," deklaroi ish kryeministri. Ai ka folur dhe për nevojën për të patur më shumë investime në veri të vendit, pasi ajo zonë sipas tij ka ardhur duke u varfëruar në mënyrë drastike. "Shqipëria ka qenë në kushte të vështira social ekonomike. Gjatë dy viteve të fundit, ka ardhur duke varfëruar më tej banorët e këtyre zonave duke rritur më tej problemet e tyre sociale. Ka rënie drastike të investimeve nga ana e qeverisë," theksoi Meta.

[Albo]

Kërkesa e opozitës për komision hetimor do të diskutohet nesër në byronë e Kuvendit

PS kundër hetimit të Albtelekomit

“Parlamenti po kthehet në Prokurori. Këtë çështje mund ta hetojnë organet e specializuara”

Anila Rama

TIRANE - Opozita po kërkon ta shndërrojë Parlamentin në një prokurori të dytë, duke dubluar tërësisht organin e specializuar për të zhvilluar hetime profesionale. Në këtë mënyrë, socialistët vlerësojnë kërkesat e vazhdueshme të opozitës për hetime parlamentare, duke u shprehur kundër kërkesës së Partisë Demokratike për të hetuar veprimtarinë e të vetmes kompani të telefonisë fikse në vend. Por pavarësisht se janë kundër ngritjes së këtij komisioni hetimor parlamentar, nënkryetarja e Kuvendit Makbule Çeço dhe sekretari i Marrëdhënieve me Publikun në selinë rozë Bardhyl Agasi pohuan se shqyrtimi i kërkesës në byronë parlamentare do të zgjidhë nëse duhet ngritur apo jo komision hetimor për të zbardhur procedurat që janë ndjekur për të zyrtarizuar rritjen e tarifave të bisedave lokale dhe me linjat brenda vendit si dhe për të hetuar mbi marrëveshjet e ndërlidhjes së Albtelekomit me kompanitë private mobile. Çeço tha se kjo kërkesë mund të mos ketë objekt hetimi ashtu siç ishte dorëzuar në Kuvend kërkesa për të hetuar ngjarjen e Shkallnuerit. “Nuk jam njohur me kërkesën zyrtarisht. Por mendoj se ka struktura të tjera që mund të hetojnë se si është kryer rritja e tarifave për bisedat nga telefonat e Albtelekomit. Nuk besoj se duhet të zhvillohet hetim parlamentar. Megjithatë byroja do të vendosë për këtë çështje pasi ta ketë shqyrtuar. Ndoshta mund të jetë edhe pa objekt fare”, -tha Çeço. Ndërkaq zyrtari i lartë i PS-së, Agasi tha se ishte i habitur me faktin që kërkesa për të hetuar më parë dorëzohen në Parlament, sesa në organin përkatës, prokurorinë. Sipas tij, me këtë logjikë që po vepron opozita, Parlamenti po humbet funksionin e vërtetë, dhe i duhet që të merret vetëm me hetime. “Po na dalin të gjitha çështje të veçanta. Besoj se kërkesa për të hetuar mbi një problem të caktuar duhet të drejtohet në fillim në prokurori dhe jo në Parlament. Ky mund të quhet pa frikë hetim paralel dhe zbehje e rolit të prokurorisë. Megjithatë byroja parlamentare dhe më pas grupet parlamentare do të vendosin nëse hetimi për kompaninë shtetërore të Albtelekomit do të kalojë për miratim në seancë plenare apo do të rrëzohet”, -tha Agasi.

Rusmali
Ndërkaq sekretari i Çështjeve Ligjore në selinë blu, Ilir Rusmali tha se kërkesa për ngritjen e komisionit hetimor për Albtelekomin, kishte një objekt të përcaktuar qartë. Sipas tij, gjithçka është bazuar në dispozitat e ligjit për komisionet parlamentare. Opozita duke pasur edhe mbështetjen e lëvizjes “Mjaft” ka kërkuar që nga muaji dhjetor dorëheqjen e drejtorit të Albtelekomit Apostol Noti, duke e akuzuar atë për rritje abuzive të çmimit të bisedave të telefonisë fikse, duke rënduar të gjithë abonentët e kësaj kompanie. Noti dy ditë më parë u detyrua të japë dorëheqjen si pasojë e situatës së krijuar për këto tarifa tepër të shtrenjta për shqiptarët. Ndërkaq brenda një kohe të shkurtër, opozita ka depozituar në Kuvend tre kërkesa për ngritje të komisioneve hetimore parlamentare. Kërkesa për hetimin e aksidentit të Shkallnuerit, është rrëzuar nga Parlamenti me shumicë votash, nën argumentimin se mungonte objekti i hetimit. Ndërsa për komisionin tjetër që do të hetonte tragjedinë e 9 janarit, kërkesa u pranua dhe u miratua ngritja formale e komisionit. Por opozita nuk paraqiti emrat pasi këmbënguli që të merrte drejtimin e hetimit, pretendim nga i cili nuk u tërhoqën as socialistët.

[Brari]

gjeta diku kte shkrim..

Sdi nga eshte marre..

--------

Pse duhet hetuar Albtelekom?

Oltion Rrumbullaku

Më në fund u hodh në eter lajmi që opozita ka depozituar pranë Kryesisë së Kuvendit kërkesën për ngritjen e komisionit hetimor për kontrollin e veprimtarisë së kompanisë shtetërore Albtelekom. Meqënëse nuk pretendoj të zotëroj të vërtetën e vetme të ngjarjeve të ndodhura rrotull Albtelekom gjatë këtyre viteve të fundit, këtë analizë e kam bazuar në disa supozime që mendoj se janë më të mundshme në lidhje me situatën financiare të kësaj kompanie shtetërore.

Pak Histori
Rreth një vit më parë m’u kërkua të bëja një studim për situatën e tregut të telekomunikacioneve në Shqipëri për llogari të një institucioni ndërkombëtar. Përtej vështirësive të panumërta që ndesha në gjetjen e materialeve zyrtare të kufizuara vetëm në pak të dhëna të INSTAT-it dhe ndonjë hartim interesant në lidhje me “strategjinë kombëtare” të tregut të telekomunikacioneve, kryesisht u mbështeta në hulumtime të shtypit të përditshëm të viteve të fundit. Përveç optimizmit të tepërt të këtyre pseudo–strategjive të ndryshuara çdo vit është për t’u theksuar që parashikimet e pas 97ës shpreheshin që Albtelekom do të privatizohej që në vitin 2000. Ky vit shkoi si ky shkuan edhe të tjerë. Por gjatë gjithë kësaj kohe deri në fund të vitit 2003, nuk është përmendur më askund privatizimi i kësaj pasurie kombëtare.

Çfarë mund të ketë ndodhur?
Deri në vitin 2000 kompania shtetërore Albtelekom ishte në një gjendje të lakmueshme financiare me fitime që e tejkalonin shifrën e 4 miliardë lekëve (rreth 30 milionë dollarë). Në qoftë se do të privatizohej në ato momente ishte i pashmangshëm një përfitim nga privatizimi për më shumë se 200 milionë dollarë duke pasur parasysh ndër të tjera faktin se tregu i telekomunikacioneve është një treg shumë atraktiv me mundësi të pakufizuara rritjeje dhe zotërimi i rrjetit fiks në një shtet të caktuar i jep një gati - monopol natyror në tregun e telekomunikacioneve çdo kompanie që do të rezultonte fituese nga tenderi përkatës. Por, Albtelekom -i nuk u shit. Gjithçka u la në heshtje. Të vetmet gjurmë janë ato pseudostrategji të paravitit 2000 që ishin aq fantastiko – shkencore sa deklaronin se në vitin 2004 Albtelekom do të ketë rreth 500 mijë abonentë (momentalisht ka pak më shumë se gjysma e kësaj shumë).
Mirëpo fjalët e shkruara i mori era dhe në vitin 2000 AMC u privatizua dhe pas kësaj edhe aftësitë e drejtuesve të ekonomisë shqiptare pësuan “shndërrime” të rëndësishme që e lanë krejtësisht pas dore, me qëllim ose jo, privatizimin e Albtelekom -it. Gjatë kësaj kohe u nënshkrua edhe kontrata e famshme e interkonjeksionit midis Albtelekom dhe AMC i cila i siguronte kësaj të fundit 88% të faturës së bisedave midis këtyre dy operatorëve. Për një periudhë të caktuar, ndoshta ngaqë Albtelekom e konsideronte kontratën të parregullt, nuk u paguan detyrimet e lindura nga kjo kontratë. Këto bazohen në hulumtimet e shtypit të vitit 2001 ku vihet re një rritje të presionit të AMC kundrejt Albtelekom për të respektuar kontratën e nënshkruar dhe për të paguar borxhet e krijuara që në fillim të nënshkrimit të saj.
Më pas duke u rikthyer tek supozimet është shumë e mundur që Albtelekom u detyrua të pranonte pasojat e kontratës rreth fundit të vitit 2001 që përkon me ndryshimin e parë të çmimeve të Albtelekom (pas së cilës ishte një lajthitje të përdorej një telefon fiks për tu lidhur me celular për shkak të tarifës stratosferike) dhe njohjen si borxh për të paguar të detyrime të trafikut të mëparshëm të këtyre kompanive që nga viti 2000. Këto ndryshime sollën pasoja edhe në bilancin e deklaruar të
.....

[Brari]

Kam nje dyshim se PS e ka ujdisur punen me KESH-in dhe Telekomet qe i ka cifligje te vetat.. qe sa me shume tu a rrasin faturen njerzve te ndershem e nga ana tjeter tu cojne fatura simbolike sorrollopit militant socialist si nje fare "nderi" qe Partia ne Pushtet ja ben njerzve te saje..

[Albo]

Miratohet ngritja e komisionit hetimor per "Albtelecomin"

Rritja e cmimeve te telefonise fikse nga Albtelekomi Shqiptar, duke filluar qe nga dita e djeshme, do te hetohet nga nje Komision i posacem Parlamentar. Ne mbledhjen e rradhes se Byrose Parlamentare, socialistet kane pranuar kerkesen e bere prej Partise Demokratike per ngritjen e ketij Komisioni Hetimor, i cili do te hetoje procedurat e rritjes se cmimit te tarifave telefonike dhe marreveshjet me operatore te tjere telefonike. Keshtu, Zevendes-kryeministri, Namik Dokle deklaroi dje ne Byrone Parlamentare se qeveria shqiptare eshte e vendosur per ngritjen e jo vetem ketij komisioni, por edhe per ngritjen edhe te disa komisioneve te tjera mbi menyren e funksionimit te shoqerive anonime, "te te gjitha sh.a-ve te cilat administrojne fondet publike". "Nese ka shkelje ligji, do te pergjigjen perpara tij, te gjithe ata qe e kane shkelur. Nese ka shkelje te ligjit, ata qe jane votuar nga Parlamenti, sepse ERT-ja votohet prej tij, atehere Parlamenti te marre masat per t'i shkarkuar nga detyra per te cilen i ka votuar" , nenvizoi dje Dokle. Nga ana tjeter, Kryetari i Grupit Parlametar te PD-se, Bamir Topi u shpreh se me kete deklarate, numri dy i ekzekutivit lehtesoi punen e Byrose per ngritjen e komisionit, ndersa vuri edhe njehere ne dukje mungesen e vullnetit te shumices ne lidhje me ngritjen e komisioneve hetimore. Nderkaq, midis Kryetareve te Grupeve Parlamentare u ra dakort qe deri te enjten e kesaj jave, opozita dhe shumica duhet te paraqesin emrat e perfaqesuesve te tyre, te cilet do te marrin pjese ne kete komision hetimor. Kryesimin e ketij komisioni hetimor do ta kete opozita, kurse emrat e anetareve te tij, do te mesohen vetem ne seancen parlamentare te se enjtes. Qeveria shqiptare eshte kritikuar ashper, kohet e fundit, nga opozita per rritjen e cmimit te telefonise fikse, ndersa Kryetari i PD-se, Sali Berisha ka premtuar se do t'i shkohet deri ne fund zbardhjes se ceshtjes se Telekomit.

Renato Kalemi

[Brari]

gazeta panorama


---------

Që na vjedhin na vjedhin…

Redi Gjuzi

Që na vjedhin është normale. Këtë e dëgjon në kafene kur shikon makina 100 mijë dollarëshe, me njerëz që para disa vitesh nuk dihet se mbi cilën sipërfaqe bujare të tokës kanë banuar. Që na vjedhin është normale, kjo dëgjohet edhe kur shtrohen rrugë, që më parë kanë qenë me gropa, kur priten shirita përurimi të veprave me të vërtetë të bukura, por këtë radhë e themi me fytyrë të qeshur dhe me një “hajd më, të paktën këtë radhë e bënë rrugën”. Dhe shumë mirë. Shumë mirë se të paktën rruga u bë. Në këtë logjikë, vjedhja është bërë e justifikueshme. Mjafton që të paktën të bëhet puna, të ndërtohet rruga, ujësjellësi, shkolla etj. Në rast se këto nuk ndërtohen, atëherë vjedhja bëhet e keqe, hajduti i shëmtuar. Kështu ndodh pothuajse në të gjitha fushat në Shqipëri.

Në momentin kur nuk bëhet asgjë, hajduti shahet, në rast se hajduti e ndan vjedhjen me punën, atëherë ai nuk është hajdut, por punëtor. Rreth 5 vite më parë, kur u privatizua AMC-ja, shqiptarët i pranuan tarifat e larta, nga më të lartat në Evropë, të impulseve me të mirën që sollën këto fatura. Shqiptarët kishin aparate celularësh në duar, dhe kjo ishte një “rrugë pa gropa”. Si e tillë, tarifa marramendëse tolerohej. E njëjta frymë u përdor edhe në privatizimin e Vodafone. Ne pranuam, sërisht të paguanim pafund për një impuls të telefonisë celulare, pasi tani kishin një treg të liberalizuar. Prap një “rrugë pa gropa”. Tani shqiptarët nuk kanë çfarë të bëjnë që impulsi i telefonisë së lëvizshme në Shqipëri është 6 herë më i lartë se në Irak. Ata gëzojnë komunikimin e ri. Por pas 5 vitesh, liberalizim të telefonisë celulare, po del një problem i ri. Përveç se na e shesin impulsin sa frëngu pulën, duke paguar 6 herë më shumë se në Irak, për të folur me celularë, duke ecur, këto kompani po na i marrin lekët edhe duke folur me telefon fiks. Një raport ndërkombëtar tregon se kontratat e Telekomit me AMC dhe Vodafone, kanë një anomali, që si gjithmonë po paguhet nga qytetarët. Kështu në rast se merr në telefon nga shtëpia me anë të telefonit fiks, një numër celular dhe shpenzon 100 lekë, kompanitë e celularëve marrin nga kjo shifër 88 lekë. Kontrata e lidhur nga Telekom i jep shoqërive të telefonisë së lëvizëshme 88 për qind të vlerës së folur dhe jo më pak se 40 lekë për minutë. Kështu në vend që lekët të shkojnë te Telekomi, sepse ke folur me telefon fiks, shkojnë përsëri te Vodafone ose AMC. E njëjta gjë ndodh edhe kur merr në telefon nga celulari. Në këtë rast, kontrata është bërë përsëri në kurriz të Telekomit. Telekom merr vetëm 8 për qind të faturës. Pra, i gjithë komunikimi i shqiptarëve pasuron kompanitë celulare. Sido të flasësh, të marrësh një mik për t’i thënë se po na vjedhin për rrugët, për dritat, për ujësjellësin, lekët e tua shkojnë për të pasuruar kompanitë celulare. Dhe këto kontrata, me të dy kompanitë, janë firmosur nga shqiptarë, nga ata shqiptarë, që shfrytëzuan dëshirën e shqiptarëve për të komunikuar me celularë, për të abuzuar. Sepse paratë që duhet të shkojnë te Telekomi, që është pronë e të gjithë shqiptarëve, shkojnë për kompani të huaja, që rastësisht nuk janë shumë larg kufijve shqiptarë. Dhe rrjedhoja nuk është vetëm përfitimi i pafund, por edhe rraskapitja e Telekomit. Rrjedhojë është edhe mosshitja e tij. Asnjë kompani e huaj nuk i afrohet Telekomit, pasi shikon këto lloj kontratash. Kështu, Telekomi nuk shitet, të ardhurat në buxhet nuk rriten. Rriten vetëm makinat 100 mijë dollarëshe të disa personave që vënë firma, dhe shqiptarët që thonë,: “Hajd më, që do na vjedhin do na vjedhin, por të paktën tani po flasim në telefon”.