Gjin Gjoni jep dorehqejen dhe leshon akuza per KLD

[Brari]

panorama
------
akuza të gjyqtarit

intervista


Prapaskenat dhe pazaret. Gjin Gjoni bën radiografinë e Këshillit të Lartë të Drejtësisë

“Ju rrëfej klanet e KLD-së”
Gjyqtari i dorëhequr: Ja përse refuzova Krimet e Rënda


Laureta Rryçi

Nuk është thjesht dorëheqje. Por, reagim, apo më mirë akoma, një aktakuzë e hapur. Në një letër format, e shkruar me 50 radhë kompjuterike, gjyqtari i Gjykatës së Tiranës, Gjin Gjoni, dje i ka shprehur Presidentit Moisiu se i ka larë duart me Gjykatën e Krimeve të Rënda.

E, sikur ky rebelim të mbetej këtu, çdokujt do t’i dukej normale. Por, juristi, që mban mbi supe 10 vjet veshur pelerinën e zezë të gjykatësit, akuzon Këshillin e Lartë të Drejtësisë për pazare e klane që, sipas tij, nuk dëshirojnë të kenë pranë tyre një anëtar të ri. Në një intervistë të dhënë mbrëmë vonë për gazetën “Panorama”, ai bënë radiografinë e këtij isntitucioni. Përse nuk e zgjodhën në KLD. Kush e pengoi dhe si përzgjidhen anëtarët dhe çfarë do të ndodhte nëse veprohej ndryshe.

Në fakt, kjo është hera e parë që një gjyqtar të akuzojë direkt këtë institucion, kur tashmë të gjitha shigjetat e institucioneve të huaja janë drejtuar nga gjyqësori, i cilësuar ndryshe edhe si kollona më e dobët e Shtetit shqiptar.

Zoti Gjoni, ju keni paraqitur kërkesën Presidentit dhe në të njëjtën kohë Kryetarit të Këshillit të Lartë të Drejtësisë, Alfred Moisiut, që të mos ju dekretojë për gjyqtarë të Gjykatës së Faktit të Krimeve të Rënda. Përse e keni ndërmarrë këtë vendim dhe kur e keni bërë këtë kërkesë?
Është e vërtetë që e kam bërë një kërkesë të tillë. Kërkesa ime ka mbërritur që ditën e djeshme në tavolinën e kreut të Shtetit dhe në të njëjtën kohë kryetarit të KLD-së që ditën kur mësova që kishin vendosur të më propozonin edhe mua në mes të gjyqtarëve të tjerë. Arsyet e mia për dorëheqjen janë, pikësëpari, sepse para disa ditësh KLD-ja refuzoi që të më pranonte si anëtar, edhe pse kisha marrë të gjitha votat e mundshme nga të gjithë gjyqtarët në Konferencën Gjyqësore dhe e dyta, është sepse unë iu kam premtuar të gjithë atyre gjyqtarëve se, po qe se ata do të votonin mua, për anëtar të KLD-së, unë nuk do të pranoja asnjë detyrë tjetër, që kishte të bënte me karrierën time, por do të mundohesha t‘u zgjidhja problemet e tyre që kishin të bënin me problemet gjyqësore.

Pse vendosët pikërisht dje të kërkonit dorëheqjen, kishit dyshime se ndoshta nuk do të dekretoheshit?
Nuk kam patur asnjë sinjal që nuk do të dekretohesha, por vendosa për arsyet më lartë, si dhe unë jam ndier i fyer nga anëtarët aktualë të Këshillit të Lartë të Drejtësisë. Pasi veprimi i tyre ishte i turpshëm dhe në kundërshtim me Kushtetutën.

Me çfarë argumentesh e kundërshtoni vendimin e KLD-së?
Unë di të them se ata përdorin dy lloj procedurash për raste të njëjta dhe për persona të ndryshëm. Që do të thotë, ndërsa emërojnë gjyqtarë në Gjykatat e Apelit, apo të Faktit, të cilët nuk kanë punuar asnjë ditë si gjyqtarë, por vetëm asistent gjyqtar, mua më mohojnë të drejtën, ndërkohë që kam dhjetë vjet punë dhe 6 muaj asistent gjyqtar.

Ju refuzuan anëtarët apo Presidenti?
Më refuzuan gjashtë anëtarë, të cilët ishin në përbërje, duke lënë katër anëtarë të tjerë pa u marrë mendimi fare. Nuk është se më refuzoi kreu i KLD-së, Moisiu, por më refuzuan anëtarët e klaneve të caktuara. Arsyet janë shumë të thjeshta dhe në të njëjtën kohë të turpshme për drejtësinë shqiptare. Në Këshillin e Lartë të Drejtësisë ka klane, të cilat i kanë rrënjët e thella dhe nuk duan që të ulet ndonjë person i ri mes tyre. Prezenca ime do t‘u prishte shumë plane interesash atyre, sepse ata e dinë se në prezencën time nuk do të bënin më pazaret e tyre të vjetra.

Pra, i bie që në Këshillin e Lartë të Drejtësisë ka persona, të cilët i bëjnë pazaret në kurriz të drejtësisë?
Po, është e turpshme se si ata njerëz, që dikur kanë marrë votat e të gjithë gjyqtarëve nga i gjithë vendi, tani që kanë marrë një post e përdorin vetëm për interesat e tyre personale dhe për pazaret e tyre.

Më datën 27 të këtij muaji, do të zhvillohet Konferenca Gjyqësore, a do të bëni ndonjë deklaratë para gjyqtarëve që iu votuan disa ditë më parë?
Drejtuesit e Drejtësisë shqiptare të heqin edhe të drejtën për të folur dhe si pasojë lirinë e të shprehurit. Për të ilustruar atë çka thashë më lart po iu them rastin më të fudnit. Sot (dje) mbasdite ka qenë mbledhja e Këshillit Ekzekutiv Gjyqësor dhe kryetari i Gjykatës së Lartë, Thimio Kondi, i ka kërkuar të gjitha anëtarëve që ditën e konferencës mua të më hiqet e drejta e fjalës. Nëse unë do të tentoj të flas, atëherë do të më nxjerrin përjashta. Ky është vendimi i turpshëm i radhës që kërkojnë ata. Të kërkohet heqja e fjalës në një mbledhje gjyqësori, ku gjëja kryesore është drejtësia, do të thotë që drejtësia drejtohet nga persona që marrin vendime të turpshme.

Ju deri tani keni gjykuar shumë dosje të bujshme si “Kokaina”, “Grori” tani që kërkuat dorëheqjen nga Gjykata e Faktit të Krimeve të Rënda si do të ndiheni para çështjeve të vogla?
Do të ndihem shumë mirë, sepse nuk është e thënë që nuk do të ketë më dosje të bujshme. Sepse jam i bindur se do të ketë plot padi civile apo penale jo shumë të rënda, që do të bëhen të bujshme. Për mua, rëndësi ka që unë të kryej misionin tim, ashtu siç duhet dhe shumë gjyqtarë që më votuan të vazhdojnë të mendojnë se gjyqtari Gjin Gjoni do të veprojë gjithmonë në të mirë të drejtësisë shqiptare.



Arsyet e dorëheqjes nga Krimet e Rënda

Katër arsyet pse gjyqtari Gjin Gjoni heq dorë nga vendi në Gjykatën e Shkallës së Parë të Krimeve të Rënda. Pas vendosjes së emrit të tij në listën e gjyqtarëve, që mund të bëhen anëtarë të trupit gjykues më të ri në vend. Disa ditë para se të jepej vendimi i dekretimit nga ana e Presidentit të Republikës, Gjoni heq dorë nga ai vend. Ai i kërkon Presidentit të mos e dekretojë. Arsyet, sipas tij, janë katër. Në një letër dërguar Presidentit, ku kërkohet edhe mosdekretimi, Gjoni thotë se “emërimin tim si anëtar të kësaj gjykate, nuk mund ta marr dhe konsideroj si një kompensim, për mënyrën se si më është mohuar mandati i anëtarit të Këshillit të Lartë të Drejtësisë nga ana e Këshillit”. Vetëm para një jave, Presidenti nuk pranoi të dekretonte emrin e Gjin Gjonit në KLD, edhe pse ky i fundit kishte marrë më shumë vota se të gjithë kandidatët e tjerë për të zënë vendin në Këshillin e Lartë të Drejtësisë. Gjoni e cilësoi këtë si një veprim antikushtetues. Ndërkohë refuzimi i vendit të gjyqtarit ka edhe arsye të tjera. Sipas Gjonit, këtë vend e refuzon edhe se “u kam premtuar 180 anëtarëve të Konferencës Kombëtarë Gjyqësore, që më votuan se në rast të zgjedhjes sime si anëtarë të KLD-së, nuk do të kërkoja asnjë rritje në detyrë”. Gjithashtu, Gjoni, në letrën drejtuar Presidentit, ku kërkon mosdekretimin e tij si gjyqtar të Krimeve të Rënda, thotë se mund t´i shërbejë më mirë drejtësisë në vendin tanishëm të punës, në atë të gjyqtarit të Gjykatës së Faktit të Tiranës.



10 vjet gjyqtar në Gjykatën e Faktit Tiranë
Kush është Gjin Gjoni, gjyqtari i “Grorit” dhe “Kokainës”

Gjin Gjoni njihet si një nga gjyqtarët më me përvojë në Gjykatën e Tiranës. Gjatë dhjetë viteve punë, në fillim si asistent dhe më pas si gjyqtar, ai ka kaluar në dorë me qindra procese të bujshme. Këto si gjatë kohës kur në pushtet ka qenë Partia Demokratike dhe kur erdhën socialistët. Por, ato që e kanë bërë atë të njohur kanë qenë dy proceset e fundit që, sipas specialistëve, veprat penale të të akuzurëve, futen në krimet e rënda dhe trafiqe. Bëhet fjalë për dosjen e Arben Grorit, një personazh shumë i njohur i botës së krimit, i akuzuar për trafik droge. Ai e dënoi “të dënuarin” e drejtësisë italiane me 25 vjet burg. Por, një proces tjetër ka qenë e ai i ashtuquajtur “Kokaina”, kur të akuzuar kanë qenë Sokol Koçiu, ish-drejtor i Policisë së Vlorës dhe shef i policisë gjyqësore në Prokurorinë e Përgjithshme. Bëhet fjalë për një trafik ndërkombëtar të kokainës ku përfshiheshin dhjetëra shtete, mes të cilave edhe Shqipëria. Edhe në këtë rast, Gjin Gjoni ka dhënë vendime shumë të ashpra, të mbështetura këto në Kodin Penal. Vendimet e dhëna nga ky gjyqtar janë futur në të gjitha manualet dhe të dhënat e drejtësisë shqiptare. Kohët e fundit, ai kërkoi të përfshihet në Këshillin e Lartë të Drejtësisë, pikërisht i mbështetur në përvojën dhe në arritjet e punës së tij. Por një kërkesë e tillë nuk u mor parasysh nga Presidenti i Republikës, Alfred Moisiu. Kjo shërbeu më pas si një reagim i tij për të mos u përfshirë në institucionin më të ri të drejtësisë, atë të Krimeve të rënda.

-------