Iran: Konservatoret fitojne ne zgjedhje

[Albo]

Iran: Ligjvënësit thonë se Këshilli Mbikqyrës Islamik i ka vënë veton një projekt-ligji

26 janar 2004, 5:30 UTC


Ligjvënësit iranianë thonë se Këshilli Mbikqyrës Islamik me pikëpamje konservatore i ka vënë veton një projekt-ligji që kishte për synim të dobësonte rolin e këshillit në procesin e zgjedhjeve parlamentare.
Ligjvënësit dhe njoftimet bënë dje të ditur se këshilli me 12 anëtarë i cilësoi ndryshimet ligjore si në kundërshtim me kushtetutën dhe me ligjet islamike të Iranit. Këshilli ka fuqinë t’u vërë veton ligjeve të miratuara nga parlamenti i mbizotëruar nga reformistët.

Në një sesion urgjent dje parlamenti miratoi një ligj për reforma i cili nuk do t’i lejonte Këshillit të skualifikonte kandidatët për poste të zgjedhura, me përjashtim të rastit të kriminelëve.

Këtë muaj, Këshilli ndaloi mijëra kandidatë reformistë të konkuronin në zgjedhjet e përgjithshme të muajit të ardhshëm. Që nga ajo kohë, Këshilli ka lejuar për konkurim 300 kandidatë me urdhër të Udhëheqësit të Lartë Iranian dhe pas protestave të shumta nga ligjvënës reformistë dhe zyrtarë qeveritarë.

Parlamenti e cilësoi ligjin e reformave si tepër urgjet, një term që përdoret vetëm kur vendi është në rrezik të madh politik. Ky cilësim nuk është përdorur që pas Revolucionit Islamik të Iranit në vitin 1979.

[Albo]

Irani mohon planet e vizitës së zyrtarëve të Kongresit amerikan
31 Jan 2004, 15:31 UTC


Ministri i Jashtëm i Iranit mohon planet që një delegacion i zyrtarëve të kongresit amerikan të vizitojë Teheranin. Njoftimi vjen një ditë pasi një senator amerikan shpalli planet për një udhëtim në Iran. Një zëdhënës i ministrisë së Jashtme iraniane tha sot se plane për një udhëtim të tillë nuk ekzistojnë. Dje, senator Alein Spekter tha se udhëtimi i zyrtarëve të kongresit ishte konfirmuar për muajin tjetër për të përgatitur terrenin për një vizitë të mundëshme të një delegacioni ligjvënësish amerikanë. Senatori Spekter tha se hollësitë e vizitës ishin përcaktuar gjatë një takimi me ambasadorin e Iranit pranë Kombeve të Bashkuara. Uashingtoni i ndërpreu marrëdhëniet diplomatike me Iranin në vitin 1980, pas pushtimit të ambasadës amerikane në Teheran./al/

[Albo]

Iran: Fillon zyrtarisht fushata e zgjedhjeve
12 shkurt 2004, 19:55 UTC

Në Iran ka filluar zyrtarisht fushata e zgjedhjeve, për të cilat reformistët thonë se janë të manipuluara për t’u dhënë konservatorëve shumicën në parlament.
Fushata për 290 vendet e parlamentit filloi zyrtarisht të mërkurën në mesnatë. Agjencia shtetërore e lajmeve IRNA thotë se mijëra qendra votimi do të bëhen gati për zgjedhjet e së premtes së ardhshme.

Mbi 5 mijë e 600 kandidatë kryesisht konservatorë janë në garë, ndërsa mbi 2 mijë kandidatë reformatistë nuk do të marrin pjesë, pasi u skualifikuan nga Këshilli Mbikqyrës, një organ shumë i fuqishëm. Vendimi për të mos i lejuar ata të kandidojnë shkaktoi një krizë politike.//kk//

[Albo]

Shënohet përvjetori i revolucionit iranian

Presidenti iranian, Mohammed Khatami, ka kritikuar ashpër kundërshtarët e tij konservatorë, duke thënë se po i shpërfillin të drejtat e njeriut dhe po punojnë kundër interesave iraniane.
Përvjetori bie gjatë krizës së rëndë në republikën islamike

Ai i bëri këto komente në Teheran në një tubim për shënimin e 25 vjetorit të revolucionit që solli autoritetet aktuale në pushtet.

Qindra mija punonjës qeveritarë dhe familjet e tyre u sollën në qytet me autobusë në një shfaqje vjetore të përkrahjes për autoritetet konservatore islamike.

Përvjetori shënohet gjatë njërës prej krizave më të rënda në historinë e kësaj republike islamike, krizë e cila lindi kur Këshilli i pazgjedhur i Gardianëve ndaloi pjesëmarrjen e më shumë se dy mijë kandidatëve reformatorë në zgjedhjet parlamentare të këtij muaji.

[Albo]

Iran: Reformatorët vazhdojnë të tërheqin kandidaturat për zgjedhjet

15 shkurt 2004, 19:10 UTC


Në Iran, reformistë të tjerë tërheqin kandidaturën nga zgjedhjet parlamentare në shenjë proteste ndaj diskualifikimit masiv të kandidatëve që mbështesin reformat.
Sipas agjencisë iraniane të lajmeve, Ministria e Brendshme tha të dielën se deri tani 607 kandidatë kanë vendosur të mos konkurojnë në zgjedhje.

Shumica e partive reformiste të vendit po i bojkotojnë zgjedhjet e 20 shkurtit, duke i cilësuar ato si të padrejta.

Kriza politika shpërtheu muajin e kaluar kur Këshilli Mbikëqyrës i Iranit skualifikoi më shumë se 2 mijë e 500 kandidatë nga zgjedhjet parlamentare. Mes tyre ishin 80 anëtarë të legjislaturës së tanishme.

Politikanët reformistë thonë se duke skualifikuar një numër kaq të madh kandaidatësh reformistë, Këshilli Mbikëqyrës, anëtarët e të cilit nuk zgjedhen por emrohen, ka manipuluar zgjedhjet në mënyrë që parlamenti të bier nën kontrollin e konservatorëve.

Reformistët dhe konservatorët janë mbërthyer në një betejë prej afro dhjetë vjetësh për rolin udhëheqës në Rapublkikën Islamike të Iranit.

Analistët thonë se populli i Iranit po i humbet shprersat se gjendje do të zgjidhet dhe parashikojnë një pjesëmarrje të ulët në zgjedhjet e së premtes. //kk//

[Albo]

Gazetarë iranianë thonë 'bojkotoni zgjedhjet'

Në prag të zgjedhjeve të përgjithshme në Iran, disa prej intelektualëve dhe gazetarëve më të njohur të vendit kanë bërë thirrje për bojkotim të votimeve.
Edhe Ajatollah Montazeri ka thënë se nuk do të votojë


Një grup prej më shumë se njëqind gazetarësh lëshuan një kumtesë në të cilën thonë se nuk do të votojnë sepse votimi nuk do të jetë i lirë dhe i ndershëm.

Kleriku më i shquar disident në Iran, Ajatollah Hossein Ali Montazeri, poashtu ka thënë se nuk do të votojë.

Kjo pason hapin e Këshillit të Gardianëve për të skualifikuar mijëra kandidatë reformistë.

Reformistët po bëjnë fushatë për një pjesëmarrje të ulët në përpjekje për të vënë në dyshim legjitimitetin e parlamentit të ri.

Një korrespondent i BBC-së thotë se aktivistët e rinj po e përdorin edhe internetin dhe celularët për të dekurajuar njerëzit nga votimi.

Më herët, autoritetet iraniane mbyllën dy gazeta të shquara reformiste pasi ato shpërfillën një urdhër për të mos e botuar një letër që kritikonte Udhëheqësin Suprem të vendit, Ajatollah Khamenei.

[Albo]

Iran: Konservatorët fitojnë në zgjedhje

21 shkurt 2003, 18:40 UTC


Në Iran, rezultatet e deritanishme të zgjedhjeve parlamentare, tregojnë se kandidatët konservatorë të mbështetur nga udhëheqja islamike e vijës së ashpër e vendit korrën një fitore të madhe.
Zyrtar të Ministrisë së Brendshme në Teheran konfirmuan se kandidatët konservatorë kishin fituar në shumicën e zonave elektorale ku janë numëruar votat.

Një numër zyrtarësh të partive reformiste thonë se parashikojnë që konservatorët të kenë shumicën në legjislaturën e re të vendit.

Fitorja e kandidatëve konservatorë ishte thuajse e garantuar, pasi Këshilli Mbikëqyrës i vijës së ashpër skualifikoi 2 mijë e 400 kandidatë, kryesisht reformistë, mes të cilëve 80 anëtarë të parlamentit të tanishëm, i cili mbizotërohej nga reformistët.

Këshilli Mbikëqyrës, anëtarët e të cilit emërohen nga klerikë të lartë myslimanë dhe aleatë të tyre, gëzon të drejtën e vetos ndaj vendimeve të parlamentit. Vendimi i këshillit për të skualifikuar kandidatët reformistë nxiti thirrjet për bojkotimin e zgjedhjeve.

Konservatorët, të cilët gëzojnë mbështetjen e plotë të udhëheqësit superm Ajatollahut Ali Kahmenei, thanë se duke marrë pjesë në zgjedhje, votuesit do të tregonin besnikërinë e tyre ndaj Islamit dhe Iranit.

Politikanët e vijës së ashpër pretendojnë se pjesëmarrja në votim ishte e lartë, por nuk ka njoftime nga burimeve të pavarura sesa nga 46 milionë zgjedhësit e regjistruar morën pjesë në votim.//kk//