Vetvrasjet ne Shqiperi te shumta!!

[Shpirt Njeriu]

BERAT- Ka lënë një letër në të cilën shkruante se do të vetëvritej, duke hedhur dhe firmën e tij, por nuk ka dhënë asnjë detaj rreth motiveve të vetëflijimit. Mësuesi i fillores, Reshat Rodhe, 53 vjeç, baba i dy fëmijëve, është vetëvrarë dje me çifte, në rrethana enigmatike në shtëpinë e tij. 53-vjeçari banues në fshatin Parangua të komunës Otllak, 3 km në veri të qytetit, sipas hetimeve të para të policisë, i ka dhënë fund jetës në kushtet e depresionit të shkaktuar për motive ende të panjohura. Familjarët kanë thënë se mësuesi prej disa ditësh ishte mbyllur në vetvete, por ata nuk e kishin menduar se një gjë e tillë do ta çonte në vetëvrasje.
Ngjarja
Ngjarja tragjike në familjen Rodhe ka ndodhur në mëngjesin e djeshëm, rreth orës 05:30. Bashkëshortja e viktimës ka treguar dje pas ngjarjes se Reshati ishte ngritur më herët se ditët e tjera. “Kur e pyeta pse u ngrit kaq herët Reshati më tha se do të lahej dhe do të merrej me ca punë të shkollës”,- ka thënë gruaja e viktimës. Ajo e ka lënë të qetë bashkëshortin dhe ka filluar të merret me punët e mëngjesit. ”Isha në dhomën time kur dëgjova krismën e armës. Dola menjëherë jashtë për të parë se çfarë kishte ndodhur. Në verandën përpara shtëpisë pashë burrin të shtrirë përmbys dhe të mbytur në gjak. Ulërita me sa zë që kisha”,- ka treguar gruaja e shtëpisë, pa mundur të japë ndonjë detaj rreth motiveve të vetëflijimit të bashkëshortit të saj. Të parët që kanë ardhur pranë viktimës ishin fëmijët e tij të mitur të cilët janë terrorizuar nga skena që kanë parë. Më pas aty janë gjendur dhe fqinjët dhe të afërmit e familjes të cilët e kanë dërguar me urgjencë në spital mësuesin e vetëvrarë. Burime nga spitali i Beratit thanë për gazetën se 53-vjeçari ka mbërritur i vdekur pranë bluzave të bardha. Ai kishte marrë një plagë në zemër, e cila ka qenë vdekjeprurëse.
Policia
Një grup ekspertësh të policisë së Beratit ka shkuar në vendngjarje dhe ka nisur hetimet. Burimet thanë për gazetën se në cilësinë e provës materiale kanë sekuestruar armën e gjahut me të cilën është vetëvrarë mësuesi, letrën që ai ka lënë si dhe një gëzhojë të gjetur aty. Policia tha se arma e gjahut me të cilën është vetëvrarë mësuesi rezulton me leje. Policia ende nuk ka dalë me një version zyrtar lidhur me motivet e vetëvrasjes së mësuesit. Familjarët që janë marrë në pyetje nuk kanë mundur të thonë ndonjë arsye. Për momentin, thanë burimet, jemi duke hetuar në pistën se mësuesi është vetëvrarë në kushtet e një depresioni të çastit.

Viktima
Reshat Rodhe, së bashku me familjen e tij kishte dy vjet që ishte zhvendosur nga Hulova, fshat i largët i Gramshit në fshatin Parangua të komunës Otllak, në rrethin e Beratit. Ai punonte mësues i ciklit të ulët në fshatin Zhitom të komunës Velabisht, në Berat. Sipas të njohurve, viktima kishte 30 vjet që punonte si mësues dhe njihej si njeri i rregullt
I afërmi
Bujar Hysi, baxhanak i mësuesit të vetëvrarë, nuk mund t’i shpjegojë arsyet e vetëflijimit. Ai thotë se ishte takuar 48 orë para ngjarjes me baxhanakun e tij dhe nuk pashë tek ai ndonjë shenjë që mund ta çonte në këtë akt tragjik. “Ditët e fundit ishte paksa i tërhequr dhe i mbyllur në vetvete. Nuk e kisha pyetur por mendoja se e kishte nga lodhja në punë”,- tha ai
Nxënësi
Behar Rodhe e njihte mësuesin e vetëvrarë që në fshatin Hulovë të Gramshit. Edhe Behari ishte zhvendosur në fshatin Paragua të Beratit. “Më kishte dhënë mësim në fillorë. Ishte njeri i mirë me të gjithë dhe i respektuar. U çudita kur mësova se mësuesi kishte vrarë veten. Nuk di ç’të them se përse e ka kryer këtë akt ndaj vetes”,- thotë ish- nxënësi.

[Shpirt Njeriu]

KORÇË- Një 31-vjeçare i ka dhënë fund jetës në ujërat e lumit Dunavec. Mirela Trungu, nga fshati Bulgarec i Korçës, është vetëmbytur mbrëmjen e së martës, ndërsa trupi i saj është gjetur ndanë lumit mëngjesin e djeshëm. Sipas burimeve nga policia e Korçës, mësohet se pas gjetjes së trupit, në vendngjarje ka mbërritur një grup i policisë kriminale, që ka kryer hetimet e para në vendngjarje. Pas dyshimeve se 31-vjeçarja ishte vetëmbytur, agjentët e policisë kriminale kanë marrë deklarimet e të afërmëve të Trungut. Këta të fundit kanë pohuar se Mirela vuante prej kohësh nga sëmundja mendore, sëmundje kjo që është bërë shkak për mbytjen e saj në lumin Dunavec. Pas marrjes së dëshmisë prej familjarëve, agjentët e policisë së Korçës kanë përcaktuar si shkak të vetëmbytjes së 31-vjeçares depresionin dhe më pas ia kanë kaluar dosjen prokurorisë së rrethit, për hetime të mëtejshme. Mirela Trungu është e vetëmbytura e dytë në Korçë gjatë dy ditëve të fundit, pas ngjarjes tronditëse të 30-vjeçarit nga fshati Panarit

[Shpirt Njeriu]

KORÇË- Një 30-vjeçar nga një fshat i thellë i Korçës i ka dhënë fund jetës, pas ndarjes nga e fejuara. Vetëvrasja e radhës ka ndodhur në fshatin Panarit të rrethit të Korçës, dy ditë më parë. Burime nga policia lokale pohojnë për “Shekullin” se Festim Demko ishte fejuar me një vajzë nga fshati Backë i Skraparit. Ditën e diel, Festimi kishte shkuar në shtëpinë e të fejuarës për të vendosur ditën e dasmës, por është pritur shumë ftohtë nga njerëzit e gruas së tij të ardhshme. Ndërsa vetë e fejuara i kishte thënë se nuk do të kishte asnjë dasmë, pasi ajo kishte vendosur të ndahej. Sipas burimeve nga policia lokale, mësohet se ky lajm mendohet ta ketë dëshpëruar së tepërmi 30-vjeçarin Demko, i cili nuk është kthyer më në shtëpi. Trupi i tij u gjet në rezervuarin e fshatit Panarit nga bashkëfshatarët e tij, pasi kishte dalë në breg. Punonjësit e policisë që kryen hetimet në vendngjarje pohuan se 30-vjeçari kishte mbytur veten, pasi e kishte lënë e fejuara.