Ne lidhje me Bordellat Shqiptare femrat shiten jashte shtetit!!

[Shpirt Njeriu]

Sërish zbulohet një shtëpi publike në një apartament në qytetin e Korçës. Burime të policisë bëjnë të ditur se është ndaluar 38-vjeçarja Z.L., pronare e apartamentit, e cila gjente edhe klientët. Ka qenë një vajzë nga Laçi ajo që shfrytëzohej si prostitutë, e cila për gati dy javë është bërë edhe objekt i dhunës seksulale nga një sërë klientësh. Policia mendon se ky apartament shërbente vetëm si karantinë përgatitore, ku viktimat e shfrytëzimit seksual, pasi mbaheshin disa ditë në këtë vend, trafikoheshin për në vende të tjera jashtë Shqipërisë, kryesisht në Greqi. Në momentin e operacionit u prangos edhe klienti, 35-vjeçari G.L. Pasi është arrestuar, 24 vjeçarja nga Laçi që shfrytëzohej si prostitutë, mësohet se ka deklaruar në polici se klienti i ndaluar e kishte përdhunuar disa herë. Polica po heton për të sqaruar pozicionin e G.L. në këtë ngjarje. Fillimisht policia në materialet e dërguara në Prokurori ka ngritur për 35-vjeçarin akuzën e kryerjes së marrëdhënieve seksuale të dhunshme për më shumë se një herë.

Si u zbulua baza


Ka qenë një informacion i siguruar tërësisht në rrugë operative nga zyra e antitrafiqeve në Drejtorinë e Policisë së Korçës, që u shoqërua edhe me arrestimin e menjëhershëm të pronares së shtëpisë e njëkohësisht të dhunuesit të 24-vjeçares laçiane. Burime të policisë bëjnë të ditur se gjithçka u realizua brenda një dite. Fillimisht për policinë u dha një informacion i saktë, se apartamenti që shërbente edhe si shtëpi publike gjendej në rrugën "Kiço Drenova" në lagjen numër 15 të qytetit. Më pas agjentët e policisë gjetën momentin që pas mesnate të ndërhynin për arrestimin në flagrancë. Fillimisht u ndalua 38-vjeçarja Z. L., e cila jetonte në apartament edhe me nënën e motrën e saj. Familjarët qëndronin në një dhomë, kurse në dhomën tjetër u gjend 24-vjeçarja nga Laçi dhe klienti i saj 35- vjeçar L.G., po nga qyteti i Korçës. Fillimisht u mor në pyetje vajza që shërbente si prostitutë në këtë shtëpi. Ajo deklaroi se kishte rreth 2 javë që ishte strehuar në këtë apartament dhe se Z.L. i kishte sjellë fillimisht klientë që ishin treguar të dhunshëm me të. Madje, sipas deklarimeve të saj, ata kishin kryer me të marrëdhënie seksuale me dhunë. Por gjithsesi burime të policisë lokale bëjnë të ditur se hetimet vazhdojnë dhe vajza është e trembur për të treguar tutorin e saj, që e kishte sjellë në Korçë dhe e kishte lënë në dorë të 38-vjeçares. Për këtë ajo është strehuar në ambientet e Drejtorisë së Policisë dhe po merret në seanca pyetjesh qetësisht. Ndërkohë, pritet edhe përgjigjja e komisariatit të Laçit, ku do të kryen edhe të gjitha verifikimet e duhura për familjen e saj. Në ditët e ardhshme 24-vjeçarja do të duhet të zgjedhë nëse do të shkojë pranë familjes, apo do të strehohet në qendrën e IOM-it. Gjithçka mbetet në vullnetin e saj për të vendosur, thonë burimet e policisë lokale.


Shtëpia shërbente për të mësuar vajzat me "punën"



Pas zbulimit të apartamentit që shërbente si shtëpi publike, policia e Korçës ka nisur një hetim shumë më të gjerë. Qëllimi kryesor është të zbulohet mënyra se si ka përfunduar vajza nga Laçi deri në Korçë dhe se cili do të ishte destinacioni i saj më pas. Burime nga policia e Korçës kanë treguar se deri tani është mësuar që në këtë shtëpi janë dërguar edhe vajza të tjera. Edhe ato kanë pësuar të njëjtin fat. Fillimisht janë përdhunuar vazhdimisht nga klientë të dhunshëm. Më pas, kur tutorja është siguruar që ato janë bindur të ushtrojnë këtë profesion, u ka dërguar edhe klientë normalë. Por prostitutat në këtë shtëpi nuk rrinin shumë. Pas 10 ditësh ose dy javësh mendohet se ato dërgoheshin në shtetet e tjera. Pra kjo shtëpi shërbente vetëm si vend për t'i mësuar vajzat me punën që duhej të kryenin më pas në trotuaret e Europës.