Studentet shperthejne ne proteste para kryeministrise

[Albo]

Qindra policë rrethuan dje kryeministrinë nga frika e protestës studentore

Shpërthejnë studentët!

Protesta filloi për shkak të mungesës së energjisë elektrike në Qytetin Studenti dhe vazhdoi me kërkesën për largimin e Fatos Nanos

Mijëra studentë u bënë thirrje dje qytetarëve shqiptarë, të bashkohen me ta në protesta për të rrëzuar qeverinë e për të plotësuar kërkesat e tyre.

Parrullat: "Mos të rrijë në trotuar, kush e ndjen veten shqiptar", "O popull me kë je, me Fatosin a me ne", "Poshtë qeveria", "Te sheshi, te sheshi, e hodhëm qelbësirën", "O Fatos ti ku je, pa drita ne na le", "Mbushni sheshet o shqiptar, mos rrini në trotuar" "Eja mblidhuni këtu, këtu", "Këtu vendosim ne"

Mijëra studentë kanë marshuar dje në orët e vona para selisë së kryeministrisë për të protestuar për mungesën e gjatë të dritave në Qytetin Studenti dhe indiferencën e qeverisë ndaj kërkesave të tyre. Protesta e cila ishte spontane, mori formën e një proteste me kërkesa të qarta antiqeveritare. Studentët, pasi u grumbulluan në sheshin qendror të qytetit Studenti, zbritën në rrugën e Elbasanit dhe rreth orës 21 ishin para kryeministrisë. Policia bllokoi arteriet kryesore të kryeqytetit, e alarmuar nga shtrirja e protestës. Në krye të trupave policore ishte vetë nëndrejtori i policisë së Tiranës.

"Ky është një paralajmërim se ne dimë të kërkojmë e do të kërkojmë të drejtat tona deri në fund" - tha një nga oratorët. Studentët ftuan të gjithë qytetarët shqiptarë të ngrihen në protesta, të bashkohen me ta për të kërkuar të drejtat e tyre. Pothuajse të gjitha thirrjet e tyre bashkoheshin në një të përbashkët, ftesën ndaj qytetarëve për të protestuar e kërkuar largimin e qeverisë.

Pasi mbërritën para kryeministrisë, studentët hodhën parrulla antiqeveritare si poshtë qeveria, parrulla kundër kryeministrit Fatos Nano si dhe ftuan qytetarët e Tiranës të bashkoheshin me ta.


Si filloi protesta

Protesta e studentëve ka qenë krejt spontane dhe ka grumbulluar disa qindra të tillë. Artan Cena, student në fakultetin e Histori-Filologjisë thotë se kishte tre orë e gjysmë që kishin ikur dritat në qytet dhe studentët u grumbulluan para godinës 16. Aty janë vetorganizuar dhe kanë rënë në një mendje për të zbritur para kryeministrisë. Kështu qindra studentë kanë zbritur para shkallëve kryeministrisë, ku kanë kërkuar të drejtat e tyre. "Duam drita, duam ujë" ishte perifrazimi më i përmendur gjatë gjithë tubimit të studentëve, që zgjati më shumë se një orë. "O popull me kë je, me Fatosin a me ne!" ishin thirrjet që gumëzhinin para zyrës së kryeministrit Fatos Nano. Poshtë shkallëve të kryeministrisë ishte një varg i gjatë me policë. Dhjetëra të tillë të vendosur ballaz, kanë vëzhguar që protesta e studentëve të mos dilte jashtë kontrollit. Nuk kanë munguar edhe thirrjet e shumta të studentëve për largimin e kryeministrit Fatos Nano. "Poshtë qeveria", "Te sheshi, te sheshi, e hodhëm qelbësirën", "O Fatos ti ku je, pa drita ne na le", "Mbushni sheshet o shqiptarë, mos rrini në trotuar" ishin disa nga thirrjet e shumta të studentëve. Ata kërkuan më shumë drita e më shumë ujë në qytetin Studenti. Jo vetëm atje, por në të gjithë Shqipërinë.

Isidor Koti, student i vitit të tretë, i cili ndodhet në periudhë sezoni thotë se është e domosdoshme që në Qytetin Studenti të mos ndërpriten dritat, pasi kjo paralizon studimet. Kjo për të është një protestë krejtësisht spontane e studentëve, që mungesa e energjisë elektrike i kishte nxjerrë jashtë dhomëzave të ftohta të godinave. Këtë e vërteton edhe një student tjetër.

Ndriçim Omuri thotë se nga ora 20:15 ishin mbledhur para godinës 16, pasi ishin fikur dritat në të gjithë Qytetin Studenti. Kjo i detyroi studentët që të zbrisnin e të protestonin për rreth 1 orë e 30 minuta para kryeministrisë. Më pas ata janë nisur për në Qytetin Studenti. Gjatë gjithë rrugës kanë brohoritur për rënien e qeverisë, pasi sipas tyre ajo po shkakton errësirën në vend.


Protesta vazhdoi në qytetin "Studenti"

Protesta është zgjeruar më shumë në Qytetin Studenti. Pothuajse të gjithë studentët kanë dalë jashtë duke protestuar. Në qendër të Qytetit Studenti, para Drejtorisë së QS-së janë mbledhur tashmë mijëra studentë, duke kërkuar largimin e kryeministrit Nano. Ata kanë kërkuar edhe takim me Drejtorin e Qytetit Studenti, për të komunikuar mbi plotësimin e të drejtave të tyre. Studentëve që protestuan para kryeministrisë, u janë bashkangjitur edhe qindra të tjerë, që kanë vuajtuar errësirën në dhomat e tyre. Studentët paralajmëruan se nëse të drejtat e tyre nuk do të plotësohen, radhët e tyre do të rriten çdo ditë e më shumë.

[MtrX]

Bravo... vazhdoni keshtu... vetem studentet mund te bejne ndonje gje per Shqiperine, se te tjeret aha jane ne gjume...

[Amanti]

Nuk me duket e drejte se vetem studentet mund te bejne dicka .
Thirrja e tyre e deshmon kete .
Mos te rrije ne trotuar , kush e ndjen veten shqiptar .
D.m.th ata kane nevoje per ndihme dhe i drejtohen se pari popullit te tiranes te mos beje sehir por tu bashkohet atyre .
Ku ishin tiransit ? O zot na mbyti plogeshtia .

[Albo]

Studentët: Protestat do të vazhdojnë

Thuhet se protesta ishte e parapërgatitur. Dikush thotë nga forcat politike, dikush nga SHIK. Nuk është aspak kështu. Vetë fakti që aktualisht nuk ka asnjë drejtues të protestës apo plan organizimi për ditët në vazhdim, tregon pavarësinë dhe spontanitetin e saj
"Vazhdimësia e protestës është e domosdoshme, pasi kushtet e Qytetit Studenti lënë për të dëshiruar", thotë Ndriçim Omuri një nga protestuesit e së hënës

Alida Beqiri

"Gjithçka nisi para godinës 28. Në fillim ishim vetëm 10 vetë" nis të tregojë për protestën e së hënës para kryeministrisë, studenti i vitit të katërt informatikë, Ndriçim Omuri, që nuk di të thotë asnjë emër organizatorësh.
Dy orë të vetme pa drita në pothuaj gjithë Qytetin Studenti kanë rikthyer skenat e 13 vjetëve më parë kur protestat e filluara nga studentët rrëzuan regjimin komunist. Por sipas Omurit, njërit prej protestuesve, është shpejt të flasësh për rrëzimin e qeverisë. "Në media është thënë se kjo ka qenë një protestë e parapërgatitur. Dikush thotë nga forcat politike, dikush nga SHIK. Por nuk është aspak kështu. Vetë fakti që aktualisht nuk ka asnjë drejtues të protestës apo plan organizimi për ditët në vazhdim, tregon pavarësinë dhe spontanitetin e saj. Është shpejt të flitet për rrëzimin e qeverisë, pasi studentët ende nuk janë organizuar".
Lëvizja ka filluar rreth orës 20.40 pranë drejtorisë administrative të Qytetit Studenti fillimisht nga një grup i vogël prej 10 studentësh, në godinat e të cilëve nuk kishte drita. Më tej grupi është shtuar me të tjerë dhe gjatë rrugës për tek godina e qeverisë, është përshëndetur nga banorët e pallateve. Pas rreth 20 minutash protesta, një grup prej rreth 300 studentësh zbret drejt godinës së kryeministrisë. Policia ka mbajtur nën vëzhgim lëvizjet e këtij grupi, pa ndërhyrë. Para Kryeministrisë grupi ka lëshuar, veç parrullave për drita e kushte më të mira jetese, edhe parrulla politike si "Poshtë Qeveria" apo "Të ikë Fatos Nano". Grupi ka qëndruar për rreth 20 minuta para Kryeministrisë. Këtu studentëve u janë bashkuar edhe pjesëtarë të lëvizjes "Mjaft" e "Unionit Studentor".
"Kur kemi arritur në QS, dritat kishin ardhur, megjithatë protesta, jo vetëm vazhdoi, por u bë më masive në sheshin Demokracia. U bëmë thirrje studentëve të tjerë të bashkoheshin me ne dhe numri shkoi në 300 vetë. Lëvizëm drejt godinës së administratës së Qytetit Studenti ku përsëritëm kërkesat për drita dhe kushte më të mira jetese. Protesta vazhdoi deri në orën 22.00", vazhdon Omuri që thotë se vazhdimësia e protestës është e domosdoshme, pasi kushtet e QS-së lënë për të dëshiruar.
Folës të ndryshëm kanë qartësuar se protesta nuk ishte politike dhe nuk duhet të shfrytëzohej si e tillë. Ndërkohë policia e pranishme nuk ka ndërhyrë në asnjë moment për të shpërndarë studentët.



I kërkuam "Mjaft" të na organizonte

"Bashkimi i disa drejtuesve të lëvizjes "Mjaft" në protestën tonë, nuk u prit mirë nga studentët, megjithatë nuk pati ndonjë reagim jashtë normales", thotë Omuri. Anëtarët e "Mjaft" nisën të artikulonin parrullat e tyre, të njohura tashmë, të cilat u përzien me ato të studentëve "Duam drita", "Poshtë qeveria". "Kur ishim duke u shpërndarë u kërkuam anëtarëve të "Mjaft" të na organizonin në protesta të mëtejshme, të linim takime dhe të flisnim për kërkesat tona, por për fat të keq nuk u konkretizua asgjë", thotë Omuri.



Unioni i Pavarur Studentor: Protestat, asnjë lidhje politike

"Kemi ndërmarrë iniciativën për të filluar protesta të vazhdueshme studentore, në të gjithë format dhe mënyrat e lejuara nga ligji duke protestuar:
1.Në mbrojtje të jetës
2.Kundër varfërisë
3.Për një autonomi të plotë universitare
4.Për një të ardhme të sigurt dhe europiane
5.Për përmirësimin e kushteve në Qytetin Studenti
6.Për mbrojtjen e dinjitetit të studentëve dhe shqiptarëve në përgjithësi.
Këto janë pikat ku do të mbështeten protestat e organizuara nga Unioni i Pavarur Studentor, i cili nëpërmjet një deklarate për shtyp ka denoncuar përfshirjen e organizatave të tjera që veprojnë në Shqipëri, në lëvizjet studentore. "Për hir të së vërtetës këto organizata nuk kanë lidhje me studentët dhe problemet e tyre, kështu që nuk mund të përpiqen të manipulojnë protesta me karakter të pastër studentor, protesta që nuk kanë lidhje me asnjë forcë apo grupim politik", tha në deklaratën e tij kryetari i UPSSH-së, Ylber Gjeta, i cili ka theksuar disa herë se protesta e së hënës është organizuar nga anëtarë të Unionit të Pavarur Studentor. "Në vijim të kërkesave tona kërkojmë që shkarkimi i Drejtorit të Qytetit Studenti të pasohet edhe me shkarkimin e zv/drejtorit të komanduar, pasi edhe ai është bashkëfajtor për shumë probleme, shkelje dhe keqadministrime që kanë ndodhur në QS. Protestat do të fillojnë edhe në Shkodër e Vlorë", përfundon deklarata e UPSSH-së.

Tema

[Eve]

Nami i zi eshte ne Shqiperi....Ca behet keshtu mor erdhi viti 2004 dhe jemi akoma pa drita...s'di ca them!!

[arkl]

PRO STUDENTEVE

[beni67]

A thua do ti degjoje njeri studentet.A thua te gjeje mbeshtetje nga populli i fjetur. A do te kene ata aftesi te organizohen... Keto jane disa pyetje qe do te doja tua dija pergjigjet.
Edhe une i mbeshtes studentet. Por cfare mund te bejme ne qe te mund ti ndihmojme sadopak ata. Kete do te doja te me thoshte ndonjeri nga ju....
Shendet te gjitheve.