Lakrori: PD-PS, dialog për interesa mbipartiake

[Albo]

“Me këtë tryezë do të ndikojmë brenda partive tona për një kulturë bashkëpunimi”

Shekulli

TIRANË – Sekretari për marrëdhëniet ndërkombëtare në PS Maqo Lakrori ka shpjeguar në një intervistë për “Shekullin” nismën më të fundit për bashkëpunimin e të gjitha partive parlamentare shqiptare në fushën e marrëdhënieve ndërkombëtare. Ai tha se është optimist, se të gjitha partitë do ta përkrahin idenë dhe marrëveshjet do të nënshkruhen brenda dy javësh. Drejtimet e bashkëpunimit ndërpartiak kanë të bëjnë me procesin e integrimit euroatlantik të Shqipërisë, mbështetja për partitë shqiptare të Kosovës, Maqedonisë, Serbisë e Malit të Zi si dhe kujdesi për emigrantët.

Si erdhi kjo nismë [për një tryezë ndërpartiake për bashëpunim për marrëdhëniet ndërkombëtare ?
Ideja lind natyrshëm nqs analizon interesat dhe mundësitë për plotësimin e tyre. Në rastin konkret, për plotësimin e interesave të Shqipërisë, të shqiptarëve, madje edhe të rajonit, krahas mundësive të tjera, mund të ndikohet pozitivisht edhe përmes marrëdhënieve partiake ndërkombëtare. Që ky ndikim të jetë sa më i madh duhet përpunim i organizuar i mendimeve dhe koordinim i veprimeve. Këtë do të bëjë tryeza që ju përmendët.
A besoni se kjo do të ketë efektin e duhur në këtë situatë të acaruar politike në vend?
Asnjëherë nuk është vonë për të bashkëpunuar, sepse interesat që e kërkojnë këtë bashkëpunim nuk jane as të çastit e as të lindura nga acarimet e ditës; pra nisma është afatgjatë. Megjithatë, edhe kur ka acarime, është më racionale që të kërkohen hapësira dialogu dhe punë të përbashkët, sepse edhe vetë jeta është shumë më e pasur se sa konfliktet politike.
Cilat janë pikat kryesore të platformës që ju u keni propozuar partive të tjera?
Kryesor është fillimi i një bashkëpunimi insitucional të qëndrueshëm në fushën e marrëdhënieve partiake ndërkombëtare. Forma e organizimit është tryeza e rrumbullakët periodike, e cila do të shërbejë si përpunuese, përafruese e mundësisht edhe njësuese e vizioneve dhe qëndrimeve për çështjet me interes të përbashkët. Drejtimet kryesore të propozuara janë integrimi euro-atlantik i Shqipërisë, kujdesi i gjithanshëm për emigrantët shqiptarë e familjet e tyre dhe mbështetja e partive shqiptare të Kosovës, Maqedonisë dhe Serbisë Malit të Zi, në bashkëpunimin dhe integrimin e tyre me bashkësinë e partive politike të vendeve euro-atlantike.
Çfarë synohet me këtë bashkëpunim dhe në çfarë niveli do të jetë përfaqësimi në tryezë, në nivel kryetarësh apo sekretarësh ?
Të arrijmë në konceptime, argumenta, qëndrime sa më të përafërta, mundësisht të njësuara - për çështje madhore në interes të Shqipërisë e që lidhen me jashtë. Mbi këtë bazë të koordinojmë edhe veprimet përkatëse në marrëdhëniet partiake ndërkombëtare. Kështu edhe përfaqësimi i partive shqiptare, pavaresisht ngjyrimeve politike do të jetë më dinjitoz, edhe ndikimi në interesin tonë, do të jetë më i madh. Ndërkaq, përmes këtij procesi do të ndikojmë edhe brenda vendit, madje edhe brenda vetë partive tona, për të zhvilluar kulturën e bashkepunimit për interea mbipartiake.
Tryeza do të mblidhet në nivelin e sekretarëve ose personave të tjerë përgjegjës për marrëdhëniet ndërkombëtare të çdo partie pjesëmarrëse.
A keni marrë ndonjë përgjigje pozitive prej ndonjërës prej tyre dhe veçanërisht nga PD-ja?
Deri tani unë kam ndjekur përmes medias reagimet e para publike, të cilat janë të kujdesëshme, por gjithsesi të ngrohta e inkurajuese. Është e natyrshme, që do të duhet një kohë, uroj jo fort e gjatë, që propozimet të analizohen dhe të përpunohet qëndrimi i secilit, për të ecur drejt teksteve të pranueshëm nga të gjithë. Shpresoj që gjatë këtyre ditëve të komunikojmë intensivisht ndërmjet kolegësh të të gjitha partive të ftuara, për të kryer veprimet e tjera. Jam optimist.
Si do të zbatohen vendimet e tryezës ?
Tryeza nuk merr vendime, por u rekomandon partive pjesëmarrëse synimet, argumentat dhe qëndrimet e përpunuara dhe të koordinuara bashkërisht. Çdo parti pjesëmarrëse është vetë pergjegjëse dhe sovrane për vlerësimin dhe zbatimin e rekomandimeve të tyrezës.
A mendoni se kjo tryeze e dublon qeverinë apo Kuvendin ?
Kjo tryezë nuk dublon as qeverinë, as Kuvendin. Marrëdhëniet me jashtë, për vetë natyrën e tyre, nuk kufizohen vetëm me marrëdhëniet e karakterit shtetëror, madje nuk kufizohen as vetëm me marrëdhëniet politike, por janë shumë më komplekse se kaq. Partitë politike kanë hapësirat e tyre të komunikimit me jashtë, madje me një potencial mjaft të rëndësishëm. Pikërisht përdorimit të këtij potenciali në dobinë e përbashkët, do t’i shërbejë bashkëpunimi për të cilin po bisedojmë.
A prisni mbështetje nga ndërkombëtarët në këtë nismë ?
Në vendet më të zhvilluara se ne, ky lloj bashkëpunimi, është pjesë e traditës demokratike, është pjesë e atyre që quhen “standarte euro-atlantike” të një shoqërie demokratike. Besoj se do të na mbështesin të gjithëve, që të ecim pa hezitim në këtë rrugë.
A besoni se marrëveshjet do të nënshkruhen dhe kur ?
Kam besim se marrëveshjet do të nënshkruhen dhe se tryeza do të fillojë nga puna. Kur? Sa më parë aq më mirë. Shpresoj brenda dy javësh.

[Albo]

Ndoka: Ftesa e Lakrorit është pozitive. E pranojmë tryezën

PDR: Po tryezës së PS-së për integrimin dhe emigrantët

Nevila Perndoj

TIRANE - Reformatorët mbështesin idenë e socialistëve për zhvillimin e një tryeze për integrimin dhe kundërshtojnë mocionin me debat të ngritur për këtë çështje nga grupi parlamentar i PD-së. Kryetari i grupit parlamentar të PDR-së, Nard Ndoka deklaroi dje për “Shekullin” se ftesa e sekretarit për Marrëdhëniet me Jashtë në PS, Maqo Lakrori është pozitive dhe i shërben realizimit të një prej sfidave më të mëdha të Shqipërisë për anëtarësimin e saj në Bashkimin Europian. Pak ditë më parë, sekretari për Marrëdhëniet me Jashtë në PS, Maqo Lakrori ftoi të gjithë partitë politike në një tryezë me qëllim koordinimin e veprimeve të përbashkëta në fushën ndërkombëtare. “Opozita në tërësi duhet të ketë një ide të qartë se si funksionon opozita, ndoshta edhe me maxhorancën sepse nuk është ndonjë problem bashkëpunimi pozitë-opozitë për çështjen e integrimit të Shqipërisë. Ka një ftesë të z.Lakrori për çështjet parlamentare dhe besoj se është në thelb pozitive. Në këtë tryezë, opozita mund të paraqesë një skemë se si e mendon bashkëpunimin dhe të japë idetë e saj. Nuk besoj se për çështjen e integrimit duhet të bëhet një lëvizje në sensin e kundërt duke i ngjyrosur gjërat në kahe të kundërta. Ndaj dhe mendoj se çështja e integrimit është e vetmja pikë e rëndësishme e gjithë bashkëpunimit të partive politike”, -tha Ndoka. Kryetari i deputetëve reformatorë shtoi se përgjegjësia maksimale për integrimin e Shqipërisë i mbetet qeverisë, por kujtoi gjithashtu edhe mekanizmat që ka opozita për këtë çështje përmes komisioneve parlamentare, që ajo kryeson. “Kuptohet që përgjegjësia maksimale është e qeverisë. Ajo është shkaktarja për mosrealizimin e disa kërkesave, për të cilën nuk ka pasur faj opozita. Por kujtoj gjithashtu se një prej komisioneve drejtohet edhe nga kryetari i PR-së, Fatmir Mediu, që është pjesë e opozitës, dhe duke e parë në këtë mënyrë, opozita duhet të tregohet më e hapur, më e përgjegjshme për realizimin e integrimit”, -tha ai. Në këtë këndvështrim, nënkryetari i reformatorëve shtoi se mocioni për debat i kërkuar nga grupi parlamentar i PD-së, për çështjen e integrimit nuk është përgatitur në kohën e duhur. “Nuk mendoj se është momenti dhe koha për të bërë të tillë lëvizje, që është thjesht një lëvizje demagogjike dhe përpara se të arrijmë në një mocion për kryeministrin, PD duhet të shikojë qartë se si e sheh bashkëpunimin mes partive e cila mund të paraqitet në formën e një debati. Pra do të ishte e udhës që të bëhen disa takime paraprake derisa të shkohet deri tek mocioni”, -tha Ndoka që gjithsesi e la të hapur votën, që ata do të japin në Kuvend ndaj mocionit në fjalë.