Si pastrohet kompjuteri nga reklamat dhe spiunët

[edspace]

Në këtë temë janë mbledhur të gjitha pyetjet dhe përgjigjet në lidhje me programet reklamues, spiunë, dhe programe të tjera keqbërëse.

Çfarë janë adware, spyware?
Adware quhen programet që bëjnë reklama. Spyware quhen programet që përgjojnë përdorimin e kompjuterit, zakonisht faqet që viziton në internet ose emailin. Programet që përgjojnë internetin mundohen të zbulojnë se çfarë i intereson përdoruesit dhe dërgojnë reklama që u përshtaten atyre interesave.

Çfarë dëmi shkaktojnë në kompjuter?
Ka shumë programe të ndryshme në këtë grup por shumica përqëndrohen në këto:
- Ndryshimi i faqes së hapjes të shfletuesit (internet explorer, netscape, aol, msn, etj).
- Instalimi i ikonave të reja në krye të shfletuesit. Zakonisht këto ikona janë për kërkimin e internetit, dyqane, bixhoz, pornografi, shkarkime (download), etj.
- Hapja e dritareve ose mesazheve të ndryshme që ju ofrojnë të blini diçka, të vizitoni një faqe, të luani një lojë, të merrni një shpërblim/llotari që keni fituar, etj.
- Gjurmimi dhe përgjimi i faqeve që vizitoni me qëllim që të bëjnë reklama që u interesojnë.
- Ngadalësojnë kompjuterin dhe lidhjen e internetit.
- Ngarkojnë kompjuterin me programe të shumta.
- Fshihen në kompjuter dhe nuk të japin mundësi për ti hequr.

Lexoni pyetjet e shtruar në këtë temë për probleme të tjera të shkaktuar nga këto programe.

Si futen në kompjuter?
- Duke hapur një program që i instalon ato. Ky program mund të futet në kompjuter nga emaili, mund të shkarkohet nga faqet e internetit, nga Kazaa, shkëmbimi i skedarëve në Chat (mirc, msn, yahoo, aol), e plot të tjera.

- Shumë nga këto programe instalohen me, ose pa dijen tënde, kur viziton një faqe interneti. Këto faqe përdorin mënyra nga më të ndryshmet me dritare të vogla pop-up, mesazhe të ndyshme, cookies, reklama, flash, activex, etj që të gënjejnë ose detyrojnë përdoruesin për të instaluar reklamat, për të ndryshuar faqen e hapjes në internet explorer, për të instaluar një toolbar, etj.

Disa prej këtyre faqeve shfrytëzojnë gabimet ose konfiguracionin e gabuar të shfletuesit (internet explorer) dhe instalohen menjëherë pa bërë asnjë pyetje.

- Një pjesë tjetër e programeve parazitë vijnë bashkë me programe të tjera. Pothuajse të gjithë programet e vegjël që ofrohen falas si Kazaa, Date Manager, Time Manager, Calendar, Gator, lojra interneti, gjatë instalimit futin në kompjuterin tuaj edhe programet parazitë që përgjojnë veprimtarinë e komjuterit dhe pastaj dërgojnë reklama në lidhje me informacionin që përgjuan. psh: Nqs unë hap një faqe me muzikë të Madonës, programi spiun do ta shikojë këtë dhe do dërgojë një reklamë për të blerë një album të Madonës.

Kini kujdes se disa nga programet që hiqen sikur i ndalojnë reklamat, instalojnë akoma më shumë. Përdorni vetëm programet serioze si Ad-Aware (jo adware), Spybot, CWShredder.

Si t'i parandaloj programet reklamues dhe spiunë?
- Azhurnoni windows duke vizituar faqen www.windowsupdate.com ose duke hapur Windows Update nga menuja start e kompjuterit. Në këtë faqe mund të merrni të gjitha freskimet që nxjerr Microsoft për mbrojtjen në internet, sigurimin e kompjuterit, etj. Në disa kompjutera azhurnimi bëhet vetvetiu por nqs zgjidhni ta bëni vetë, përdorni një nga mënyrat e lart-përmëndura njëherë në muaj.
- Mos hapni dhe mos instaloni asnjë program pa ditur se çfarë përmban.
- Mos hapni asnjë skedar të bashkëngjitur në email, nqs nuk e keni kërkuar atë. Shumica e skedarëve të infektuar kanë prapashtesat .exe .pif .bat .js
- Tregoni kujdes edhe sikur emaili të duket sikur është dërguar nga një miku juaj pasi adresa e dërguesit mund të jetë e fallsifikuar.
- Mos pranoni të merrni asnjë skedar në chat përveç fotografive me prapashtesën .jpg .gif .png .tif ose skedarëve tekst me prapashtesën .txt .doc. Kini kujdes se disa skedarë mund të kenë dy prapashtesa .jpg.exe ose .gif.pif për tu gënjyer.
- Mos vizitoni faqe që hapin shumë dritare, ose që u bëjnë pyetje për instalimin e programeve. Shumica e programeve keqbërëse kërkojnë leje nga ju para se të instalohen. Lexoini me kujdes pyetjet që u bën kompjuteri dhe pastaj zgjidhni Po ose Jo (Ok/Cancel, Yes/No).
- Mos u gënjeni me reklamat që ju ofrojnë të instaloni programe ose lojra falas. Ndërtimi i programeve kërkon mundim të madh dhe janë të pakët programet që shpërndahen falas. Programet që janë falas zakonisht e nxjerrin fitimin duke reklamuar.
- Nqs zgjidhni të instaloni këto programet, gjatë instalimit mund t'ju ofrojnë programe të tjera. Mos i pranoni këto oferta.

Si të pastroj kompjuterin nga këto programe keqbërëse?
Programet me të sukseshme për pastrim janë Ad-aware, Spybot dhe CWShredder. Ka dhe programe të tjera por mund të perdoren vetëm për 15 ose 30 ditë dhe pastaj duhet t'i blini. Ad-aware, Spybot, CWShredder dhe programet e tjera pa pagesë mund t'i merrni duke klikuar këtu
Janë të renditura sipas numrit të përdoruesve.

Nqs përdorni Windows 2000 ose Windows XP, mund të merrni edhe programin që ka ndërtuar vetë Microsoft për këtë problem. Quhet Windows Defender dhe ju mundëson pastrimin, si dhe mbrojtjen e kompjuterit për të ardhmen. Mund ta shkarkoni këtu.

Një mënyrë tjetër është kontrolli nëpërmjet faqeve të internetit. Një nga këto faqe është ajo e kompanisë Trend Micro. Vizitoni këtë faqe dhe ndiqni udhëzimet për të kontrolluar kompjuterin për reklama e spiunë.

Programet janë të thjeshta për të instaluar dhe përdorur, por nqs keni pyetje, lexoni postimet në vazhdim ose shkruani pyetjen tuaj në këtë temë.

Shënim: Të gjithë programet/shërbimet e përmendur më lart janë falas dhe mos u gënjeni nga reklamat që u premtojnë pastrim më të mirë kundrejt pagesës.

Për të mësuar për viruset dhe programe të tjera keqbërëse, lexoni edhe temën Sigurimi i Kompjuterit. Aty mund të gjeni edhe disa antivirusë falas të cilët tashmë kanë filluar të mbrojnë kompjuterat jo vetëm nga virusët, por edhe nga programet keqbërës (reklamat, spiunët).

[euzfor]

Kur hap int explorer dhe e kam vene blank me hapet nje faqe tjeter edhe pse une e kam vene blank. Si mund ta zgjidh kete prob ?

[edspace]

Me siguri që do kesh programe spyware ose adware në kompjuter. Janë programe që pa lejën tënde rruajnë gjurmët e tua në internet dhe reklamojnë produktet e tyre. Këto programe zakonisht instalohen pa dijeninë tënde kur ti instalon një program tjetër si psh Kazaa ose viziton një website që të detyron ti instalosh ato në kompjuter.

Për ti hequr këto programe shko tek download.com
http://www.download.com/Ad-Aware-SE-...ml?tag=lst-0-1

Bëje download dhe instaloje në kompjuter ad-aware.
Pas instalimit bëj scan kompjuterin me default options.
Adaware do ti gjej të gjitha programet dhe të lejon ti fshish ato nga kompjuteri.

Pas kësaj internet explorer do hapë një faqe bosh ose një faqe tjetër sipas dëshirës tënde.

[benseven11]

kontrollo per ndonje program te dyshimte qe te aktivizohet sapo ndez kompjuterin
Per ta bere kete klikon start pastaj run aty shtyp fjalen msconfig
kliko ok dhe te dritarja qe hapet kliko ne sturtup buton lart te cepi i dritares te menuja e artikujve qe ndizen ne startup mund te shikosh per ndonje aplikacion qe te ka bere Hijack homepage
klikon te boxi i aplikacionit qe ka shenjen e V duke e lene boxin anash bosh.Per ta gjetur aplikacionin kollaj mbaj mend addresen ose emrin e faqes qe te del megjithse e ke vene homepage blank

[StterollA]

euzfor, shko tek Tools mandej Internet Option dhe atu ku shkruan Address: fshije tekstin qe eshte me backgraund blu. Po deshe te te hapet faqe tjeter, atehere shkruaje linkun e asaj faqes.

Duhet te te dal nje kuti opcjonesh si kjo:

[Vito Corleone]

edhe une kisha te njejtin problem me internet explorer i cili me hapte faqe me reklama kot se koti, ose me ndryshonte faqen time aktuale dhe me hapte sa here te njejtin sit(qe une nuk e desha te hapej). Instalova ad-aware 6, bera scan me default, dhe me nxorri rezultat nje liste goxha te madhe me file dhe skedare. por me sa shoh une disa prej tyre jane file regjistri dhe kam frike ti fshij se mos me hapin pune tjeter. Si te bej?

[edspace]

Z. Corleone, fshiji se nuk do kesh probleme.

Adaware mbahet si një nga programet më të mirë për saktësinë që ka në gjetjen e parazitëve/reklamave.

Ato që ke nxjerrë ti në foto nuk duhen. Me siguri që ke plot të tjera poshtë dhe për mendimin tim të gjitha nuk duhen.

99.99% ato registry/skedarë/foldera etj nuk duhen por edhe sikur ta fshish gabimisht adaware të jep mundësinë ti kthesh mbrapsh ato që fshive. Për siguri ti mund ta bësh vetë backup registry. start>run>regedit

Shikoje listën dhe nqs shikon emra programesh që ti nuk i ke parë ndonjëherë atëherë fshiji.

Ke për të parë një rritje të madhe në shpejtësinë e kompjuterit tënd. Windowsi do bëhet load më shpejt, do kesh më shumë memorie për programet që përdor dhe faqet e internetin do hapen më shpejt.

Gjithë të mirat.

[benseven11]

ide shume e mire qe ke vene fotografine me listen.Me cfare tregon lista shkaku kryesor qe te ndryshon faqen Home te internet explorerit eshte programi Xupiter ne krye te listes >programi xupiter ashtu si edhe Gator( qe eshte ne liste)zakonisht instalohen automatikisht pa dijenine tende nepermjet reklamave popup qe dalin direkt ne ekran ose pop under qe dalin vetem si butona poshte te task bari.Xupiter te ka bere haixhek browserin( browser hijack) dmth te ka marre nen kontroll toolbarin.Me cfare jep lista te gjitha skedaret jane te kategorise data miner dmth ato mbledhin informacion per komplet historine
e faqeve qe ke pare ne internet si dhe te gjejne dhe raportojne e mail adressen te serveri qe i ka keto aplikacione dhe qe me vone shesin adresen e emailit qe ke tek kompani qe blejne lista email adresash.Te gjitha duhen hequr nuk ka asnje rrezik.problemi eshte se edhe po i hoqe te gjitha kjo ta zgjidh vetem perkohsisht problemin,pasi xupiter dhe gator po ashtu edhe erzula e te tjerat instalohen automatikisht.Per ti hequr qafe pergjithmone ndiqen 2 rruge.E para shkon lart klikon te tools zgjedh dhe klikon internet options pastaj klikon advanced tab aty te lista ka mundesi qe 2 rreshta < enable install on demand(other) dhe enable install on demand(internet explorer) te dyja keto rreshta i ke me dialog boxin katrorin e vogel anash me shenjen e v-se(checked)>I ben katrorave uncheck(i heq shenjen e V-se) dhe pasi klikon posht apply dhe ok.Komplet keto xupiter gator dhe pislliqet e tjera nuk te instalohen me.Rruga tjeter eshte duke i bllokuar hyrjen me ane te firewall it psh Zone Alarm duke pare te dritarja e lajmerimit te firewallit per Emrat e tyre dhe i ben bllokim
te perhershem.Ka te ngjare qe Xupiteri dhe keto te tjerat te te aktivizohen qe ne start up dmth sa ndez kompjuterin.per kete eshte mire te kalosh nga Start/Run shkruan te kutia ekzakt
msconfig klikon ok te dritarja tjeter klikon te startup tab dhe te lista qe hapet u heq shenjen e V-se gjithe rreshtave qe kane
xupiter si fjale diku ose gator.Nganjehere eshte e veshtire ti heqesh te gjitha se disa rreshta ne liste jane edhe te veshtira per tu kuptuar.Mire eshte te kesh te instaluar edhe ndonje program bllokimi te reklamave ose te ndryshosh Privacy settings
nen tools/internet options/privacy ndryshon nivelin e privacise nga i ulet ne te mesem ose nivel te larte me kontroll me te forte per cookies dhe reklamat.Nje menyre tjeter per ti kontrolluar keto gjera eshte te instalosh nje Browser tjter jo te perdoresh Internet Explorerin.Une vete perdor si browser MY IE2 Browser eshte i ngjashem me Explorerin por ka me shume funksione te
menuja e butonave ne toolbar.Eshte shume here me i mire

[Vito Corleone]

faleminderit edspace, benseven, dangerous dhe nickmaster. mesova shume gjera nga keto qe me thate (disa i dija, kuptohet). tani nuk jam ne shtepi, me te vajtur do ti fus nje te fshire te mire atyre gjerave, dhe te shikojme pastaj. eshte e vertete ai Xupiter eshte i poshter shume. duhet hequr qafe. te gjitha keto vijne ngaqe shkarkoj shume me iMesh-in. heret apo vone do futeshin ngaterresat. gjithashtu nga linja e dobet e internetit qe kam, pasi jam ne konvikt studentash dhe me modem telefonoj nje server Albacom etj etj. Shpresoj te mbaroj pune me keto qe me keshilluat. Faleminderit dhe mire u degjofshim-

[ermal80]

Postuar më parë nga MtrX
po une kam spybot tani dhe ka dhe version shqip, te ik truri fare

ku mund ta shkarkoj versionin ne shqip ?