PS vendos sot fatin e deputeteve renegade

[Albo]

Grupi i PS, KQGS do vendosë për metistët

Deputetët socialistë nuk kanë mundur që të japin një përgjigje përfundimtare për fatin e mëtejshëm të deputetëve që kanë mbështetur ish-kryeministrin Meta në sulmet që ka bërë ai ndaj Nanos. Mbledhja e djeshme e këtij grupi e ka anashkaluar këtë problem. Sipas një propozimi të dalë nga kjo mbledhje do të jetë pikërisht Komisioni Qendror i Garancive Statutore, ai që do të diskutojë për fatin e metistëve. Tashmë ky komision, i njohur si gjykata e socialistëve, do të vendosë nëse metistët do të çregjistrohen nga regjistrat e kësaj partie. Ndryshe nga çfarë ishte paralajmëruar, ligjvënësit socialistë kanë ndryshuar natyrën e diskutimeve në mbledhjen e ditës së martë të grupit të deputetëve. Mësohet se grupi socialist ka vendosur që me zbatimin e statutit apo rregullores së partisë, të merret Komisioni Qendror i Garancive Statutore. Pas përfundimit të mbledhjes së grupit, deputetët e tjerë kanë vendosur që të mos e komentojnë përjashtimin e deputetëve anti Nano. Megjithatë socialistët vazhdojnë të deklarojnë se janë të gjitha mundësitë që këta deputetë të kërkojnë falje dhe të rikthehen në gjirin e saj. "Këta deputetë duhet të reflektojnë rreth veprimeve që kanë ndërmarrë kohë më parë. Në qoftë se nuk ndodh një gjë e tillë, mbetet vend të diskutohet në Komisionin e Garancive Statutore", tha deputeti Albert Çaçi. Sipas tij, statuti është statut dhe duhet të respektohet. Ndërsa, ministri i Shtetit për Integrim, Marko Bello tha se kjo çështje nuk është diskutuar fare në mbledhjen e grupit. "Përjashtimi i deputetëve nuk u zu fare në gojë në mbledhjen e grupit, pasi ne kemi gjëra më të rëndësishme se sa ky problem për t'u marrë," tha Marko Bello. Për deputetët e tjerë, çështja e përjashtimit nuk është me ngut, ajo mund të kryhet kur të merren vendimet nga forumet përkatëse. "Mendoj se statuti duhet respektuar, por ne nuk kemi ndonjë ngut për këtë çështje," tha Nazmi Bilani.

Pritet që përjashtimi i deputetëve që votuan kundra të diskutohet në mbledhjen e kryesisë socialiste. Shumë nga emrat e atyre që kanë votuar kundër dy ministrave, propozuar nga Nano për të zënë postet vakante të ministrit të Jashtëm dhe ministrit të Rendit, janë kthyer në mbështetës të Nanos.

Ish-kryeministri Ilir Meta ndodhet prej shumë kohësh në Shtetet e Bashkuara të Amerikës, së bashku me bashkëshorten e tij. Mendohet se ai do të qëndrojë edhe për shumë kohë në këtë vend, për të pritur që të kthehet, pasi situata politike në vend të ketë pësuar ndryshime.