Operacioni "Rrjeta e hekurt"

[ALBA]

Prokurorët e rretheve raportojnë te kryeprokurori Sollaku, lidhur me sekuestrimet e policisë

“Përse hoqëm sekuestrot për 10 lokale”
Ligji antimafia, hipoteka dhe mungesa e flagrancës




Tiranë

Prokuroria heq sekuestrimet ndaj 10 lokaleve të vendosur nga policia, si prona që rrjedhin nga një krim.

Dy në Tiranë, dy në Lezhë dhe gjashtë në Vlorë, është bilanci i objekteve që i janë kthyer pronarëve, e shoqëruar kjo edhe me një kërkim ndjese. Në një mbledhje të organizuar, dje, në Prokurorinë e Përgjithshme me kryepro-kurorin Theodhori Sollaku dhe të gjithë kryeprokurorët e rretheve, rezultoi se në jo pak raste aksioni i policisë rezulton një gafë ligjore. Të shtyrë për të bërë bujë nëpërmjet operacionit “Rrjeta e hekurt”, përfaqësues të Ministrisë së Rendit, përveçse zellit për të goditur personazhet e botës së krimit, kanë shkelur edhe ligjin. Në fakt, gabime të tilla i kishte paralajmëruar tre ditë më parë drejtori i Drejtorisë së Krimit të Organizuar në Prokurorinë e Përgjithshme, Zamir Shtylla. Në një intervistë në gazetën “Panorama”, policia nuk kishte marrë leje tek ata për të kryer sekuestrime të këtij lloji. Por, duket se policia nuk e mori shumë parasysh atë deklarim. Ndërkohë, sipas diskutantëve në takimin e djeshëm, tre janë arsyet kryesore përse Prokuroria i ka kthyer mbrapsht këto vendime, ndërkohë që edhe gjykata është duke shqyrtuar edhe disa procese të tjera.

Arsyeja e parë, ligji antimafia
Mund të cilësohet si një gafë publike fakti që, sipas Prokurorisë, policia po punon mbi bazën e një ligji antimafia, i huazuar nga Italia, i cili ende nuk është miratuar në parlament. Zelli i tepruar pas tragjedisë së 9 janarit për të goditur krimin e organizuar dhe personazhet e tij, ka sjellë te policia edhe nxitimin për të gabuar. Konkretisht, në projektin e ri është e paracaktuar që sekuestrimet bëhen edhe ndaj personave që kanë kryer vrasje, grabitje dhe krime të tjera të rënda. Por, në ligjin ekzistues, një gjë e tillë nuk shkruhet, në këtë mënyrë prokurorët e kanë cilësuar shkelje të ligjit sekuestrimet ndaj disa personave, që akuzohen për vrasje. Por, edhe ndaj personave të tjerë, që kanë kryer krime të tilla si pastrim parash, apo trafik droge, sekuestrimet janë bërë mbi bazën e ligjit të ri.

Arsyeja e dytë, mungesa e hipotekës
Jo më pak e rëndësishme se e para është fakti se në aksionin e sekuestrimeve, policia nuk ka bashkëpunuar fare me zyrat e hipotekave dhe zyrat e regjistrimit të pasurive nëpër rrethe. Kjo ka sjellë ndryshime të objekteve, gjë që në të shumtën e rasteve, të dëmuarit i janë drejtuar gjykatës. Rasti i pastiçeri “Venecia” në Tiranë është më simboliku. Sipas dokumenteve shkresore në hipotekë dhe në zyrën e regjistrimit të pasurive, lokali në fjalë nuk figuron të ketë pronar Altin Lamen, të akuzuarin e Prokurorisë për armëmbajtje pa leje dhe vrasje. Si të tillë Prokuroria e Tiranës nuk mund të ligjëronte një sekeustrim të kryer nga policia. Por, si ky rast ka patur disa edhe në rrethe të tjera. Në mbledhjen me prokurorët është theksuar se në raste se policia do të kishte komunikuar më parë më zyrat e regjistrimit të pasurive dhe hipotekat, patjetër që nuk do të kishin ardhur këto gabime.

Arsyeja e tretë, sekuestrimet e flagrancës
Gjatë këtyre ditëve, policia ka deklaruar se të gjithë sekuestrimet i ka mbështetur në nenin 302 të Kodit të Procedurës Penale. Komentimi që i kanë bërë krerët e policisë këtij ligji lidhej me faktin se policia kishte të drejtë të sekuestronte pronat dhe pas 48 orëve të paraqiteshin materialet në Prokurori. Por, prokurorët janë kundër këtij komenti që i bëjnë ligjit në fjalë policët. Sipas diskutanëteve në mbledhjen mes pro-kurorëve është e vërtetë se policia ka të drejtë të kryejë sekuestrime të menjëhershme, por kur ato janë në kushte flagrante që, nënkuptohet në ato raste kur kapet drogë, armë apo objekte të tjera të ndaluara. Ndërsa në të gjitha rastet e sekuestruara nga policia në aksionin e fundit, nuk bëhet fjalë fare për sekeustro në kushtet e flagrancës.



Mbrëmë është zhvilluar takimi midis dy drejtuesve
Toska te Sollaku për sekuestrimet

Operacioni më i fuqishëm i ditëve të fundit, “Rrjeta e hekurt”, solli edhe përplasjen e organit të akuzës dhe Ministrisë së Rendit. Një palë e quan operacionin e suksesshëm, ndërsa pala tjetër, në shumicën e rasteve, të paligjshëm. Pikërisht këto kontradikta kanë sjellë edhe takimin kokë më kokë të dy krerëve të këtyre institucioneve. Ministri i Rendit Publik, Igli Toska, u takua dje në mbrëmje me Kryeprokurorin Theodhori Sollaku. Takimi është zhvilluar në ambientet e Prokurorisë së Përgjithshme. Sipas burimeve nga organi i akuzës, mendohet se tema e takimit ka qenë zhbllokimet që policia u bëri lokaleve të sekuestruara. Sipas Prokurorisë, nuk kishin bazë ligjore sekuestrot e lokaleve, pjesë e luftës “Rrjeta e hekurt”. Ndërsa përfaqësuesit e uniformave blu kanë pohuar në ditët e mëpërparshme se të gjithë pronat e sekuestruara kanë lidhje me trafiqe dhe me trafikantë. Njëkohësisht, të gjithë operacionet e njëpasnjëshme u cilësuan si të suksesshme, edhe pse kërcënimet nuk kishin qenë të pakta. Por, me sa duket, mendim ndryshe kanë patur përfaqësuesit e Prokurorisë, të cilët, duke u bazuar në dokumentacionin që i ka paraqitur policia, nuk ka qenë i mjaftueshëm për t´i vënë sekuestron disa prej lokaleve, që është vendosur të rikthehen në punë. Ndërkohë, Sollaku në një mbledhje dje, ka mbledhur të gjithë prokurorët e rretheve për të biseduar mbi sekuestrimet e fundit. Në krahun tjetër, operacioni “Rrjeta e hekurt” ka vazhduar deri në orët e vona të ditës së djeshme, duke sekuestruar të tjera skafe, objekte, automjete që mendohet se kanë lidhje po me trafiqe.



“Venecia” dhe “Tirana” fitojnë lirinë

Nga gjashtë lokale në Tiranë të sekuestruara nga policia gjyqësore dhe ajo kriminale në kushtet e flagrancës, dy prej tyre nuk janë konsideruar të drejta dhe pa bazë ligjore prej prokurorisë së rrethit. Kështu lokalet “Venecia” dhe bar “Tirana” kanë fituar lirinë nga organi i akuzës, sepse i pari nuk ka patur pronar Altin Lamen dhe i dyti ishte me bashkëpronar. “Venecia” fillon punë sot, ndërsa “Tirana” u hap dje dhe, sipas pronarit, ky ishte një vendim i drejtë i Prokurorisë.



Paligjshmëria
Shtylla dha i pari alarmin

Alarmin i pari për sekuestrime të gabuara e dha që ditën e parë të aksionit “Rrjeta e hekurt”, drejtori i Drejtorisë së Krimit të Organizuar në Prokurorinë e Përgjithshme, Zamir Shtylla. Në një intervistë ekskluzive për gazetën “Panorama”, ai e komentoi si një fushatë të gjithë aksionin e policisë pas tragjedisë së 9 janarit. Për më tepër, që në të gjitha rastet, organi i Prokurorisë nuk ishte njoftuar për veprimet e sekuestrimeve. Shtylla deklaroi më tej se goditja e njerëzve të lidhur me krimin ishte nja nga prioritetet e Prokurorisë, porse ajo nuk duhet të bëhej me fushata, siç po bënte policia.

panorama