Tragjedi tjetër në det, 21 të mbytur e 7 të humbur

[Thjeshtesia]

Berisha merr pjesë në ceremonitë e varrimit, qeveria mungon


Nevila Perndoj


TIRANE- Zyrtarët më të lartë të Partisë Demokratike kanë qenë dje të vetmit politikanë të pranishëm në ngushëllimin e familjeve të 21 viktimave që humbën jetën në ujërat e Jonit. Në ceremonitë e varrimit të shumë prej tyre në fshatrat e Shkodrës si rrallëherë, lideri i opozitës Sali Berisha është shfaqur para kamerave i përlotur, me një qëndrim më shumë njerëzor sesa politik. Kryetari i demokratëve është nisur dje që pa gdhirë për të ngushëlluar nga afër të gjitha familjet e viktimave në rrethin e Shkodrës dhe për të marrë me vete edhe një apel se shteti shqiptar dhe politika në përgjithësi duhet të marrë masa për përmirësimin e jetës ekonomike të popullit. Pas vizitave në familjet e viktimave, Berisha ka deklaruar për përfaqësuesit e medias se demokratët do të jenë avokatët e së vërtetës në Kuvend për këtë ngjarje të rëndë. “Ne do të jemi avokatët tuaj për ta nxjerrë në ditën e diellit të vërtetën e hidhur”, -tha dje Berisha në Shkodër. Bashkë me kryetarin e demokratëve kanë qenë edhe zyrtarët e tjerë të lartë të selisë blu. Që nga dita e tragjedisë, demokratët kanë qenë shumë më afër viktimave sesa përfaqësuesit e shtetit. E para që është bashkuar me dhimbjen e tragjedisë ka qenë nënkryetarja e demokratëve, Jozefina Topalli. E shoqëruar edhe nga deputeti tjetër demokrat Pal Dajçi, ajo ka asistuar në identifikimin e viktimave nga të afërmit e tyre. Më pas të shtunën në darkë kanë asistuar edhe përfaqësues të PS-së si kryetari i Bashkisë së Vlorës, Shpëtim Gjika dhe nënkryetarja e Kuvendit, Makbule Çeço. Ndërsa ministri i Mbrojtjes Pandeli Majko si dhe presidenti Alfred Moisiu kanë qëndruar gjatë me të mbijetuarit pas transportimit të tyre në spitalin e Vlorës. Por kujdesi i tyre nuk ka zgjatur shumë. Dje, asnjë prej tyre nuk ka qenë i pranishëm në dhimbjen e familjarëve që përcillnin viktimat për në banesën e fundit.

Shekulli
13/01/2004

[Thjeshtesia]

Në familjen e 25-vjeçarit të zhdukur. Të paktën të na gjejnë trupin e djalit

Nëna: Kreshnikut i dhashë bekimin para se të nisej


Anila Dushi

SHKODËR - Kreshnik Bjeshka është një ndër të zhdukurit në tragjedinë e 9 janarit, ndërsa në familjen e tij tij ka rëndë zija. Ai është djalë i vetëm i Ndoc Bjeshkës, i cili nuk di asgjë për fatin e tij.
Prindërit dhe 5 motrat e Kreshnikut si dhe të afërmit janë në ankth të madh. Presin ndonjë sinjal shprese, për djalin e vetëm të Ndoc Bjeshkës, invalidit të verbër, kryetar i shoqatës së të verbërve “Shpresa katolike”. Nëna e tij Marta tregon se i biri i kishte thënë se do të ikte në Itali. “Më tha se do të ikte të premten në 06:30. I thashë mos shko, por më tha se është e rregulluar puna me policinë dhe Guardia Di Financën. Më tha dhe se me skaf nuk ka rrezik”,- rrëfen mes lotëve Marta. Ajo tregon se djali i është ulur në dhe “unë i dhashë bekimin. Iku dhe më tha se nuk po të jap dorën as ty dhe as motrave se nuk është mirë. I kam telefonuar deri më 09:00 të mëngjesit por nuk është përgjigjur. Edhe sikur të ma kenë vrarë, të vinin e të më thoshnin. Edhe të mbijetuarit duhet të vijnë të më tregojnë në ç’vend a drejtim ka shkuar Kreshniku. Kështu do të mund të gjendet sido që të gjendet gjallë a vdekur, u bëftë vullneti i zotit”,- thotë nëna. Motrat e Kreshnikut vetëm qajnë, ndërsa halla e tij thotë që i kërkon skafeve e avionëve të shtetit të kërkojnë dhe të gjejnë trupin e Kreshnikut. Është vëllai i vetëm i 5 motrave që jetojnë me pensionin e babait të verbër. “Gjithë ata njerëz kanë shkuar jashtë me viza qoftë për qejf, qoftë për shëtitje, por shteti s’ka pasë mundësi me i siguru një vizë djalit të një qorri. Të mos e detyronte atë të shkonte me skaf e të linte jetën”,- thotë më tej ajo. Shpresat duket se shuhen për familjen e Kreshnik Bjeshkës i cili akoma nuk është gjetur.

Shekulli
13/01/2004

[Thjeshtesia]

Sipas krerëve të Drejtorisë së Policisë së Tiranës, leja për protestën s’është e vlefshme. Mjaft: “Protesta do të vazhdojë”

Ndalohet protesta para zyrës së Nanos

Gazetari Artur Çani thirret në polici: Tubimi shkakton prishjen e sigurisë publike

Anila Rama

TIRANE - Policia kërkon ndërprerjen e protestave të lëvizjes “Mjaft” para Kryeministrisë dhe zhvendosjen e tyre në sheshin “Nënë Tereza”. Për këtë çështje, krerë të Drejtorisë së Policisë së Tiranës, thirrën dje gazetarin Artur Çani dhe njërin nga drejtuesit e lëvizjes, duke u thënë se kjo protestë e zgjatur bëhej shkak për prishjen e sigurisë publike. Sipas policisë, kërkesa që lëvizja “Mjaft” kishte depozituar dje në mesditë për të organizuar tubime paqësore deri të premten pasdite, nuk do të merrej në konsideratë. Gazetari Çani tha dje për “Shekullin” se drejtori i policisë së kryeqytetit, Albert Dervishi dhe shefi i policisë së rendit, Ylli Vasili, u kanë kërkuar që të mos vazhdonin më protestën para Kryeministrisë. “Ne debatuam gjatë me drejtuesit e policisë së Tiranës, duke u bërë të qartë se Kryeministria ishte i vetmi vend sinjifikativ i kësaj proteste që ata donin ta zhvendosnin disa qindra metra më tutje. Kjo protestë drejtohet ndaj kryeministrit për papërgjegjshmërinë që ai ka treguar duke mos ndërprerë pushimet pas tragjedisë së Vlorës”, -tha Çani. Sipas tij, policia me ndërhyrjen nga “lart” nuk mund të ndalonte protestuesit e lëvizjes “Mjaft” dhe qytetarët e thjeshtë që të zhvillonin këtë tubim paqësor me leje, ashtu siç kishte ndodhur disa vjet më parë kur Azem Hajdari u nxor jashtë nga sindikatat e pavarura. Sipas tij, protestat do të vazhdojnë në po të njëjtin vend. Të premten protestat e kësaj lëvizjeje, do të përmbyllen me një miting të madh po para Kryeministrisë, ku pjesëmarrja parashikohet të jetë me qytetarë nga i gjithë vendi. Artur Çani tha se në protestën e pasdites kishin ndërhyrë disa përfaqësues të institucioneve shtetërore, duke u bërë presione që të ndërprisnin protestën, ku nuk përjashtohet mundësia që të kenë qenë edhe nga SHIK-u. Prej gati tre ditësh të rinj të lëvizjes “Mjaft” janë vënë në krye të një proteste origjinale para Kryeministrisë duke rrethuar me shirit të zi sheshin para selisë së qeverisë, pas mosardhjes së kryeministrit Fatos Nano ditën kur ndodhi tragjedia. Ndërkaq përgjatë këtyre ditëve, qytetarë të ndryshëm kanë shkruar parulla të shumta duke shprehur solidaritetin me viktimat e tragjedisë, por edhe duke kritikuar dhe ironizuar ashpër kreun e qeverisë. Ditën që Nano u kthye nga pushimet e gjata në Turqi, në krye të rrugës së Durrësit ishte shkruar parulla “Mirë se erdhe Nano djali se dhe ne na mori malli”.

Shekulli
14/01/2004

[Thjeshtesia]

30-vjeçari figuron i zhdukur nga tragjedia e 9 janarit. Kishte qenë në Itali, por ishte kthyer pasi nuk mund të jetonte larg familjes

Tragjedia, Artani s’donte ta shihte as në ëndërr Italinë


Anila Dushi


SHKODËR- Italinë nuk donte ta shihte as në ëndërr pasi e kishte provuar çdo të thoshte të ishe larg familjes, larg djalit të tij mitur, “Largimi nga familja është gjëja me e trishtueshme në botë”,- shkruante Artan Sagrini, 30-vjeçari nga lagjia “Partizani” në Shkodër, 4 vjet e gjysmë më parë, prapa një fotografie që ia kishte dërguar familjes. Atëherë ishte në Itali dhe prej dy vjetësh ishte kthyer në Shqipëri, pasi nuk mund të jetonte dot larg familjes. Por kushtet e vështira ekonomike e detyruan që të largohej sërish prej saj, për të mos u kthyer më. Familjarët thonë se në 9 janar është në Vlorë, por emri i tij nuk figuron në listën e të zhdukurve, të të mbijetuarve apo të të vdekurve. Të afërmit e tij thonë se 30-vjeçari, fëmija i vetëm i familjes Sagrini, ka qënë në gomone, pasi pasditen e saj dite (9 janar) ai i ka marrë në telefon dhe u ka thënë atyre se po nisen. Ata janë të irrituar se përse ai nuk përmendet askund. E shoqja Marjana Sagrini tregon se ka shkuar në Vlorë, ka kontrolluar në spital dhe morg, por nuk e ka gjetur burrin e saj. I kanë thënë se në rast se do gjendet ndonjë kufomë do ta thërrasin. Por emri i tij nuk përmendet askund.

Rrëfimi i Marjanës
Gruaja e Artanit, Marjana,rrëfen për gazetën “Shekulli” se bashkëshorti i saj kishte qënë në Itali para 4 vjetësh e gjysmë dhe prej dy vjetësh ishte kthyer pranë familjes. “Nuk kishte dokumente dhe kishte shkuar tek vëllai im i vetëm që ndodhet familjarisht në Itali me dokumente”, -rrëfen Marjana. Atje, në Napoli, ku jetonte dhe vëllai i Marjanës, Artani punonte në sera lulesh, por u kthye se nuk rrinte dot pa familjen, pa Marjanën dhe djalin e vetëm, Marselin 8 vjeç. Me lot në sy, bashkëshortja e Artanit tregon dy fotografi që ai i kishte dërguar nga Italia në prill të vitit 2000. Prapa njerës fotografi ai shkruante, “unë për të fituar pak para iu largova familjes sime. Por kjo është një gjë shumë e trishtuar. Nuk paska gjë më të rëndë se me të dalë djali në telefon e me të thanë se si je babi e kur don me ardhë në shtëpi. Por unë besoj se zoti do më ndihmojë e këtë vend (Italinë) të mos e shoh më as në ëndërr. Se të jesh afër familjes tënde është gjëja më e vlefshme në botë”. Ndërsa pas fotografisë tjetër, Artani, i drejtohej me ca fjalë, djalit Marselit: “Marsel jam mërzitë për me të pa, aq shumë saqë them nganjëherë sikur të kem krahë sikur zogu të fluturoj e të vij e të shoh për 5 minuta. Por ajo ditë besoj se ka me ardhë e unë e nana jote e cila jep jetën e vet për ty mor i dashtuni im Marsel s’do të ndahemi më, sepse Zoti është i madh e për ty ishalla nuk vjen ajo ditë me u largu nga familja. Largimi prej familjes është gjëja më e trishtueshme në botë. Të duket se fiton, por je i humbur në të gjitha anët. Kur të rritesh do ta kuptosh”. Ndaj dy vjet më parë, Artani u kthye pranë familjes. Pesë muajt e parë, pas kthimit punoi në një fabrikë tullash. Më pas ai mori një dyqan me qera, ku punonte së bashku me Marjanën, por nuk u eci. Vendosi që të ikte përsëri. Tre muaj më parë futi dokumentet, por nuk i dhanë vizë. Kjo e mërziti më shumë. Atë natë para se të nisej nuk fjeti, por rrinte duke numëruar eurot. Marjana citon fjalët e të shoqit, “jam i këputur sepse unë kur kam synim të bëj diçka më këputet trupi”. I thashë se me t’u këputë trupi është shenjë jo e mirë. Iu luta shumë mos me shku por nuk më dëgjoi!Djali u mërzit shumë dhe atë ditë në mëngjes më thoshte se unë nuk shkoj në shkollë, se nuk e shoh babin më. Sikur dhe atij i ndiente zemra diçka. Artani puthi djalin dhe nuk na e dha dorën, për t’i ecur gjatë rrugës. Anila Dushi

I mbijetuari: “Isha me Artanin, por na ndanë”
“Pasditen e 9 janarit më mori në telefon dhe më ka thënë se po shkoj. Jemi duke u nisur , dëgjo ë….., dhe këtu është shkëputur telefonata”,- tregon Marjana, e cila atë natë ka fjetur thellë dhe nuk i ka parë lajmet që njoftuan për mbytjen e një gomoneje me klandestinë. Ajo tregon se mëngjesin e 10 janarit, sapo ka dëgjuar për ngjarjen ka lajmëruar njerëzit e saj. Artani është rritur jetim, pasi nëna i ka vdekur kur ai ishte 5 vjeç. Katër vjet më parë, ka humbur dhe babanë dhe nuk ka as motër as vëlla. Marjana ka komunikur me Aleks Guraziun nga Guri i Zi, i cili ka mbijetuar nga tragjedia. “Nga telefoni i tij më telefonoi para se të nisej. Aleksi më tha se kishin qenë bashkë, por më pas i kishin ndarë. E di që ka hipur në gomone, por s’jemi parë se ishte errësirë dhe nuk di më tej”,- citon Marjana fjalët e Aleksit. Ajo tregon se babai i saj dhe djali i xhaxhait ndodhen në Vlorë, në pritje të ndonjë lajmi. “Kam pak shpresë, por të paktën t’i gjendet trupi e të ketë një varr”,- përfundon Marjana. Shtëpia e saj ndodhet në katin e tretë të një pallati në lagjen “Partizani”, përballë shkollës 8- vjeçare “Skënderbej”. Në hyrjen tjetër të po këtij pallati ndodhet familja e viktimës tjetër Dritan Hetaj, që u identifikua dy ditë pas tragjedisë.

Shekulli
14/01/2004

[Thjeshtesia]

Eurodeputetja shprehet se populli e ka humbur besimin tek qeveria dhe tek politikanët

Pack: Nano emëroi ministra ata që vetë i akuzonte


Shekulli

TIRANE - Deputetja gjermane e Parlamentit Evropian, Doris Pack, e cila drejton delegacionin e këtij Parlamenti për marrëdhëniet me vendet e Evropës Juglindore duke folur për BBC-në, tha se populli shqiptar e ka humbur besimin tek politikanët dhe tek qeveria. “Madje dhe shumë nga politikanët nuk janë vërtet të pastër dhe kjo është ajo që është e dukshme”,-tha Pack.

Shqipëria është ende një vend i varfër. Por çfarë po bëjnë fqinjët më të pasur perëndimorë për ta ndihmuar vendin? Dhe cili, sipas tyre, është problemi i Shqipërisë?

Pack: Ata nuk bëjnë gjithçka që duhet bërë. Ata, gjatë gjithë kohës, janë të zënë me betejat politike mes tyre, në betejat brenda për brenda partisë. Deri në muajin dhjetor, ata bënë një luftë të madhe në partinë e shumicës, atë socialiste dhe unë mendoj se ata po humbasin kohë duke luftuar njëri-tjetrin, në vend që të punojnë realisht për nevojat e popullit.

BBC: Ka shumë para të BE-së që shkojnë atje, mbi 1 miliard euro brenda një periudhë 13 -vjeçare. A janë këto para të harxhuara kot?

Pack: Nuk mundem ta them që këto para janë të harxhuara kot. Por ne shpenzojmë shumë para dhe rezultati nuk është që mund dhe duhet të jetë tek e fundit. Kështu që nuk mendoj se ne i humbasim këto para, por ato nuk kanë eficencën që mund të kenë, nëse politikanët do të punonin më shumë.

BBC: Çfarë duhet të ndryshojë?

Pack: Ata duhet të ndryshojnë qëndrimin ndaj krimit të organizuar, kundrejt korrupsionit në institucione, kundrejt trafikimit dhe emigrimit ilegal. Nëse e sheh, çfarë ndodhi gjatë fundjavës, mund të imagjinosh se një pjesë e madhe e emigracionit ilegal ende vazhdon dhe se brenda strukturave të Shqipërisë ka ende shumë korrupsion.

BBC: Por shumëçka ka ndryshuar, apo jo. Numrat e atyre që shkojnë drejt Perëndimit kanë rënë në mënyrë shumë drastike. Kështu që ata po bëjnë shumë.

Pack: Ata po bëjnë shumë sa i përket emigracionit ilegal, por ata nuk po bëjnë aq sa duhet kundër krimit të organizuar dhe korrupsionit, veçanërisht, korrupsionit institucional. Këtë nuk e thotë vetëm Komisioni Evropian. Të gjitha vendet anëtare janë të shqetësuara dhe Parlamenti Evropian botoi një raport në dhjetor që thotë të njëjtën gjë. Madje dhe shumë nga politikanët nuk janë vërtet të pastër dhe kjo është ajo që është e dukshme. Nëse kthehemi pas, kryeministri aktual akuzoi shumë vetë, ish-ministra se ishin të korruptuar dhe dy prej tyre, që ai i cilësoi si të korruptuar para disa muajsh, ai i emëroi ministra. Dhe njerëzit nuk e besojnë qeverinë, nuk i besojnë politikanët.

BBC: Çfarë duhet të bëjë, çfarë mund të bëjë BE-ja?

Pack: Ne po punojmë me ta për negociatat për procesin e Stabilizim-Asociimit dhe komisionerët po punojnë me ta për disa ligje të veçanta. Ata po bëjnë disa ligje, po nënshkruajnë shumë gjëra, por ajo që mungon, është zbatimi i atyre që ata po nënshkruajnë. Dhe sistemi i drejtësisë nuk funksionon. Ata ende kanë një problem të madh me të drejtat e pronësisë së tokës. Ata kanë probleme me situatën e energjisë. Kështu që, po t'i përdorin të gjitha energjitë për të zgjidhur këto probleme dhe jo të humbasin kohë duke luftuar njëri-tjetrin, unë mendoj se do të jetë më mirë.

Shekulli
14/01/2004

[bukrie]

TRAGJEDIA
Vërtet tragjedi e madhe për popullin shqiptar.
Deri kur? per ne shqiptaret.
Sa do të na zgjat ky fat?
A thua na ka kirjuar vetm per me perjtuar keto tragjedi.
vrasje, mbytje.luftë
Po ju lutem ne nuk mundem te kthejm ata ne jetë por te lutem që
mos te ndodhë më- te lutem qe mos te ketë më vdekje-te mos humbim me njerzë se jeta është e vlefshme -se nji jetë njeru me krijuar është shumë sakrificë.

ZOTI E BEKOFTË POPULLIN SHQIPTARË

[christina54]

Me teper e sensibilizuar per ministrat ton eshte DORIS PAK se sa presidenti yn ce i aprovoj ata.

[ALBA]

Ky eshte kulmi . Ndersa po degjoja lajmet , per tragjedin e Karaburunit , procesi qe filloj ndaj atyre qe organizuan trafikun e qytetareve Shqiptare dhe shkaktuan 21 vete te vdekur me aq buje ne Vlore po zbehet .Perkunder deklaratave se ato do te akozoheshin per vrasje dhe me ceshtjen e tyre do te merej gjykata e krimeve te renda , ajo do gjykohet nga gjykata e rrethit te Vlores . Sipas prokurorit te Vlores nuk ka prova per oficeret e larte te cilet jane liruar per ti marre ne pergjithesi penale. Nderkaq familjaret e viktimave qe nuk jane gjetur kane filluar te kthehen ne shtepite e tyre .

Edhe ne Kosove eshte perkujtuar dhe jane shprehur ngushellime per tragjedine e Karburunit e cila shkaktoi 21 te vdekur .Nje qiri per viktimat e 9 janarit 2004 ka qene motoja me te cilen qindra qytetare te Prishtines e Kosoves kane dale perpara Teatrit Kombetar te kryeqendres per te shprehur dhimjet per familjet e te mbyturve .

[Vala_79]

Ngushellime per te gjithe familjaret te cilet humben me te dashurit ne tragjedine e fundit ne Vlore.Dhe e di qe te gjitha fjalet e thena ketu s'do te lehtesojne aspak dhimbjen e tyre.
Sa per Nano e shoqerine e tij me duket se askush spo ngre zerin te kerkoje drejtesi.Tek tuk zemerime, akuza pa shume buje, sikur qytetaret jane mesuar me keto qe po i ndodhin Shqiperise.Duket sikur pas kesaj kafshate do e pine dhe 1 gote uje , per ta perbire me mire dhe do vazhdojne ne skamjen e tyre, te vetedijshem qe edhe neser do ndodh dicka tjeter mos dhasht zoti me e rende se kjo.Une mendoj qe qytetaret e nje vendi, studentet thene me se miri, kane qene dhe jane mekanizmi levizes ne nje shtet, studentet gjithmon kane sjell revulucione dhe evulucione ne shtete si Shqiperia.Eshte koha kur Shqiperia si asnjehre me pare ka nevoje te bashkoje mendjen dhe zemren me nje dhe te gjykoje e reagoje drejt ne emer te atyre qe shkuan, ne emrin e tyre qe po jetojne tani dhe ne emer te atyre qe do vijne.Sa nuk eshte vone...

[kundraRRYMES]

A se keni kuptuar me kohe qe ne kemi mbi 13 vjet qe po zvarritemi pasi degjojme te tille "dhi shterpe" si Doris Pack e kompani.

Alba te lutem mos publiko me intervista te BBC pasi me vjen per te vjelle, pasi ne krye te seksionit shqiptar eshte i biri i gjeneralit te kohes Enverit nje nepotist dhe asgje tjeter. Pyetet Doris Pack per qeshtjen shqiptare kur me sakte duhet pyetur pse perkrahet qeveria shqiptare kur populli vete nuk beson tek ajo qeveri?

A se keni kuptuar qe nese nuk ka popuj si shqiperia DORIS PACK e kompani nuk do te kene me pune. Nuk do te kete me pune as per Italianet e as per komisioneret Europiane qe vijne e ikin nga shqiperia duke futur neper xhepat "ndihmat" ne asistence teknike.
A se keni kuptuar qe nese nuk ka me rrefugjate e mjerane te tille qe perfundojne ne fund te detit nuk do te kete me nevoje per "GUARDIA DI FINNANZA" e bishtat e saj per te patrulluar ujrat shqiptare dhe per tu shoqeruar me pros-titutat shqiptare.

A se keni kuptuar qe nese nuk ka mjerim papunesi ne shqiperi, nuk do te kete me nevoje per "zonat e tregetise se lire" qe pervecse tregetareve Italiane e GREKE dhe pushtetareve shqiptare nuk perfiton njeri.

A nuk e keni kuptuar qe nese shqiperia qendron ne llum e kjo vetem per faktin se kjo eshte ne interesin ekonomik te nje grupi te caktuar njerzish ne shqiperi itali maqedoni dhe greqi.

A nuk ju duket e njejte gjendja shqiptare me ate MEKSIKANE ku te dy shtetet jane ne kufij me shtetet me te zhvilluara ne bote dhe perseri prodhojne rrefugjate, e u mohohet e drejta per te levizur te lire, e mbi te gjitha u mohohet e drejta per te zhvilluar vendin e tyre.


Pse nuk u pyet DORIS PACK te nderpresi udhetimet ne TIrane apo ndihmen qe i jep "KOLLOVAR-it" NANO qe me nje rroge mujore prej jo me teper se 2000 dollare ne muaj ja mban xhepi te pushoje ne hotelet me te shtrenjta te sheikeve arabe.

Pse nuk pyetet DORIS PACK per perkrahjen qe ju dha nje qeverie qe erdhi ne pushtet me ndihmen e trafikanteve te droges e prostitucionit, qe sot po mbajne peng nje vend te tere, dhe dita dites po sshkaktojne viktima ???

SA PSE jane per tu pergjigjur dhe besoj se deri kur te gjenden pergjigjet per tere ato PSE do te ndodhin mjaft tragjedira te tilla, pa kuptuar qe atij vendi po i ndodh tragjedia me e madhe "humbja"