Privatizimi i Mobtelit

[dodoni]

Kartelat e “Mobtelit” serb tash shiten me emrin „MobiKos“


Prishtinë, 6 janar (Kosovapress) Time: 08: 53

Që nga fillimi i këtij viti në territorin e Kosovës rrjeti telefonik serb “Mobtel” ka hedhur në shitje kartelat dhe numrat e vet telefonikë përmes kompanisë kosovare “Nias Kosova-MobiKos”, drejtor i së cilës është Murteza Kada dhe që udhëhiqet nga biznesmeni Ekrem Lluka. Ministri i Transportit dhe Postë-Telekomunikacionit, Zef Morina, me këtë rast ka përkujtuar se ekzistimi i rrjetit telefonik serb „Mobtel“ në Kosovë është ilegal.


Mendoj se ky Ekrem Lluka është dashur që të konsultohet me udhëheqësit shqiptar para se të privatizonte këtë kompani serbe.
Presim dhe jemi të bindur që shqiptarët e kësaj ane do ta bojkotojnë këtë kompani.
Përshëndetje

[dodoni]

Qeveria e Kosovës e konsideron të paligjshëm operimin e dy subjekteve serbe në vend

Qeveria: UNMIK-u të ndalojë punën e operatorit serb të telefonisë


Faton Osmani


PRISHTINË – Qeveria e Kosovës ka kërkuar nga UNMIK-u të sqarojë bazën juridike, sipas të cilës në territorin e Kosovës ka funksionuar dhe vazhdon të funksionojë operatori serb i telefonisë mobile “Mobtel”. Qeveria e konsideron të paligjshëm operimin e çdo operatori ilegal që funksionon në Kosovë, përfshirë edhe kompaninë “Mobikos”, e cila së fundi ka bërë transaksion me “Mobtelin”, duke themeluar një subjekt në vete me operim në Kosovë. “Qeveria e Kosovës nuk mund të pajtohet me funksionimin e papenguar të këtij operatori që është në kundërshtim me dispozitat e ligjit mbi telekumunikacionin”, - u shpreh Kusari, lidhur me funksionimin e operatorit ilegal të Serbisë, në territorin e Kosovës. Në këtë mënyrë, siç theksoi ajo, funksionimi i këtij operatori e dekurajon tenderuesin potencial në lëmin e telekomunikacionit dhe krijon një precedent tjetër degradues për sundimin e ligjit në Kosovë. Kusari pohoi se qeveria e Kosovës, një sqarim ligjor rreth funksionimit të “Mobtelit” në Kosovë e ka kërkuar edhe dy muaj më parë nga UNMIK-u, por deri më tani as nga zyra ligjore e as nga Holkeri, nuk është kthyer përgjigja, se më çfarë statusi funksionon ky operator i huaj në Kosovë. “Çdo operim i një operatori që nuk ka marrë licencë në Ministrinë e Transportit dhe Postë-Telekomunikacionit, konsiderohet ilegal dhe duhet të sanksionohet”,- theksoi zëdhënësja e qeverisë së Kosovës. Në pyetjen se kush duhet ta ndalë funksionimin e “Mobtelit” në Kosovë, Kusari tha se kompetencat në këtë rast janë të përziera. “Një pjesë i takon qeverisë, e cila ka thënë se kjo është e papranueshme dhe në kundërshtim me ligjin, ndërsa pjesa tjetër i takon UNMIK-ut, e cila duhet ta sanksionojë atë”. Në mbledhjen e parë për vitin 2004, qeveria e Kosovës, po ashtu diskutoi edhe lidhur me punën e grupeve punuese për zbatimin e standardeve. Zëdhënësja Mimoza Kusari tha se qeveria e konsideron të domosdoshme prezencën e qeverisë në përcjelljen dhe koordinimin e punës së grupeve. Kryeministri i Kosovës, Bajram Rexhepi u ka bërë thirrje edhe pjesëtarëve të komunitetit serb që të marrin pjesë në këto grupe. “Kryeministri u bëri thirrje pjesëtarëve të komunitetit serb që të marrin pjesë në mbledhjet për punën e standardeve dhe u shpreh se pjesëtarët e komunitetit serb e kanë të domosdoshme ta marrin pjesë si anëtarë të qeverisë së Kosovës”, - tha pas mbledhjes, zëdhënësja Kusari. Sipas saj, pjesëmarrja në grupet punuese nuk mund të bëhet në mënyrë të dhunshme dhe qeveria e Kosovës ka treguar gatishmëri që në këtë proces t’i përfshijë të gjitha grupet etnike pa dallim.



10/01/2004


Shpresojmë që UNMIK të ndaloj punën e kësaj kompanie të paligjshme menjëherë.

Përshëndetje