Luan Plakiçi, denohet si tutor prostitucioni ne Angli

[Shijaksi-London]

- AKTUALITET Dhjetor23, 2003

ANGLI/ HISTORIA E LAÇIANIT 26-VJEÇAR

10 vjet burg përkthyesit trafikant
Gjykata: Luan Plakiçi, bosi i vajzave Lindore



Nga Londra,
Muhamed Veliu

ANGLI

Supertrafikanti shqiptar i prostitucionit në Angli dënohet vetëm me 10 vjet burg. Luan Plakiçi (emri i vërtetë Artur), mbi të cilin rëndojnë plot 15 akuza, është dënuar dje nga Gjykata e Krimeve të Rënda në Londër "Wood Green Crown Court". Pas një gjyqi maratonë 3-mujor me plot 55 orë bisedime, një juri prej 12 anëtarësh e ka shpallur shqiptarin 26-vjeçar fajtor në akuzat për rrëmbim personi me anë të mashtrimit, shfrytëzim të shtatë vajzave, 2 rumune dhe 5 moldave, për të jetuarin me para të ardhura nga prostitucioni, trafikim personash me qëllim prostitucioni, përdhunim, pengmarrje të këtyre vajzave dhe akuza të tjera që kanë të bëjnë me çështjen e trafikimit e shfrytëzimit të femrave. Gjykata ka dëgjuar dëshmitë e vajzave të trafikuara, të cilat kanë thënë, se "shpresonin që do të vinin në Angli të punonin si kamariere apo pastruese hotelesh për të fituar para për familjet e tyre të varfëra".

Vendimi

Trupi gjykues i çështjes "Plakiçi", pasi ka dëgjuar për orë të tëra pretendimet e akuzës dhe të mbrojtjes së shqiptarit, ka dhënë 10 vjet burg për të. Gjatë dhënies së dënimit për trafikantin shqiptar, gjykatësi i këtij superpoçesi gjyqësor, Robert Winstanely iu drejtua Plakiçit duke i thënë: "Ju përfituat nga avantazhi dhe fakti se këto vajza të reja jetonin në kushte varfërie në vëndet e tyre të origjinës. Këto vajza ishin një prehë e lehtë për t'i mashtruar me premtime false për një jetë më të mirë. Ju shfrytëzuat vuajtjet e tyre me premtime për punë të ndershme për to dhe të familjet e tyre të zhytura në varfëri". Më pas, kreu i trupit gjykues ka thënë se viktimat e tij ishin pajisur me pasaporta false dhe në ato raste që ato kapeshin sërish, u jepeshin pasaporta të reja. Gjykatësi e cilësoi shitjen e këtyre vajzave si "një krim të pafalshëm". Ai përfundoi duke i thënë Plakiçit: "Është detyra ime t'ju dënoj ju apo të tjerë si puna juaj, të cilët mund të tentojnë në shfrytëzimin e këtyre vajzave, siç e bëre ti. Për këtë ju dënoj me dhjetë vjet burgim".

Si përfitoi Plakiçi

Luan Plakiçi (emri i vërtetë Artur), nga Laçit, prej disa vitesh kishte fituar të drejtën e azilit në Britaninë e Madhe. Pas disa kohësh nga kjo gjë, ai ka shërbyer si përkthyes në Londër, në Ministrinë e Emigracionit, gjë që i ka shërbyer mjaft mirë për shumë kohë që të jetë larg dyshimeve të policisë. Gjatë ditës ai vishte kostumin e përkthyesit në Ministri, ndërsa gjatë natës detyronte vajzat të prostituonin nëpër shtëpi publike të Londrës. Pas garantimit të azilit dhe vendit të punës, Britania i siguroi Plakiçit edhe një pasaportë udhëtimit. Këtë të fundit ai e shfrytëzoi mjaft mirë, duke shkuar në Rumani, Mal të Zi, Shqipëri, Itali, Belgjikë; duke blerë, mashtruar e rrëmbyer vajza të reja, kryesisht nga vendet e Lindjes. Më pas, i dërgonte ato në Londër, duke ndjekur itinerarin Rumani-Mal i Zi-Shkodër-Vlorë-Ankona-Angli. Gjatë dëshmisë së tij para gjykatës, Plakiçi e pranoi se ka trafikuar për në Angli 60 njerëz, ndër ta 30 vajza Lindore për prostitucion, "por për llogari të personave të tjerë".

Pasuria e Plakiçit dy miliardë lekë

Falë biznesit të trafikimit, Plakiçi bënte një jetë luksoze. Vishej me rroba "Armani" e "Versaçe", ndërsa shëtiste rrugëve të Londrës me 3 makina luksoze; ndër to, një Ferrari Spider. Në momentin e arrestimit Plakiçit iu gjetën 204 mijë stërlina, afro 408 milionë të vjetra, në tre llogaritë bankare. Detektiv inspektori Mark Holmes, gjatë një konference për shtyp pas dënimit të Plakiçit, u shpreh se pasuria e tij mund të jetë në shifrën e një milion stërlinave (2 miliardë lekë të vjetra), të cilat do të sekuestrohen. "Këto pasuri janë në Greqi, Itali dhe Shqipëri", shtoi ai.

Ja emrat e anëtarëve të rrjetit
Trafikanti tregoi bashkëpunëtorët

Luan Plakiçi (emri i vërtetë Turi) një emigrant shqiptar nga Laçi, me nënshtetësi angleze që nga 1 Dhjetori 2001, është arrestuar më 29 tetor 2002 në banesën e tij në rrugën nr.3, Middelton Road, në Londër. Prangosja e tij është bërë nga policët londinezë, pasi këta të fundit kishin shoqëruar disa vajza, të cilat prostituonin në një shtëpi publike në veri të Londrës. Pas 10 javësh seanca gjyqësore, Plakiçi është ngjitur në vendin e dhënies së dëshmive, në sallën numër 5 të gjykatës "Wood Green Crown Court", nga ku ka treguar me detaje të gjithë mënyrën e trafimimit të emigrantëve ilegalë, ndërmjet tyre 30 prostituta. "Unë nuk kam trafikuar asnjeri, por vetëm u kam dhënë ndihmë emigrantëve ilegalë për të hyrë në Angli", ka thënë Plakiçi, i cili këtu ka përfshirë edhe 30 vajza Lindore. Në dëshminë e tij Plakiçit ka treguar edhe emra konkretë të bashkëpunëtorëve të tij, duke i quajtur edhe shfrytëzues prostitutash, si Maksi, Bekim Kasumaj, Mondi, Pëllumbi, Shpëtimi, Spartaku, Krenari, si dhe rumuni Jonçi (aktualisht i dënuar në Rumani). Veç rrëfimit, Plakiçit i është gjetur edhe një ditar, në të cilin janë gjetur dhjetëra numra telefonash, si dhe emra bashkëpunëtorësh të tij. Ndërmjet tyre bie në sy emri i një ish-oficeri policie në Tiranë gjatë viteve `94-`97. Në ditarin e Plakiçit shkruhet: "L. nga Tropoja" dhe numri i tij i celularit 0778230####.