Libi: Rivendosen maredheniet diplomatike me SHBA

[Albo]

Komuniteti ndërkombëtar përshëndet vendimin e Libisë

Komuniteti ndërkombëtar e përshëndeti vendimin e Libisë për të hequr dorë nga armët e shkatërrimit në masë.
Një numër vendesh thanë se vendimi i Libisë është një hap përpara drejt ndalimit të përhapjes së armëve bërthamore dhe një shembull i mirë për vendet e tjera që kërkojnë të zhvillojnë armë bërthamore, kimike dhe biologjike.

Sekretari i Përgjithshëm i Lidhjes Arabe Amr Musa i bëri thirje Izraelit, i cili mendohet se ka armë bërthamore, të ndjekë shembullin e Libisë. Ministri i Jashtëm i Egjiptit Ahmed Maher, pa përmendur emrin e Izraelit, tha se vende të tjera në Lindjen e Mesme duhet t’u japin fund programeve për prodhimin e armëve bërthamore.

Izraeli tha se e përshëndet vendimin e Libisë. Radioja izraelite citoi ministrin e jashtëm Silvan Shalom sipas të cilit Libia po përgatit terrenin për t’u përfshirë në komunitetin ndërkombëtar.

Afrika e Jugut, e cila e eliminoi programin e saj bërthamor 10 vjet më parë, tha se veprimi i Libisë krijon kushtet që Afrika të arrijë vizionin e saj si një kontinent pa armë të shkatërrimit në masë.

Fuqitë bërthamore Rusia, Kina dhe Franca e vlerësuan veprimin e Libisë. Por ministri i jashtëm francez Dominik De Villëpë u bëri gjithashtu thirje zyrtarëve libianë t’u japin fund negociatave për kompensimin e familjeve të viktimave të shpërthimit në një avion francez në vitin 1989.

Ish kryeinspektori i Kombeve të Bashkuara për armët e shkatërrimit në masë Hans Bliks e përshëndeti hapin e Libisë. Ai i tha rrjetit televiziv CNN se udhëheqësi libian Moamar Gadafi mund të jetë nxitur nga ato që ndodhën në Irak, ku forcat e koalicionit të udhëhequr nga Shtetet e Bashkuara ndërhynë ushtarakisht në kërkim të armëve të shkatërrimit në masë.

[Albo]

Presidenti Bush: SHBA dhe Britania do të jenë vigjëlente për të siguruar që Libia përmbush zotimin e saj


Presidenti Bush tha se Shtetet e Bashkaura dhe Britania do të jenë vigjëlente për të siguruar që Libia përmbush zotimin e saj për të hequr dorë nga programi i armëve ilegale, ndërkohë që ai u bëri thirrje vendeve të tjera që të ndekin shembullin e Libisë.
Presidenti tha se udhëheqësit, që vendosin të heqin dorë nga programet e armëve të shkatërrimit në masë do të gjejnë, siç u shpreh ai, një rrugë të hapur për marrëdhënie më të mira me Shtetet e Bashkuara.

Duke folur në Britani, kryeministri britanik Tony Blair tha se udhëheqësi libian Muahar Gadafi ndërmori një vendim të guximshëm për të ndaluar programet e armëve bërthamore, kimike dhe biologjike të Libisë dhe për të lejuar inspektimet ndërkombëtare.

Një delegacion libian shkoi sot në Vienë për të filluar bisedimet me inspektorët e Kombeve të Bashkuara për armët bërthamore lidhur me zhdukjen e programit të armëve bërthamore të Libisë.

Në Libi, djali i kolonel Gadafit tha se ishte shumë i kënaqur me marrëveshjen, që u arrit si rezultat i bisedimeve 9 mujore midis zyrtarëve amerikanë, britanikë dhe atyre libianë.

Saif al-Islam Gadafi i tha rrjetit televiziv CNN se ky vendim do të ndihmojë në krijimin e kushteve për të vendosur marrëdhënie normale me perëndimin dhe për t’u dhënë fund sanksioneve kundër vendit afrikan.

Ekspertët thonë se kjo është hera e parë që Libia pranon në publik se është përpjekur të zhvillojë armë të tilla.

Ekspertë amerikanë dhe britanikë vizituan qendrat e armëve të Libisë në muajin tetor dhe përsëri këtë muaj. Zyrtarët amerikanë thanë se programi i armëve bërthamore i Libisë ishte shumë më i avancuar se sa mendohej. Zyrtarë amerikanë thanë se Libia ishte afër zhvillimit të një armë bërthamore.

//ze//

[Albo]

Bushi: sanksionet ndaj Libisë do të vazhdojnë

6 janar 2004 5:15 UTC


Presidenti Bush zgjati afatin e sanksioneve ekonomike të vëna 18 vejt më parë kundër Libisë, duke thënë se para se të hiqen sanksionet duhet të verifikohet angazhimi i Tripolit për të çmontuar programet e tij të armëve të shkatërrimit në masë.
Presidenti Bush tha të hënën se muajin e kaluar Libia ndërmori atë që ai e cilësoi si hap të mirëpritur, kur ra dakord të eliminojë programet e saj të armëve kimike dhe bërthamore. Ai theksoi se Shtetet e Bashkuara janë të gatshme të pranojnë atë që ai e cilësoi si përparim libian për sa kohë që Tripoli ndërmerr hapa konkretë drejt zhdukjes së shqetësimeve ndërkombëtare.

Libia pranoi muajin e kaluar se ka pasur armë të shkatërrimit në masë. Tripoli e bëri këtë deklaratë pas atyre që zyrtarë amerikanë e britanikë i cilësuan si muaj të tërë negociatash të fshehta. Libia ka rënë dakord të lejojë inspektimin ndërkombëtar të objkteve të saj të fshehta.//xh//

[Albo]

Nga inspektimi i shpejte i programit berthamor te Libise, administrata amerikane sot ka bere publike faktin se infrastruktura berthamore ne perdorim nga Libia eshte importuar nga Pakistani. Presidenti Musharaf eshte vene perballe ketij fakti qe ka kapur ate te papergatitur pasi nuk nuk eshte e ditur nese ai ishte ne dijeni te ketij eksporti qe vendi i tij ka bere.

Musharaf ka premtuar hetimin e kesaj ceshtjeje duke u impenjuar personalisht per ti shkuar ne fund ketij problemi. Sherbimet sekrete amerikane mendojne se eksporti i teknologjise berthamore qe Pakistani zoteron eshte bere nga fizikante pakistaneze te shtyre nga lakmia e parase.

Pakistani ka qene nen monitorim te repte ne lidhje me mardheniet e veta me Iranin, nje tjeter vend me program nuklear.

[Albo]

Libi: Rivendoset prania diplomatike amerikane

11 shkurt 2004 5:30 UTC


Shtetet e Bashkuara vendosën përësri praninë e tyre diplomatike në Libi, ndërkohë që kryeministri britanik, Tony Blair, shpreson të bëjë së shpejti një vizitë në këtë vend afrikan në kuadër të përpjekjeve për ta kthyer atë në gjirin e komunitetit ndërkombëtar.
Departamenti amerikan i Shtetit njoftoi të martën se një diplomat amerikan po punon pranë ambasadës belge në Tripoli, prania e parë diplomatike amerikane në atë vend që nga viti 1980.

Zyrtarët thonë se parashikojnë që edhe diplomatë të tjerë amerikanë të vizitojnë Libinë në një të ardhme të afërt dhe që Libia të vendosë së shpejti praninë e saj diplomatike në Washington.

Po të martën, sekretari i jashtëm britanik, Jack Straw, bëri të njohura planet e zotit Blair për të shkuar në Tripoli për t’u takuar me udhëheqësin libian, Moamar Gadafi. Zoti Straw e bëri këtë njoftim pas bisedimeve në Londër me homologun e tij libian, Muhamed Abd al-Rahman Shalgam. Ky ishte takimi i nivelit më të lartë midis zyrtarëve të dyja vendeve në më shumë se 20 vjet. Sekretari i jashtëm britanik e cilësoi takimin si historik dhe të frytshëm.

Zyrtarët thonë se zhvillimet diplomatike janë rrjedhim i deklaratës libiane të dhjetorit se Tripoli po hiqte dorë nga programet e armëve bërthamore e kimike. Shtetet e Bashkuara, Britania dhe ekspertë ndërkombëtarë ndodhen në Libi, ku po punojnë me zyrtarë libianë për çmontimin e programeve të armëve.

[Albo]

Lidhjet e Kinës me armët e Libisë

Ka patur njoftime se dokumentet lidhur me infrastrukturën bërthamore të Libisë - që iu dorëzuan amerikanëve,- kanë ardhur nga Kina. Vendimi i Gadafit u prit me lëvdata në të gjithë botën

Gazeta Washington Post shkruan se një hetim ndërkombëtar ka zbuluar se projekte kineze që i ishin dhënë Pakistanit në vitet 80, i ishin shitur Libisë.

Rezultatet e hetimit, nxorrën se disa nga dokumentat që përmbante Libia ishin në gjuhën kineze.

Një ish inspektor i Kombeve të Bashkuara, David Albright - që citohet nga Washington Post - i tha BBC-së se informacioni përfshinte edhe udhëzime për ndërtimin e armëve të thjeshta bërthamore që mund të përdoreshin per raketa.

Tani pyetja që shtrohet është se a ka qënë Kina apo Pakistani furnizues me projekte të teknologjisë bërthamore për Iranin dhe Korenë e Veriut.