Balli Demokrat: Bashkimi me Ballin Kombëtar, mision i pamundur

[Albo]

Drejtues të Ballit Demokrat në një konferencë për shtyp deklaruan se është e pamundur që ata të bashkohen me partinë e Ballit Kombëtar. "Pas disa bisedimeve informale ne arritëm në përfundimin se për Ballin Kombëtar, më shumë se qëllimi dhe procesi i bashkimit, ka vlerë rezultati nominal i lidershipit të ardhshëm, ndërsa për ne është e kundërta. Ne iu kemi sugjeruar që ata të caktojnë gjithçka në bashkëpunim me ne, të shtyjnë datën e Kongresit për disa kohë dhe kongresi të mos quhet i Jashtëzakonshëm, thjesht për të gjetur 'Judat' mes nesh por si një Kongres impersonal i Bashkimit. Ne mendojmë se ky Kongres i njëanshëm do të jetë një kongres i dështuar dhe i turpshëm, pasi ai synon që me metoda jo konsensuale, por të dhunshme e policore të ngjitë një grup violent e mediokër disa shkallë më lart në piramidën e kësaj partie," thuhet në njoftimin për shtyp të kësaj force politike.

Ata gjithashtu kanë deklaruar së në vend ka një krizë të thellë pushtetesh, e cila thellohet pas heshtjes antikushtetuese të Gjykatës kushtetuese. "Ajo duhet të ishte shprehur me kohë në lidhje me mosekzistencën e dy ministrave prej 6 muajsh, bazuar në nenin 124/1 të Kushtetutës ku thuhet se Gj.K. "bën interpretimin përfundimtar të Kushtetutës". Ajo e ka këtë detyrim edhe nga neni 131/ç dhe, sidomos, pas kërkesës zyrtare që i është bërë nga Partia Demokristiane para disa muajsh në bazë të nenit 134/f. Me këtë qëndrim Gj.K. është fajtorja më e madhe në krizën midis Parlamentit dhe Qeverisë pasi nuk po zbaton detyrat e saj kushtetuese për interpretim të një çështjeje të pa sqaruar mirë në Kushtetutë e duke lënë kështu me qëllim në pushtet një Qeveri inefiçente e jolegjitime," thuhet në deklaratën e tyre për shtyp.