Holkeri ne OKB: Kosova ka bere perparime me standartet

[Albo]

Besim Abazi
10 dhjetor 2003, 14:48 UTC


Dita e sotme në Kosovë, shënon fillimin e rrugës praktike drejt zgjidhjes së statusit përfundimtar të saj, thanë në Prishtinë, zyrtarët më të lartë ndërkombëtarë dhe vendorë. Ata i bënë këto komente gjatë ceemonisë së shpalljes së dokumentit zyrtar të “Standardeve për Kosovën”, të përcaktuara nga bashkësia ndërkombëatre për t’u përmbushur para fillimit të zgjidhjes së statusit të saj politik. Sundimi i ligjit, liria e lëvizjes, kthimi i qëndrueshëm dhe të drejtat e komuniteteve e pjestarëve të tyre, zhvillimi ekonomik, te drejtat pronësore, bisedimet me Beogradin për cështje teknike dhe Trupat Mbrojtëse të Kosovës, janë tetë standardet e përcaktuara, përmbushja e të cilëve është detyrë e përbashkët e Misionit të Kombeve të Bashkuara dhe institucioneve të vetëqeverisjes në Kosovë, ndërsa mesi i vitit 2005, llogaritet si periudhë e vlerësimit të tyre.

Shefi i Misionit, Harri Holkeri, tha se, shpallja e kësaj kohe për shqyrtimin e statusit përfundimtar ka hapur një kapitull të ri dhe tash është koha që ai të shkruhet. “Është detyrë e përbashkët për ta përgatitur Kosovën për statusin përfundimtar. Tash është një kohë e përcaktuar për këtë vendim, por asgjë nuk është e pashmangshme. Ky vendim varet nga ajo që thuhet dhe bëhet në Kosovë, sepse ekziston vetëm një rrugë drejt statusit përfundimtar dhe ajo është nëpërmjet përparimit në përmbushjen e standardeve”, tha zoti Holkeri.


Presidenti i Kosovës Ibrahim Rugova tha ndërkaq se shpallja e dokumentit për standardet, është një ngjarje me rëndësi për Kosovën dhe të ardhmen e saj. “Standardet që bashkësia ndërkombëtare i kërkon nga Kosova, kanë për qëllim vlerësimin e të arriturave të Kosovës, para vednosjes së statsuit final të Kosovës, që për ne është pavarësia, si dhe përmbushjen e normave për integrim në Bashkimin Evropian, në NATO dhe në bashkësinë ndërkombëtare”, tha presidenti Rugova.


Kryeministri i Kosovës Bajram Rexhepi tha se dokumenti është udhërrëfyes i qartë për Kosovën, institucionet e saj dhe Misionin e Kombeve të Bashkuara, duke u bërë thirrje qytetarëve që të përkrahin fuqishëm përpjekjet për përmbushjen e tyre. “Pa plotësimin e standardeve do ta kemi të vështirë të finalizojmë statusin përfundimtar të Kosovës, ashtu sic e synojmë të gjithë ne. Prandaj, kontributi i secilit kosovar në realizim të standardeve është kontribut drejt zgjidhjes së statusit të Kosovës në pajtim me vullnetin e qytetarëve të saj”, nënvizoi kryeministri Rexhepi.

Autoritetet shprehën keqardhjen e tyre për mospjesmarrjen e përfaqësuesve të komunitetit serb në ceremoninë e shpaljes së dokumentit dhe refuzimin e tyre për t’u përfshirë në këtë proces, i cili sic u tha, është me rëndësi thelbësore pikërisht për këtë komunitet. Këta të fundit nuk janë pajtuar me standardet dhe posacërisht me mospërfshirjen e vërejtjeve dhe kërkesave të Beogradit lidhur me dokumentin përfundimtar.


Zyrtarët thanë se tash për tash nuk ka ndonjë mospajtim të thellë rreth dokumentit, ndërsa shefi i misionit i quajti “probleme gjuhësore” mospajtimet rreth hyrjes së dokumentit në të cilën fillimisht ishte nenvizuar se standardet duhet të jenë në pajtim përvec me Rezolutën 1244 të Këshillit të Sigurimit dhe Kornizës Kushtetuese edhe me ligjet e zbatueshme, gjë që është kundërshtuar nga përfaqësuesit politik të Kosovës.

Pak pas shpalljes zyrtare të dokumentit, shefi i Misionit të Kombeve të Bashkuara Harri Holkeri dhe kryeministri Bajram Rexhepi mbajtën takimin e parë të strukturës së përbashkët për zbatimin e standardeve, që vlerësohet edhe pjesa më e vështirë e tërë procesit. Zoti Holkeri tha se përmbushja e tyre do të bëjë që bashkësia ndërkombëtare të punojë për statusin politik të Kosovës, ndërsa dështimi do të kthente Kosovën prapa mbase për disa dhjetvjetsha të tjerë.

[shigjeta]

Ai që e ka në dorë këte punën e standardeve dhe që duhet ta kryej punën e aplikimit të tyre, ai është njeri me dy fate të ndryshme. Është me fat, sepse në dorë ka diçka që shoqërinë kosovare (shpresohet fort) ka për ta ndryshuar e orientuar kah Europa e qytetërimi europian. Është i pafat, sepse këte gjë fatkeqësisht duhet ta kryej në një kohë rekord.*

*** *** ***

Për standardet dhe do cikërrima tjera


Po bëhen ma shumë se katër vjet qysh se janë instaluar UNMIK-u dhe KFOR-i, si udhëheqës politiko-ushtarakë, ndërsa gjatë kësaj kohe shumë gjëra pozitive kanë ndodhë në Kosovë. Ndërkohë priten me ndodhë edhe shumë të tjera, një prej të cilave edhe formulimet e quajtura “Standarde”, frazë tashmë e famshme dhe e gjithëpërdorur në Kosovë.


Por, çka janë standardet dhe ku bazohen ato?

Në fjalorin e Oxfordit të gjuhës angleze, standardi ka hiç më pak se 41 sinonime. Duke nisur nga “ligji”, “norma”, “mesatarja”, “fundamenti”, “principi”, “besimi”, “ideali”, “shembulli”, e kështu me radhë. Një tjetër që s’u përmend e që lidhet direkt me gjithë idenë e standardeve është shpjegimi që jep ky fjalor për fjalën 'standard', e që në shqip përkthehet “i pranueshëm”. Kosovën e pret arritja e gjithë këtyre sinonimeve, por edhe e shumë të tjerave. E gjithë kjo nën ombrellën e europianizmit që e bazon modelin e vet të shtetit në ate që mund të quhet “shteti ideal” apo “shteti i ligjit”.

Duke ecë udhëve të Prishtinës, shumë lehtë e kupton që standardi është diçka e pakapshme lehtë. Mos të them e largët, por sidoqoftë diçka që nuk gjendet në xhep të asnjërit prej udhëheqësve tanë. Ironia qëndron në faktin se disa prej tyre mendojnë se ato standarde ne i kemi mbërri moti, e tash veç e presim vendin tonë në familjen europiane. Por, ai që mendon kështu nuk ec shpesh rrugëve të Kosovës, nuk pret dy muaj për një letërnjoftim apo dokument, nuk i merr 120 euro rrogë, e as nuk mbetet pa rrymë ndonjëherë. Është i kuptueshëm fakti që tentohet të paraqitet situata sa më pozitive, por nuk duhet hedhur hi syve të popullit.

Politika në Kosovë sot nuk është politikë institucionale, ajo nuk është politikë premtuese. Politika në Kosovë sot bazohet n’atë që është bë më herët: partitë të tërat flasin për veten si çlirimtarë, disa të tjerë si themelues të Republikës, tjerët flasin për dofarë unionesh, tek-tuk ndonji ngre zanin për luftë çlirimtare, e ne nuk e dimë se prej kujt duhet të çlirohemi më. A të çlirohemi prej armiqëve të popullit, apo armiqëve në popull? A të “çlirohemi” prej UNMIK-ut apo të çlirohemi prej mendimit se duhet të çlirohemi?

Standardet dhe Mbretnitë e tyre

Fjalët e mëdha t’udhëheqësve të Kosovës me standarde nënkuptojnë përparim. Nënkuptojnë progres, idealizëm, ligj, normë. Premtojnë perspektivë, premtojnë integrim, dhe mbi të gjitha, premtojnë paqe. Për qytetarin e Kosovës që kurrë nuk ka lexuar gazetë tjetër pos asaj të partisë, që kurrë nuk e ka pa një mbledhje Kuvendi, e që voton për hir të shallit të të parit, rinisë e retorikës të të dytit, apo qëndrimeve in-konsistente të të tretit, standard është edhe mos me pasë standard. Mos me folë, mos me ndigju, me jetue si n’ajër. Standard është edhe mos me u mërzitë e me shkue deri në gjygj a polici stacioni kur sheh ndonjë krim, standard është edhe të mendohet se tjerët që nuk janë si ai simbas ideve politike, gjuhës apo kombit, duhet mos me qenë hiç, ose me qenë diku larg syve të tij, e kështu rretheqark standardeve të një shoqërie tejet të standardizuar. Por, standardi nuk është edhe fundi i problemeve të Kosovës. Standardet janë vetëm fillimi i zgjidhjes së tyre, se problemi i vërtetë ka me dalë në pah nëse shoqëria kosovare i përmbush këto standarde me një qëllim të vetëm: statusin final, e nuk e kupton që këto nuk janë vetëm lojëra deri në status, po principe të përhershme të një kombi e shteti.

Këtu qëndron problemi i shoqërisë kosovare, asaj shoqërie që vrasjet e njerëzve nuk i dënon sepse janë krime barbare por sepse prishin imixhin e Kosovës, që i mban 400.000 armë nëpër shtëpi e bodrume, që e sheh vrasësin por bëhet qorr e shurdh, që i mungon kreativiteti, që i mungon organizimi i pavarur prej politike e prej partish. Këtu qëndron problemi më i madh. Nuk janë as standardet, as varfëria e madhe, as rrugët gropa-gropa, as dritat që nuk bëjnë dritë në qytet. Problemi është mendimi fisnoro-klanor, mentaliteti ksenofobik dhe heshtja masive. Shoqëria kosovare e ka ngritur një mur të madh të heshtjes dhe askush s’po guxon ta rrënojë. E ai që tenton me folë, i humb filli dikah. E në këte shoqëri, si të aplikohen standardet?


Konkluzë “standarde”

Ai që e ka në dorë këte punën e standardeve dhe që duhet ta kryej punën e aplikimit të tyre, ai është njeri me dy fate të ndryshme. Është me fat, sepse në dorë ka diçka që shoqërinë kosovare (shpresohet fort) ka për ta ndryshuar e orientuar kah Europa e qytetërimi europian. Është i pafat, sepse këte gjë fatkeqësisht duhet ta kryej në një kohë rekord. Një vjet e gjysë e ka ai person ta marrë këte shoqëri e ti thej barrierat që ajo vetes po ja vendosë. Me e marrë e me i folë për ardhmërinë e vendit, t'i tregojë që edhe pse dikur dikush na ka vrarë, ne nuk duhet të bijmë në nivelin e tyne, ne duhet të tregojmë se ato me të cilat krenohemi, mikpritja, besa, drejtësia, vërtetë janë tonat dhe se i respektojmë, duhet me i folë popullit për atë që mundet me arritë nëse e merr udhën që i tregohet, e t'i tregojë edhe se çka hedh anash, nëse këto gjëra nuk i kryen.

Ai njeri që arrin ta bëjë këte, ai ka me hy në historinë e Kosovës si njeriu që kontribuoi për çrranjosjen e mentalitetit fisnoro-klanor, që i dha nji udhë kombit të vet të lënduar e të vrarë në robëri e luftëra Ai njeri ka me u shpërblye me mirënjohjen e popullit. E të mos harrojmë, nuk ka shpërblim ma të madh për nji udhëheqës, se kur populli i tij ja shpreh mirënjohjen.

Trim Kabashi, Chicago (USA)
Marr nga Gazeta Java - 18 Dhjetor 2003


*Artikulli është i shkruar në gegnisht origjinalisht, por u përshtat për një lexim sa më të lehtë.

[Albo]

E lexova artikullin dhe ASD ben shume mire qe e evidenton realitetin paksa te prapambetur qe mbreteron ne shoqerine shqiptare ne Kosove qe eshte e mbizoteruar nga retorika boshe politike. Eshte detyra e intelektualeve shqiptare ne Perendim qe te pikturojne realitetin e vendit te tyre jo te izoluar por ne raport me boten e qyteteruar. Shqiptaret e Shqiperise apo Kosoves jane skllever te realitetit qe jetojne dhe clirimi prej kesaj sllaverie do te kerkoje kohe e perkushtim.

Ne lidhje me standartet...

Standartet jane nje arritje e madhe politike per procesin e pavaresise se Kosove. Per here te pare Perendimi nuk premton me fjale por i hap udhen nje procesi qe e con Kosoven drejt integrimit. Jo me kot pakicat serbe ne Kosove u ankuan menjehere prane institucioneve te OKB ne Kosove se "standartet e cojne Kosoven drejt pavaresise, dhe pavaresia e Kosoves destabilizon rajonin".

Ky eveniment u jep pergjigje shqetesimeve gjithmone ne rritje te institucioneve shqiptare, kuvendit, presidence, qeverise qe ne cdo takim nderkombetar kerkonin me shume autoritet, me shume pushtet nga UNMIK per te adresuar problemet e mprehta qe has shoqeria shqiptare. Tashme politikanet ne Kosove e humbasin te drejten e ankesave apo berjes me faj te Perendimit, pasi tashme ata kane nje date per diskutimin e statusit final te Kosoves, brenda vitit 2005, kane edhe nje udherefyes per standartet qe duhen te permbushen ne menyre qe shqiptaret te fitojne ate qe duan, pavaresine e Kosoves.

Nen perspektiven e nderkombetareve, ekziston nje medyshje e madhe ne lidhje me Kosoven. Medyshja nuk lind nga pyetja nese Kosova do te jete e pavarur apo jo, pavaresia e Kosoves eshte fituar me bomben e pare te NATO mbi Beograd. Medyshja e perendimoreve lind nga ajo pyetja tjeter: cfare do te thote per Europen Juglindore nje Kosove e pavarur? Ekzistojne dy pergjigje per kete pyetje te kampeve pro dhe kunder pavaresise se Kosoves. Kampi i pare eshte kampi pro-shqiptar, Washington-Rome-Viene qe kane qene dhe vazhdojne te jene historikisht pro interesave shqiptare. Ky kamp beson se shqiptaret nuk jane faktor destabiliteti per Europen Juglindore, perkundrazi, jane faktor stabiliteti. Tek shqiptaret ata shohin partneritetin qe nuk e gjejne dot tek interesat sllave apo greke ne Ballkan qe origjinen e tyre e kane ne Moske. Kampi i dyte eshte kampi pro-sllav ne te cilin hyjne Paris-Londer-Moske te cilet jane kumbaret e ish-Jugosllavise. Keta jane ata qe besojne se shqiptaret nuk meritojne nje vend ne tryezen europiane pasi interesat strategjike ne Ballkan nuk kalojne as ne Tirane e as ne Prishtine, por ne Athine dhe Beograd. Kuptohet qe keta jane "buka e vjeter" ne maredheniet nderkombetare, politika e jashtme e te cileve ka ndryshuar pak ose aspak ne keto 100 vjetet e fundit karshi ballkanit.

Politika e jashtme e ndjekur nga Washingtoni e ka vene kampin tjeter perballe faktit te kryer qe Kosova do te fitoje pavaresine e saj. Edhe pse kjo nuk eshte bere publike per opinionin boteror apo ate shqiptar, kjo eshte bere e qarte ne qarqet diplomatike midis qeverivise amerikane dhe aleateve te saj. Londra, Berlini dhe Moska i jane nenshtruar vullnetit te Washingtonit duke pranuar prishjen e status-quo 85 vjecare ne Ballkan dhe fillimin e nje politike te re ballkanike. Ne qender te kesaj politike te re eshte ndihma integruese e 7 milion shqiptareve ne Ballkan qe jetojne ne plot 5 shtete duke u munduar keshtu te korrigjojne nje gabim historik perendimor ne Ballkan.

Parisi nga ana e vet eshte i vetem kunder prishjes se status quo Ballkanike dhe ende i meshon politikes se vet pro-sllave ne Ballkan. Kjo u duk ne kembenguljen e Parisit nepermjet Solanes dhe BE per krijimin e unionit "Serbi Mal i Zi", kur palet dhe Moska eshte kunder kesaj inisiative qe nuk ka te ardhme. Menjehere pas kesaj lezivje franceze nen masken e "BE", Moska i terhoqi trupat e saj paqeruajtese nga Ballkani. Ky ishte nje tjeter eveniment historik, Ballkani u cliruar njehere e pergjithmone nga rrymat pan-sllave te stepave te Rusise.

Goditja tjeter e madhe e Parisit ndaj interesave tona kombetare eshte anashkalimi i Korridorit 8, nje plan strategjik amerikan per lidhjen e tregut te Europes Lindore me ate Perendimore. Ne planet e Parisit qe jane edhe planet e BE Shqiperia nuk shihet si terminali i mallrave ne Adriatik, por vendin e saj e ze Greqia. Teksa Washingtoni shikon korridorin 8 te kaloje nga Italia ne Shqiperi, ne Maqedoni e me tej ne Bullgari, BE e shikon korridorin e vet te shkoje nga portet greke ne Maqedoni e me tej ne Serbi. Teksa BE aktualisht po investon miliona $ ne infraskuturen e Greqise fondet per korridorin 8 jane anashkaluar me dashje deri ne vitin 2020.

Pavaresisht nga perplasja e interesave SHBA-France ne Ballkan, kjo ne vetvete eshte teper pozitive per ceshtjen tone kombetare. Takimi i Vjenes i shoqeruar edhe me standartet per integrimin e Kosoves i hapin rrugen procesit te transferimit gradual te pushtetit te OKB ne Kosove, institucioneve te brishta shqiptare.

Cfare do te thone standartet per shqiptaret e thjeshte?

Do te thone qe perendimi eshte po aq i interesuar per stabilitetin politik dhe institucional te Kosoves, aq sa duhet te jene edhe vete shtetasit shqiptare te Kosoves. Standartet ne menyre indirekte u japin mesazhin shqiptareve te mbeshtesin institucionet e zgjedhura me voten e lire ne Kosove dhe te distancojne veten nga organizatat e fshehta kriminale. Do te thote qe shqiptaret te denojne krimet politike qe kane pllakosur Kosoven, te braktisin bojkotin e pjesmarrjes ne takimet nderkombetare, te braktisin militantizmin politik per hir te interesave te perbashketa kombetare qe qendrojne me lart se interesat politike.

Mesazhi i standarteve eshte i qarte per cdo shqiptar. Nuk duhet te kerkoni vetem pavaresine e Kosoves por duhet te kerkoni edhe integrimin e Kosoves ne familjen europiane ne te njejten kohe. Popullin shqiptar ne Ballkan e ndaj nje histori e hidhur 100 vjecare me Europen perendimore, e ndan feja qe ne shqiptaret mbajme ne shumice, na ndan tradita e vogel demokratike qe ne shqiptaret kemi, na ndan orientimi i sinqerte e dashamires pro-amerikan qe ne shqiptaret kemi manifestuar si popull edhe atehere kur gjysma e Europes demonstronte kunder interesave amerikane.

Ajo qe ne na bashkon me Europen eshte deshira dhe vleresimi qe ne kemi per LIRINE dhe DEMOKRACINE, pasi ndryshe nga popujt e tjere europiane, ne shqiptaret e mesuam vleren e lirise dhe demokracise duke provuar izolimin dhe persekutimet diktatoriale. Na bashkon rraca jone e mocme dhe kontributi i jashtezakonshem qe ne shqiptaret kemi dhene ne te gjitha qyteterimet qe ka njohur bota dhe vete Europa. Nje vend i vogel si Shqiperia ka nxjerre stratege e shenjtore te cilet kane ndryshuar kahun e historise se Europes e botes.

Ajo per te cilen ceshtja jone kombetare ka me shume nevoje se kurre ne kete kohe eshte per zerin e intelektualeve shqiptare te rinj te cilet jetojne, punojne e studiojne ne Perendim, pasi eshte detyra jone te ndergjegjesojme popullin shqiptar qe jeton ne Ballkan. Nuk mund te presim nga intelektualet e vjeter ne Kosove apo Shqiperi, te lindur e rritur nen komunizem e okupim serb qe te kuptojne epoken historike qe shqiptaret po jetojne ne keto vite.

Ne mbyllje dua te them se standartet nuk e shtyjne diten e pavaresise se Kosoves, perkundrazi, bejne te mundur qe dita e pavaresise se Kosoves te jete edhe dita e integrimit te saj ne familjen europiane.

[Hek]

Nga Hysamedin Ferraj
"Rimekembja"


PSE INTEGRIMI NË BE NUK E ZGJIDHË ÇËSHTJEN SHQIPTARE



Kur flitet për çështjen shqiptare mendimet janë ndarë në dy kampe kryesore: njëri që thotë se fillimisht duhet zgjidhë çështja shqiptare dhe pastaj të shihet çështja e integrimit në BE; tjetri që thotë se integrimi në BE dhe demokratizimi i vendeve në të cilat janë të përfshira pjesë të kombit dhe territoreve shqiptare (Kosovës, Serbisë, FYROM-it, Malit të Zi, Greqisë) përbën zgjidhjen e çështejs shqiptare.

Qëndrimi i politikanëve, të pozitës dhe opozitës, i uzurpartorëve të shoqërisë civile (kryetarë të OJQ-ëve ose OJF-vë) dhe manarë të tyre, gazetarë dhe analistë-opinionistë që kanë monopolizuar mendimin mediatik dhe që nuk dallohen në asnjë ide nga politikanët, shkrimtarë e artistë, studiues e injorantë, të gjithë, me përjashtim të nacionalistëve shqiptarë kur flitet për çështjen shqiptare përpiqen të argumentojnë se çështja shqiptare do të zgjidhet nga procesi integrues ballkanik dhe europiaë, me heqjen e kufijve, të vizave, me qarkullimin e lirë të njerëzve etj. Ky është një arsyetim (në qoftë se mund të quhet i tillë) aq i njohur sa nuk është e nevojshme të paraqitet më gjërësisht.

Këtu do të tregohet, shkurt dhe nën shembullin e Greqisë, se as integrimi në Europë dhe as demokratizimi nuk e zgjidhë çështjen shqiptare.

Se çështja shqiptare nuk zgjidhet me integrimin në BE e vërteton rasti i Greqisë. Antarësimi në BE është shkalla më e lartë e integrimit në Europë. Greqia është e integruar në Europë, është antare e Bashkimit Europian. Por çështja e shqiptarëve dhe territoreve shqiptare në Greqi, çështja çame nuk është zgjidhur. Integrimi dhe antarësimi në Europë nuk i zgjidhë me siguri as çështjet e të drejtave të shqiptarëve në vendet që bëhen antare të BE si, ta zëmë, Unioni Serbi Mali i Zi, FYROM etj. Greqia është e integruar në Europë dhe antare e BE e megjithkëtë as çamët, e madje as aravanitasit nuk i gëzojnë të drejtat më elementare që u takojnë grupeve kulturore, etnike, fetare për të mos folur për të dretjat kombëtare. Faktet tregojnë se shqiptaret gëzojnë më shumë të drejta kombëtare në vendet që nuk janë të integruara në Europë dhe antare të BE si në FYROM, Mali i Zi, e madje edhe nën Serbi se sa në Greqi që është e integruar në Europë dhe antare e BE.

Zhvillimet në BE po tregojnë se vetë BE po shkon drejt organizimit si një organizatë ndërkombëtare dhe jo siç mendohej se mund të jetë diçka transnacionale ose mbinacionale (supranacionale). Në një organizatë ndërkombëtare antarët hyjnë si shtete, si kombe, në parim sovrane, të barabarta etj. Të barabarta si kombe! Jo si sasi, zhvillim etj. Diskutimet e fundit dhe vendimet për kushtetutën e BE treguan se BE po organizohet si organizatë ndërkombëtare dhe jo si organizatë qytetarësh. Megjithë këmbënguljen e disa shteteve të mëdha, veçanërisht Francës dhe Gjermansië që votimi të bëhet sipas numërit të popullsisë (pra përfaqësimit qytetar) u vendos që votimi të bëhet sipas shteteve kombëtare që e përbëjnë: një shtet, një komb = një votë. Pra përfaqësimi do të bëhet sipas shtetit kombëtar dhe jo sipas qytetarëve. Me integrimin e vendeve ballkanike në BE shqiptarët do të përfaqësohen nga zyratrët e atyre vendeve dhe jo si shqiptarë. Në BE do të antarësohet Serbia, do të votojë si Serbi dhe
do t’i përfaqësojë shqiptarët si shtetas të vetë, do të antarësohet FYROM dhe do t’i përfaqësojë shqiptarët si shtetas të vetë, do të antarësohet Shqipëria dhe do të përfaqësojë qytetarët që përfaqëson edhe sot e jo si Shqipëri e Bashkuar. Pra, derisa BE organizohet si organizatë në të cilën përfaqësohen shtetet dhe kombet pak a shumë siç është OKB, atëherë të thuhet se çështja shqiptare zgjidhet me integrimin ose antarësimin në BE është si të thuhet se çështja shqiptare zgjidhet me antarësimin e vendeve ballkanike në OKB!

Edhe më parë ishte vënë në dukje se BE ende funksionon si një organizatë ndërkombëtare përderisa p.sh. antarët e Parlamentit Europian zgjidhen mbi baza kombëtare, shtetërore dhe jo të qytetarëve europian. Kështu p.sh. antarët gjermanë të Parlamentit Europian nuk zgjidhen nga votuesit italian sado europianistë ekstremë që të jenë, ose nga antarët francëze nuk zgjidhen nga votuesit gjermanë etj., etj. Mendohej se do të shkohet drejt një organizimi të një lloji tjetër. Por diskutimet për kushtetutën e BE dhe mënyrën e marrjes së vendimeve treguan se deri tani modeli i organizimit të BE është si modeli i OKB a çdo organizate tjetër ndërkombëtare dhe jo transnacionale apo supranacionale. Prandaj edhe një herë vlen të përsëritet se argumentimi për zgjidhjen e çështjes shqiptare (d.m.th. bashkimit të territoreve dhe pjesëve të kombit shqiptar në një shtet) duke u integruar apo antarësuar vendet ballkanike në BE është si të thuash se çështja shqiptare është zgjidhur me enatarësimin e
vendeve të Ballkanit në OKB.

Për më tepër, me antarësimin ose integrimin e vendeve ballkanike në BE nuk ka asnjë siguri se do të përmirësohen së paku të drejtat e shqiptarëve. Rasti grek është shëmbulli praktik i kësaj: shqiptarët gëzojnë më shumë të drejta në çdo vend tjetër që nuk është antar i BE se sa në Greqi që është antare e BE. Qenia antare e BE-së i ka dhënë Greqisë një mundësi të veçantë t’i shtypë të drejtat e shqiptarëve sepse duke e pasë antare të veten BE e ka privilegjuar.

Në fund, as demokratizimi nuk është siguri se çështja shqiptare zgjidhet apo të drejtat e shqiptarëve përmirësohen. Shqiptarët kanë pasur më shumë të drejta në ish-Jugosllavinë që ka qenë socialiste, që nuk ka qenë as kapitaliste dhe as demokratike se sa në Greqinë e sotme që klasifikohet si demokratike dhe kapitaliste, me ekonomi tregu, antare e BE etj.





5.12.2003 Hysamedin Feraj

[Albo]

SHBA: Kosova duhet të përqëndrohet në përmbushjen e standarteve të OKB-së

David Gollust
6 shkurt 2004, 3:15 UTC


Shtetet e Bashkuara u bënë dje thirje udhëheqësve të Kosovës të përqëndrohen në përmbushjen e standarteve të Kombeve të Bashkuara për demokraci dhe jo në pavarësinë e mundshme të Kosovës nga Serbia dhe Mali i Zi. Kryeministri i Kosovës Bajram Rexhepi ndodhet në Washington ku ka zhvilluar takime me Sekretarin e Shtetit Colin Powell dhe zyrtarë të tjerë. Korrespondenti i Zërit të Amerikës njofton nga Departamenti i Shtetit.
Megjithëse udhëheqësit e Kosovës thonë se paqartësia në statusin e ardhshëm të Kosovës po dëmton ekonominë, Departamenti i Shtetit thotë se vëmendja duhet përqëndruar në krijimin e një shoqërie demokratike shumë-etnike dhe jo në statusin përfundimtar të saj.

Këto komente u bënë pas bisedimeve që zhvilluan të mërkurën Sekretari i Shtetit dhe kryeministri Rexhepi, i cili erdhi në Washington për të marrë pjesë në Lutjet e Mëngjesit që u zhvilluan dje, dhe që tërheqin çdo vit një numër figurash politike nga mbarë bota.

Në dhjetor Kryeadministratori i misionit të Kombeve të Bashkuara në Kosovë, ish-kryeministri finlandez Harri Holkeri paraqiti një numër standartesh për të ndërtuar demokracinë në Kosovë.

Këto standarte do të shërbejnë si bazë për vlerësimin që Kombet e Bashkuara do të bëjnë në mes të vitit 2005 lidhur me gjendjen në Kosovë për të përcaktuar nëse ka ardhur momenti i diskutimit të statusit të saj përfundimtar.

Në një konferencë për shtyp, zëdhënësi i Departamentit të Shtetit Richard Boucher tha se gjatë bisedave me zotin Rexhepi, Sekretari Powell dhe nën-sekretari i shtetit Marc Grossman theksuan rëndësinë e zbatimit të standarteve të Kombeve të Bashkuara dhe bashkëpunimit me administratën e zotit Holkeri.

“Ne vazhdojmë të mbështesim përpjekjet e Kombeve të Bashkuara në Kosovë dhe të udhëheqjes së Përfaqësuesit të Posaçëm të Kombeve të Bashkuara Hari Holkeri për të ngritur një shoqëri shumë-etnike dhe demokratike në Kosovë, në përputhje me rezolutën 1244 të Këshillit të Sigurimit të OKB-së. Në këtë moment, ne mendojmë se vëmendja duhet të përqëndrohet në arritjen e përparimit në përmbushjen e standarteve, veçanërisht atyre që lidhen me çështjet e një shoqërie shumë-etnike, dhe jo në statusin përfundimtar. Aktualisht nuk kemi përcaktuar ende një qëndrim lidhur me diskutimet për statusin përfundimtar.”

Zoti Boucher tha se Shtetet e Bashkuara do të vazhdojnë angazhimin e tyre për zhvillimin e Kosovës si dhe do të bashkëpunojnë me aleatët e tyre për të krijuar një Kosovë të qëndrueshme dhe demokratike.

Në një intervistë për gazetën Washington Times, zoti Rexhepi tha se administrata e Kombeve të Bashkuara e ka tejkaluar afatin e logjikshëm të qëndrimit, dhe se paaftësia e komunitetit ndërkombëtar për t’u përqëndruar në “vizionin përfundimtar” e ka bërë shumë më të vështirë qeverisjen e Kosovës.

Ai tha se e ardhmja e paqartë e Kosovës ndër të tjera po dekurajon edhe investitorët dhe po vonon marrëveshjet për privatizim të industrive të zotëruara nga shteti.

Zoti Rexhepi shtoi gjithashtu se shqiptarët e Kosovës, të cilët përbëjnë 90 për qind të popullsisë, mbështesin në masë dërrmuese idenë e pavarësisë.

Ndërkaq, serbët e Kosovës, shumica e të cilëve u larguan nga Kosova gjatë luftës, duan të mbeten pjesë e Serbisë dhe Malit të Zi. Popullsia prej rreth 80 mijë serbësh që ndodhet aktualisht në Kosovë jeton kryesisht e përqëndruar në lagje të mbrojtura nga forcat e sigurimit të Natos të dislokuara në Kosovë.

[Tahir_Veliu]

Pajtohem plotesisht me Hysamedin Ferraj, se integrimi ne BE nuk do te zgjidh qeshtjen kombetare shqiptare. Perkundrazi, une mendoj e me integrim ne Bashkimin Evropian qeshtja kombetare do te pesoj shume.

Integrimi ne BE eshte nje element qe ta beje te pamundur arritjen e aspirates shekullore te popullit shqiptar per bashkim kombetar, sepse atehere do te jete e veshtire te kete ndryshime kufinjesh. Integrimi ne BE, per qytetaret e rendomte d.m.th. vertetim i statusit aktual te shqiptareve si qytetar te klases se dyte, dhe skllever ne token e tyre, Shqiperine Etnike.

Fillimisht duhet bashkim kombetar shqiptar (nje Shqiperi e Bashkuar) pastaj populli shqiptar, sikurse popujt e tjere te BE-se duhet te shprehen ne menyre demokratike se a pajtohen per tu "integruar" ne BE.

Pershendetje

[Albo]

Harri Holker, raporton në Këshillin e Sigurimit të OKB-së

“Kosova ka bërë përparim”
Kryeadministratori: Po përmbushen standardet

Kosovë

Administratori i posaçëm i Kombeve të Bashkuara në Kosovë, Harri Holkeri, u shpreh se “përparësia kryesore e misionit të OKB-së, i cili administron Kosovën, është finalizimi i një plani për zbatimin e një numri standardesh për ndërtimin e demokracisë.

Në raportin e mbajtur në KS të OKB-së ai tha se, standardet do të krijojnë bazën për një vlerësim të Kombeve të Bashkuara vitin e ardhshëm, nëse Kosova është gati për bisedime rreth statusit të saj final, që do të jetë pavarësia ose autonomia në kuadër të Sërbisë e Malit të Zi”. Holkeri tha se ka mundësi reale që shumë çështje të zgjidhen në dialogun e filluar me Beogradin, që ka gjasa të vazhdojë gjatë këtij muaji. Shefi i Misionit të OKB-së, tha se Beogradi i ka shtuar ndërkohë strukturat paralele dhe se është mëse e domosdoshme që kjo sfidë të kapërcehet. “Ndërkohë, ka filluar edhe puna për zbatimin e masave për përmbushjen e standardeve”, tha më pas ai. Por ai tha gjithashtu tha se kishte mbetur i zhgënjyer që serbët e Kosovës, të cilët përbëjnë 10% të popullsisë, kanë refuzuar t’i bashkangjiten procesit. Ai u bëri thirrje serbëve, që të luajnë një rol aktiv, duke shtuar se është e rëndësishme për të gjitha komunitetet që të marrin pjesë në procesin e përcaktimit të ardhmërisë së Kosovës. Ai tha se është detyra e misionit të Kombeve të Bashkuara që të sigurohet që çdokush të përfaqësohet në mënyrë të drejtë. Zëvendësministri i Jashtëm i Sërbisë, Zrljko Peroviç, tha nga ana tjetër se OKB-ja nuk po e kryen rolin e saj aq sa duhet për realizimin e procesit të gjithëpërfshirjes. “Nëse nuk veprohet, në fund rezultati do të jetë një dështim që asnjëri nuk do ta dëshironte”, shtoi ai më pas. Holkeri e cilësoi kriticizmin mbi këtë çështje si të pajustifikuar, duke thënë se misioni i OKB-së dhe qeveria e Kosovës kanë garantuar siguri për serbët e Kosovës. Në fund, Holkeri shprehu besimin e tij se standardet megjithatë do të përmbushen, por jo pa mbështetjen financiare te bashkësisë ndërkombëtare. Raporti i Kombeve të Bashkuara përkoi me vizitën e Kryeministrit të Kosovës, Bajram Rexhepi, në Uashington, ku u takua me udhëheqës të lartë amerikanë. Shtetet e Bashkuara u bënë thirrje së fundmi udhëheqësve të Kosovës, të përqëndrohen më shumë në krijimin e një shoqërie demokratike shumetnike e në përmbushjen e standardeve të kërkuara, dhe jo në statusin përfundimtar.

[MrSafet]

[B]Ministri i jashtëm i Serbisë e Malit të Zi, Goran Svilanoviq ka thënë se qëndrimi gjerman ishte shtruarja e rrugës për pavarësinë e Kosovës. Ai ka thënë se Gjermania i ka bllokuar përpjekjet e Beogradit për të formuluar qartë një rezolutë në KS të OKB-së, për siç ka thënë ai, shtypjen e shumicës shqiptare ndaj pakicës serbe në Kosovë, pas shpërthimit të dhunës vdekjeprurëse.

Svilanoviq ka thënë se Beogradi dëshironte një rezolutë për të dënuar përpjekjet e shqiptarëve për spastrimin etnik të Kosovës, mirëpo konkretisht Gjermania e ka bllokuar atë, ka thënë Svilanoviq. Svilanoviq ka thënë gjithashtu se interesat e Serbisë e Malit të Zi në këtë moment ndryshojnë nga ato të Gjermanisë.
Mirëpo, Gjermania ka hedhur poshtë këto pohime. Zëdhënësi i ministrisë së jashtme të Gjermanisë, Ualter Lindner tha se pohimet e Beogradit ishin të pasakta, duke precizuar se KS i ka ftuar të gjitha palët që të tregohen të përmbajtura, njofton Radio Evropa e lirë.