SHPK dhe TMK

[Brari]

Nga trepca.net:

-------------

SHPK-ja sillet sikur të mos kishte ndodhur asgjë!


Shkruan: Nazmi LUKAJ

Policia e SHPK-së, jo vetëm që nuk ka bërë asgjë për kapjen e kriminelëve, por edhe sot, kur po vriten pjesëtarët e saj, sillet sikur asgjë nuk ka ndodhur! Krerët e saj e dinë se disa shëpëkëistë kanë punuar dhe ende kanë lidhje me shërbimet sekrete kriminale. Mirëpo, deri më tani, asnjë përpjekje nuk e kanë bërë për identifikimin e tyre, për t’i dëbuar nga radhët e veta, me ç’veprim SHPK-në do ta kishin shndërruar në një polici të mirëfilltë, në një polici të popullit dhe për popullin, ashtu si e ka dëshiruar ky. Deri sa të mos e bëjë një përçapje të tillë, kriminelët në Kosovë ka rrezik që kurbën e krimit ta rrisin edhe më shumë.

Çudit fakti pse policia sillet sikur të mos kishte ndodhur bash asgjë! Ky gjest i saj është me përplot pikëpyetje. Një nga to është edhe se mos, vallë, krerët e SHPK-së edhe vetë mbajnë lidhje me shërbimet e tilla?! Duke mos lëvizur nga amullia, SHPK-ja gjithnjë e më tepër po e humb besimin e vet në popull. Gjithnjë e më tepër po e mbështjell veten me dyshimin se lidhjet e saj me shërbimet sekrete janë shumë të nyjshme, dhe se mu për këtë nyjshmëri nuk është duke vepruar asgjë. Mosveprimi i saj për t’i spastruar radhët e veta, ka bërë që qytetarët e Kosovës jo vetëm të mos guxojnë të bëhen dëshmitarë të ndonjë rasti kriminal, por, madje, që kjo temë edhe të bëhet gogol për ta edhe gjatë bisedave.

Po të ishin vrarë pjesëtarët e një policie në secilin vend të përparuar të botës, krerët e saj do të mblidheshin urgjentisht për t’i identifikuar shkaqet e tyre. Ato polici, vrasjet e pjesëtarëve të vet, do t’i kishin konsideruar si një trandje të fuqishme të besimit të tyre te qytetarët. Madje, në këso rastesh, edhe vetë ministri i Punëve të Brendshme do të ishte detyruar që të jepte dorëheqje, në rast se nuk do t’i kishte identifikuar zbrazëtirat në polici. Gjithçka me urgjencë do të veprohej, për t’ia kthyer besimin policisë në popull. Ndërsa, kjo policia jonë i ka future veshët në lesh. Prijetari i saj, Sheremet Ahmeti, as pas këtyre vrasjeve asgjë nuk është duke ndërmarrë, që t’i pastrojë radhët e veta. Ose, edhe vetë frikohet që të luajë me vesh, nga frika se do të mund të jetë edhe vetë pre e këtyre shërbimeve sekrete kriminale, njerëzit e së cilës i njohin tash edhe vetë qytetarët.

Ata sillen të lirë, pa fije frike se do të mund të kapen nga policia. Ata vazhdojnë të jenë rrezik permanent, për të gjithë ata që futen në lista të zeza nga krerët e këtyre shërbimeve, të cilët kurrë nuk do të guxonin ta zhvillonin veprimtarinë e tyre, po të mos kishin pasur miqësira me individë të caktuar brenda SHPK-së , si dhe me njërëz të ndonjë segmenti të policisë së UNMIK-ut. Ne ministër të Punëve të Brendshmme nuk kemi, por policia ka një prijetar të vetin, e ai është Sherehmet Ahmeti, i cili, për t’ia kthyer besimin në popull SHPK-së, sa më parë duhet t’i bëjë të gjitha përpjekjet për t’ia liruar frymëmarrjen kësaj nga shëpëkëistët e lidhur me shërbimet sekrete. `

Në rast se nuk do të mund ta bëjë këtë, atëherë detyrë e tij e moralshme do të ishte dorëheqja, sepse, së paku, vetes do t’ia ruante dinjitetin. Një potez të tillë, do ta bënin të gjithë ata krerë policie në vendet e përparuara të botës, që ta ruajnë moralin e vet njerëzor, dhe për të dëshmuar se shprehin haptazi protestën e vet me gjendjen e rëndë në ato polici. Sherehmet Ahmeti, në këtë mënyrë, mund të shpëtojë diçka nga respekti që ka pasur në popull, si një ish-i burgosur politik. Në të kundërtën, do të zvetënohet gjithnjë e më shumë, bashkë me institucionin që e udhëheq. E gjendja në këtë polici, tashmë dihet nga të gjithë çfare është. Prandaj, kjo duhet ta gjejë një zgjidhje me urgjencë, sa nuk është bërë edhe më e zymtë…

---------------------------------






......

Mendime..



Skjarim per disa lexues.

SHPK - Sherbimi policor i Kosoves.
TMK- Trupat mbrojtese te Kosoves.



Vrasja e Sabaetes tregon se ne SHPK ka kriminele ose spiune te Krimineleve.
Vrasja e Drinit tregoi se ne TMk kishte dhe ka kriminele.

Agjentura Klosiste ne Kosove (qe sot dhe mund te jete e pamvarur nga Klosistet e Tiranes sepse ka fituar eksperiencen e nevojshme per te ecur me kembet e veta) mendon se SHPK dhe TMK jane "cifligje" te tyret e jo institucione te Kosoves.

Sikur PDK e AAK qe i thone vetes "Parti te dala nga Lufta" te kishin dale nga ndoj lufte qe kishte sjelle fitoren e ushtrise qe ata komanduan mbi ushtrine e Sllobos edhe mund te justifikoheshin ne filozofine e tyre te uzurpatorit te politikes dhe institucioneve kosovare mirpo te gjithe e dine(ata vete e dine me mire) se largimi i okupatorit Serb nga Kosova erdhi nga nderhyrja ushtarake e Natos.
E vetmja merit e ktyre dy Partive eshte se me strategjine e tyre te luftes "ndersyen" ushtrine Serbe mbi popullin e Kosoves dhe kur kjo ushtri serbe hyri ne Kosove populli u gjend i pa mbrojtur kurse shteti gjakatar serb u gjend me nji "arsye" te mjaftushme diplomatike qe ju dha aq bujarisht nga Hashim-Jakupet per te bere realitet endrrat e Cubrilloviqve e per te ja mshel dhe gojen
politikanve Kosovare me mandat te Popullit e kryesorja per tja mbyll shtigjet dhe diplomacise boterore..
Mirpo fati yne qe Sllobo gjeti belane se nje TROJK politikanesh nderkombetare te llojit Klinto-Bler e Shreder Solane u gjenden ne krye te Botes perendimore dhe Masakra e Sllobos nuk u la ne heshtje por u denua dhe ky denim ishte Shpetimi i yne..

Sikur Bota te kishte pas ne Krye ca tipa "mos nderhyrsa" te Llojit Camberlen cdo kishte ndodhur valle?
(chamberlain, ish minister dhe kryeminister i Britanise madhe ne vitet 38-40 qe bente sehir kur Hitleri i ra Cekise, Polonise etj..dhe me vone vet Anglise dhe Europes..)

Sot e ksaj dite 2.5 milion Kosovaret tone do ishin nder cadra kampesh neper dyer te botes..

TMK dhe SHPK duhet te pastrohen nga uzurpatoret e te vihet nen filtrin e Parlamentit e ku gjithe Nomenklatura e saje te perzgjidhet me transparence e keto dy institucione ti kthehen Popullit te Kosoves..
Deri tani kto jane Prona te Hashim Ramush Jakupave..e jo vetem prona por cfar eshte me e tmerrshmja ..jane dhe dy ARME qe i perdor shtabi vrases per interesat e tyre politike kriminale.

Le te fillohet ky pastrim me shkarkimin e Agim Cekut dhe Sheremet Ahmetit..

Kosova nuk i ka teper djemt e vajzat..e as Nanat Kosovare nuk i kan teper lotet..

Te ikin kta dy pisa..e pastaj plehu tjeter..




.......

[Brari]

trepca net

------------------
Një përgjigje komesarit të policisë Stefan Feller

Zoti Feller, ti e di edhe më mirë se unë se si është gjendja në SHPK




--------------------------------------------------------------------------------

9 dhjetor 2003 / TN

Ju lus që shkrimin që më keni reaguar, ta lexoni mirë edhe një herë. Se jam i bindur se do ta kuptoni se qëllimi i tij ka qenë shumë fisnik. Do ta kuptoni se ai ka synim ngritjen e SHPK-së në një polici të mirëfilltë, si të shtetit Tuaj.

Shkruan: Nazmi LUKAJ

Komesari i policisë së UNMIK-ut, z. Stefan Feller, sot ka dërguar një reagim të tij për mua në "Bota sot", në të cilin thotë: " Nëse shikojmë prapa, vetëm dy javë, dy policë trima nga Shërbimi Policor i Kosovës janë vrarë në pritë, dhe artikulli juaj i titulluar si “SHPK sillet sikurse asgjë nuk ka ndodhur” është të them, me fjalë më të buta – i vajtueshëm. Shkrimtari (nuk jam shkrimtar-po gazetar, verejtja ime) mundohet që t'i politizojë vrasjet dhe të sjellë dyshime dhe pasiguri në popull, sa i përket balancit dhe ndershmërisë së Shërbimit Policor të Kosovës. Deklaratat janë dhënë, pa ndonjë orvatje që të dëshmojnë, atë se “shërbimet” sekrete kriminale punojnë përbrenda policisë.

Deklaratat se SHPK-ja po e humb besimin e popullit, se krimet nuk po zgjidhen, dhe asgjë nuk po bëhet në kapjen e personit përgjegjës për vrasjet e fundit. Z. Lukaj në mënyrë të zymtë mundohet që t'i lidhë këto në një varg akuzimesh të një teorie të një komploti të fshehtë, për të cilën kërkonte dorëheqjen e kolonel Sheremet Ahmetit. Është shumë e pafat që vrasjet e fundit tragjike të përdorën në mënyrë personale, që të sulmohet organizata dhe shërbimi në cilin ata vdiqën. SHPK-ë është e bashkuar në shërbimin e tyre ndaj popullit të Kosovës. Normal se anëtarët e tij kanë prejardhje të ndryshme, etnike dhe politike – është një princip i pranueshëm që një polic duhet ta tregojë në shërbimin që ai e përfaqëson, dhe kjo do të thotë se shumëllojshmëria është e inkurajuar.

Se çfarëdo që janë si individ policia janë një shërbim. Ata janë përfaqësuesit me të sukseshëm dhe më të dukshëm të Kosovës së re. Suksesi i SHPK-së në zbatimin e ligjit dhe zgjidhjen e krimit nëpër tërë Kosovën është një njohuri mbarë popullore. Anketimet e fundit në popullatë kanë treguar se këto suksese kanë sjellë përkrahjen dhe mbështetjen mbarë popullore. Këto sukeses mund të jenë të egra për ata me qëllime politike, dhe është shumë vështirë të mos shihet politika prapa kritikave në këtë artikull dhe sulmi ndaj kolonel Sheremet Ahmetit. Z. Lukaj duhet ta dijë se kolonel Ahmeti nuk është i barabartë sa i përket përgjegjësive me Ministrin e Punëve të Brendshme, dhe se ai nuk i bart përgjegjësitë për evoluimin-zhvillimin e SHPK-së. SHPK-ja është pjesë e Policisë në Kosovë dhe në fund të fundit i raporton Komesarit të Policisë. Populli e di më mirë.

Populli e di se SHPK-ë është polici e tyre dhe se çdo tentim është bërë që të gjenden dhe të arrestohen vrasësit qyqarë të Sebahate Tolaj dhe Isuf Haklajt dhe se policia nuk do të inkuadrohet në politikë. Ne presim bashkëpunimin e gazetarëve profesionalë në themelimin e sigurisë dhe ndërtimin e shërbimit policorë, dhe jo akuzimin e njëpasnjëshëm hasur në këtë artikull. Stefan Feller, komesar i policisë së UNMIK-ut".(Letra e z. Feller është e botuar në tërësi).

Letra e z. Stefan Feller, pëkundër faktit se e respektoj misionin e tij në Kosovë, më la pa tekst. Më së shumti më çuditi se pse ky po e merr rolin e avokatit të z. Sheremet Ahmetit. Sigurisht nga përkthimi i dobët që ia ka bërë dikush, ai shkrimin tim aspak nuk e ka kuptuar. Edhe aty ku e ka kuptuar, gabimisht ka dhënë konstatime. P.sh., e ka kuptuar që kam thënë se SHPK-ja po e humb besimin në popull. Kjo është e vërtetë, z. Feller, sepse unë jam çdo ditë në popull, dhe e di se kjo nuk është shpifje imja, por ky është mendimi i popullatës. Nëse nuk beson, dil dhe bisedo me popullatën, ose bëje një anketim, dhe do ta vërtetosh këtë gjë. Nëse të del e kundërta, atëherë keni të drejtë që të ndërmerrni edhe masa ndaj meje.

Por, po u doli konstatimi im ( e që jam njëqindmijëpërqind i bindur se do t'u dalë ashtu si kam shkruar unë), atëherë do të duhej të më kërkoje falje publikisht. Keni thënë se " Shkrimtari (nuk jam shkrimtar-po gazetar, verejtja ime) mundohet që t'i politizojë vrasjet dhe të sjellë dyshime dhe pasiguri në popull, sa i përket balancit dhe ndershmërisë së Shërbimit Policor të Kosovës".

Zoti Feller, unë nuk po mundohem t'i politizoj vrasjet, por ato janë politike. Këtë e dini mirë edhe Ju, siç e dini se zonjusha Sebahate ka qenë duke punuar në dosjen e kolonel Tahir Zemës. Pse u vra kjo, z. Feller? Pse u vra Smajl Hajdaraj? Pse u vra Xhemajl Mustafa?... Për politikë, z Feller. Për asgjë tjetër. Dhe a janë zënë vrasësit e tyre? Jo. Këtë e dini mirë. Se janë vrasje politike e di krejt populli, z. Feller. Dhe, sot e asaj dite, kurrë nuk janë kapur kriminelët as të tyre, as të asnjë të vrari tjetër të pasluftës.

Çka ka bërë policia, z. Feller, deri më sot për t'u kapur vrasësit e tyre? Unë nuk e di. Nëse Ju e dini, atëherë më tregoni. Ose, do të thoni se nuk po tregoni për shkak të hetimeve?! Veç duhet ta dini se shumë familje janë duke bartur barrën e dhimbjes për të dashurit e tyre. Unë, për SHPK-në, nuk "dua të sjellë dyshime dhe pasiguri në popull, sa i përket balancit dhe ndershmërisë së Shërbimit Policor të Kosovës", si keni thënë. Këtë dyshim nuk e kam shfaqur unë, por populli. Këtë e dini mirë Ju, siç dini edhe shumë gjëra rreth kësaj policie. Unë, z. Feller, SHPK-në dua ta shoh në atë shkallë policie të mirëfilltë, si është policia Juaj në shtetin Tuaj.

Asgjë më shumë. Dhe, deri sa të mos bëhet kjo, besueshmëria e saj në popull do të jetë e vogël. Po çuditem çfarë anketimesh kanë qenë ato që këtë polici e nxjerr të besueshme, si keni thënë. Ndoshta keni pyetur vetëm anëtarët e atyre partive që nuk çajnë kokën për këtë situatë. Se, pjesa dërrmuese e popullit, ka kohë që ka luhatur mendimin për SHPK-në. Keni thënë edhe se " Z. Lukaj në mënyrë të zymtë mundohet që t'i lidhë këto në një varg akuzimesh të një teorie të një komploti të fshehtë, për të cilën kërkonte dorëheqjen e kolonel Sheremet Ahmetit".

Unë, së pari, kam kërkuar nga kolonel Sheremet Ahmeti që t'i identifikojë ata pjesëtarë policie që kanë punuar më parë në shërbimet sekrete, e nëse nuk mundet, atëherë të japë dorëheqje. Pra, kam kërkuar një angazhim më të madh të z. Sheremeti në këtë drejtim, e jo kryekëput dorëheqjen e tij. Këtë do ta bënte çdo udhëheqës policie, edhe në vendin Tënd, apo jo z. Feller?

Ata që sot punojnë në SHPK, e që kanë pasur lidhje me ato shërbime kriminale, populli i njeh mirë. Nëse duhet, një ditë t'i tregoj edhe me emra. Sepse unë jam gazetar, dhe nuk i ruaj delet, po çdo ditë pajisem me informata nga populli, që është shumë i zhgënjyer me punën e SHPK-së. Për artikullin që kam bërë, kam marrë shumë lavdërata pikërisht nga populli.

Madje, edhe nga vetë pjesëtarët e kësaj policie, që e kuptojnë se kam pasur të drejtë në konstatimin tim. "Normal se anëtarët e tij kanë prejardhje të ndryshme, etnike dhe politike – është një princip i pranueshëm që një polic duhet ta tregojë në shërbimin që ai e përfaqëson, dhe kjo do të thotë se shumëllojshmëria është e inkurajuar. Se çfarëdo që janë si individë, policia është një shërbim. Ata(policët) janë përfaqësuesit me të sukseshëm dhe më të dukshëm të Kosovës së re. Suksesi i SHPK-së në zbatimin e ligjit dhe zgjidhjen e krimit nëpër tërë Kosovën është një njohuri mbarë popullore", thotë Feller.

Jo, z. Feller, unë mendoj se është shumë e rëndësishme se kush punon në polici, sepse ai që ka hyrë me qëllime të errëta, assesi nuk mund të jetë në shërbim të policisë. Prandaj, po më habitni me këtë konstatim. Pastaj, edhe unë kisha dashur të jetë që " policët e SHPK-së janë përfaqësuesit dhe më të dukshëm të Kosovës", si keni thënë Ju.

Mu për të qenë e tillë kjo, edhe e kam bërë shkrimin që ju e keni cituar dhe që i keni shprehur vërejtjet Tuaja. Dhe, këtë e dëshiroj sa më parë, sepse kam dëshirë që vërtet Kosova ta ketë një polici të tillë. Këtë e dëshiron edhe populli. Z. Feller, edhe Ti, edhe krerët e SHPK-së duhet të jeni shumë të bindur se qëllimi i shkrimit tim ka të bëjë me më të mirën e këtij vendi- që SHPK-ja të angazhohet seriozisht dhe me tërë fuqinë për kapjen e kriminelëve të atdhetarëve të vrarë pas luftës, sepse ata, me kontributin kombëtar që e kanë dhënë, nuk e kanë merituar këtë tragjedi. Apo jo, z. Feller? Madje, shkrimin e kam bërë me dhimbje të madhe. Por, dëshira që shteti im ta ketë një polici si të vendit Tuaj, më ka shtrënguar që të mos hesht.

Unë Juve ju respektoj, edhe misionin që e keni, por Ju lutem, respektojeni edhe Ju misionin tonë të gazetarit, sepse edhe ne e kemi opinionin tonë për gjithçka që duhet të jetë pozitive në Kosovë. Dhe, krejt çka shkruajmë, shkruajmë me qëllimin më të mirë. Për këtë, duhet të jeni shumë të sigurtë. Krejt në fund, dua t'jua them edhe një gjë: nuk është hera e parë që reagon UNMIK-u ndaj meje. Edhe më parë keni reaguar, kur kam shkruar se një kriminel serb ka qenë i pranishëm në Pejë, kur ka ndodhur vrasja e fëmijëve serbë në Gorazhdec. Madje, jam marrë edhe në pyetje, që ata e kanë quajtur konsultim, pse e kam bërë atë shkrim. Sigurisht, se po të mos kisha pasur të drejtë, kishit marrë masa të tjera ndaj meje. Po, kam pasur të drejtë,sepse populli kriminelin, ditën e vrasjes, e ka parë me sytë e vet në Tregun e Gjelbër në Pejë.

Kjo më bën të dyshoj se UNMIK-u po synon të ma mbyllë gojën. Që të heshtë përgjithmonë. Nuk kisha pasur dëshirë të jetë ky synim Juaji. Z. Feller, nëse nuk e dini, jeta ime ka qenë, për shkak të shkrimeve të mia të guximshme, vazhdimisht e kërcënuar nga shërbimet sekrete, të cilat, po ashtu, kanë dëshirë të ma mbyllin gojën. Dhe, edhe tani jam vazhdimisht në shënjestër të tyre. Përkundër kësaj, unë guximshëm kam botuar shkrime për shpartallimin e tyre dhe të krimit përgjithmonë nga Kosova. Sepse e dua një Kosovë pa krim. E dua një Kosovë pa lot. Si e do edhe Ti vendin Tënd. Reagimi Juaj, dhe përpjekja për të ma mbyllur gojën, Ju njoftoj, me tërë sinqeritetin, se u shkon përshtati shërbimeve sekrete dhe kriminelëve që Kosovën ta mbushin me lot. Një ditë, mbase, edhe mund të jem gjah i tyre. Atëherë do ta vërtetoni mirë se sa shumë keni gabuar që më keni reaguar.

Po ashtu, duhet ta dini se unë aq shumë e kam luftuar krimin, sa Ju është dashur të më shpërbleni, e jo të më reagoni. Madje, për këtë është dashur të marrë lavdëratë edhe nga vetë SHPK-ja. Jo vetëm unë, por edhe shumë gazetarë të tjerë të "Bota sot", sepse ta luftosh sot krimin, do të thotë të hysh në listat e kriminelëve për të mos qenë më as vetë në këtë botë. Prandaj, z. Feller, Ju lutem, analizoni më mirë gjërat, e pastaj reagoni. Para se ta përfundoj këtë shkrim, të lus që shkrimin që më keni reaguar, ta lexoni mirë edhe një herë. Se jam i bindur se do ta kuptoni se qëllimi i tij ka qenë shumë fisnik. Do ta kuptoni se ai ka synim ngritjen e SHPK-së në një polici të mirëfilltë, si të shtetit tuaj. Unë,z. Feller, Ju respektoj shumë, por kam dëshirë që respekti në mes nesh të jetë reciprok.



--------------------------------------------------------------------------------