SME Union

[gene]

Ndërmarrjet
Ndërmarrjet e vogla dhe të mesme, krijohet unioni i përbashkët i tyre

SME-Union është një shoqatë e krijuar me qëllim mbrojtjen e të drejtave të ndërmarrjeve të vogla dhe të mesme






Orieta Zhupa / Data (10-11-2003)


Bashkimi i ndërmarrjeve të vogla dhe të mesme, ose i njohur ndryshe SME-UNION, është një shoqatë në përbërje të së cilës marrin pjesë përfaqësues të ndërmarrjeve të vogla dhe të mesme që veprojnë në Shqipëri. Alfons Hani, drejtori i kësaj shoqate, tha: “SME-UNION është krijuar me qëllim për të përfaqësuar, mbrojtur dhe zhvilluar interesat e biznesit të vogël dhe të mesëm në Shqipëri, për të hequr barrierat që e pengojnë atë, si dhe për të krijuar një klimë sa më të përshtatshme për veprimtarinë e tij”. Ky union është krijuar me kontributin e rreth 200 bizneseve shqiptare të cilat janë anëtarësuar në të. Sipas Hanit, kjo shoqatë do të ketë dy drejtime kryesore: drejtimi i parë do të jetë mbrojtja e biznesit nga interpretimi i njëanshëm i ligjeve që kanë të bëjnë me të dhe drejtimi i dytë do të jetë krijimi i një klime të favorshme për biznesin. “Bizneset e vogla dhe të mesme japin më tepër se 75% të prodhimit të brendshëm bruto (PBB) dhe kjo do të thotë se janë një shtyllë kryesore e ekonomisë, kështu që detyrimisht i takon një vend i nderuar në të gjitha tavolinat”,- thotë për “Biznesin” Hani.
Gjatë viteve të fundit shumë natyrshëm ka pasur vazhdimisht shkelje të të drejtave të bizneseve. Si biznesi, ashtu edhe shteti kanë qenë në formim dhe natyrisht në formim e sipër të dyja palët i kanë rënë në qafë njëri–tjetrit. Kështu, shpeshherë ligjet kanë qenë të njëanshme ose janë interpretuar si të tilla, shprehet ai. Në krijimin e kësaj shoqate thelbësore është që ndërmarrjet e vogla dhe të mesme të vetëpërfaqësohen kudo përballë problemeve ekonomike, pasi deri tani ato nuk kanë “folur” vetë, por janë përfaqësuar nëpërmjet të tjerëve.
Pse u krijua kjo shoqatë për SME-të?
Sipas Hanit, ky union u krijua për të mbrojtur të drejtat e SME-ve, pasi ato përbëjnë mbi 98 për qind të numrit të përgjithshëm të ndërmarrjeve në Shqipëri. Gjithashtu, ato japin pjesën më të madhe në prodhimin e përgjithshëm kombëtar, si dhe krijojnë 66% të vendeve të punës, duke u bërë kështu motori i zhvillimit ekonomik.

Objektivat prioritare të Unionit
Të ulë koston e të bërit biznes në Shqipëri nëpërmjet uljes së taksave për SME-të
Të krijojë një klimë më të favorshme për SME-të
Të thjeshtëzojë rregullat për kryerjen e bizneseve dhe të reduktojë burokracinë në administratë
Të përpiqet për kushte kreditimi më të mira
Të ndihmojë bizneset
Të mbështesë iniciativat që rritin konkurrencën dhe zhvillojnë një treg jo të monopolizuar.

a do te anetaresoheshe ti???

[gene]

pse?

pse jo?

a nuk eshte si nje lloj sindikate e pronareve?

[ganoid]

Nuk e di nese existon nje "ze" i biznesit ose prodhimit te vogel dhe te mesem?
Mgja edhe ne se existon une nuk ja kam degjuar ndonjehere zerin.

Persa i perket pyetjes nese do rregjirstrohesha apo jo, asaj nuk mund ti pergjigjet njeri pa marre informacionin e duhur qe ky union duhet ta paraqesi ne forme brozhure.
Mgja mire do ishte qe ndermarsit e vegjel dhe te mesem te kene nje ze te tyre pasi qeveria po i shqep ne taksa . Ata qe kane miq e paguajne lek nuk taksohen ndersa ata qe snjofin njeri, mbajne terre barren e taksave mbi kurriz.

Sa me shume behet korrupsion , aq me shume ngrin taksat shteti per te mbushur buxhetin, aq me shume vuan ndermarsi i drejte.
Kjo rrjedhe duhet te ndalohet sa me shpejt. Kete nuk mund ta beje nje ndermares i vetem apo nje grup prej 5 vetash por te gjithe bashke.

Pra une mendoj se nqs pjestaret e ketij unioni kane marre persiper te mbrojne ndermarsin e drejte atehere duhet perkrahur.
Kete duhet ta vlersojne vete ndermarsit.

[gene]

Koment
Biznesi i vogël jashtë vëmendjes së Ministrisë së Financave

Është e nevojshme që shteti të stimulojë, në bashkëpunim me organet apo shoqatat, jo rrënimin e biznesit të vogël, por rritjen e tij dhe përmirësimin e shërbimit ndaj konsumatorit pa nënvlerësuar kontrollin dhe aplikimin e ligjeve fiskale





Nga Niko Zherdi / Data (24-11-2003)


Që në muajin gusht 2003, Shoqata për Mbrojtjen e Tregëtarëve dhe Tregut, duke marrë në konsideratë kërkesat dhe vërejtjet që kanë tregtarët e shitjes me pakicë, me qëllim që t’u paraprijë analizave të shqyrtimit të ligjeve për vitin e ardhshëm, përpiloi vërejtjet të cilat ia përcolli Ministrisë së Financave, të Ekonomisë dhe Kuvendit që në datën 7 tetor 2003. Këshilli konsultativ i Ministrisë së Ekonomisë ngarkoi zv.ministren e Financave, e cila në bashkëpunim me Ministrinë e Pushtetit Lokal do të duhej të bënte vërejtjet e nevojshme për t’ia paraqitur Kuvendit. Por, për fat të keq, deri më tani jo vetëm që nuk është bërë asgjë, por edhe as nuk është marrë mundimi për të korrigjuar apo ndryshuar ato që janë të mundshme.
Konkretisht: Ligji 8978 datë 12.12.2002, për taksimin vendor për biznesin e vogël, shqyrton masën e aplikimit të një taksë lokale(d.m.th. bashkiake). Sipas ligjit, është përcaktuar një taksë e njëjtë si për bizneset e shitjes me shumicë dhe për ato të shitjes me pakicë në masën 60 mijë lekë (kjo për rrethet e kategorisë së parë). Përveç kësaj nuk ka parcelim të qytetit dhe as një ndarje në bazë të sipërfaqes që disponon çdo biznes. Ne si shoqatë kemi propozuar që të qartësohet për biznesmenin se çfarë duhet të paguajë dhe të caktohet tarifa jo më aforfe, por me bazë të sipërfaqes në metra katrorë. Dhe sipas parcelimit është e natyrshme që zonat në qendër të qytetit të kenë ndryshim me atë që është në periferi.
Sipas ligjit nr.8435 datë 28.12.2002, neni 2, nuk përcaktohet qartë mënyra e llogaritjes së sipërfaqes së zënë, ndërkohë që llogaritet në mënyrë arbitrare dhe sipërfaqja bosh e lëvizjes të klientit.
Gjithashtu, për sa i përket taksës së pastrimit dhe taksës së tabelës, është kërkuar që të përjashtohen tregtarët ambulantë që operojnë në tregje, pasi këto i paguajnë njëherë më parë pronarët që kanë afishuar dhe reklamuar mallrat e tyre. Po kështu nuk kemi qenë dakord lidhur me rritjen e shkallës së tatimit nga 2% në 4%. Gjithashtu, është kërkuar të ndryshohet Kodi i Procedurës Civile lidhur me qiratë, e cila duhet të përcaktohet jo më 1 dollar për metër katror, kur kemi të bëjmë me një mall që sjell të ardhura, por që kjo qira të merret në përqindje sipas të ardhurave të pronarit. Në këtë kontekst mendoj se kjo taksë duhet të dallojë nga ajo e banesave prej 10% e cila merret me qëllim jetese. Kështu, është e drejtë që të trajtohen edhe qiratë në të njëjtën mënyrë sikur të ishin mall, duke iu nënshtruar treguesve ekonomikë, tregut, ofertës dhe kërkesës. Dhe shteti në këtë drejtim duhet që me ndërhyrjet e tij të ekuilibrojë këta tregues, të cilët në mënyrë artificiale influencojnë direkt apo indirekt në rritjen e çmimeve të tregut.
Në bazë të këtyre fakteve kemi propozuar që shteti të përcaktojë tarifat, qëllimi i të cilave duhet të jetë ekuilibrimi i kërkesës me ofertën, duke përjashtuar që privatët të veprojnë jashtë ligjeve të shtetit. Për këtë parashtroj dy variante:
Varianti i parë është që për kategorinë e parë të qytetit të vendoset një taksë prej 20 dollarë për metër katrorë, e dyta 15 për metër katrorë dhe 14 dollarë për metër katrorë për të tretën. Gjithashtu, tarifa nuk duhet të jetë fikse, por edhe kjo e ndarë sipas kategorive, respektivisht: për tregun e kategorisë së parë 40 %, për të dytin 25 % dhe të tretin 15%. Gjithashtu, edhe kontratat duhet të hartohen saktësisht dhe në rast falsifikimi apo shmangie nga këto detyrime të aplikohen gjobat.
Varianti i dytë mund të jetë që qiramarrësi të paguajë 10% të xhiros në rastin e kategorisë së parë, 8% ai i kategorisë së dytë dhe 5% ai i kategorisë së tretë, mbi të cilën qiradhënësi duhet t’i shlyejë shtetit jo më 10% siç është sot, por më shunë në raport me kategoritë dhe kushtet që shënuam më lart.
Këto dhe disa shkaqe të tjera janë ato që influencojnë negativisht në rënimin e tregtarit apo biznesit të vogël, ankesa këto që shfaqen në treg dhe kanë për t’u shfaqur qartë që në fillim të tremujorit të parë 2004.
Prandaj mendojmë dhe është e nevojshme që shteti duhet të stimulojë, në bashkëpunim me organet apo shoqatat, jo rrënimin e biznesit të vogël, por rritjen e tij dhe përmirësimin e shërbimin ndaj konsumatorit pa nënvlerësuar kontrollin dhe aplikimin e ligjeve fiskale, në mënyrë që edhe tregu të ruhet edhe të kontrollohet informaliteti. Dhe mendoj se një nga këto masa është miratimi dhe zbatimi i propozimeve të shoqatës sonë.
Autori është presidenti i Shoqatës së Mbrojtjes së Tregtarëve dhe Tregut


www.biznesi.com.al