Vlora, qyteti ku niset lehtësisht biznesi

[Lioness]

(Nga Standard)

Të regjistrosh një biznes në Shqipëri, sigurisht që tani është më e lehtë. Por nisja e një aktiviteti biznesi nuk është krejt i lehtë në gjithë qytetet. Por në Vlorë, nëse vendos për të nisur një biznes, sigurisht që do ta kesh më të lehtë. Ky përfundim ka dalë nga raporti i Bankës Botërore, i cili është publikuar dje në Bitola (Manastir) në Maqedoni. Raporti i Bankës Botërore “Të bësh biznes në vendet e Evropës Juglindore 2008″ që përfshin 22 qytete të rajonit dhe përqendrohet në katër kritere: fillimi i një biznesi, marrja e licencës, regjistrimi i pasurisë dhe zbatimi i kontratave.

Brenda këtyre katër kritereve një ndër qytetet kryesore në Shqipëri, Vlora është renditur ndër të parat për sa i përket kriterit për lehtësitë e fillimit të një biznesi. Sipas raportit të BB-së, lehtësia e të bërit biznes ndryshon shumë midis qyteteve të Evropës Juglindore. Raporti “Të bësh biznes në Evropën Juglindore 2008 mbulon 22 qytete në shtatë ekonomi: Shqipëri, Bosnjë dhe Hercegovinë, Kroaci, Kosovë, Ish-Republikën Jugosllave të Maqedonisë, Mal të Zi dhe Serbi. Për herë të parë, “Të bësh biznes” kalon përtej qyteteve më të populluara për të krahasuar qytetet brenda së njëjtës ekonomi dhe qyteteve të rajonit.

Raporti thekson se përderisa disa ekonomi kanë arritur një progres të dukshëm në përmirësimin e klimës së biznesit në nivel kombëtar, Kroacia dhe Ish-Republika Jugosllave e Maqedonisë renditen ndër 10 vendet e para për sa u përket reformave në nivel global vitin e kaluar, ka ende hapësira ku mund të zgjerohen reformat në nivel lokal. “Ky raport paraqet të dhëna në nivel qyteti, të cilat mund të frymëzojnë reforma në nivel kombëtar dhe lokal dhe të fuqizojë reformat në rajon”, - shprehet Jane Armitage, drejtoreshë në Bankën Botërore.

Bitola (Manastiri) në Ish-Republikën Jugosllave të Maqedonisë është në krye të renditjes së qyteteve të vlerësuara nga ky raport. “Ne jemi të kënaqur që ky qytet është zbatuesi më i mirë”, - shprehet Patricia Rader, drejtoreshë e Misionit të Agjencisë Amerikane për Zhvillim Ndërkombëtar (USAID) në Shkup. “Reformat e biznesit kanë shumë rëndësi për zhvillimin. Investitorët kanë nevojë për siguri, qeverisje të mirë dhe ligj kontraktual dhe rajoni ka nevojë për investime, me qëllim stimulimin e zhvillimit dhe krijimin e vendeve të reja të punës”.

Raporti identifikon reforma, të cilat mund t’i bëjnë qytetet më konkurruese, duke zvogëluar shpenzimet dhe risqet e të bërit biznes. Këto përfshijnë konsolidimin e lëshimit të licencave të ndërtimit nëpërmjet ngritjes së “one-stop shop”, prezantimit të regjistrave elektronikë të bizneseve dhe përmirësimin e menaxhimit të rasteve në gjykata. Qytetet mund të mësojnë për zgjidhjen e reformave nga eksperienca e qyteteve të tjera në vendin e tyre ose në rajon. Nëse një qytet do të adoptonte të gjitha praktikat më të mira që zbatohen në Evropën Juglindore, ai do të renditej në vendin e nëntë midis 178 ekonomive të studiuara nga “Të bësh biznes”, i krahasueshëm me renditjen e Irlandës dhe Kanadasë. Kjo nënkupton adaptimin e praktikave më të mira nga Vlora, Shqipëri (për të filluar një biznes); Osijeku, Kroaci (për të marrë lejen e ndërtimit); Pljevlja, Mal i Zi (për të regjistruar pasurinë); dhe Zrenjanini, Serbi (për të zbatuar kontratat).

Raporti është realizuar nën drejtimin e FIAS, një shërbim këshillimor për klimën e investimeve të grupit të Bankës Botërore. Ky raport është realizuar me mbështetjen financiare te IFC-së (Korporata Financiare Ndërkombëtare), Agjencisë së Shteteve të Bashkuara për Zhvillim Ndërkombëtar, dhe Sekretariatit të Shtetit për Çështjet Ekonomike, Zvicër (SECO). Ajo bazohet në përpjekjet e më shumë se 224 juristëve, kontabilistëve, kontraktuesve, inxhinierëve, specialistëve të pasurisë dhe zyrtarëve të pushtetit qendror dhe lokal. Për më shumë informacion ose për të shkarkuar raportin, mund të vizitoni http://www.doingbusiness.org/SEE