Xheni shqiptarja qe u trafikua per prostitucion kur ishte 15 vjece

[Shijaksi-London]

SI NA SHOHIN TE HUAJT

SEKRETI I XHENIT


"The Guardian"
Sophie Arie

Me dëshirën për t'iu larguar një jete të dhunshme në familjen e saj në Shqipëri, Xheni, vetëm 15 vjeç, përfundoi e trafikuar në Angli. Por sapo arriti atje, u rrah, u torturua dhe u detyrua të prostituonte dhe kjo ishte vetëm nisja e një jete të mundimshme për të. Historia e saj, e njohur për policinë shqiptare, është publikuar dje nga e përditshmja britanike "The Guardian". "Gazeta shqiptare" boton sot reportazhin e gazetares Sophie Arie, që sjell historinë e jetës së vajzës shqiptare.


Xheni është një vajzë 20-vjeçare simpatike, me sy të qeshur, xhinse të ngushta dhe një pirsing në kërthizë, që e vë në dukje ashtu si padashur. Asaj i pëlqen të rrijë pab-eve deri natën vonë. Por kohët e fundit nuk e ka bërë shpesh këtë. Gjithë këtë kohë është mbyllur në shtëpi në qytetin e saj gjithë pluhur, të cilin një varg malesh të ashpër e ndajnë nga deti dhe qytetet e tjera të vendit. Ndërsa drita e pakët shkon e vjen në dhomën e ndjenjes së familjes së saj, ajo ndez cigaret njëra pas tjetrës dhe nis të flasë me një anglishte me theks të rëndë, para fytyrës së hequr të s'ëmës. "Nuk mund të dal. Jo, në asnjë mënyrë!", më thotë, ndërsa motrat e saj më servirin një gotë raki. "Shikimet e njerëzve më ndjekin gjithandej. Ata mund të thonë se kam qenë jashtë. Ata e dinë se çfarë kam bërë atje".

Që kur e sollën në Shqipëri, nga Anglia, në fillim të këtij viti, pa asnjë dokument me vete, Xheni, kështu dëshiron ajo ta thërrasin, ende nuk ka arritur t'ua thotë prindërve të saj se atje ishte e detyruar të prostituonte. "Ata do të vdisnin nga turpi, do më nxirrnin jashtë", më thotë, pasi është e sigurt se nëna dhe motrat e saj, që janë ulur aty afër nesh rreth tavolinës së bukës, nuk kuptojnë asnjë fjalë nga ato që ajo thotë.

Ata preferojnë të mendojnë ende se ajo ishte shumë me fat, pasi kishte siguruar një punë si kamariere, nga e cila paguhej 30 paundë në ditë në një kafene londineze, një punë që ajo vërtet e ka bërë pasi arriti t'u shpëtojë tutorëve të saj. Familja e saj është krenare për të. Shohin tek ajo atë farë suksesi që nuk e kishin parë te ndonjë pjesëtar tjetër i familjes.

Por Xheni është vetëm një nga qindra vajzat e traumatizuara shqiptare, që janë kthyer në vendin e tyre pa shpresë dhe pa progres ekonomik, pasi janë trafikuar dhe janë detyruar të prostituojnë nga qindra trafikantë në qytetet e Europës perëndimore. Më pas, duart e saj nisin të dridhen dhe sytë përloten, ndërsa më tregon larg syve të familjes, me një gotë verë të kuqe në dorë, se çfarë i ka ndodhur vërtet.

Në moshën 15-vjeçare, Xheni, një nga shtatë vajzat babai i të cilave ishte vrarë në një zënkë për çështje prone, ishte transferuar së bashku me t'ëmën në shtëpinë e motrës së madhe. Por burri i motrës, në gjendje të vështirë financiare, kishte nisur ta rrihte vajzën. Fqinjët ia shihnin shenjat e rrahjes dhe shpesh ato ishin aq të rënda sa ajo s'mund të shkonte në shkollë.

Një ditë, një fqinj i saj erdhi ta shpëtonte, duke thënë se kishte rënë në dashuri me të dhe donte ta ndihmonte. Ai pagoi një taksi me të cilën kaluan kufirin grek dhe i premtoi asaj se do të gjenin punë dhe do të jetonin mirë në Greqi.

"Ai më tha se do të martoheshim. Por kur shkuam në Greqi, nuk ma përsëriti këtë", thotë vajza. "Morëm dokumente identifikimi dhe u nisëm për në Itali. Ai paguante për gjithçka. Unë kisha rënë në dashuri". Në Itali, "i dashuri", emrin e të cilit ajo nuk pranon ta tregojë, pasi ka frikë, e çoi në një apartament me disa djem të tjerë në Torino. Ata nisën ta rrihnin adoleshenten derisa ajo pranoi të dilte në rrugë. Xheni qëndronte e mbylur në apartament, ku s'mund të përdorte telefonin dhe ata e kërcënonin se do ta vrisnin nëse ajo nuk do t'i dorëzonte të gjitha paratë. "U thosha se doja të kthehesha te nëna ime, por ata më nxirrnin në rrugë. Kisha frikë, nuk doja të jetoja më. Doja vetëm të vdisja", tregon vajza. Por biznesi nisi të binte dhe tutorët po u frikësoheshin kontrolleve të policisë, ndaj shkuam në Angli. Një ditë "i dashuri" i kishte thënë: "Këtu është më e lehtë, ka sauna dhe ambiente masazhi dhe klientët kanë më shumë para".

Më pas ata e rrasën Xhenin në një makinë që i çoi në një tjetër "apartament-burg" në Bruksel. Atje, "i dashuri" e rrahu aq shumë saqë policia i dëgjoi britmat e vajzës dhe e arrestoi tutorin. Xheni u strehua dhe u trajtua si azilkërkuese, por nuk deshi të kthehej në shtëpinë e saj, pasi kishte frikë se familja nuk do ta pranonte. Ajo u nis për në Angli, e fshehur në një kamion, së bashku me 15 vetë të tjerë. Ajo u arrestua nga policia sapo zbriti nga anija që i çoi në Angli. Aty u strehua dhe siguroi statusin e azilantes. Nisi punë në një kafene, por djemtë shqiptarë vazhdonin t'i bënin presion për t'iu kthyer punës së mëparshme. "Ata më çuan në një shtëpi të vjetër në Paddington. Aty erdhën edhe dy vajza të tjera. Visheshim me bluza të gjata të bardha, pak-a-shumë si uniformë infermieresh".


Për tre muaj Xheni punoi në atë shtëpi të vjetër publike në Paddington, e detyruar të bënte 16 orë seks në ditë. Klientët paguanin 30-50 paundë për gjysmë ore. Të gjithë përdornin prezervativë, thotë ajo, e bindur se kështu do t'u shpëtonte sëmundjeve. "Një ditë pata 26 klientë. Do të doja që ndonjëherë të bëja dashuri me dikë që dua vërtet, por kam frikë se nuk do ta bëj kurrë këtë, kur mendoj për gjithë ata burra", thotë Xheni.
Pas pune, tutorët e përdhunonin të gjithë me radhë, e shtrinin përtokë dhe thithnin kokainë mbi barkun e saj. Kur një nga vajzat e bordellos i refuzoi një ditë klientët, tutorët i thyen gishtat e dorës dhe i qethën kokën për ndëshkim.
"Nuk duhet të flisnim me askënd. Nuk kisha ku të shkoja. Nuk njihja njeri. S'i besoja dot askujt", thotë Xheni.

Xheni u ndalua disa herë, ndërsa e rrihnin në rrugë, por për të mbrojtur tutorët që e kishin kërcënuar me vdekje nuk tregonte se e kishin detyruar të prostituonte. Ajo u shpëtoi atyre, kur policia bëri një kontroll në shtëpinë publike dhe për pak kohë humbi në masën e madhe të të papunëve të kryeqytetit anglez. Ajo u riatdhesua një vit më pas. Sapo mbërriti në Shqipëri, ia tregoi të gjithë këtë policisë së qytetit ku jeton. Ajo nuk e di se ku është e çfarë bën "i dashuri" i saj, por jeton me frikën se ai mund ta gjejë një ditë. Me sa di ajo, tutorët e saj në Londër vazhdojnë të trafikojnë vajza të tjera.

"Ndihem fajtore. Kur isha 15 vjeç nuk mendova më gjatë. Kisha nevojë që dikush të kujdesej për mua. Duhej të kisha qëndruar këtu e të duroja kunatin që më rrihte. Nuk e dija se gjërat mund të shkonin edhe më keq". Xheni është një rast i zakonshëm i klasës më të varfër shqiptare, të vajzave të paarsimuara shqiptare, që bëhen objekt i trafikantëve e që furnizojnë kështu industrinë e seksit në Europë. Të ardhurat nga skllavet e seksit janë më të mëdha dhe rreziqet më të pakta se ato të trafikut të drogës apo armëve. Sipas Departamentit Amerikan të Shtetit, 700000 persona trafikohen apo shfrytëzohen çdo vit në botë. Dhe ndërsa Italia ka mbyllur dyert për gomonet dhe skafet shqiptare, trafikantët nga Shqipëria synojnë tashmë veriun e Europës, Anglinë dhe vendet skandinave.

"Rruga për në Itali është mbyllur. Qindra trafikantë shqiptarë i janë drejtuar tani Anglisë, Holandës, Suedisë dhe Norvegjisë", thotë Avni Jasharllari që drejton Qendrën Shqiptare të Antitrafikut. Sipas tij, 330 kriminelë shqiptarë zhvillojnë aktivitetin e tyre ne Angli.
Bashkëpunimi mes policisë shqiptare dhe angleze ka nisur, por jo çdo gjë është e lehtë. "Trafikantët shqiptarë po dominojnë zonën europiane të trafikimit të qenieve njerëzore", sipas Organizatës Botërore për Migracionin (IOM), pasi ata veprojnë në grupe të vogla me lidhje familjare dhe përdorin presione emocionale për të mos lejuar vajzat të ikin". Vajzat e trafikuara, kryesisht nga Europa Lindore, Afrika dhe Azia, tashmë gjenden nga Napoli deri në Notingam dhe 65 për qind e vajzave të trafikuara nga Shqipëria janë nën moshën 18 vjeç. Ministria e Brendshme britanike numëroi 1420 raste në vitin 1998, por ekspertët e kësaj fushe thonë se kjo është vetëm "maja e ajsbergut", pasi biznesi po zhvillohet dhe shumë vajza nuk deklarojnë asgjë për këtë, nga frika.

Shumë vende europiane as nuk kanë legjislacion për këtë formë moderne skllavërie. Në Britani, një projektligj për krime seksuale i është paraqitur parlamentit dhe duhet të miratohet para fundit të vitit, gjë që do të thotë se trafikantët do të përballen me dënim deri në 14 vjet burgim për trafikim të qenieve njerëzore.
Ndërkohë, Shqipëria vazhdon të përballet me fluksin e madh të vajzave që riatdhesohen pasi kanë prostituuar në trotuaret e Europës. Ato kthehen në vendin e tyre kur ka vende boshe në avione, por kur arrijnë në Shqipëri nuk i pret askush. Prostitucioni ëstë krimi më i rëndë për një grua në këtë vend musliman me sipërfaqe sa të Uellsit. 3.1 milionë banorët e këtij vendi duket se e njohin të gjithë njëri-tjetrin dhe në zonat rurale, që jetojnë me rregullat e lashta sociale, cënimi i nderit të familjes paguhet me gjak.

Kthimi i një prostitute në jetën normale është thuajse i pamundur. Në veri të vendit ka disa agjenci ndihme që i mësojnë nënat si të mbrojnë vajzat e tyre nga trafikmi, ndërsa të tjera agjenci ofrojnë strehë për vajzat e gratë e trafikuara. Shumë prej tyre zhvendosen në qytete të tjera, disa ikin në vende të tjera dhe të tjera bien sërish në duart e trafikantëve. "Opinioni publik është gjëja më e keqe për këto vajza", thotë Krenar Kasi, drejtuesi i një skuadre antitrafik në Berat, që ka numëruar në 18 muajt e fundit 200 raste të vajzave që kthehen nga tregu i seksit në Europë. Policia ka arritur të rrisë numrin e vajzave shqiptare që tregojnë emrat e trafikantëve të tyre, duke mbrojtur identitetin e vajzave dhe duke ia dorëzuar ato IOM-it apo shërbimeve të tjera të ndihmës. Rojet e policisë ruajnë strehëzat ku qëndrojnë këto vajza dhe ku sillen shpesh vërdallë edhe trafikantët që tentojnë të bëjnë presione ndaj tyre. "Një vajzë denoncoi tutorët e saj dhe na u desh ta shoqëronim në qytete të ndryshme me bodigardë në një makinë me xhama të errëta", thotë Spartak Guma, kreu i njësisë antitrafik në Tiranë. "Kur ajo u kthye në qytetin e saj, në Fier, te dera e shtëpisë ishte shkruar me gërma të mëdha 'Prostitutë'". Ndërsa trafikimi është një plagë shoqërore edhe në Moldavi, Rumani dhe Bullgari, në Shqipëri situata është edhe më e rëndë. Pas gjysmë shekulli izolim stalinist, kriminelët janë shtuar mjaft dhe policia nuk ka aspak kontroll në këtë pikë. Pothuajse gjysma e vajzave të trafikuara në rajon janë shqiptare, sipas një raporti të publikuar në Korrik nga IOM dhe ICMC. Që prej janarit të vitit 2000, numërohen 2241 raste trafikimi, por ekspertët thonë se shifra e vërtetë është shumë më e lartë se ajo zyrtare.

Xheni është rritur para kohe tani, pasi është mësuar të merret me të gjithë llojet e burrave, por ende ka mbetur ajo vajza pa fëmijëri, që ëndërron prapë të bëhet modele apo aktore telenovelash, kur të kthehet në Angli. "Anglia është shtëpia ime tani", thotë ajo, ndërsa i kalon ditët duke pritur për një vizë në dyert e konsullatës angleze në Tiranë. "Sapo u ktheva këtu e kuptova që u mërzita. Më mungon Anglia. Mezi më zë gjumi natën, e kur më zë, nis të ëndërroj për gjellë më të mira", thotë ajo.
Përktheu: Elira Çanga

[elisabet]

Ne raste te tilla nuk cfare te thuash , vetem psheretin thelle.
Eshte me te vertete per te ardhur keq, kur mendon qe ka njerez qe kenaqen duke i bere keq tjetrit.
Dhe kur mendon se sa vajza te tjera kane te njejtin fat...
Zoti ju dhente force dhe i ndihmofte ....

[Zala]

Sapo e lexova kete artikullin ne anglisht. Eshte me te vertete tragjike dhe per te qare. Por le te mos harrojme se ky nuk eshte nje rast i izoluar i Shqiperise.
Perdhunosje a masakra te njeriut behen kudo, akoma edhe ne vende ku nuk i pret te te ndodhin. Sepse disa njerez per nje arsye ose nje tjeter nuk kane ndryshim nga kafshet dhe veprojne vetem me instikte barbare.
Gjithsesi uroj qe nje dite te lexoj nje artikull ku te degjoj qe disa trafikant jane kapur dhe dhene nje denim te denje per ato qe bejne. Ne ka drejtesi ne kete bote, do te vij edhe ajo dite.

[MICH]

ca pislliku si nuk i lsho toka ata qe bojne ashtu.

[Ceceni Tirons]

Hehe e paska morr molli xhenin per gjell anglie. A se provoj anglin i her ajo?

[Shijaksi-London]

O Ceceno ironija jote berballe fatekeqesise se kesaj vajze nuk eshte gje tjeter pervec nje cinikerije te cilen nuk duhet ta shprehesh kur te tjeret kalojne fatekeqesi te tilla.