Skandali, aparatura e testit të drogave 6 muaj e prishur

[ALBA]

E FALEN ANGLEZET, KUSHTON 120 000 DOLLARE




--------------------------------------------------------------------------------

Ferdinand Dervishi

Drogë apo miell? Të dyja në formë pluhuri, por shumë larg njëra-tjetrës, kur bëhet fjalë për akuza që mund të konvertohen në dhjetëra vite burg. Të paktën me rastin e të mërkurës, kur gjatë përplasjes së një makine u identifikuan në brendësi të saj rreth 10 kilogramë pluhur të ngjashëm me drogën, policinë e ka gjetur belaja. Prej 48 orësh ende nuk kanë mundur të gjejnë nëse bëhet fjalë për drogë apo për miell. Ndërsa shoferi i makinës, i afërm i një oficeri të lartë të Gardës, mbikëqyret nga policë roje në Spitalin Ushtarak, askush nuk di të thotë nëse është i fajshëm apo i pafajshëm. Dhe gjithçka e tillë ndodh sepse në Laboratorin Kriminalistik prej gjashtë muajsh është prishur pajisja e testit të drogave. Një precedent i habitshëm, por edhe i rrezikshëm në vendin ku prania e trafikut të drogave të forta ka ndikuar në kushtëzimet e faktorit ndërkombëtar për integrimin në Bashkimin Europian.

Precedenti i pajisjes së prishur
Burime të policisë pohojnë se pajisja moderne e testimit të drogave është prishur para 6 muajësh si rezultat i një defekti elektrik. Ndërsa zgjidhja ka qenë e thjeshtë. Testet e drogave u janë kërkuar t'i bëjnë mjekët ligjorë të spitalit civil. Më tej njerëzit të cilët nuk punojnë me të njëjtën përgjegjësi ndaj detyrës sikurse ushtarakët, detyrohen të bëjnë me metoda të kohës së qepës duke përdorur epruveta, testet e drogave. Dhe nuk është çudi, që droga të diagnostikohet miell dhe anasjelltas. Por deri këtu askush nuk ka vërejtur ndonjë çudi dhe gjithçka shkon fjollë, sikur prej 6 muajsh trafikantët e narkotikëve të kenë bërë pakt me policinë që derisa të rregullohet pajisja, nuk do të merren më me punë të pista.

Përgjegjësia për prishjen
Sipas burimeve të Gazetës, pajisja e prishur i është falur Ministrisë së Rendit nga policia angleze dhe kushton rreth 120 mijë dollarë. Gjatë kohës që ishte në punë, pajisja, pas një ore nga aplikimi, përcaktonte me saktësi llojin e substancës, madje edhe përqindjet e përbërësve të saj. Por një ditë të bukur pajisja ishte prishur dhe krerët e Laboratorit Kriminalistik e kishin justifikuar dëmin me luhatjen e tensionit. Një justifikim i "ngrënë" nga të gjithë, pasi askush nuk është bërë merak për pasojat. Por duke logjikuar që Ministria e Rendit nuk e ka të thjeshtë të riblejë një pajisje të re prej 120 mijë dollarësh, dikush duhet të kujdesët që të riparohet dëmtimi i të vjetrës. Madje një justifikim mund të kishte qenë të paktën gjetja e fajtorit. Pasi në të kundërt, ka shumë të ngjarë që në mjekësinë ligjore përherë e më tepër në vend të drogës të gjendet miell, apo derivate të tij.


Flet vëllai i Çelës: Heroina e kapur është thjesht miell

TIRANE - "Jemi të goditur shumë nga ana morale". Kjo ka qenë shprehja e parë e vëllait të Albert Çelës, i cili u dyshua si transportues i gjashtë kilogramëve drogë me mjetin e tij. Riza Çela ka sqaruar për Gazetën se implikimi i vëllait të tij ka qenë thjesht një keqkuptim, ose një nxitim qoftë i policisë apo i mediave për të dhënë lajmin e bujshëm për kapjen e gjashtë kilogramëve drogë. "Lënda e dyshuar si drogë është thjesht miell për gatim që na kishte ardhur nga një fshatar nga Lushnja. Kjo punë për mua është e sqaruar, por ajo që na lëndoi më shumë është goditja morale që na është shkaktuar jo vetëm vëllait tim e familjes sonë, por edhe kunatit të tij oficer në Gardën e Republikës", thotë ai. ga.ja


gazeta Shqiptare