Zyrat e Shtetit ne krah te Bandave

[Brari]

gazeta shqiptare:

---------

ARREST POLICIT NË KORÇË, GRUP HETIMI NË TEPELENË

Pasaporta falso, pranga nënpunëses


----



Arta Dane, punonjësja e gjendjes civile të Valiasit në Tiranë dje është shoqëruar për në Komisariatin numër 2 të policisë së Tiranës, ku është marrë në pyetje lidhur me një certifikatë të firmosur prej saj me qëllim përdorimin si dokument për pajisje me pasaportë. Bëhet fjalë për certifikatën me anë të së cilës është pajisur me pasaportë në nëntor të vitit të kaluar Altin Arapi, njeriu i akuzuar për vrasjen e shoferit të kryeprokurorit Theodhori Sollaku. Në këtë mënyrë punonjësja e gjendjes civile e Valiasit bëhet personi i dytë i cili e pëson nga fakti i nxjerrjes së një pasaporte të falsifikuar një personi të shpallur në kërkim në kuadrin e hetimeve për vrasjen e shoferit të kreyprokurorit Theodhori Sollaku. Ndërkohë, burime të prokurorisë pohojnë nisjen e një grupi hetimor në drejtim të qytetit të Tepelenës dhe një tjetri në drejtim të Korçës. Sipas pohimeve zyrtare, grupi i nisur në drejtim të Tepelenës do të merret me falsifikimin që i ka bërë në këtë qytet Altin Arapi gjendjes së tij civile. Të cilën më pas të falsifikuar e ka regjistruar në Valias me emrin e rremë, Petrit Bejzade. Ndërsa grupi hetimor që do të niset në Korçë do të hetojë për pasaportat fals të dy vëllezërve Sadiku (Gazmend dhe Artan) të cilët shoqëronin në Belgjikë të akuzuarin Altin Arapi. Sipas burimeve të prokurorisë, edhe në Korçë është nën procedurat e arrestimit një polic i kufirit, i cili në kohën kur ka përmushur detyrën e inspektorit të rendit kishte firmosur për dy pasaportat e kapura në Belgjikë me emrat e rremë Elton Kola dhe Elton Ukaj. Në këtë mënyrë shkon në një shifër të konsiderueshme numri i personave të cilët janë duke provuar prangat dhe qelitë vetëm sepse dikur janë treguar të shkujdesur me qëllim apo pa qëllim.


Të fortët me pasaporta fals

Mbase pasaporta e parë fals e një personi që u bë mit në botën e krimit e administruar nga policia ishte ajo e Altin Dardhës, tmerrit të Beratit. Më 28 shkurt 1998 teksa ndiqej nga policia ai hodhi përtokë disa rroba të trasha të trupit ku u gjet një pasaportë me fotografinë e tij, por me gjeneralitete të tjera e lëshuar nga një komisariat policie në jug të Shqipërisë. Më pas ka patur një sërë lajmesh të tjera për të fortë të njohur të cilët kanë përdorur pasaporta fals. Kryesisht dokumente të tilla kanë përdorur ata që kanë tentuar të largohen jashtë vendit, apo kanë mundur të stabilizohen për kohë të caktuara në shtete të ndryshme të Europës. Kështu në vitin 2000 i famshëm është bërë largimi i kreut të bandës së Lushnjës Alfred Shkurti me vizë nga Lidhja e Shkrimtarëve dhe Artistëve në drejtim të Italisë me anë të një pasaporte fals me gjeneralitet Aldo Bare. Një zbulim i zhurmshëm që më pas do të bënte që Shkurtit t'i harrohej emri duke u përdorur pikërisht ai i rremi që kishte në pasaportë: Aldo Bare. Më tej një variant i përdorimit të pasaportave fals nga shqiptarët e famshëm të kronikave të zeza ka qenë ai i pajisjes me dokumente identifikimi kosovare. Me dokumente të tilla ishin pajisur Mandela (Eduard Peqini) i arrestuar nga policia franceze, Lulzim Balliu i arrestuar nën akuzën e grabitjes së Viktoria Bekham, Lulzim Caka i arrestuar në Foxhia të Italisë, apo Kastriot Jaupi i arrestuar në rrethinat e Madridit.


Gjykata lë në burg pa afat vëllezërit Sadiku

TIRANE - "E pranojmë akuzën". Kjo ka qenë dëshmia e vetme e dhënë nga vëllezërit Sadiku dje në Gjykatën e Tiranës gjatë vlerësimit të masës së sigurisë. Gazment e Artan Sadiku kanë marrë dje masën e sigurisë "burg pa afat", nën akuzën e "vënies në përdorim të dokumentave të flasifikuar". Dy vëllezërit u riatdhesuan të prangosur nga Belgjika, pasi policia e këtij vendi dyshonte të kishin lidhje me Altin Arapin, i dyshuari kryesor për vrasjen e shoferit të kryeprokuorit Theodhori Sollaku. Sikur të mos kishte qenë ky dyshim, ndoshta emri i vëllezërve Sadiku nuk do të përmendej në mediat e përditshme dhe riatdhesimi i tyre nuk do të pritej me kaq interes. Madje edhe ata vetë nuk e kanë kuptuar kur kanë mbërritur në aeroport se përse kishte aq shumë forca policore dhe fotoreporterë të shumtë. Por pavarësisht dyshimeve dhe hamendësive të ngritura, ndaj tyre u formulua brenda pak orësh vetëm akuza e "venies në përdorim të dokumentave të falsifikuara". Akuzë kjo e cila ka mjaftuar për të mbajtur në burg pa afat dy vëllezërit nga qyteti i Elbasanit. Burime pranë organit të akuzës kanë pohuar se vëllezërit Sadiku nuk kanë lidhje me Altin Arapin dhe se njohja e tyre ka qenë e rastësishme në një pub në Belgjikë. Të njëjtën gjë kanë deklaruar edhe vetë Gazment e Artan Sadiku, të cilët nuk kishin dijeni mbi të kaluarën e Arapit. Ndërkohë pavarësisht akuzës së ngritur, nuk përjashtohet mundësia e marrjes sërish në pyetje të Sadikajve për të sqaruar sërish njohjen e tyre me Altin Arapin.






..............


Fukarejte e mjere me dite e jave presin si qent duke ju lutur e lepire e duke i paguar sa frangu pulen nepunset e Shtetit per nje firma e nje vule a nje pasaport a certifikate.

Mirpo nuk ndodh keshtu me Bandat. Ato ne sekond bejne vrasjet, ne minut gjejne dokumentat fallco e brenda ores gjenden jashte Shtetit.

I kujt eshte my masakara Shtet?