I vihet zjarri shtepise se kryetarit te KZQV te Tiranes

[Albo]

Hakmarrje ndaj kryetarit të KZQV së Tiranës, i cili nuk pranoi manipulimin e rezultatit

Dhales denoncon falsifikimin. I djegin shtëpinë

Ngjela: "Kur kam kandiduar për postin e kryetarit të Bashkisë në Tiranë, në radhë të parë kam qenë i bindur se nuk kam qenë unë me kandidatin socialist përballë njëri-tjetrit, por unë përballë krimit të organizuar në Tiranë"

Kërcënimet e përsëritura dhe të shpeshtuara ndaj kryetarit të KZQV së Bashkisë së Tiranës kanë kulmuar dje me djegien e banesës së tij. Në shenjë hakmarrje ndaj denoncimit të vjedhjeve të votave në Tiranë dhe mospranimit të rezultatit të manipuluar të zgjedhjeve për kryeqytetin, persona ende të paidentifikuar kanë djegur qëllimisht banesën e Perikli Dhales, kryetarit të KZQV së Bashkisë së Tiranës, përfaqësues i PD, ndërsa ky ndodhej në Prokurorinë e rrethit të Tiranës, duke paraqitur kallzimin penal për falsifikimin e nënshkrimit të tij, nga anëtarët e KZQV, përfaqësues të partive politike në pushtet.

Dëshmitarët në vendin e ngjarjes dhe familjarët shprehen të sigurtë, se zjarrvënësi ka hyrë në oborrin e banesës dykatëshe nga mbrapa saj dhe kanë shfrytëzuar dritaren e vetme të hapur të aneksit, për vënien e zjarrit.

Megjithëse policia dhe Prokuroria ende nuk janë shprehur zyrtarisht për autorët dhe motivet, mungesa e energjisë elektrike në momentin e zjarrit përjashton mundësinë e një djegieje askidentale nga ndonjë shkëndi e mundshme elektrike, ndërsa helmimi i qenit përforcojnë idenë se vënia e zjarrit ishte parapërgatitur, si shenjë presioni e kërcënimi ndaj denoncuesit të falsifikimit të tabelave të rezultateve të zgjedhjeve në Tiranë.


Ngjela: Zjarrvënia, presion i hapur

Aktin e rëndë terrorist ndaj banesës së kryetarit të KZQV së Bashkisë së Tiranës, e ka denoncuar dje edhe kandidati i PD për kryetar të kësaj Bashkie.

Duke parë lidhjet e këtij akti me krimin e organizuar, Ngjela është shprehur se, "kur kam kandiduar për postin e kryetarit të Bashkisë në Tiranë, në radhë të parë kam qenë i bindur se nuk kam qenë unë me kandidatin socialist përballë njëri-tjetrit, por unë përballë krimit të organizuar në Tiranë, përkatësisht antishtet. Jam krejtësisht i bindur se antishteti është vënë përpara dhe se ka shenja që ky komision kërkon t'i hapë rrugë antishtetit. Kryetarit të KZQV së Bashkisë së Tiranës, Perikli Dhales, i është djegur shtëpia. Shenjat janë për presion të hapur dhe jam i bindur për këtë", u shpreh Ngjela.


Fqinjët dhanë ndihmesën e parë, zjarrfikësit shmangin tragjedinë

Rreth orës 12.00 të mesditës së djeshme, banorët e një ndërtese të vjetër dykatëshe, në Rrugën "4 Dëshmorët", diku përballë kopshtit të fëmijëve Nr. 35 në Tiranë, kanë qenë të parët që kanë vërejtur flakët dhe tymin e zjarrit të dalin nga dritaret e banesës së Perikli Dhales, në katin e parë të kësaj ndërtese. Menjëherë pas kësaj, një e moshuar ka dalë në verandën e katit të dytë dhe duke thirrur për ndihmë nga fqinjët, ka dhënë alarmin për zjarrin që kishte rënë.

Një punëtor i gjendur rastësisht duke punuar shumë pranë vendit ku kishte rënë zjarri dhe një fqinj i Dhales, kanë arritur në banesën që digjej dhe pasi kanë shqyer derën e jashtme të saj, me ndihmën e mjeteve rrethanore, të ndihmuar nga fqinjët e tjerë, janë përpjekur të shuajnë flakët e zjarrit të rënë në aneksin e banesës, duke hedhur ujë me kova.

Disa minuta më vonë, në afërsi të banesës që digjej, mbërrijnë edhe dy automjete zjarrfikëse dhe menjëherë pompierët i futen punës për shuarjen e zjarrit. Megjithë punën e mirë të pompierëve, nuk u arrit të shpëtoheshin orenditë dhe mobiliet e aneksit, ndërsa u shmang një dëm i konsiderueshëm në kuzhinën e banesës.


Zjarrvënësit helmuan më parë qenin "Boxer"

Në kohën që pompierët luftonin me zjarrin, lehja e dy qenve të vegjël, të strukur diku shumë pranë banesës, iu kujtoi të zotëve të shtëpisë se mungonte një tjetër qen, shumë më i madh, i racës "Boxer". Thirrjet "Krimos"…, "Krimos" dhe mosreagimet e mundshme të qenit, u pasuan me dyshimet se ai mund të ishte helmuar, me qëllim për të bërë më të lehtë planin e mundshëm për vënien e zjarrit qëllimisht në banesën e kryetarit të KZQV së Bashkisë së Tiranës.

Dyshimet për helmimin e qenit dhe për një zjarrvënie të qëllimshme u bënë realitet, kur rreth dy orë më pas, disa metra mbrapa ndërtesës dy katëshe, u gjend duke dhënë shpirt qeni i racës "Boxer" me emrin Krimos.

Përpjekjet për t'i ofruar ndihmën e parë kanë qenë pa rezultat, sepse disa minuta më vonë ai ngordhi në një klinikë veterinare. Sipas të afërmve të Dhales, mësohet se qeni u mor më vonë nga ana e ekspertëve të policisë, për një ekspertizë ndaj tij, për identifikimin e shkakut të ngordhjes.

Humbja e qenit ishte po aq e dhimbshme për familjarët e Dhalesit, sa edhe akti hakmarrës ndaj banesës së tyre. Sipas tyre, por edhe fqinjëve, qeni që e thërrisnin Krimos ishte jo vetëm i madh, por edhe besnik, dhe nuk lejonte askënd të huaj t'i afrohej godinës dy katëshe. Po sipas tyre, ky ka qenë edhe shkaku i marrjes së masave dhe i realizimit fillimisht të eleminimit të qenit.


Ekspertët: Zjarri jo nga shkëndia elektrike

Pyetjet e tyre të para, si dhe interesimi për "zbulimin" e ndonjë shkëndie elektrike, si shkaktarin e zjarrit, janë kundërshtuar nga fqinjët, të cilët i kanë bërë të ditur policisë se diçka para orës 11.00, më se një orë para rënies së zjarrit, në lagjet e banesat e tyre ishte ndërprerë energjia elektrike.

Dëshmitë e fqinjëve janë përforcuar edhe nga ekspertët. Eksperti i Institutit të Projektimit të Instalimeve Elektrike (IPIE), Ndue Përdoçi, në procesverbalin e mbajtur në dy kopje rreth shkaqeve të zjarrit ka fiksuar në shënimet e tij, se instalimet elektrike kanë qenë të rreth 7 viteve më parë dhe kabllot elektrike u gjendën të dëmtuara nga zjarri dhe jo si vatër e shkak i rënies së tij.

Një kopje e këtij procesverbali u nënshkrua edhe nga kryefamiljari Perikli Dhales.

Familjarët vetë kanë mohuar gjithashtu që të përdorin mjete të tjera ngrohëse e gatimi me lëndë djegëse, duke përjashtuar edhe këtë hamendësi për një zjarr të mundshëm aksidental.



Policia, ende asnjë motiv e autor për zjarrvënien

Përpjekjet e fqinjëve për t'u lidhur me policinë e njoftuar atë, megjithëse kanë vazhduar për disa minuta pas konstatimit të zjarrit, kanë qenë pa rezultat. Në numrin e telefonit të emergjencës 129, të sallës operative dhe në numrat e telefonit të Komisariatit të Policisë Nr. 3, nuk përgjigjej askush. Një situatë e tillë ka bërë që vetëm pas rreth 45 minutash, të marrin njoftim e të mbërrijnë uniformat blu të policisë si edhe agjentët e krimeve. Fillimisht, ata kanë bërë kujdes të largonin nga vendi i ngjarjes banorët e dashamirësit e shumtë, ndërsa kanë filluar ekspertimin e vendit të ngjarjes.

Për rreth pesë orë pas mbërritjes së tyre, agjentët e krimeve nuk kanë mundur të gjejnë shkakun e mundshëm të rënies së zjarrit, duke mos arritur të vënë gishtin as mbi autorët e mundshëm të kësaj zjarrvënie.

Në këto rrethana, ata u larguan duke marrë me vete provat e pretenduara, ndërsa fotoreporterët dhe kameramanët vetëm atëherë kanë qenë më të lirshëm për të fokusuar djegien dhe dëmet e zjarrit të vënë në banesën e Perikli Dhales, kryetarit të KZQV së Bashkisë së Tiranës, përfaqësues i opozitës.



Zjarri, dëme të konsiderueshme

Pas largimit të zjarrfikëseve, ka qenë jo e lehtë që të hyje në banesën e Perikli Dhales. Tymi i dendur si edhe afshi i nxehtë, e vështirësonin hyrjen në banesë dhe bërjen e një bilanci të mundshëm të dëmit.

Dyert e hapura të dhomave kishin "ndihmuar" tymin që të depërtonte në të gjitha dhomat, duke nxirë muret e tyre, ndërsa era e tymit ndihej kudo edhe nëpër rrobat e orenditë e padjegura.

Depërtimi më në brendësi të banesës të çonte në aneksin e saj, ku edhe ishte vënë zjarri. Orenditë, pajisjet e sendet e tjera, ishin shndërruar në masa të zeza të shkrumbuara. Asgjë prej tyre nuk kishte shpëtuar.

Ndërkohë flakët e zjarrit që kishin filluar të preknin edhe kuzhinën, kishin shkaktuar dëme disi më të lehta mbi bufenë e kolltuqet që gjendeshin aty.

Për fatin e mirë, në momentin e rënies së zjarrit, në banesë nuk ndodhej asnjë pjesëtar i familjes Dhales.

Artur BEGA





Një muaj, dhjetra kërcënime ndaj komisionerëve të opozitës në KZQV e Bashkisë së Tiranës[/u]

Para zjarrvënies, kërcënime me jetë ndaj Dhales[/b]

Prej rreth një muaji, kërcënimet kanë qenë të përsëritura në adresë të Dhales e komisionerëve të tjerë të KZQV së Bashkisë së Tiranës, përfaqësues të opozitës.

Nëpërmjet telefonit, komisionerët e opozitës janë kërcënuar rregullisht me kërcënime të tipit, "do t'ju hedhim në erë me gjithë shtëpi", do t'ju zhdukim fëmijët", etj.

Dy netë më parë, pikërisht rreth orës 22.00 të së shtunës, ndërsa kishte përfunduar me debate e denoncime për vjedhjen e votave mbledhja e KQZ, vetëm pak metra larg banesës së tij, Perikli Dhales kërcënohet nga disa persona, të cilët udhëtonin me një autoveturë. Duke iu afruar pranë, ata kanë sharë, fyer e kërcënuar kryetarin e KZQV, i cili vetëm disa minuta më parë kishte denoncuar falsifikimin e firmës së tij në tabelat e rezultateve të zgjedhjeve në Tiranë.

Denoncime për kërcënime të njëjta, për mbrëmjen e së shtunës, janë bërë edhe nga komisionerë të tjerë të opozitës, anëtarë të KZQV së Bashkisë së Tiranës.

Mbrëmjen e së shtunës, gjatë mbledhjes së KQZ, Perikli Dhales, kryetari i KZQV, deklaroi se numri i procesverbaleve në të cilat është falsifikuar firma e tij, është më shumë se 120 ose në rreth 40 përqind e të gjithë dokumentacionit për marrjen në dorëzim të gjendjeve fizike të kutive është falsifikuar firma e kryetarit, duke lënë nëpër dokumenta vetëm firmat e nënkryetarit Aleks Zyba dhe sekretarit Azis Meta, të dy komisionerë socialistë. Sipas Dhales, falsifikimi i firmës së tij si kryetar i KZQV ishte kryer kryesisht në kutitë e ardhura në bllok në KZQV dhe përkatësisht në dokumentacionin e minibashkive 1, 4, 10, dhe 11. Formulari i mësipërm i quajtur A 28 nuk është firmosur nga të gjithë komisionerët e KZQV-së, duke qenë i falsifikuar.

A. B.


Perikli Dhales e cilëson djegien e banesës së tij të qëllimshme dhe të parapërgatitur

Zjarrvënësit, ata që më kërcënojnë për zgjedhjet

- Ku ndodheshit në momentin e rënies së zjarrit dhe si e mësuat djegien e banesës tuaj?

Sikurse ishte paralajmëruar një ditë më parë, së bashku me Spartak Ngjelën dhe komisionerët e tjerë të opozitës kishim shkuar në Prokurorinë e rrethit të Tiranës, për të bërë kallzimin penal për falsifikimin e firmës time në tabelat e rezultateve nga komisionerët e PS e të PSD. Ndërsa unë ndodhesha në zyrën e prokurorit, duke dhënë shpjegimet përkatëse, një mik, nëpërmjet telefonit më njofton për rënien e zjarrit në banesën time. Duke i kërkuar ndjesë prokurorit, urgjent u nisa për në shtëpi. Kam qenë i pari nga familja që kam mbërritur në shtëpi, pasi bashkëshortja dhe fëmijët kishin dalë që herët në mëngjes, për punëra të ndryshme.

- Në raste të tjera të mëparshme, në djegie banesash, ekspertët kanë hamendësuar për djegie nga shkëndia elektrike. Sa mundësi ka që edhe banesa juaj të jetë provokuar nga një shkak i tillë?

Absolutisht, banesa ime është djegur qëllimisht. Nuk e them këtë nga pozita ime si kryetar i KZQV së Tiranës, por nga rrethanat. Së pari, krahas dëmeve materiale, si një mesazh kërcënues ndaj meje, zjarrvënësit kanë bërë kujdes që të helmojnë qenin tim, i cili nuk lejonte askënd të huaj t'i afrohej shtëpisë. Jo vetëm kaq, por zjarrvënësit kanë shfrytëzuar për realizimin e veprës së tyre kriminale dritaren e aneksit, e vetmja që ishte lënë hapur nga ana jonë. Dhe më kryesorja, që mohon kategorikisht rënien e zjarrit nga ndonjë shkëndijë elektrike, është se prej më se një ore, në lagjen tonë e për pasojë edhe në banesën time, ishin ndërprerë dritat. Ndërsa unë nuk kam përdorur asnjëherë gazin për ngrohje e gatim, që të mund të dyshohet si shkak i rënies së zjarrit.

- Djegia e banesës tuaj ndodhi pas denoncimit publik, por edhe në Prokurorinë e rrethit të Tiranës, të falsifikimit të firmës tuaj në KZQV. A shihni ju ndonjë lidhje të mundshme dhe a keni pasur më parë presione e kërcënime të tjera?

Djegia e banesës sime është e qëllimshme, e përsëris këtë dhe të vetme lidhje e shkak që unë shoh, e lidh me denoncimin e falsifikimit të firmës time. Djegia e banesës time, shënoi kulmin, pasi edhe më parë, që prej një muaji, kërcënimet kanë qenë të përsëritura, por jo në këtë formë, por nëpërmjet telefonit apo fjalëve fyese e kërcënuese të hedhura në rrugë. Këto kërcënime kanë qenë të tipit "do t'ju hedhim në erë shtëpinë", "do t'ju vrasim fëmijët", "do t'ju rrëmbejmë fëmijët", etj. Kërcënimin më të fundit e mora nëpërmjet celularit në orët e vona të mbrëmjes së dielë. Asnjëherë nuk i kam vlerësuar këto kërcënime, ndaj edhe nuk i kam denoncuar.

- Sipas jush, kërcënuesit e ditëve të kaluara a janë të njëjtët që i kanë vënë zjarrin banesës tuaj?

Padyshim, janë të njëjtët inskenues e realizues të kërcënimeve ndaj meje e familjes time në ditët e mëparshme, ata që arritën deri në vënien e zjarrit banesës time. Nuk kam as më të voglin dyshim për këtë.



PD denoncon djegjen e shtepisë së Dhalesit si hakmarrje politike të atyre që shkatërruan procesin zgjedhor

Topalli : Djegia e shtëpisë, e paramenduar

"Koncidenca me ditën e sotshme, kur zoti Dhales si kryetar i KZQV ishte në prokorori për të bërë kallzimin kundër fallsifikit të firmave të tij, më bënë të them se nuk është e paqellimshme djegia e shtepisë së Dhalesit".

Partia Demokratike ka reaguar menjeherë pas djegjes së shtepisë së Perikli Dhalsit, duke këkruar nga drejtësia që hetojë në pistën e hakmmarjes politike pas së cilës qendrojnë ata që fallsifkuan proçesin zgjedhor në Tiranë.

Nënkryetarja e Partisë Demokratike dhe Kuvendit të Shqipërisë, Jozefina Topalli tha dje nga vendi i ngjarjes se " koncidenca me ditën e sotshme kur zoti Dhales si kryetar i KZQV ishte në prokorori për të bërë kallzimin kundër fallsifikit të firmave të tij, kjo më bënë të them se nuk është e paqellimshme djegia e shtepisë së Dhalesit. "

Topalli u tha gazetarëve se " zjarri në shtepinë e Dhalesit mund të jetë vënë në mënyrë të qellimshme, pasi në momentin e zjarrit në këtë lagje nuk ka patur energji elektrike. "Në vazhdim të komentit të saj nënkryetarja e PD-së, u shpreh se " kishte dyshime të forta, se mund te jetë edhe e qellimshme, qoftë edhe për të gjitha faktet dhe shpjegimet që jep i zoti i shtepisë që është edhe kryetar i KZQV-së së Tiranës. "

Sic tha Topali " ajo që të habitë është fakti se në monetin e renjës së zjarrit nuk ka patur energji elektrike në të gjtihë lagjen, ndërkohë që as ndonjë stufë gazi apo ndonjë mjeti tjetër që mund të kishte shpërthyer zjarrin nuk ka patur në atë dhomë ku ka rënë zjarri. " Një tjetër e dhënë është se familjarët nuk kanë qënë në atë moment brenda, komentoi nënkryetarja e PD-së. " Unë dua që tia lëmë drejtësisë zbardhejn e cehstjes, por gjithsesi brenda zemres dhe shpirtit tim kam dyshime të forta ", tha në fund nënkryetrja e PD-së.

M. B.


Paloka: Akt terrorist ndaj kryetarit të KZQV

"Duke marrë parasysh rrethanat dhe faktet Partia Demokratike konsideron aktin ndaj Dhalesit si një akt të kryer prej të njëjtëve terroistë të cilët shkatrruan edhe procesin zgjedhor në Tiranë. "

Vendosmeria e kryetarit të KZQV të Tiranës Perikli Dhales për të denocuar fallsifikimin e proçesit zgjedhor për bashkinë e Tiranës ka patur si çmim djegien e shtepisë së tij e cila gjendet vetëm pak metra larg qendres së qytetit. Pas ngjarjes së rëndë e cila synonte hapur mbylljen e gojës së Dhalesit,pas një denocimi që ai kishte bërë në prokororinë e Tiranës, ka reaguar edhe Partia Demokratike, përfshirë nënkryetaren e PD-së Jozefina Topalli, zëdhënsi i kësja partie Edi Paloka si dhe kryetari Degës së PD-së, Tiranë Vili Minarolli.

Edi Paloka tha dje gjatë një konference shtypi se shkatrrimi i procesit zgjedhor në Tiranë është tanimë një fakt i pakundërshtueshëm. Sic tha ai "të shtunën në KQZ përfaqësuesit e Edvin Ramës nëpërmjet sekretarit të KZQV dhe anëtarit të KZQV Pirro Sino, dorëzuan dokumentacionin e tyre nëpërmjet të cilit pretendojnë rregullsinë e zgjedhjeve në Tiranë. Ky dokumentacion u muar në dorëzim nga KQZ në kundërshtim të plotë me procedurat megjithëse vec të tjerave ai rezultonte dhe i fallsifikuar." Sic jeni në dijeni Kryetari i KZQV së Tiranës Perikli Dhales ka konstatuar se 128 raste prej rezultateve të paraqitura prej përfaqësuesve të Ramës mbajnë edhe firmën e tij të fallsifikuar.

Duke komenetuar shkaqet e vënjes së zjarrit në Shtepinë kryetarit të të KZQV të Tiranës, Paloka u shpreh se akti ndodhi " pikërisht sot kur zoti Dhalës ishte në prokorori për të bërë denoncimin lidhur me këtë fallsifikim të rendë. "

" Duke marrë parasysh rrethanat dhe faktet Partia Demokratike konsideron aktin ndaj Dhalesit si një akt të kryer prej të njëjtëve terroistë të cilët shkatrruan edhe procesin zgjedhor në Tiranë. "

Duke folur në emër të PD,Paloka deklaroi se " ne kërkojmë nga prokororia ti shkojë deri në fund kësaj piste për të vendosur përpara drejtësisë autorët e këtij akti. "

Njëkohësisht,vijoi zëdhënësi i selis ëblu, " PD deklaron se asnjë akt terrosit nuk mund të ndryshojë me faktin që proçesi zgjedhor në Tiranë ka rënë përfundimisht sidomos pas evidentimit të fallsifikimit në 128 rezultatet e paraqituranga përfaqësuesit e Ramës të cilët janë tashmë në duart e prokororisë. "

Vetë zoti Dhales tha për gazetarët se kishte patur kërcënime të herëpashershme, nga njerëz të panjohur të tilla si " do t'u hedhim shtepinë në erë ", " do tu varsim femijët, do tua rrembejnë " etj. Por ndërsa Dhalesi i mësuar më të tilla kërcenime, i ka injoruar ato, fakti që ai kishte denoncuar në prokorori fallsifikatorët ka bër që edhe hakmmarja të jetë e shpejtë.

Akti ndaj familjes Dhales shënon një akt deshprimi të atyre që fallsifikuan rezultatin e zgjedhjeve në Tiranë, ndërsa u gjenden para një korrektese ligjore dhe njerëzore të tij dhe të anëtarëve të tjerë të KZQV-së, anëtarë të opozitës.

Pas rikthimit të ish-komunistëve në pushtet në mars të vitit 1997, Perikli Dhalës dhe bashkëshortja e tij Donika Dhales janë bërë preh e një përsekutimi të vertetë politik nga organet e policisë dhe të SHIK-ut, ku sic dihet paten penetruar shumë militantë të PS-së dhe ish anëtarë të komiteteve rebele.

Tre vjet më parë, pas kundërshtimit që PD i pati bërë fallsifikimit të procesit zgjedhor të 1 teteorit në Tiranë, sidomos të lënjes jashtë listave të rreth 80 mijë zgjedhësve të identifikuar si mbeshtetës të PD-së, famijla Dhales i qe bashkuar kësaj proteste duke lujatur një rol të rëndësishëm.

Për këtë shkak Dhales dhe bashkëshortja e tij qenë kërcënuar, keqtrajtuar dhe në arrestuar nga policia politike e Tiranës, për ti liruar vetëm pas protetsve të fuqishme të popullit të kryeqytetit.

Akti i djegjes së shtepisë së zotit Dhales shënon një shkallëzim të dhunës dhe terrorit ndaj Kryetarit të KZQV të Tiranës, akt i cili me siguri nuk do të stepë këtë demokrat të vendosur dhe qytetar shembullor për të çuar deri në fund denocimin e fallsifikimit të proçesit zgjedhor në Tiranë.

M. BUÇPAPAJ

[Brari]

Familja Dhales braktis shtëpinë e djegur

Alida Beqiri

Një rrugicë plot baltë të çon në shtëpinë e djegur të Perikli Dhalesit, kryetarit të KZQV-së së Tiranës. Dera kryesore prej druri është e kyçur me dry, ndërsa ajo prapa në kopsht, qëndron ende e hapur. Gjuhët e flakës ka lënë gjurmë deri jashtë në korridorin kryesor që bashkon shtëpinë e Dhalesit me ato të fqinjëve. Sapo dëgjon hapa, një plakë rreth të 60-ve, e veshur në të zeza hap derën, si për të treguar se këtë herë është treguar vigjilente, dhe na thotë se familja Dhales nuk është në shtëpi. "Që dje në mbrëmje kanë ikur tek të afërmit e tyre, pasi shtëpia është e pabanueshme", thotë ajo duke na përshkruar ngjarjen e së hënës paradite. "Ishte ora 11 e paradites, kur ndjemë erën e tymit dhe pamë flakët të dilnin nga dera kryesore. Çuditërisht nuk dëgjuam asnjë zhurmë, madje as qenin që zakonisht leh sapo dëgjon hapa. Lajmëruam zjarrfikësin, policinë dhe më pas Peron. Kaq mundëm të bënim", thotë me keqardhje dëshmitarja e ngjarjes.

Pasi kontaktuam në telefonon me zotin Perikli Dhales, ai bashkë me të birin Frenklin na shoqërojnë në shtëpinë e tyre, ose më mirë, atë që ka mbetur nga shtëpia. Na tregojnë se nuk kanë mundur të shpëtojnë asgjë, u kanë mbetur vetëm rrobat e trupit. Sapo hapet dera, ndihet era e tymit dhe e blozës, ndërkohë që brenda nuk shihet asgjë. Dëmet janë të pallogaritshme, nuk mund të riparohen. Pothuaj gjithë orenditë e shtëpisë janë djegur, pjesa tjetër ka dalë jashtë përdorimit. Të zotët nuk e dinë se çfarë mungon në shtëpi. "Në shtëpi nuk kam pasur parà, por kam pasur dokumenta. Nuk kemi bërë inventar, sepse është e pamundur, një pjesë është djegur, një pjesë është shkrumbuar, tjetra është kthyer në blozë", thotë Dhales duke u munduar të fshehë lotët. Është e pamundur të hysh në shtëpi, sepse është errësirë e plotë. Megjithëse është ende ditë mund të shquash vetëm suvatë e rëna të mureve.

Tani familja Dhales, e mbetur pa shtëpi, jeton tek të afërmit. Tani për tani nuk dinë ç'të bëjmë. Askush nuk u ka ofruar asnjë ndihmë. "Do t'i përballoj vetë, mesa të mundem. Megjithatë tani për tani nuk di çfarë të bëj. Shtëpia do kohë të restaurohet. Por s'kemi ku të shkojmë, veçse atje. Madje edhe këtu ishim me qira. I zoti i shtëpisë ka të drejtë të më kërkojë të paguaj dëmin", vazhdon Dhales.



Ekspertiza: Shtëpisë i është vënë zjarri. Qeni është helmuar

Pasi ka kaluar tronditjen e djeshme e është qetësuar plotësisht, Dhales deklaron i bindur se zjarri ishte i qëllimshëm. "Motivi është hakmarrja. Edhe ekspertiza konstatoi se shkaku i zjarrit nuk ishte shkëndija elektrike, por që bëhet fjalë për zjarrvënie. Nuk ka mundësi që shkaku të jetë shkëndija, sepse në vatrën e zjarrit nuk ka pasur as pajisje elektrike për të gatuar, ne gatuajmë në një kuzhinë përjashta. Atje e përdorim vetëm për të ngrënë. Por edhe sikur të kishte mjete elektroshtëpiake, nuk ka pasur drita", thotë Dhales.

Por më shumë se djegia e shtëpisë, familjen Dhales e ka trishtuar humbja e qenit të tyre 2-vjeçar të racës boxer, që e kanë varrosur dje si të ishte njeri. Frenkli tregon momentin e parë që e kanë çuar tek eksperti veterinar. "Sapo e pa qenin, doktori më pyeti nëse kishte qenë i lidhur. Jo, - i thashë unë, - Krimosin nuk e lidhnim asnjëherë. Ai tha se përjashtohet mundësia që qeni të jetë asfiksuar nga flakët, pasi kjo ndodh vetëm kur është i lidhur," - thotë Frenkli, djali më i vogël i familjes Dhales. "Në pamje të parë, nga jargët, nga goja, nga sytë, qeni është helmuar", këto ishin fjalët e veterinerit.

Nuk u gjet se me çfarë ishte helmuar Krimosi, pasi familjarët nuk pranuan të hapej e t'i bëhej ekspertiza "pjesëtarit të familjes" siç e quan Frenkli. "Organet e ekspertizës na thanë të merrnim përgjigjen një ditë më pas, por ne nuk shkuam pasi është diçka e parëndësishme. Është mëse e qartë që qeni është helmuar dhe s'kam pse të shkoj të marr një ekpertizë të kotë", thotë Dhales.



Lidhja me vajtjen në prokurori

Perikli Dhales zjarrvënien e lidh me vajtjen në prokurori. "Unë shkova në prokurori për të bërë denoncimin e falsifikimit të firmës sime nga Pirro Simo. Në kohën që kam qenë në prokurori duke kryer formalitetet, më marrin në telefon e më thonë që po të digjet shtëpia. Edhe gruaja ime në atë kohë ishte thirrur në KQZ për ca probleme të KZQV-së përkatëse, pasi ishte kryetare e komisionit të një njësie në Tiranë. Në shtëpi nuk ka pasur asnjë njeri. Energji elektrike nuk ka pasur, sepse ndërprerja aty është e përditshme. Pas orës 10 të mëngjesit e deri në 3 pasdite në gjithë atë zonë nuk ka energji. Këtë e dëshmojnë të gjithë fqinjët. Denoncim nuk kam ndërmend të bëj, sepse është e kotë kur nuk ekziston shteti dhe organet e drejtësisë. Këtu po ndodhin vrasje në mes të Tiranës dhe nuk po gjendet autori. Nuk kam besim dhe nuk kam ndërmend të shkoj", thotë Dhales.



Kërcënimi i së shtunës mbrëma

Të Shtunën rreth orës 11 të natës, kur po dilte nga KQZ-ja, Dhales po kthehej në shtëpi, pasi kishte deklaruar në Komisionin Qendror të Zgjedhjeve, falsifikimin e firmës së tij në procesverbale. Gjithashtu kishte deklaruar se do të bënte denoncimin ditën e hënë. "Kur u afrova pranë shtëpisë, ula shpejtësinë të marr kthesën, sepse është pak e vështirë të hyhet në rrugicë. Në atë moment më parakaloi një makinë, uli shpejtësinë dhe aty nisën të më kërcënojnë. Me fjalë fyese rrugaçësh, më kërcënuan se do të më zhdukin. Unë nuk u fola, por nuk munda t'u merrja targën, sepse ishte mjaft errësirë. Isha me fat që s'më qëlluan me pistoletë. Dritat e mia binin në drejtim të kundërt, e nuk mundja t'i shihja," shpjegon ai.

"Denoncimin për falsifikim të firmës e kam bërë tashmë në prokurori dhe do t'i shkoj deri në fund, pa marrë parasysh pasojat", përfundon Dhales.





Nga Shtypi

[Albo]

Shtëpia e djegur e Dhalesit dhe vila e Celibashit

Nga Mero Baze

Kryekomisioneri i zgjedhjeve në Tiranë, Perikli Dhales, po kalon natën e tretë i strehuar te miqtë e tij, ndërkohë që hetimet për autorët e atentatit ndaj familjes së tij, po arshivohen sikur të mos kishte ndodhur asgjë. Nën heshtjen e porositur, po mbillet një rrezik i madh për secilin që guxon të merret me zgjedhjet në Shqipëri, duke inkurajuar manipuluesit e zgjedhjeve të pasurohen, dhe kryekomisionerët e opozitës të poshtërohen. Le t'i shohim të dy rastet. Rasti i parë është ai i heshtjes ndaj zjarrit mbi shtëpinë e kryekomisionerit të Tiranës, si një liçensë për krime të ngjashme ndaj gjithë komisionerëve që bëhen pengesë për rrugën drejt pushtetit. Por imuniteti i djegur i komisionerëve shqiptarë me rastin "Dhales", prej dy ditësh ka lënë pa mbrojtje jo vetëm fëmijët dhe gruan e Perikli Dhalesit, por dhe ata të Ilirjan Celibashit, Dëshira Subashit, Maks Shimanit, Klement Zgurit, etj.. Ndryshimi mund të jetë vetëm tek inventari i shtëpive, që lëviz, nga modestia e familjes Dhales tek luksi i banesës së Celibashit.

Rasti i dytë është ai i Durrësit. Pas vendimit të djeshëm gjakftohtë të Kolegjit Zgjedhor për zgjedhjet në Durrës, u vu re fenomeni i dytë negativ që lidhet me arbitrat e zgjedhjeve në Shqipëri. Të inkurajuar nga fakti që ish arbitrat e zgjedhjeve të 24 Qershorit nuk pësuan asgjë, edhe pse masakruan mbi 40 zona elektorale, pesë gjyqtarët e Kolegjit Zgjedhor as që denjuan të dëgjonin argumentat e opozitës për zgjedhjet në Durrës. Është e vështirë ta ndash nëse ata gjyqtarë janë të trembur nga shteti apo të trimëruar nga mbrojtja e shtetit, por është e sigurt se ata ndihen të qetë kur ngrejnë dorën njësoj si Celibashi dhe Subashi. Pra ata e dinë mirë se shteti u ka dorëzuar besimin për ruajtjen e pushtetit. KQZ dhe ata nuk kanë ndërmend ta prishin këtë rregull. Pra këtu njëra palë është e rrezikuar pse nuk lejon manipulimin dhe tjetra është e inkurajuar të manipulojë, pse nuk është dëmtuar kurrë nga manipulimi. Pas kësaj e ke më të lehtë ta kuptosh përse një kryekomisioner i opozitës jeton në një shtëpi me qira që i merr flakë dhe kryekomisionerët e qeverisë kanë arritur që me dy-tri palë zgjedhje, të bëjnë vila dhe parà pa u djegur as nga ligji, as nga "persona të panjohur".

[Shpirt Njeriu]

Budalliqe shqiptaresh,se s`do behemi njerez neve ndonjehere!!