Statusi i Kosovës do bëhet realitet në pranverën e 2005

[dodoni]

Më bëri përshtypje shumë një zëdhënëse e UNMIK-ut nga Pakistani apo Bangladeshi para disa ditësh kur me këmbëngulje e ashpërsi theksonte se vetëm UNMIK ka juridiksion në Kosovë.
Mozomakeq thashë me vete, edhe këta janë bërë të luajnë me neve!!!!
Mirëpo menjëherë pas saj morra lajmin tjetër nga zëdhënësi i OSBE-së që thoshte se qeveria si e dalë nga votat e popullit ka poashtu juridiksion.
UNMIK-u në Kosovë ka ardhur për të ndihmuar vendasit e jo për të udhëhequr vendasit me Pakistana, Bangladesha e njerëz të vendeve si këto.

Është poashtu shumë me vend edhe deklarata e Tom Lantoshit se ato standarde edhe Amerikës po tia kishte vënë Anglia, nuk do ta kishte fituar pavarësinë kurrë.
Mirëpo, prapë demokratizimi sa më i madh i jetës në Kosovë por edhe kudo është mjaft i rëndësishëm si për vendin tonë ashtu edhe për të tjerët, dhe grupet punuese që po ngriten nga qeveria atje janë për tu përshëndetur dhe uruar punë të mbarë.
Holkeri tha se do të zgjidh problemin e privatizimit dhe privatizimi do të filloi së shpejti.
Mirëpo, çështjet më të rëndësishme si shuarja e strukturave të pushtetit paralel që mvaret e duhet të bëhet nga serbët menjëherë dhe urgjentisht dhe për këtë duhet edhe ndërhyrja e ndërkombëtarëve po të jetë nevoja, si dhe problemi i kthimit të të zhvendosurve shqiptar në veri të Mitrovicës që mvaret nga serbët, dhe kthimi i atyre joshqiptar që duan të kthehen në zonat tjera që mvaret nga shqiptarët duhet dhe mendoj se do të zgjidhen nga po këto grupe punuese të ngritura nga qeveria.
Ndërsa problemet tjera teknike duhet të zgjidhen me qeverinë serbe, dhe kjo pa humbur kohë.
Pamvarësisht këtyre, statusi i Kosovës nuk ka pse të shtyhet por me referendum popullor të deklarohet vullneti i popullit që do të thotë ribashkim me Shqipërinë.


Tung

[Shpirt Njeriu]

Presidenti Bush nderoi sot me Medaljen Amerikane të Lirisë, Sekretarin e Përgjithshëm të Natos George Robertson, gjatë një ceremonie në Shtëpinë e Bardhë. Ky është çmimi më i lartë i Shteteve të Bashkuara për civilët. Zoti Robertson u nderua me këtë çmim për drejtimin e Natos, ndërsa aleanca pësoi ndryshimet më të mëdha në historinë e saj, duke u zgjeruar me 7 anëtarë të rinj dhe duke iu përgjigjur disa prej sfidave më të vështira në fushën e sigurimit. Zoti Robertson erdhi në Uashington nga Orlando e Floridës ku dje përfundoi punimet Asambleja parlamentare e Natos. Lufta kundër terrorizmit, Iraku dhe Afganistani ishin ndër temat kryesore të takimit. Në një intervistë për Zërin e Amerikës, Sekretari i Përgjithshëm i Natos, George Robertson tha se mbetet optimist për të ardhmen e Evropës Juglindore.
Një nga shenjat e dukshme të përparimit që është bërë në Evropën Juglindore tha Sekretari i Përgjithshsëm i Natos, Lordi Robertson është pjesëmarrja e vendeve të rajonit përkrah Natos në misionet e aleancës jashtë bllokut të saj. “Ne tani po shohim trupa nga Evropa Juglindore që po punojnë me Naton në misionet e saj jashtë Evropës. Shpresojmë që në të ardhmen të shohim më shumë prej tyre. Ky rajon ka përfituar nga angazhimi i Natos, nga angazhimi i komunitetit ndërkombëtar. Tani është koha që ky rajon të fillojë të hapë kontributin e tij në zona të tjera të botës ku ka nevojë për përvojën e vendeve të tij”, tha zoti Robertson.

Megjithatë rajoni i Ballkanit ka ende nevojë për forcat e Natos. Presidenti i Asamblesë së Natos, ligjvenësi amerikan Doug Bereuter, tha se trupat e Natos duhet të qëndrojnë në Kosovë të paktën deri në zgjidhjen e çështjes së statusit përfundimtar. I pyetur nga Zëri i Amerikës lidhur me çështjen e statusit të Kosovës, zoti Robertson tha se, Kosova duhet t’i përqëndorjë tani energjitë tek plotësimi i standarteve.

“Për Kosovën duhet të flasim për standartet para se të flasim për statusin e saj. Ende nuk jemi në fazën e të ardhmes së saj kushtetuese. Ajo që duhet të bëjë Beogradi e Prishtina është të bisedojnë, të arrijnë marrëveshje për çështjet e jetës së përditshme, si elektriciteti, transporti, kthimi i refugjatëve. Kjo është ajo që banorët presin nga udhëheqësit e tyre, të zgjidhin problemet e jetës së tyre të përditshme. Dhe në kohën e duhur do të arrijmë tek problemi i statusit përfundimtar.”

Duke folur për Maqedoninë, zoti Robertson tha se ky vend e kapërceu me sukses periudhën e krizës dhe tani mund të shohë me besim të ardhmen.


“Populli i Maqedonisë meriton të ketë një të ardhme më të mirë në kuadër të Evropës. Unë kam besim se udhëheqja politike në Maqeodni, qeveria e koalicionit është e angazhuar për stabilitet, për zbatimin e Marrëveshjes së Ohrit dhe për të siguruar që Maqedonia të luajë një rol aktiv në Evropë.”

Përpjekjet e rindërtimit në Irak dhe roli i Natos në Afganistan, ishin ndër temat kryesore të takimit të Asamblesë Parlamentare të Aleancës. Dhe për zotin Robertson ky ishte fjalimi i tij i fundit para Asamblesë si Sekretar i Përgjithshëm i Aleancës. Në dhjetor, zoti Robertson largohet nga kjo detyrë që e ka mbajtur që nga viti 1999.

[Shpirt Njeriu]

Në një takim në Bruksel ditën e hënë, ministrat e jashtëm të BE-së do të thonë se progresi në reforma në Kosovë duhet rishikuar rreth mesit të vitit 2005, pas thirrjeve të ngjashme të bëra nga Shtetet e Bashkuara.

Qëkur Kosova u bë protektorat i OKB-së më 1999, bashkësia ndërkombëtare i ka ikur bisedimeve rreth statusit final të saj - me fjalë të tjera, nën cilat kushte ajo mund të arrijë pavarsinë të cilën shumica shqiptare atje e dëshiron.

Politika e OKB-së ka qenë 'standardet para statusit', që kërkon nga kosovarët të bëjnë reforma demokratike, të sigurojnë sundimin e ligjit dhe të respektojnë të drejtat e pakicës për serbët dhe komunitetet e tjera para se të fillojnë bisedimet për pavarsinë.

Kjo është interpretuar shpesh në Kosovë si arsyetim për të vonuar një vendim mbi statusin final.

Por, ndërsa SHBA po shqyrton shkurtimin e angazhimit të saj ushtarak në Ballkan, ajo ka filluar të ngul këmbë për progres politik në rajon.

Në Kosovë janë krijuar grupe të punës për të përshpejtuar punën rreth standardeve demokratike.

Pas një udhëtimi në rajon këtë muaj, zëvendëssekretari amerikan i shtetit Marc Grossman bëri të ditur se çështja mund të shtrohet më 2005, por vetëm nëse Kosova bën reforma.

Njoftimi i tij, në emër të Grupit të Kontaktit, do të mbështetet të hënën nga ministrat e jashtëm të BE-së, siç shpjegon zëdhënësja e Komisionit Evropian Emma Udwin:

"Porosia mbetet e njëjta: standardet para statusit. Dhe ne e mirëpresim shumë nismën e përfaqësuesit të posaçëm Holkeri për operacionalizimin e standardeve dhe punën që do ta bëjë me institucionet e përkohshme të vetqeverisjes.

"Disponimi tani është se nëse shënohet progres i mjaftueshëm rreth standardeve, ne mund të arrijmë një pikë kur do të mund të shikojmë çështjen e statusit apo të paktën të fillojmë të shtrojmë pyetjen diku më 2005.

"Por ky nuk është premtim i një date, ky është pasqyrim i asaj që ne shpresojmë se do të ndodhë nëse shënohet progres i mjaftueshëm rreth standardeve. Dhe vërtetë fati i Kosovës qëndron në duart e vetë kosovarëve, thotë zëdhënësja e Komisionit Evropian," Emma Udwin.

BE-ja do të kërkojë nga Kosova dhe Serbia që të shënojnë progres më të prekshëm edhe në dialogun mes tyre mbi çështjet teknike, siç janë transporti dhe energjia.

Dialogu filloi muajin e kaluar në Vjenë por pak është bërë që atëherë, përfundon Oana Lungjesku e BBC-së në Bruksel.

[Llapi]

Kosova do të jetë e pavarur, tha gjenerali Klark gjatë një takimi me shqiptaro-amerikanët

Uashington 15 nëntor - Anëtarë të mirënjohur të komunitetit shqiptaro-amerikan të udhëhequr nga Këshilli Kombëtar Shqiptaro Amerikan (KKSHA) në Nju Hampshair u takuan me kandidatin demokratik për president, gjeneralin Uesli Klark (Wesley Clark). Në këtë takim ata kanë shprehur vendosmërinë e komunitetit që çështjet shqiptare të jenë përparësi në politikën e jashtme të Amerikës.
Takimi mes anëtarëve të KKSHA-së dhe gjeneralit amerikan ishte pjesë e serisë së takimeve që kjo organizatë jopërfituese dhe jopolitike shqiptare ka patur me politikanë amerikanë të profilit të lartë për të mbrojtur të drejtat ë shqiptarëvë.
I pyetur nga Hari Bajraktari, një anëtar i Bordit Drejtues të KKSHA-së, për qëndrimin e tij politik ndaj të ardhmes së Kosovës, gjenerali Klark tha: "Si president (Kosova) do të jetë një prej çështjeve në krye të axhendës sime. Kosova do të jetë e pavarur sepse ky është vullneti i shumicës së popullit atje. Ky është parimi i duhur dhe ne do të punojmë për të arritur këtë qëllim, sepse kjo është mënyra më e mirë për të mënjanuar konflikte të tjera në të ardhmen", tha Klark.
Duke i kujtuar këtij kandidati presidencial se puna në Ballkan nuk është përfunduar ende, KKSHA-ja theksoi se udhëheqja amerikane në rajon tani është më e nevojshme se ndonjëherë tjetër.
Gjenerali Klark vërejti se SHBA-të duhet të punojë me vëmendje të madhe në Ballkan për të bashkuar dhe forcuar lidhjet ekonomike dhe për të ulur nivelin e armiqësive dhe urrejtjes historike të cilat në vitin 1999 shkaktuan një numër konfliktesh etnike të përgjakshme në rajon si rezultat të nacionalizmit të egër aerb nën udhëheqjen e të akuzuarit për krime lufte Sllobodan Millosheviç.
Duke iu përgjigjur një pyetjeje nga anëtarët e KKSHA-së rreth qëndrimit të tij në lidhje me ofertën e Serbisë për t'u vënë SHBA-ve në dispozicion 1,000 trupa për t'i ardhur në ndihmë përpjekjeve ushtarake në Afganistan, Klark tha se ishte plotësisht kundër pranimit të Serbisë si pjesë përbërëse e përpjekjeve ndërkombëtare kundër terrorizmit.
"Jam i shqetësuar rreth propozimeve që kam dëgjuar të diskutohen se Serbia do të dërgojë trupa ushtarake në Afganistan për të luftuar ekstremistët muslimanë... Mendoj se duke patur parasysh historinë e këtyre ushtarëve, Shtetet e Bashkuara të Amerikës do të përcillnin mesazhin e gabuar nëse do të lejonin një gjë të tillë. Deri sa kjo të qartësohet dhe shpjegohet, ne nuk mund ta ftojmë Serbinë [që të marrë pjesë në luftën kundër terrorizmit]," tha gjenerali Klark.

[drini_në_TR]

Duke lexuar dhe shpresuar që thëniet e gjenaralit Klark më sipër janë të vërteta dhe gjithashtu që ai do ta mbaj premtimin e thënë, i bëj [size=]THIRRJE[/size] të gjithë shqiptaro-amerikanëve të votojnë për Klark-un si president të Amerikës. Megjithëse vota e shqiptaro-amerikanëve është diçka shumë e vogël në krahasim me popullsinë e Amerikës, mbështetja për të në fushatë dhe votime do të jetë një qëndrim simbolik ndaj politikës dhe figurës së Klark-ut.

Drini.

[Stresi]

XHELAL NEZIRI
TETOVË, 4 TETOR - “Faktori shqiptar në Ballkan po bëhet i rëndësishëm, bëhet një faktor me zë”, thotë në një bisedë për “Kohën ditore” ish-presidenti shqiptar Rexhep Meidani, i cili qëndroi në Tetovë për të marrë pjesë në Panairin e sivjetëm të librit shqip. Ai realizoi disa takime me përfaqësues të lartë politikë të shqiptarëve të Maqedonisë, si me liderin e BDI-së Ali Ahmetin, dhe u bëri një vizitë studentëve të Universitetit të Tetovës. Sipas Meidanit, çështja shqiptare ka karakter historik me konvergjenca, të cilat janë krijuar nga sisteme të mbyllura jodemokratike. “Problemi i shqiptarëve ishte i mbyllur brenda kufijve të caktuar. Ndërsa sot, në kushte të reja, çështja shqiptare po zhvillohet si proces me thellime demokratike me prirje integruese evroatlantike në Shqipëri, po zhvillohet si proces pavarësimi në Kosovë, pas çlirimit të saj, po zhvillohet si proces i barazisë qytetare të grupeve të ndryshme në Maqedoni që gjenë jetësimin e saj në Marrëveshjen e Ohrit, ndërsa për shqiptarët në Mal të Zi është proces i fitimit të drejtave më të mëdha brenda komunitetit të tillë”, vlerëson Meidani. Duke pasur parasysh që proceset historike janë të pakthyeshme, ish-presidenti shqiptar mendon se “edhe kancelaritë e huaja, edhe fqinjët e shqiptarëve, edhe popullsitë e tjera që banojnë bashkë me popullin shqiptar, e kanë kuptuar që me faktorin shqiptar nuk mund të luhet më”. “Ky faktor po maturohet politikisht, ekonomikisht dhe, duke u fuqizuar zëri i tij, bëhet më prezent, më i pranishëm në rjedhat e rajonit dhe më gjerë”, nënvizon Meidani.

Pala sërbe nuk është e përgatitur të bisedojë rreth statusit final të Kosovës

Meidani vlerëson se Prishtina duhet të fillojë dialogun me Beogradin, por në këto biseda të shkojnë me një platformë të përbashkët dhe me kusht që të dyja palët të përfaqësohen në nivel më të lartë. “Në botën e sotme është i domosdoshëm dialogimi. Pjesëmarrja në dialog është e domosdoshme të jetë në nivelin më të lartë si nga pala kosovare ashtu edhe nga pala serbe. Nuk duhet kësaj radhe të luhet si me rastin e Rambujesë, ku përfaqësimi serb nuk ishte në nivelin më të lartë, dhe kjo la hapësirë që Milosheviqi të manovronte edhe më tej”, thotë Meidani. Ai sugjeron palën kosovare që të jetë unike në këtë dialog, ku institucionet politike, partitë politike, prlamenti, qeveria dhe presidenti, të flasin me një zë për platformën me të cilën do të paraqiten në bisedime. Ish-presidenti Meidani mendon se duhet të ndërpritet teknologjia e ndërkombëtarëve që thotë “standardet para statusit” sepse këto metoda, sipas tij, nuk prodhojnë rezultate. “Po të shikosh me kujdes teknologjinë e standardeve para statusit, mund të konstatohet se ajo pësoi një ngrirje, një status quo në Kosovë. Kjo teknologji bllokoi edhe procesin e kalimit të kompetencave nga ndërkombëtarët te vendorët. Për këtë arsye gjykoj që dialogu duhet të jetë i përgatitur për çështje konkrete me përgjigje konkrete dhe me zbatimin e rekomandimeve, sugjerimeve dhe vendimeve që do të merren gjatë atij dialogu”, thotë Meidani. Sa u përket bisedimeve për çështjet praktike, ish-presidenti shqiptar thotë se këtu ka një problem, dhe se ky problem është parimor. “Mirë, le të bisedohet për çështjet praktike, pragmatike që lidhen me energjinë, lëvizjen e qytetarëve. Por, problemi themelor këtu është problemi i vendosjes përfundimtare të statusit të Kosovës dhe për këtë temë kyçe pala serbe është e papërgatitur”, vlerëson Meidani. Këtë konstatim të tij ai e mbështet me veprimet konfuze në politikën sërbe, që shihen me miratimin e një deklarate për Kosovën nga ana e parlamentit serb si dhe me lojën që bëhet nga ana e trupit koordinues për Kosovën me në krye zv.kryeministrin Çoviq. “Gjithë kjo lojë të jep të kuptojsh se pala serbe ende nuk e ka kuptuar realitetin e ri në Kosovë. Ajo kërkon maksimumin që të nxjerrë përfitimet e saj nëpërmjet manipulimit, krijimit të tensioneve artificiale, por ndoshta edhe të tensioneve më të mëdha”, shton Meidani. “Procesi i Kosovës është i pakthyeshëm. Nuk mund të imagjinohet kthimi i proceseve prapa, pasi një kthesë e tillë mund të krijojë kriza dhe destabilitet në rajon. Kosovarët, pas një lirie katërvjeçare, nuk mund të kthehen sërish nën Serbi. Veçanërisht nëse kihet parasysh historia e këtij shekulli dhe në veçanti dhjetëvjetëshi i fundit, ku u aplikua politika e gjenocidit dhe e pastirmit etnik”, vlerëson ishpresidenti shqiptar. Serbia, sipas tij, do të harxhojë shumë energji të kotë që nuk jep rezultate duke aplikuar një mendësi të tejkaluar dhe duke mbajtur shpresat se Kosovën sërish do ta kthejë nën juridiksionin e saj. “Sa më shpejt të shkëputet politika serbe nga kjo mendësi e së kaluarës, aq më mirë do të jetë për vetë Serbinë dhe qytetarët e saj”, shton Meidani. Ai vlerëson se “bllokimi i evolucionit të situatës nëpërmjet krijimit të Unionit Serbi- Mali i Zi është relativisht artificial, pasi u bë nën trysninë evropiane”. “Ai është një union jo i barabartë, jo vetëm në raport me popullsinë në këto republika, por edhe në disporporcion ekonomik dhe politik, diproporcion i cili në vitet e fundit thellohet gjithnjë më shumë. Ky paraqet edhe një eksperiment për humbje kohe nga bashkësia ndërkombëtare, pas tri eksperimenteve të mëparshme. Njëri me krijimin e Mbretërisë serbekroate- sllovene (1915), i dyti me eksperimentin e Titos në krijimin e federatës Jugosllave, i treti ishte i Milosheviqit dhe ky është eksperimenti i katërt me radhë që ushtrohet me këto dy njësi. Logjika e shëndoshë thotë se, pasi ke dështuar tri herë me radhë, atëherë edhe krijesa e fundit do të jetë edhe më e dobët, andaj edhe ndarja e këtyre republikave do të jetë e patjetërsueshme”, mendon Meidani.

Marrëveshja e Ohrit nuk mund të japë rezultate brenda natës

Duke folur rreth proceseve që zhvillohen në Maqedoni, ishpresidenti shqiptar thotë se “Marrëveshja e Ohrit është një kompromis mes grupeve etnike në Maqedoni”. “Si në çdo marrëveshje tjetër, asnjëra palë nuk e merr maksimumin. Por, problemi nuk qëndron në arritjen e saj në letër po në implementimin e saj, në mishërimin e saj në praktikë. Në këtë drejtim do të thoja se ka shumë për të bërë në kuptimin konkret”, thotë Meidani. “Marrëveshja e Ohrit ka punë në kuptimin e realizimit praktik dhe mendësor e të sinqertë të saj. Si proces s’duhet të presim që të japë rezultate brenda natës, sepse ajo është një proces që do të zhvillohet me hapat e paraparë. Me rëndësi është që shqiptarët të jenë së bashku, me një zë, që ajo që është realizuar në këtë marrëveshje të gjejë jetësim në praktikë. Një gjë e tillë duhet kuptuar edhe nga popullsia maqedonase, pasi në fund të fundit i shërben zhvillimit brenda Maqedonisë”, vlerëson ish-presidenti Meidani. Realizimi i Marrëveshjes së Ohrit, sipas tij, i shërben stabilizimit të tërë rajonit dhe integrimit të tij në strukturat evroatlantike. Në qoftë se hezitohet në implementimin e kësaj marrëveshje, Meidani thotë se një hamendje e tillë do të ishte një gabim i madh. “Do të thoja se nuk janë bërë hapa të mjaftueshëm, por kryesorja është që politikanët shqiptarë të punojnë bashkërisht pa më të voglën xhelozi, pargjykim, për të realizuar Marrëveshjen e Ohrit, pasi në fund të fundit ishte një kompromis i nevojshëm në një kohë të caktuar”, vlerëson Meidani.

Rezultatet e zgjedhjeve vendore në Shqipëri do të jenë të balancuara

Ish-presidenti shqiptar mendon se rezultatet e zgjedhjeve të ardhshme vendore në Shqipëri do të jenë të balancuara. “Ndoshta është rëndë të prognozosh rezultatet nga këto zgjedhje, por besoj se ato do të jenë përgjithësisht të balancuara. Është karakteristikë e re në Shqipëri që përfaqësimi në nivel të këshillave, bashkive apo komunave, të jetë relativisht më i shpërndarë, ndryshe nga herat e tjera kur krijoheshin probleme ndërmjet këtyre këshillave”, thotë Meidani. Sa më pozitiv të jetë ky përfaqësim, thotë ai, aq më shumë komunat do të jenë në shërbim të qytetarëve. “Këto këshilla nuk do të marrin urdhra nga anëtarët e partive nga ku janë zgjedhur, pra do të jenë në shërbim të qytetarëve. Kjo do të japë një përvojë të re në procesin e decentralizimit të pushtetit dhe rritjen e autoritetit të pushtetit vendor, të menaxhimit më të mirë të komunave. Njëkohësisht, do të japë shenja pozitive pasi fushata për kryetar bashkie, për kryetar komune, zhvillohet në një atmosferë të lartë të qetësisë, me porograme të caktuara, e jo si fushatat e mëparshme që shpesh zhvilloheshin vetëm nga qendrat politike dhe që rezultonin edhe me konflikte”, thotë ish-presidenti i Shqipërisë, Rexhep Meidani.

[mani]

KOSOVA SOT
“UNMIK-u shkel premtimin për kompetencat”

Qeveria e Kosovës ngel me gishta në gojë

--------------------------------------------------------

Ndryshime në Preambulën e Dokumentit "Standardet për Kosovën"



PRISHTINE (25 Dhjetor) - UNMIK-u konfirmon se në bazë të Deklaratës së fundit presidenciale të Këshillit të Sigurimit, janë bërë ndryshime në Preambulën e Dokumentit "Standardet për Kosovën". Këto ndryshime kanë rikthyer në tekst formulimin "ligjet e aplikueshme", por duke precizuar se çdo element diskriminues do të jetë i pazbatueshëm. Qeveria e Kosovës ndërkaq, nuk është e njoftuar për këto ndryshime, pohoi koordinatori i saj për standardet, Rexhep Hoti. ro/ro (RTK/BalkanWeb)
----------------------------------------------------------------

KOHA DITORE


“Serbët tash të kënaqur me ndryshimet në dokumentin për standardet”

Çfarë loje po luhet me preambulën e dokumentit “Standardet për Kosovën”.

[Brari]

Trepca.net

--------------

Vështrim

Kosovës nuk i duhet politika e ashpër




--------------------------------------------------------------------------------

24 dhjetor 2003 / TN

...por një politikë e mençur dhe demokratike, ku partitë e ndërrojnë njëra-tjetrën nëpërmjet votës. Dhe që pas secilave zgjedhje i ndihmojnë njëra-tjetrës për ta avancuar sa më shumë çështjen kombëtare. Derisa të mos e kuptojmë kështu garën politike, Kosova e ka vështirë të ecën dritës së lirisë që e ka ëndërruar populli.

Shkruan: Nazmi LUKAJ

Deri në vitin 1997, në Kosovë gati të gjithë ilegalistët ishin të anëtarësuar në partitë e djathta. Por, në momentin kur shpërtheu lufta, ata u bënë bashkë. Dikush me qëllimin më të pastër kombëtar, dikush për të bërë përçarje në të, dikush për qëllime thjesht karrieriste etj. Ata që hynë në luftë me qëllimin më të pastër kombëtar, u interesonte vetëm çlirimi i atdheut, e jo se kush do ta udhëhiqte luftën, kurse përçarësit, karrieristët etj. luftën e identifikuan me ambicien për ta marrë menjëherë
pushtetin pas përfundimit të saj.

Duke e pasur këtë qëllim, qysh gjatë luftës, filluan t'i bllokojnë veprimet e krahut ushtarak, që në luftë kishte hyrë me urdhra të institucioneve, përkatësisht me urdhrat e Ahmet Krasniqit. Për ta arritur më lehtë këtë qëllim, filluan eliminimin fizik të kundërshtarëve që, pos në literaturën marksiste, e kishin mësuar edhe nga SHIK-u i Shqipërisë, pasi shumica prej tyre kishte qëndruar një kohë matanë atdheut. Fillimisht, përveç disa kundërshtarëve që i eliminuan në terren, e vranë edhe vetë Ahmet Krasniqin.

Gjatë luftës dhe shumë kohë pas saj (këtë e bëjnë edhe sot, por me një intensitet më të vogël), ilegalistët bënë çmos që ta komprometonin edhe kryetarin Rugova në popull, mirëpo kjo iu kthye bumerang, sepse atë nuk mundën ta mashtrojnë, meqë ishte shumë i vetëdijshëm për kontributin e tij kombëtar.

Pas përfundimit të luftës, ambicia për ta marrë pushtetin ilegalistëve përkohësisht iu realizua, kur e instaluan QPK-në. Kjo u zgjati deri në zgjedhjet e para lokale dhe parlamentare, zgjedhje këto që parësore e bënë sërish LDK-në dhe dr. Rugovës edhe një herë ia legjitimuan epitetin lider i popullit, edhe pse ky i tillë konsiderohej, por vota vetëm sa e vërtetoi këtë.

Gjatë qeverisjes së QPK-së pati shumë më pak krime, sepse ilegalistët ishin të kënaqur që i kishin marrë frerët e udhëheqjes së Kosovës në duar, nëpërmjet QPK-së. Krimet u shumëfishuan pasi i humbën zgjedhjet partitë e reja, në të cilat ilegalistët u rreshtuan pas luftës.

Shërbimet sekrete që u instaluan në Kosovë, sapo ilegalistët e vendosën QPK-në, u bënë shumë të rrezikshme për vetë Kosovën. Derisa e kishte pushtetin QPK-ja, krimi i tyre ishte më i vogël. Por, pas zgjedhjeve, kur LDK-ja u rifaktorizua, këto shërbime vranë disa nga figurat qendrore të LDK-së.

Sidomos krimi mori përmasa në Rrafshin e Dukagjinit. Kështu, në vend se të bënin një politikë mbështetëse të LDK-së për ta realizuar pavarësinë, ish-ilegalistët e ashpërsuan skenën politike aq shumë, sa krijuan një klimë frike e terrori te popullata. Një gjë e tillë iu kthye bumerang vetë partive të reja, sepse u zbehën shumë në opinion.

Ato popullata filloi t'i identifikojë me krimin, për të cilin një pjesë të fajit e mbajnë edhe organet e sigurisë vendase dhe ndërkombëtare, sepse pak (ose fare pak) deri më sot kanë bërë për kapjen e kriminelëve dhe urdhërdhënësve të tyre. E them këtë, sepse po të ishin kapur kriminelët dhe po të ishin zhbërë shërbimet sekrete që në start, krimi nuk do ta kishte pasur grafikonin që e ka.

Edhe ky vit që po e lëmë pas, kaloi në frymën e viteve të tjera të pasluftës, pra në frymën e pranishmërisë së krimit, që e ashpërsoi shumë klimën politike në Kosovë. Këta katër vjet e më shumë të kësaj gjysmëlirie, populli nuk dëshiron që t'i përsëriten kurrë më. Por, e dëshiron një Kosovë, ku do të mbretërojnë paqja dhe lumturia, një Kosovë çfarë e ka ëndërruar me shekuj. Dhe, për të qenë e tillë, policia e SHPK-së dhe ajo e UNMIK-ut duhet të bëjnë përpjekje më të mëdha që krimit t'ia mbyllin të gjitha shtigjet.

Po ashtu, edhe vetë krijuesit e shërbimeve sekrete, për të mirën e Kosovës, duhet t'i shthurin ato. Në të kundërtën, do të konsiderohen si dorë e zgjatur e Serbisë, sepse krimi i shkon për shtati vetëm asaj. Edhe partitë e krijuara pas luftës, e që e kanë krijuar këtë klimë të ashpër politike, krejt veprimtarisë së tyre duhet t'i japin një kah pozitiv. Në radhë të parë, duhet ta kuptojnë se derisa të fitohet pavarësia duhet të jenë vetëm politikë mbështetëse e LDK-së, që do të ishte kontributi i tyre më i vlershë kombëtar.

Kjo për to duhet të jetë çështja më primare, e jo rrëmbimi i pushtetit me metoda të ashpra, sepse ashpërsia politike i rrënon përpjekjet e popullit për pavarësi; ashpërsia politike i konvenon vetëm Serbisë dhe atyre shteteve që janë përkrahëse të rikthimit të Kosovës nën juridiksionin e saj. Një ashpërsi e tillë është rrezik edhe për vetë partitë që e kanë krijuar këtë klimë, sepse ato do të zbehen gjithnjë e më tepër në popull dhe një ditë do të mund të vihet në dyshim ekzistenca e mëtutjeshme e tyre. Kosova nuk i ka 200 milionë shqiptarë, por më pak se tre milionë.

Prandaj, për ta realizuar synimin shumëshekullor të popullit, politikës sonë nuk i duhet lufta e njëmendtë politike, me të gjitha ashpërsitë e saj, por një politikë e mençur dhe demokratike, ku partitë e ndërrojnë njëra-tjetrën nëpërmjet votës, që e respektojnë atë, dhe që pas secilave zgjedhje i ndihmojnë njëra-tjetrës për ta avancuar sa më shumë çështjen kombëtare. Derisa të mos e kuptojmë kështu garën politike, Kosova do ta ketë vështirë për të ecur dritës së lirisë që e ka ëndërruar populli.

[mani]

Kujt ti besohet sot more bac,Keshillit te Sigurimit apo atyre qe flasin ne te mire te tyre.

Qeveria përkrah parimisht preambulën e Planit për Zbatimin e Standarteve


PRISHTINE (27 Dhjetor) - Qeveria e Kosovës e përkrah parimisht preambulën e re të Planit për Zbatimin e tandardeve. Por, për finalizimin e saj kryeministri do të takohet pas Viti të Ri me liderët e institucioneve dhe të partive politike, që kanë qenë të përfshirë gjatë tërë kohës në këtë proces. Preambula e re e dokumentit "Standardet për Kosovën" duket se tani do të jetë e pranueshme për qeverinë dhe për institucionet tjera të Kosovës. Pjesa kontestuese, përdorimi i ligjeve të aplikueshme, për të cilën nuk pajtoheshin kosovarët është riformuluar dhe si e tillë iu është dorëzuar institucioneve. Zëdhënësja e qeverisë Mimoza Kusari thotë se kjo pjesë kontestuese tashmë është sqaruar. Megjithatë, edhe në preambulën e re thuhet se standardet do të përmbushen edhe në bazë të ligjeve të aplikueshme. Këto ligje para një kohe janë zhvleftësuar nga Kuvendi i Kosovës, por vendimin e Kuvendit e hodhi poshtë UNMIK-u. Mimoza Kusari, zëdhënëse e Qeverisë tha se plani "Stanardet për Kosovën" është pranuar nga të gjitha organizatat ndërkombëtare, ndërkaq ka qenë Këshilli i Sigurimit ai që e ka shtyrë shefin e UNMIK-ut që planit t'ia shtojë edhe pjesën hyrëse. dxh/dxh

[mani]

Pasha Kuranin pernjemend qitash as vet nuk po di kujt me i besue???


Holkeri: UNMIK-u, i vetmi organ vendimmarrës edhe për 18 muaj


PRISHTINE (3 Janar) - UNMIK-u do të vazhdojë të jetë i vetmi organ vendimmarrës i Kosovës, edhe për të paktën 18 muaj të tjerë, ka theksuar kryeadministratori Hari Hollker, në një konferencë për media, të mbajtur të premten pasdite në Ministrinë e Jashtme të Finlandës. "Duke pasur parasysh se këta 18 muaj do të jenë mjaft të ngjeshur me punë, ka të ngjarë që UNMIK-u të vazhdojë misionin edhe pas qershorit të vitit 2005", saktësoi Hollkeri, duke iu përgjigjur pyetjes se kur do t'i kalojë tërësisht pushteti Qeverisë vendore të Kosovës. ro/ro (Kosovapress/BalkanWeb)