Ç'ndodh Ne Linjat E Autobuzave.

[Shpirt Njeriu]

TIRANE

Radhët e gjata të njerëzve zaptojnë stacionet e autobuzëve. Ata shtohen pa masë me shpresë për të ardhur ndonjë urban i lirë. Furgonët mungojnë e kjo ka bërë që radhët e qytetarëve të shtohen më shumë. Ora 10 e mëngjesit të djeshëm. Asnjë autobus në linjë. Shiu i shtruar duket sikur i shton edhe më shumë radhët e pasagjerëve. Më shumë se 40 vetë qëndrojnë në stacionin e linjës së Unazës. Pritje 20 minuta radhazi. Më në fund duken urbanët e parë. Erdhi! Dëgjohet kështu britma entuaziaste e një gruaje, ndërsa shfaqen në horizont tre autobuzë radhazi. Të tre mbushen plot. Ajri i rëndë të zë frymën edhe pse është dimër. Nga Ministria e Jashtme deri te Ura e Shallvareve duhen plot 20 minuta rrugë. Qytetarët nisin dialogun me shoferin: pse erdhët vonë, e keni frekuencën çdo tri minuta, ndërsa njeriu që komandon autobuzin u kthehet me të qetë, duke u shpjeguar se asgjë nuk varet nga ai. Trafiku i rënduar. Tre autobuzë të linjës së Unazës kanë ndenjur me minuta të tëra në aksin Zogu i Zi-Treni, nën presionin e trafikut të çmendur. Edhe aksi i tregut te Medreseja u ka kushtuar autobusëve shumë kohë duke pritur trafikun. Specialistët e transportit prane Bashkise shprehen se problemin e moskorrektësisë apo frekuencës jo të rregullt të urbanëve e shkakton pikërisht trafiku i rënduar i kryeqytetit, i cili në periudhën e vjeshtës e dimrit është edhe më i ngarkuar. Megjithatë, problemi i trafikut nuk i përket shumë qytetarëve, të cilët shpresojnë që mes pagesës që bëjnë të kenë shërbimin e premtuar. Dje pothuaj në të gjitha linjat e transportit urban ishte e njëjta situatë. Njerëz në radhë, autobuzë që vinin shumë rrallë, dhe trafik i rënduar që vështirësonte shërbimin urban. Kjo është pamja që serviret më shpesh në kryqytet, kur njerëzit endën për të realizuar në kohë detyrimet e zakonshme.


Flasin kontrollorët

Anomali në linjat e Unazës, fatorinot biznes me abone
TIRANE - "Abone që shiten vend e pa vend. Mungesa të shenjave të dukshme nëpër stacionet e urbanëve. Vonesa në stacion". Këto janë ankesat më të përfolura e më të dëgjuara nëpër urbanet e Unazës së qytetit. Jo vetëm kaq, por pasagjerët ankohen dhe për shitjen e aboneve, që nuk u dihet origjina. "Ne na akuzojnë se përdorim abone studentësh, të njëjtin mjet identifikimi e gjithë familja, kurse vetë pronarët e linjave urbane nuk e dinë se çfarë bëjnë punëtorët e tyre. Ka plot dy ditë që abonet shiten kudo dhe nga kushdo. Fatorinot janë të parët që nisin biznesin e kartave identifikuese nëpër urbanët e tyre", tregon Englantina Preka, pasagjere në njërën prej linjave të Unazës së kryeqytetit. Janë një numër i madh pasagjerësh të rregullt që ankohen për parregullsitë e transportit qytetas. Ndërsa të zotët e urbanëve luajnë ping-pong me fajet e tyre. "Me një abone studenti qarkullon e gjithë familja. Për një ditë ne arrijmë të identifikojmë të njëjtin numër serie të abonesë që përdoret më shumë se dhjetë herë nga persona të ndryshëm të familjes", tregon Alban Meshi, fatorino në linjën e Unazës. Ai shton se shumica e pasagjerëve nuk i plotësojnë të gjitha rregullat për përdorimin e mjetit identifikues. U mjafton një copë karton në të cilin të vendosin fletën e serisë së abonesë dhe vetëm kaq, rrallëherë që u vendosin fotografinë e duhur. "Më mirë i zgjidhim problemet me ata që nuk paguajnë fare se sa me ata që kanë abone por nuk e kanë të rregullt. Rregullat e abonesë ua kemi përsëritur njëmijë herë", pohon Agron Cenalia fatorino në linjën Qendër-Uzinë-Qendër