RENEA ne Tropoje.

[Brari]

-----

FLET SHKELZEN LATA, I SHPALLUR NE KERKIM NGA POLICIA

"S'i qëllova unë specialët e RENEA"
Lata: Po goditen të gjithë shokët e miqtë e Riza Malajt


--------------------------------------------------------------------------------

Basir Çollaku

Rikthehet tensioni në Tropojë. Burime zyrtare nga Ministria e Rendit Publik pohojnë se dje rreth orës 12 forcat speciale që kanë mbërritur nga Tirana dhe ato të komisariatit të Tropojës kanë shkëmbyer zjarr armësh me Shkëlzen Latën, i cili më pas ka ikur. Sipas policisë kjo ka ndohur kur ata i kanë bërë shenjë të ndalojë dhe Lata ka ikur më shpejtësi duke qëlluar drejt tyre. I kërkuari sipas Ministrisë së Rendit ka braktisur makinën në të cilën është gjendur një automatik dhe 10 granata dore. Po dje Shkëlzen Lata dhëndërri i Riza Malajt, të kërkuarit nga policia ka folur për Gazetën. Ai tregon për përplasjen me policinë, për luftën që u bëhet miqve, shokëve të Rizait, dhe dëshirën që pushtetarët kanë ta mbajnë Tropojnë në tension që aty të mos ketë qetësi.

Ku ju ka ndaluar policia dje?
Policia nuk më ka ndaluar. Nuk ka qenë një postobllok. Unë nuk jam person në kërkim dhe s'kam përse të iki. Isha duke lëvizur për punë personaledhe isha vetëm në makinë. Kam ndaluar në një vend ku terreni ishte i keq. Menjëherë aty kanë ardhur forca speciale të Tiranës dhe të Tropojës me maska dhe më kanë rrethuar. Pohoj se nuk kam pasur armatim në makinë dhe nëse është bërë një foto në çastin që e kam lënë unë mjetin dhe arma gjendet aty atëherë jam fajtor. Por besoj se këto janë sajesa të qëllimshme.

Keni qenë i armatosur?
Kjo nuk është e vërtetë por ekzagjerohet nga policia. Unë s'kam arsye që të dal i armatosur me automatik dhe granata. Kisha dalë që të kryej punë të miat si dhe ditë të tjera por dje e gjetën që të më ndjekin dhe të krijojnë një situatë të tillë ndaj meje.

Pse nuk ndaluat kur ju bënë shenjë?
Policia ka hapur zjarr menjëherë mbi mua dhe jam shtrirë duke shpëtuar, pasi forcat speciale më kanë plagosur me 21 shkurt të vitit 2000, kur punoja në policinë ushtarake. Kisha frikë se mos më ndodhte e njëjta gjë si tre vjet më parë.

Keni probleme me drejtësinë?
Drejt meje specialët kanë qëlluar afro 200 300 plumba, pastaj jam larguar sepse nuk e jap jetën për një makinë. Nuk di se përse më kanë qëlluar. Mbase njerëz që kanë interesa të tjera, por që kanë dhe pushtet në Tiranë dhe këtu në Tropojë krijojnë kurthe ndaj nesh.

Përse kërkonin t'ju ndalonin?
Janë sajesa për të bërë Tropojën vatër zjarri sepse unë as kam grabitur as kam përdhunuar e as vrarë. Nëse do të kisha bërë një gjë të tillë, atëherë lë të më kërkonin e të më arrestonin. Para tre ditësh kam qenë në Tiranë kam ndenjur dy ditë atje dhe jam kthyer, atje nuk më kërkoi policia. Nëse unë do të isha në kërkim për ndonjë vepër penale, atëherë do të më kishin arrestuar, sepse nuk jam fshehur asnjëherë, por kam dalë lirisht nëpër qytet.

Qëlluat mbi policinë?
Unë nuk kam qëlluar. Ata kanë qenë 70 apo 80 metra afër meje e nëse do kisha qëlluar do kisha vrarë ndonjërin prej tyre. Po të kisha pasur armë do të kisha qëlluar. Por sipas meje kjo bëhet si sulm ndaj Riza Malajt, ndaj miqve të tij, shokëve të tij. Ka nisur një aksion i tillë.

Jeni përplasur me policinë?
Jo nuk kam pasur por mendoj se sulmi na vjen nga persona që kanë pushtet në Tropojë dhe që kanë konflkikte me ne, e që kurdisin operacione për të në arrestuar e goditur. Të paktën kështu mendojmë ne se ka ndodhur.


Malaj: Kanë sulmuar pa shkak miqtë e mi

Riza Malaj ka pohuar diën e djeshme se nuk ka pasur asnjë takim me dhëndërrin e tij Shkëlzen Lata. Që në orët e para të mëngjesit ka pohuar i kërkuari Malaj ka pasur shkëmbime zjarri me policinë. Kam dëgjuar nga miqtë e mi ka folur ai për gazetën se kanë qëlluar dhëndërrin tim Shkëlzen Latën. Të gjitha këto ka thënë Rizai na i bëjnë njerëz me pushtet që kanë konflikte personale me ne. Ka dhe njerëz të cilët duan të mbajnë në tension Tropojën dhe sjellin vazhdimisht forca policie në qytetin tonë shprehet i kërkuari Malaj. Kandidati legalist saktëson se do jetë e vështirë të arrestohet, duke pretenduar se është i pafajshëm.


Policia: Do i kapim Malajn e Latën brenda natës

Policia pas shkëmbimit të zjarrit me Shkëlzen Latën ka pohuar se operacioni për kapjen e të kërkuarve do të përfundojë brenda natës. Do të prangosen të dy të kërkuarit Riza Malaj dhe Shkëlzen lataj, kanë pohuar në Ministrinë e Rendit Publik. Burimet e mësipërme kanë saktësuar se është sekuestruar makina e Latës ditën e djeshme dhe në të janë gjetur një automatik model 56 si dhe dhjetë granata dore. Këto sipas policisë shërbejnë si prova për çështjen në ngarkim të të kërkuarit. Operacioni është shtrirë në gjithë rrethin e tropojës për të ekzekutuar dy urdhërarrestet e firmosura nga prokuroria. Në ndihmë të policisë së Bajram Currit kanë vajtur dhe forca speciale nga Tirana.


--------nga gazeta Shqiptare------