Vjedhin një celular, dënohen me 10 vjet burg
Vladimir Muçaj
FIER - Gjykata e rrethit të Fierit ka dënuar dje me nga 5 vjet burg dy personat, të cilët akuzoheshin për vjedhjen e një celulari. Arjan Merdani dhe Jonuz Mucaj, të dy banorë të Ballshit, u akuzuan për vjedhjen e celularit të shtetases Anila Metaj. Ngjarja, sipas akuzës, ka ndodhur në datën 8 qershor, në tregun e qytetit. Të dy të pandehurit kishin piketuar vjedhjen e celularit që shtetasja Metaj e mbante në xhepin e jashtëm të çantës. Po sipas akuzës, dy të pandehurit kanë gjetur çastin e volitshëm, kur Anila Metaj ka qënë duke blerë diçka. Këtu ka filluar të zbatohet edhe plani i tyre. Njëri prej të pandehurëve i është afruar shitëses që ishte duke komunikuar me Anilën, ndërkohë që Jonuz Muçaj ka realizuar vjedhjen. Pas grabitjes, dy të pandehurit e kanë shitur menjëherë celularin përkundrejt 40 mijë lekëve, ndërkohë që paratë i kanë ndarë mes tyre.Vajza ka kuptuar pas pak minutash që i kanë vjedhur celularin dhe ka njoftuar të atin. Ky i fundit duke lëvizur në treg, ka parë me celular në dorë shtetasin Sh.K dhe pasi ka biseduar me të ka mësuar se aparati u ishte blerë shtetasve Jonuz Mucaj dhe Arjan Merdani. I ati i vajzës ka bërë denoncimin në policinë e Ballshit, e cila ka bërë dhe ndalimin e tyre.Në seancën e djeshme gjyqësore, avokatët kanë kërkuar ndryshimin e veprës penale dhe uljen e masës së dënimit ndaj klientëve që ata mbronin, por gjyqtarja Lindita Sinanaj, ka dhënë dënimin që kishte kërkuar prokurori i çështjes. Kështu dy të pandehurve u duhet të vuajnë nga 5 vjet burg për vjedhjen e një celulari.
SHEKULLI 30/10/2003
-------------------------------------------------------------
E cfare ligjesh kemi ne ne Shqiperi.Skandal.Per nje celular duhet te vuajn 10 vjet burg.Vjedhja e tyre eshte e barabarte me nje kriminel qe merr jete njerzish .Po valle politikanet qe vjedhin me miliona,sa vjet duhen te denohen?
Krijoni Kontakt