Diabeti, sëmundja e sheqerit

[sirena_adria]

Deri në 2050 më shumë se një miliard njerëz me diabet

Deri 1,3 miliardë diabetikë do të shkojë numri deri në vitin 2050, sipas studimit të botuar në ”Lancet”.

Kjo do të thotë se në mbarë botën, numri i njerëzve me diabet, sëmundje kronike që zhvillohet kur niveli i sheqerit në gjak është shumë i lartë, do të dyfishohet gjatë tre dekadave të ardhshme.

Studiuesit zbuluan se 529 milionë persona kishin diabet në vitin 2021 dhe rritja e numrit të diabetit do të rriste prevalencën e sëmundjes nga 6,0 për qind e popullsisë së botës në gati 10 për qind deri në vitin 2050.

Gjetjet e studimit bazohen në analizën e të dhënave nga më shumë se 27 000 burime në 204 vende dhe territore.

Sipas të dhënave nga Qendrat për Kontrollin dhe Parandalimin e Sëmundjeve, më shumë se 37 milionë persona në SHBA kanë diabet.

Studiuesit zbuluan se rreth 96 për qind e njerëzve në mbarë botën që kishin diabet në 2021 kishin tip 2, duke vënë në dukje se prevalenca në rritje e diabetit të tipit 2 në mbarë botën është ”kryesisht për shkak të rritjes së obezitetit”.

Për ekspertët e shendetit, përhapja e vazhdueshme globale e diabetit paraqet një sfidë të madhe të shëndetit publik për politikëbërësit.


Gazeta Express

https://www.gazetaexpress.com/deri-n...rez-me-diabet/

[sirena_adria]

Cila Është Receta Më E Mirë E Mëngjesit Ideal Për Personat Me Diabet

Ndonjëherë ndodh që edhe pse të mos keni ngrënë darkë, normat e sheqerit në gjak në mëngjes të jenë pak të larta. Ky njihet si fenomeni i agimit dhe është diçka për të cilën nuk duhet të shqetësoheni. Por nëse sheqeri në gjak është vazhdimisht në norma të larta në mëngjes, ka një arsye për t’u shqetësuar sidomos nëse jeni me diabet. AgroWeb.org ju njeh me disa këshilla dhe me recetën më të mirë për kontrollin e sheqerit nga dielologë të ndryshëm në botë.

Çfarë ndodh në mëngjes me sheqerin në gjak?
Pak para se të zgjoheni, mëlçia lëshon glukozë në qarkullimin e gjakut për t’ju dhënë energji. Ky është fenomeni i agimit dhe është mënyra e trupit tuaj për t’ju dhënë një shtysë për të filluar ditën. Për një person pa diabet, kjo nuk është diccka shqetësuese. Pasi glukoza hyn në qarkullimin e gjakut, pankreasi lëshon insulinë për të shtyrë glukozën në qeliza, ku mund të përdoret për energji. Megjithatë, nëse keni diabet, ky proces mund të mos jetë një shenjë e mirë. Kjo për shkak se trupi nuk prodhon mjaftueshëm insulinë për të menaxhuar sheqerin e lartë në gjak. Prandaj, kur zgjoheni dhe testoni sheqerin, mund të shihni se ai është i lartë.

Pse është e rëndësishme të keni një mëngjes të shëndetshëm?
Ngrënia e një mëngjesi të rregullt dhe të ekuilibruar është shumë e rëndësishme për njerëzit që kanë diabet sepse mund të ndihmojë në mbajtjen e niveleve të sheqerit në gjak të qëndrueshme edhe gjatë gjithë ditës. Ushqimet e larta në karbohidrate të rafinuara dhe sheqer, nuk rekomandohen pasi mund të shkaktojnë rritjen e nivelit të sheqerit në gjak. Në vend të tyre, synoni të konsumoni një mëngjes me proteina, karbohidrate të pasura me fibra dhe yndyra të shëndetshme.

Mëngjesi më i mirë sipas dietologëve
Për shumë idetologë mëngjesi ideal për ata me diabet është tërshëra e përzier me fara chia. Përveçse një vakt i shijshëm, është gjithashtu një vakt i mbushur me fibra, yndyrna të shëndetshme dhe proteina. Ky kombinim tretet ngadalë, gjë që duhet të synoni nëse flasim për menaxhimin e sheqerit në gjak.

Si të bëni tërshërë me fara Chia
Përbërësit (për 1 racion)

⅓ gotë tërshërë

1 lugë gjelle fara chia

¼ gotë kos pa yndyrë

¼ gote fruta pylli të ngrira

⅔ gotë qumësht bajamesh

Pak kanellë për shije

1 lgj arra të grira

Përgatitja

Bashkoni tërshërën, farat chia, kosin, frutat e pyllit, qumështin e bajames dhe kanellën në një kavanoz ose enë me kapak. Përziejini mirë dhe vendosini në frigorifer për gjatë natës, ose për të paktën 2 orë. Në fund shtoni arrat dhe shijojeni në mëngjes.

Përfitimet

Në rregull, le ta zbërthejmë këtë recetë mëngjesi dhe të kuptojmë pse është një zgjedhje kaq e shkëlqyer për njerëzit me diabet ose këdo që e shijon.

Një vakt i mbushur me proteina

Kosi pa yndyrë përmban, tërshëra, farat chia shtojnë, qumështi i bajames dhe arrat sigurojnë një sasi të mjaftueshme proteinash për mëngjes. Proteinat ndihmojnë në tretjen e karbohidrateve, duke ngadalësuar procesin e rritjes së sheqerit në gjak.

Përmban yndyrna të shëndetshme

Ashtu si proteinat, shtimi i një burimi yndyre të shëndetshme në një vakt ndihmon në ngadalësimin e tretjes së karbohidrateve. Në përgjithësi, vaktet e balancuara dhe të pasura me lëndë ushqyese ndihmojnë në vonimin e tretjes së karbohidrateve, duke stabilizuar lirimin e glukozës në qarkullimin e gjakut. Në këtë recetë, farat chia dhe arrat japin gjithsej 15 gram yndyrë. Për më tepër, yndyrat tek farat chia dhe arrat janë acide yndyrore omega-3 dhe yndyrna të pangopura, të cilat janë anti-inflamatore dhe të shëndetshme për zemrën!

Ofron karbohidrate komplekse të pasura me fibra

Tërshëra ndonjëherë mund të jetë e keqe për shkak të përmbajtjes së lartë të karbohidrateve. Megjithatë janë një ushqim me drithëra të plota, që do të thotë se përmbajnë gjithashtu vitamina, minerale dhe fibra. Kur kombinohen me proteina dhe yndyrna të shëndetshme, ato përbëjnë një mëngjes miqësor me sheqerin në gjak.

Plot me fibra

Kjo recetë është e mbushur me fibra. Kjo lëndë ushqyese ndihmon në menaxhimin e sheqerit në gjak dhe është e mirë për sistemin tuaj gastrointestinal.


/ AgroWeb.org

[sirena_adria]

Ushqimet Më Të Mira Për Të Mbajtur Në Kontroll Diabetin

Të gjesh kombinimet e duhura ushqimore me qëllimin që të mbash të ekuilibruar nivelet e sheqerit në gjak mund të jetë shumë e vështirë.

Prandaj çdo frut apo perim që konsumohet duhet të jetë i duhuri.

Këtu keni të listuara nga AgroWeb.org disa ushqime të cilat ndihmojnë me diabetin e tipit 1 dhe 2

Peshku

Pëshku është një nga produktet më të shëndetshme. Salmoni, sardelet, açuget janë burimi më i mirë për yndyrnat omega 3 dhe acidet DHA dhe EPA që ndihmojnë zemrën.

Për të gjithë personat që vuajnë nga diabeti duhet t’i konsumojnë pasi ata janë të predispozuar që të preken nga sëmundjet e zemrës.

Këto acide mbrojnë qelizat dhe reduktojnë inflamacionin duke përmirësuar qarkullimin e gjakut.

Të gjelbërtat

Perime si spinaqi, lëpjetat, sallata janë plot me vlera por me pak kalori.

Duke qenë se treten shpejt nga organizmi nuk e rrisin nivelin e sheqerit në gjak.

Gjithashtu këto produkte janë të pasura me vitaminën C, që luan rol të rëndësishëm në eliminimin e inflamacionit dhe tensionit të lartë.

Kanella

Kanella është e pasur me antioksidantë, të cilat mbrojnë shëndetin e syve.

Studime të shumta mjekësore kanë vërtetuar se kanella mund të ulë nivelet e sheqerit në gjak dhe të përmirësojë ndjeshmërinë ndaj insulinës.

Një tjetër studim vuri re se kanella arrin të ulë dhe kolesterolin dhe nivelet e triglicerideve.

Vezët

Vezët janë vërtet një paketë me vlera shëndetësore. Përveç se të mbajnë më gjatë të ngopur, nëse konsumohen rregullisht ato ulin rrezikun e prekjes nga sëmundjet e zemrës.

Vezët gjithashtu përmirësojnë ndjeshmërinë ndaj insulinës dhe ndihmojnë prodhimin e kolesterolit të mirë.

Kosi

Kosi është një nga produktet e bulmetit më të mirët për personat me diabet.

Të dhëna kanë treguar se konsumimi i kosit ekuilibron sheqernat në gjak dhe parandalon sëmundjet e zemrës përmes probiotikëve që përmban.

Tek personat me diabetin e tipit 2, kosi ndihmon në rënien në peshë dhe ndihmon në systemin tretës.

Arrorët

Arrorët janë të shijshëm dhe të pasur me vlera për organizmin.

Të gjithë llojet e arrorëve përmbajnë fibra të cilat treten shumë lehtë nga sistemi ynë.

Konsumimi rutinor i tyre arrin të ndihmojë në reduktimin e inflamacionit dhe në uljen e sheqerit në gjak.

Brokoli

Brokoli tanimë është i famshëm për vlerat e tij.

Studime kanë pohuar se brokoli ndihmon në uljen e insulinës në gjak dhe mbrojnë qelizat nga radikalet e lira që prodhohen gjatë proceseve të metabolizmit.

Vaji i ullirit

Vaji i ullirit ndryshe mund të quhet si balsami i zemrës.

Ai përmban acide yndyrore të cilat ndihmojnë në prodhimin e substancës HDL, që është parë të jetë në shifra jo të shëndetshme tek personat me diabetin e tipit 2.

Gjithashtu vaji i ullirit ndihmon në ekuilibrimin e tensionit të gjakut dhe qarkullimit të tij për një zemër më të shëndetshme.


/ AgroWeb.org

https://agroweb.org/ne-forme/trupi-s...jtur-diabetin/

[sirena_adria]

Buka më e Mirë për Diabetikët – Cilën Duhet të Zgjidhni

Aroma e bukës së sapo dalë nga furra ka fuqinë të të ndezë të gjitha shqisat dhe të fton në ‘mëkat’ nëse e ngrëna e bukës mund të quhet e tillë.

Kjo ndodh edhe tek tek diabetikët, të cilët ndonëse bukën duhet ta konsumojnë me karar, sërish mund të plotësojnë dëshirat për ushqimin më popullor në botë.

Në këtë artikull të AgroWeb.org diabetikët dhe familjarët e tyre do të mësojnë për alternativat më të shëndetshme të brumit.

Buka Me Fibër

Buka e përgatitur me drithë të plotë, e pasur në fibër është më e mira për diabetikët.

Sipas ekspertëve, tërshëra dhe embrioni i grurit janë ndër drithërat më të shëndetshme.

Ata shprehen se diabetikët duhet t’i përmbahen sasive të rekomanduara të karbohidrateve në një vakt por gjithësesi mund të përgatisin vetë bukën me përbërësit më të shëndetshëm.

Përbërësit Më Të Shëndetshëm Të Bukës

Një bukë e shëndetshme duhet të përmbajë përbërës të pasur me proteinë, yndyrna të mira dhe fibër.

Këto përbërës do të pengojnë rritjen e shpejtë të nivelit të sheqernave në gjak.

Të dhënat e Shoqatës Amerikane të Diabetit të cilave u referohet AgroWeb.org thonë se buka e bardhë dhe e përgatitur me miell të përpunuar duhet të zëvendësohet me bukë të bërë me miell 100 përqind me drith të plotë.

Mundësisht, mielli i drithit të plotë dhe i bluar trashë është i rekomanduar për një bukë jo vetëm të shijshme por edhe të shëndetshme.

Personat që vuajnë nga diabeti mund të shfrytëzojnë shumë receta duke zëvendësuar miellin e bardhë me miell të drithit të plotë, miell bajamesh apo të farave të linit.

Këto produkte do ju furnizojnë me proteinë dhe do mbajnë nivelet e sheqerit të qëndrueshme.


/ AgroWeb.org

https://agroweb.org/ne-krahasim/cfar...idhni-agroweb/

[sirena_adria]

Cili është fruti më i mirë që duhet të konsumoni nëse jeni diabetik dhe sasia e duhur?

Sipas dietologëve, pacientët me diabet duhet të konsumojnë boronicat në vend të frutave të tjera. Një ekspert dietash i specializuar për kujdesin ndaj diabetit ka thënë se kokrrat blu janë të preferueshme, sepse ato mbartin rrezikun më të ulët për rritjen e sheqerit.

Rreth 30 milionë amerikanë kanë diabet të tipit 2, ku trupi nuk arrin të prodhojë sasi të mjaftueshme të hormonit insulinë, i cili ndihmon në shndërrimin e sheqernave në ushqim në energji.

Sëmundja bën që glukoza të grumbullohet në qarkullimin e gjakut, duke shkaktuar rritje të sheqerit në gjak dhe me kalimin e kohës kjo sjell një sërë komplikimesh serioze si plagë të infektuara dhe probleme kardiake.

Jocelyne Loran, një dietologe për diabetin në Qendrën Mjekësore Rajonale të Universitetit të Maryland Charles, zbuloi pse ajo rekomandon një filxhan boronica për pacientët e saj me diabet ose që janë në rrezik nga kjo sëmundje. Së pari, ata mund ta shmangin rritjen e sheqerit në gjak për shkak të përmbajtjes së tyre të lartë të fibrave, të cilat ngadalësojnë çlirimin e sheqernave të frutave në qarkullimin e gjakut, tha ajo për Eating Well.

Një filxhan me boronica përmban rreth 3.6 gram fibra, krahasuar me një banane, e cila përmban 3.1 gram. Një mollë përmban pak më shumë fibra, por boronicat kanë 4 gramë më pak sheqer frutash. Për më tepër, rreziku i shtimit në peshë është shumë i ulët me porcione më të mëdha, ndryshe nga disa fruta të tjera, për shkak të numrit shumë të ulët të kalorive. Një filxhan përmban vetëm 84 kalori, ndërsa një filxhan banane ka afërsisht 105.

Studimet novatore kanë zbuluar se ngrënia e një diete me shumë pak kalori, që shkakton rënie të konsiderueshme në peshë, në fakt mund ta zbythë sëmundjen. Boronicat kanë edhe lëndë ushqyese që ndihmojnë disa aspekte të shëndetit. Këto përfshijnë fibra, vitamina C dhe K dhe mangan. Mangani ndihmon trupin të formojë indin lidhës dhe kockat dhe ndihmon në koagulimin e gjakut.

Një përmbledhje e vitit 2023 në revistën Food Production, Processing and Nutrition sugjeroi se polifenolet e përbërjes bimore te boronicat mund të përmirësojnë sheqerin në gjak, dhe ul rrezikun e diabetit.

Zonja Loran sugjeron që boronicat e freskëta, të ngrira ose të konservuara janë të gjitha njëlloj nga aspekti ushqyes. Megjithatë, varietetet e konservuara kanë më shumë gjasa të kenë shurup, i cili përmban sheqer të shtuar.


Gazeta Express

https://www.gazetaexpress.com/cili-e...sasia-e-duhur/

[sirena_adria]

Bajamet janë ushqyese për shumicën e njerëzve, por ato kanë përfitime unike për njerëzit që vuajnë nga diabeti.

Bajamet, shumë të dobishme për njerëzit që vuajnë nga kjo sëmundje kronike! Zbuloni sa kokrra duhet të konsumoni në ditë


Ngrënia e rreth 45 gram bajame ul nivelin e insulinës dhe glukozës.

Ato ulin shanset për diabetin e tipit 2

Bajamet janë të pasura me magnez dhe studimet eksperimentale kanë treguar se marrja e magnezit mund të zvogëlojë rrezikun e një personi për të zhvilluar diabetin e tipit 2.

Janë të mira për zemrën

Bajamet mund të minimizojnë rrezikun e sëmundjeve të zemrës. Kjo është e rëndësishme për njerëzit me diabet, sepse, sipas Shoqatës Botërore të Zemrës, njerëzit me diabet janë në një rrezik më të lartë të sëmundjeve të zemrës.

Bajamet janë të pasura me yndyra të pangopura, e cila është e njëjta lloj yndyre që gjendet në vajin e ullirit, i cili njihet për përfitimet e tij për shëndetin e zemrës. Një porcion me bajame përmban rreth 13 gram yndyrë të pangopur dhe vetëm 1 gram yndyrë të ngopur.

Ky frut i thatë është një rostiçer me shumë kalori, por kur konsumohen me masë (rreth 23-45 gram) nuk kontribuojnë në shtimin e peshës.

Sa bajame rekomandohet për të ngrënë

Është mirë të konsumohen rreth 23 bajame në ditë të cilat përmbajnë 161 kalori, 6 gram proteina dhe 3 gram fibra dietike.


Gazeta Panorama

http://www.panorama.com.al/bajamet-s...umoni-ne-dite/

[sirena_adria]

Ushqimet pa sheqer që mund të hani për mëngjes nëse keni diabet

Kontrolli i glukozës në gjak përmes ushqimit është një nga kujdeset më të rëndësishme që duhet të kryejë dikush që është diagnostikuar me diabet, kjo sepse ai plotëson trajtimin farmakologjik qoftë antidiabetikë oralë ose insulinë.

Një stili jetese të shëndetshëm duhet t’i shtohen edhe zakone të tjera si lënia e duhanit, stërvitja e rregullt dhe gjumi i mirë, respektimi i orarit të pushimit.

Ushqimet pa sheqer që diabetikët mund të hanë

Njerëzit që duan të kontrollojnë nivelet e glukozës në gjak kanë opsione të shëndetshme dhe pa sheqer që mund të jenë të ngjashme me ato që u pëlqejnë shumë.

Dietologët japin disa shembuj të ndryshimeve që mund të aplikohen nga produktet ultra të përpunuara në një version më të shëndetshëm

Pluhuri i ëmbëlsuar i kakaos mund të këmbehet me pluhur të pastër kakao ose karob.

Smoothie me vanilje, çokollatë ose luleshtrydhe me qumësht ose pije me perime dhe natyrale.

Salcice me avokado, humus, ton ose salmon të tymosur.

Drithëra të ëmbëlsuara nga thekon tërshërë ose fara quinoa, drithëra pa sheqer ose granola shtëpiake.

Bukë e bardhë, 100% të grurit.

Reçeli natyral i frutave.

Kos të aromatizuar ose të ëmbëlsuar me kos natyral ose vegjetal.

Kombinimet që mund të bëhen

Një filxhan qumësht dhe pluhur kakao të pastër me quinoa të fryrë ose ndonjë drithër të shëndetshëm.

Tost me grurë integral me feta banane dhe gjalpë kikiriku.

Kos me fara dhe corn flakes.

Tost gruri integral me avokado, djathë të freskët dhe rukola.

Kos me fruta dhe arra.

Tost me tortilla, gjeldeti dhe avokado.

Smoothie qumështi me tërshërë, kakao të pastër dhe banane.

Omëletë me djathë dhe domate qershi.


Gazeta Express

https://www.gazetaexpress.com/ushqim...e-keni-diabet/

[sirena_adria]

Pak Sheqer dhe Shumë Antioksidantë – Mjedrat për Diabetin, Trurin dhe Peshën

Mjedrat janë ndër frutat më të mira e të shijshme që mund të shijojmë gjatë stinës së verës, por edhe në dimër nëse dimë t’i ngrijmë siç duhet.

Përveç shijes, mjedrat janë shumë të pasura në vlera dhe futen në kategoritë e frutave më të shëndetshme të pyllit.

Një filxhan çaji me mjedra ofron 50% të dozës minimale të rekomanduar të vitaminës C.

Kjo vitamin është shumë e rëndësishme për imunitetin dhe shëndetin e lëkurës.

Përveç vitaminës C, mjedrat kanë edhe mangan dhe vitamin K, të rëndësishme për shëndetin e kockave.

Nëse këto nuk mjaftojnë, më poshtë do të mësoni 5 arsye të tjera përse duhet të konsumoni sa më shumë mjedra.

Kanë Pak Sheqer
Mjedrat njihen si një ndër frutat me më pak sheqer. Për shembull, një mollë mesatare ofron 20 gramë fruktozë ndërsa një filxhan çaji me mjedra ofron 5 gramë fruktozë.

Kanë Shumë Antioksidantë
Mjedrat janë tejet të pasura me antioksidantë të cilët janë të dobishëm kundër sëmundjeve të zemrës, kancerit, diabetit dhe mbipeshës.

Për më tepër, antioksidantët luftojnë inflamacionin që lidhet direct me plakjen e parakohshme por edhe qelizat tumorale.

Shumë Të Mira Për Rënien Nga Pesha
Një filxhan çaji me mjedra ofron 8 gramë fibër, ose një të tretën e dozës minimale ditore të rekomanduar nga ekspertët.

Fibra ju mban të ngopur gjatë dhe pengon luhatjet e sheqerit.

Ajo i bën shumë mirë sistemit tretës dhe mikrobiomës së stomakut.

Të Mira Për Diabetikët
Konsumi i rregullt i mjedrave ul sasinë e nevojshme të insulinës për mbajtjen nën kontroll të nivelit të sheqerit në gjak.

Studimet konfirmojnë se njerëzit që konsumojnë dy filxhanë çaji me mjedra në ditë kanë nivele më të ukëta të sheqerit në gjak.

Të Shkëlqyera Për Trurin
Mjedrat janë ndër frutat më të mira për shëndetin e trurit dhe kujtesën.

Këto veti i atribuohen nivelit të lartë të antioksidantëve të cilat eliminojnë toksinat që rrezikojnë funksionet e trurit.


/AgroWeb.org

https://agroweb.org/ne-natyre/prodhi...in-dhe-peshen/

[sirena_adria]

Tre Sallata Ideale për të Mbajtur Diabetin nën Kontroll

Sallatat mund të konsiderohen shumë mirë si një ‘minierë ari’ për sa i përket ushqyesve që u nevojiten diabetikëve për të ulur sheqerin në gjak.

Në këtë artikull të AgroWeb.org do të mësoni tre receta sallatash të shijshme dhe të lehta në përgatitje që u përshtaten më së miri nevojave të diabetikëve.

Sallata Me Spinaq Dhe Hudhër

Përbërësit e sallatës:
6 filxhanë çaji me gjethe të vogla spinaqi
2 thelpinj hudhër të grirë
1 lugë gjelle me uthull të bardhë molle
Çerek luge me piper të zi
Një majë luge çaji me kripë
Qepë e kuqe
Një lugë e gjysmë gjelle me vaj ulliri.
AgroWeb.org sugjeron vaj ekstra të virgjër.

Përgatitja e sallatës:
Hidhini të gjithë përbërësit përveç qepës dhe spinaqit në një tas sallate.

Përziejini mirë me lugë druri dhe më pas shtoni qepën e grirë dhe gjethet e spinaqit.

Përziejini sërish dhe servireni sallatën menjëherë më pas.

Sallata Me Rrepa Dhe Kastravecë

Përbërësit e sallatës:
200 gramë kastravecë
Vaj ulliri
90 gramë rrepa të kuq
10 gramë ullinj të zinj
Uthull dhe kripë

Përgatitja e sallatës:
Lajini rrepat e kuq me ujë të bollshëm dhe pritini.

Lajini kastravecat, qërojini dhe më pas pritini në feta të holla rrethore.

Të gjithë përbërësit e mësipërm hidhini në një tas sallate dhe përziejini mirë.

Servireni sallatën menjëherë.

Sallata Me Kastravecë

Përbërësit e sallatës:
1 kastravec
2 lugë gjelle me fara të pjekura susami
Çerek filxhani kafe me uthull
Një majë luge çaji me kripë

Përgatitja e sallatës:
Lajini dhe qërojini kastravecët.

Prijini për së gjati dhe hiqini farat e tyre duke përdorur një lugë.

Më pas fetat e kastravecave vendosini mbi letrën e kuzhinës për të hequr lagështinë e tepërt.

Në një tas sallate përzieni kripën, uthullën e përbërësit e tjerë dhe në fund shtoni kastravecët bashkë me farat e susamit.

Përziejini mirë dhe servireni sallatën menjëherë.


/AgroWeb.org

https://agroweb.org/ne-kuzhine/ushqi...etin-kontroll/

[sirena_adria]

Diagnoza e Paradiabetit tek të Moshuarit – Çfarë Thonë Ekspertët për Rrezikun që Paraqet?

Ndërsa trupi ynë plaket, rreziku për t’u prekur nga diabeti i tipit 2 rritet.

Për të mbajtur nën kontroll diabetin, sitili i jetesës dhe mënyra e të ushqyerit luajnë rol kryesor.

Por ndonjëherë nevojiten edhe medikamente, për të zvogëluar rrezikun e komplikimeve të mundshme.

Si diabeti ashtu edhe paradiabeti diagnostikohen në bazë të rezultateve të testeve laboratorike.

Është jashtëzakonisht e rëndësishme të kryen këto analiza jo vetëm për t’i paraprirë diabetit nëse jeni në fazat fillestare të tij, por sepse vetëm kështu mund të parandaloni ose të paktën të frenoni zhvillimin e sëmundjes.

Përmirësimi i regjimit ushqimor dhe aktiviteti fizik i rregullt, janë vërtetuar të ndihmojnë në përmirësimin e kësaj gjendjeje shëndetsore.

Por ajo ç’ka është ende e paqartë për ekspertët e shëndetit është shfaqia e paradiabetit, një fazë që i paraprin zhvillimit të diabetit të tipit 2, në moshë të thyer. Dhe se cilat janë pasojat e shfaqjes së paradiabetit tek të moshuarit?

AgroWeb.org duke u bazuar në studimet e fundit të kryera rreth kësaj çështjeje, ju njeh më poshtë me përfundimim.

A janë pasojat e diagnostikimit me prediabet të rrezikshme edhe për të moshuarit?

Hulumtimet e fundit kanë dhënë disa informacione interesante për këtë çështje.

Në studimin ku AgroWeb.org u bazua, u analizuan rreth 3,412 individë nga një grup me moshë 71 vjeç e lart. Studiuesit zbuluan se ata me paradiabet, kishin më shumë gjasa të qëndronin në këtë gjendje të ndërmjetme ose të riktheheshin në normalitet.

Dhe më pak se 12% e njerëzve pjesëmarrës në këtë studim kaluan nga paradiabeti në diabet.

Sipas ekspertëve të shëndetit, këto gjetje tregojnë se të kesh paradiabet në moshë të thyer nuk duket të jetë edhe aq e rrezikshme.

Sipas tyre, kjo gjendje paraqet një rrezik më të lartë për të çuar në diabet të rinjtë dhe individët e moshës së mesme.

Prandaj ata theksojnë të tregohet kujdes dhe të kryhen anlizat e duhura sidomos nga personat që vuajnë nga sëmundje të cilat mund të shkaktojnë edhe diabet.


/AgroWeb.org

https://agroweb.org/shendet/diagnoza...un-qe-paraqet/