Skandal,barnat e spitalit shiten ne farmaci!

[ALBA]

DREJTORESHA E FARMACIVE DENONCON

Odeta Halil
TIRANE

Skandal me barnat e pacientëve në spitale. Akuzat e këtyre të fundit, të thëna nën zë herë pas here, dje morën një konfirmim zyrtar. Autoritetet e shëndetësisë pohuan se ilaçet përfundojnë në farmacitë përreth spitalit në mënyrë krejt të paligjshme, ku tregtohen me çmime tejet të kripura. Drejtoresha e Drejtorisë Farmaceutike në Ministrinë e Shëndetësisë, Elida Çollaku, tha për Gazetën se po merren masa për të ndalur manipulimet e bluzave të bardha në kurriz të të sëmurëve.

Onkologjiku
Eshtë spitali më i përfolur në këtë drejtim, duke u bërë disa herë dhe objekt i shkrimeve tona. Ndoshta dhe për faktin që kura e të shtruarve në këtë spital ka natyrë specifike dhe krejt të dallueshme nga antibiotikët dhe qetësuesit që zotërojnë specialitetet e tjera. Dhe për një arsye tjetër. Medikamentet e të sëmurëve me tumore, që më shpesh identifikohen me ciklet e kimioterapisë, klasifikohen te më të shtrenjtat e tregut të barnave, nga 9.000 deri në 35.000 lekë të reja. Kjo kurë përsëritet çdo 21 ditë dhe mungon thuajse krejtësisht në spital. Në të gjitha sondazhet që Gazeta ka kryer me pacientë të ndryshëm, të rinj a të gjendur më shpesh në Onkologjik, rastet kur mjekimi sigurohej falas nga spitali kanë qenë shumë të pakta.

Farmacitë
Ilaçet e pacientëve me tumore i gjen vetëm në farmacitë rreth spitalit. Ciklet e kimioterapisë të afërmit e të shtruarve i psonisin vetëm aty dhe askund tjetër. Gjatë rrugës tej kangjellave të QSUT-së, dyqanet e barnave numërohen çdo 20 metra. Kjo është çështje më vete. Specialistët e Qendrës së Kontrollit të Barnave kanë pohuar për Gazetën se shpeshtësia e këtyre farmacive është në kundërshtim me ligjin, sipas të cilit farmacitë duhet të jenë larg njëra-tjetrës jo më pak se 200 metra.

Ministria
"Ilaçet e Onkologjikut janë vetëm spitalore dhe nuk duhet të gjenden në farmaci. Kështu ndodh në çdo vend të botës dhe këtë po përpiqemi të arrijmë edhe ne". Drejtoresha e Drejtorisë Farmaceutike tha se së shpejti mbi paketimet e barnave do të gdhendet shënimi hospitaliere, domethënë për spitalet dhe për praninë e tyre në farmaci do të merren masa. "Shpresojmë që me këtë në mos ta eliminojmë të paktën të minimizojmë korrupsionin", tha më tej Çollaku. Shenjat dalluese, që do të klasifikojnë dhe grupe të tjera barnash, do t'u shërbejë inspektorëve të kontrollit të barnave për të identifikuar bashkëpunëtorët, por në radhë të parë pacientëve dhe të afërmve të tyre që do të kenë një provë më shumë në dorë për të ngritur zërin e për të denoncuar.


Rrëfimi i njërit nga pacientët e Onkologjikut

"Do shes lopën e viçin për ilaçet"
Po të mos qe dje dita e fundit në spital, ndoshta s'do të kishte folur. Kur Tahir Kacaj të rikthehet pas ca ditësh, siç bëjnë gjithnjë pacientët e Onkologjikut, nuk do kujtohet njeri për rrëfimin e tij. "E di ç'm'ka ngel me bo? Me shit lopën me gjithë viç. A s'a gjinaf me i lan fmit pa tamël? M'thuej!". Përlotet. Gruaja mundohet ta qetësojë. Veç ai të bëhet më mirë, po s'ka gjë. Kura e fundit i ka kushtuar 35 mijë lekë të reja, që i përballoi me fitimet e siguruara nga prodhimet e vjeshtës, banojnë në një fshat të Burrelit. I duhet ta përsërisë. E ka kaluar madje afatin. "E si shkuen dit't. Ku me i gjet ma paret? Si sot tre javë i kam ble barnat. Si rregull jan nji herë n'21 dit", thotë me dhembje.


Kur ka gjithnjë një pretekst…

E pamundur për të gjetur e për të ndëshkuar përgjegjësit e këtij skandali. Autoritetet e shëndetësisë u përgjigjën vetëm me masat që do të përmbushin -kushedi se kur- këtë vakum ligjor e administrativ në menaxhimin e medikamenteve spitalore. I vetmi reagim që do të shërbejë dhe për të ndrequr. A do të mjaftojë? Për identifikim autorësh e masa kundër tyre, që ndoshta do të shërbenin dhe si mësim për të tjerët nuk u fol, megjithëse ministria e Shëndetësisë ka përgjegjësinë për t'i çuar para drrejtësisë këta persona. Siç ndodh rëndom preteksti identifikohet me mungesën e denoncimeve konkrete, ashtu siç u qetësua zhurma e konkurseve për pranimet në universitete, ashtu siç justifikohet Urdhri i Mjekut, në dyert e të cilit rrallë trokasin të ankohen për doktorët. U mbetet pacientëve të luftojnë për të drejtat e tyre. Të mbledhin fuqitë e t'i mposhtin dhimbjet e frikërat, kur të mendojnë si i siguruan paratë për ilaçet, si firuan kursimet e borxhet… përndryshe ngurrimi do t'u rëndojë dhe më ndërgjegjen e stresi sëmundjen. o.h

[angeldust]

A eshte mbajtja dhe trajtimi i te semureve ne spital ne Shqiperi falas?

Ncncncnc... nqs. eshte keshtu, prandaj edhe ata qe korruptohen dhe shesin ilacet jashte spitalit i trajtojne keto lloj barnash sikur jane jo te mamase, por te njerkes.

Sistemi administrativ spitalor ne Shqiperi me duket se eshte ende me metodat e kohes e monizmit. Njerezit per mendimin tim duhet te kene njefare sigurimi shendetesor qe te trajtohen ne spital. Nuk mund te vazhdohet me me falas.

Atyre rrezik me shume po ju kushton te blejne barnat ne tregun e zi, sesa do t'ju kushtonte njefare tarife e sigurimit shendetesor. Te mbash spitalet e gjithe Shqiperise thjesht me taksat e pergjithshme qe njerezit i paguajne shtetit nuk me duket aspak praktike dhe efektive. Aq me teper qe spitalet e pergjithshme ne Shqiperi jane te gjitha shteterore dhe vetem ne ndonje klinike te specializuar te vogel private mund te gjesh sherbim cilesor te specializuar, por edhe keto jane teper te rralla.

Qe sistemi shendetesor ne Shqiperi te perparoje duhet se pari te ulet korrupsioni dhe te denohen fajtoret, dhe se dyti fonde. Keto fonde duhet te vijne nga nje lloj sigurimi shendetesor i nje lloji apo nje tjetri, sepse me fondet e kufizuara te shtetit nuk kam besim se mund te permiresohet gjendja spitalore.

[angeldust]

Plus qe keto ilacet e onkologjikut, pak se po shiten me cmime te larta ne "tregun e zi", por edhe administrimi i tyre i pakontrolluar jashte spitalit dhe mbikeqyrjes se specialisteve, ju ul efikasitetin.