Tritol pallatit te kryekirurgut te Spitalit Ushtarak

[Albo]

Shpërthimi nuk ka shkaktuar viktima, por ka krijuar një gjendje paniku tek të gjithë banorët e pallatit 6 katësh, në rrugën 'Asim Vokshi', pas Ministrisë së Drejtësisë. Myzafer Brati për orë të tëra shoqërohet nga policia. "Unë nuk kam armiq" ka qenë shprehja e vetme e artikuluar nga ai.

Shpërthim në shtëpinë e kryekirurgut të Spitalit Ushtarak

Kryekirurgu i Spitalit Ushtarak ka rënë dje pre e një atentati, që fatmirësisht ka përfunduar pa viktima. Një sasi e konsiderueshme
tritoli është vendosur mëngjesin e djeshëm përpara derës së apartamentit, ku banon Myzafer Brati, kryekirurg në Spitalin Ushtarak. Shpërthimi ka qenë i fortë dhe ka tronditur pallatin 6 katësh, pranë ministrisë së Drejtësisë. Policia ka thënë se po heton mbi shkaqet, por pa arritur në një konkluzion të saktë. Edhe vetë kirurgu Brati, i cili nuk ka qenë i disponueshëm për median, mësohet të ketë thënë para policisë se nuk ka armiq dhe se nuk di se kush mund të ketë bërë atentatin. Ai është munduar të heqë vëmendjen nga ndonjë atentat që mund të jetë bërë për shkak të profesionit të tij si mjek.

"Unë nuk kam marrë asnjë kërcënim deri më sot dhe jam i sigurt se nuk kam armiq", është shprehur kirurgu Myzafer Brati. Mjeku është pyetur për një kohë të gjatë nga organet kompetente. Për një kohë të gjatë, me porosi edhe të policisë, ai ka qenë i rezervuar për gazetarët.


Shpërthimi

Ngjarja e rëndë ka ndodhur rreth orës 04.30 të mëngjesit të djeshëm, para apartamentit ku banon mjeku Brati, në rrugën 'Asim Vokshi', Lagje 50, shumë afër Ministrisë së Drejtësisë. Eksplozivi është vendosur para derës së apartamentit, dhe ka krijuar çarje të mëdha në të gjithë pallatin gjashtë katësh të ndërtuar në kohën e sistemit diktatorial. Fuqia shpërthyese e tritolit, ka bërë që të krijohet një gropë e madhe në sheshpushimin e katit të tretë, para derës së kirurgut. Ndërsa rrezatimi i shpërthimit ka bërë që të krijohen të çara të mëdha edhe në muret e pallatit. Sipas grupit të ekspertëve tronditja që ka pësuar pallati ka bërë që të thyhen edhe shumë xhama. Vetë familja e kirurgut Myzafer Brati, është ndier e pushtuar nga frika e ndonjë atentati, që nuk e prisnin. I gjithë pallati i zgjuar nga zhurma e madhe që ka lëshuar shpërthimi, është mbledhur në vendin ku ishte vënë eksplozivi. Muret e shtëpisë dhe pjesë nga tavani kanë rënë nga tronditja e madhe. Por ajo që është e pashlyeshme në kujtesën e familjes së mjekut, është frika e madhe që kanë përjetuar. Një nga të afërmit e kirurgut thotë se menjëherë ka njoftuar policinë, e cila nuk ka vonuar të vijë. Menjëherë janë marrë në pyetje shumë banorë të pallatit, të cilët janë shprehur se kanë dëgjuar vetëm shpërthimin e madh dhe nuk dinë se kush mund të ketë bërë këtë akt. Biseda e kirurgut Brati me policinë nuk është bërë e ditur në detaje dhe duket se fshihet diçka shqetësuese pas këtij akti kriminal.


Fqinjët

Ata që e kanë përjetuar dhe nuk dinë se si të përgjigjen, - kur i pyet për atentatin që përfundoi pa viktima, - janë fqinjët e shënjestrës së këtij veprimi. Ata thonë se janë ngritur të terrorizuar, nga shpërthimi i fuqishëm. Menjëherë kanë shkuar për të ngushëlluar e për të qetësuar fqinjin e tyre, por frika e përjetuar është ende e pranishme. "Ne kemi vite që jemi komshinj me doktor Myzaferin, dhe nuk e di se si mund t'i vihet tritol atij", thotë një zonjë që sapo ka marrë fëmijët nga shkolla dhe kthehet për në shtëpi. Ndërsa një adoleshente që banon në të njëjtin pallat thotë "Jam zgjuar e tmerruar rreth orës 04.00, pas një shpërthimi dhe tronditjeje të madhe të pallatit. Në fillim m'u duk si tërmet, por shpërthimi më bindi për diçka tjetër. Menjëherë kemi zbritur për të parë se kishte ndodhur dhe pamë që një bombë ishte vënë para shtëpisë së doktorit", përfundon ajo. Askush nga fqinjët nuk ka qenë në gjendje të japë një përgjigje se kush mund të ketë bërë këtë akt.


Kolegët

Kolegët e tij në Spitalin Ushtarak janë shqetësuar, kur kanë dëgjuar për fatkeqësinë e kolegut të tyre. Ata kanë thënë për gazetën se ky është një akt i turpshëm e i rrezikshëm mbi uniformat e bardha. Kolegët e Bratit kanë kërkuar ndërhyrjen e shpejtë të policisë dhe organeve të tjera kompetente për të ndëshkuar sa më shpejt organizatorin e këtij veprimi. Gjithashtu kanë kërkuar rritjen e sigurisë ndaj personave që janë të ekspozuar përballë rreziqeve të ndryshme.



Kirurgu nuk përgjigjet

Gjatë gjithë ditës së djeshme, kryekirurgu i Spitalit Ushtarak nuk ka qenë i disponueshëm për të folur për median. Ai ka thënë se kjo ndodh pas një tronditjeje të madhe që ka marrë nga shpërthimi i tritolit. Por mesa duket e vërteta e mosdaljes në media e kirurgut ka të bëjë me një udhëzim që i ka dhënë policia dhe me frikën e kuptueshme të krijuar pas shpërthimit. Policia ka qëndruar për një kohë të gjatë me kirurgun, ku ka sqaruar shumë elementë të dyshimtë në këtë akt. Në Spitalin Ushtarak ka qenë shumë e vështirë për të marrë një listë pacientësh që ka vizituar kohët e fundit kryekirurgu. Bëhet e ditur se policia e kryeqytetit ka në dorë të gjithë emrat e vizituar nga Myzafer Brati gjatë këtij viti.

Dyshimet mbi atentatin, megjithëse nuk ka ende një motiv zyrtar janë shtrirë gjerë. Duke bërë një lidhje edhe me atentatin e djeshëm, ku u dogj makina e një polici në Vlorë, i cili ishte dhe kushëriri i Fatbardh Likskendajt, policit që u arrestua disa ditë më parë për ndihmën që i ka dhënë Altin Arapit për t'u pajisur me një pasaportë me emrin e rremë Petrit Bejzade.