Manipulimet e zgjedhjeve!

[Albo]

KZQV: 65 kutitë e para, vetëm 12 të rregullta

Mësohet se edhe në 12 kutitë e votimit që janë pranuar ka pasur parregullsi skandaloze. Në shtatë prej tyre mungojnë procesverbalet, në pesë prej tyre mungon kodi i sigurisë, në dy prej tyre mungojnë firmat e komisionerëve, në dy të tjera tabelat e rezultateve janë dhënë dorazi, ndërkohë që duhej të ishin brenda kutive, në nëntë prej tyre nuk ka fletë të pavlefshme, në tetë kuti mungojnë fletët e papërdorura, kurse në pesë prej tyre mungojnë fletët e dëmtuara. Tabela e rezultateve e qendrës 2007 ndodhet brenda kutisë së qendrës 2002

KZQV e Tiranës deri tani ka numëruar 65 kutitë e votimit që kanë ardhur nga njësitë bashkiake numër 4 dhe 11. Mësohet se nga këto kuti që janë numëruar, vetëm 12 kanë qenë të rregullta dhe 53 të tjera nuk kanë plotësuar standardet ligjore. Nga numërimi që iu është bërë këtyre kutive, rezulton se Rama ndodhet përpara me një diferencë prej rreth 10 votash. KZQV e Tiranës gjendet mes dy zjarresh. Nga njëra anë kërcënimet e vazhdueshme të KQZ për administrim të nxjerrejs së rezultateve nga ky institucion dhe nga ana tjetër pavlefshmria e votimeve në 70 për qind të qendrave të votimit. Edhe pse puna në KZQV nuk është bllokuar me këmbënguljen e anëtarëve të opozitës në komision, atje ka një dukuri që është e jashtëzakonshme. Rreth 70 përqind, në mos më shumë e kutive të votimit janë manipuluar nga komisionerët socialistë. "Tashmë ne kemi faktet që provojnë se në orën 5 pasdite të së dielës, shtabi i Edi Ramës lëshoi falangat, sepse ishte i pasigurt se mund të fitonte edhe me masakrën që u bë me listat. Është gjurma e tmerrshme që ka lënë ky operacion i falangave, që e bën nul rezultatin në Tiranë. Dhe kjo verifikohet në KZQV e Tiranës. Dua të sqaroj edhe njëherë që listat zgjedhore janë përgjegjësi e komunave, e bashkive, e Ministrisë së Pushtetit Lokal dhe e KQZ-së," është shprehur përfqësuesi i Spartak Ngjelës në KZQV. Me gjithë këto parregullsi nuk është fare e çuditshme që KZQV e Tiranës të deklarojë rezultatin përfundimtar vetëm në bazë të atyre kutive të votimit që kanë qenë të rregullta me process-verbale brenda tyre dhe me dokumentacion të rregullt.

[manoklla]

Nje pyetje kam, ky eshte forum diskutimesh dhe debati apo forum ku postohen lajmet e gazetave? Nese vetem do lexojme gazeta,a mund te na japin administratoret adresat online te gazetave shqiptare qe ti lexojme vete drjtperdrejt lajmet? Faleminderit.

Persa i perket 'manipulimeve', e tha vete Ismail Kadareja qe 'nuk ka pasur manipulime ne Tirane". Kjo deklarate e tija ndjek ate te disa muajve me pare ku shprehej pozitvisht per punen e Edi Rames. Ja pra qe paska intelektuale shqiptare qe perkrahin Edi Ramen. Dhe jo intelektuale dosido e te tipit Inva Mula e laraska si ajo, po kapacitete si I. Kadare.

[Albo]

Miri Hoti pranon: Listat nuk dolën nga bashkia

Kryebashkiaku ka pranuar se kanë dorëzuar listat e votimit që janë përdorur gjatë vitit 2000 dhe që kanë qenë të rregullta, por kur janë bërë shtesat nuk është vënë në dijeni kjo bashki, për rrjedhojë dhe listat nuk kanë firmën e bashkisë. Këtë fakt e ka pohuar dhe shefi i zyrës së gjendjes civile në këtë bashki

Pasi struktura të Partisë Socialiste në qytetin e Durrësit u shprehën se do të kërkojnë fajtorin për problemet me listat në zyrat e gjendjes civile dhe në bashki, këta të fundit kanë lëshuar akuzën e rëndë që implikon direkt Komisionin Qendror të Zgjedhjeve në hartimin e listave. Vetë ish-kryetari i kësaj bashkie është shprehur se në hartimin e atyre listave nuk ka pasur gisht kjo bashki dhe se ato nuk kanë firmën e asaj, në mënyrën që e parashikon ligji. Hoti ka deklaruar se listat janë dërguar nga kjo bashki, por në momentet e shtesave nuk është marrë mendimi i tyre. "Ne kemi bërë listat që shkojnë deri në 97 mijë votues dhe për këtë janë përdorur listat e vitit 2000, të cilat nuk kanë pasur probleme. Por më pas kur është rënë dakord që me shtesat e bëra, ato do të shpërndaheshin në disa qendra të tjera votimi, ne nuk jemi vënë në dijeni." Të njëjtin fakt e ka pohuar dhe shefi i zyrës së gjendjes civile në këtë bashki, A. Duka. Struktura që ai drejtonte ishte akuzuar më shumë nga drejtues të PS për problemet në listat zgjedhore. Mësohet se dhe kjo akuzë që kanë hedhur drejtuesit e kësaj partie ka qenë një mënyrë për të shkarkuar përgjegjësitë. Duka ka pranuar që listat nuk janë hartuar në zyrat e gjendjes civile, duke iu referuar gjithmonë listave që janë shfaqur ditën e votimeve. Në këtë mënyrë Duka ka shkarkuar nga përgjegjësia punonjëset e kësaj zyre. Ai gjithashtu ka folur dhe për çertifikatat false që janë lëshuar gjatë ditës së votimit. Ato u shpërndanë për militantët socialistë, të cilët u pajisën me to për të votuar në emër të emigrantëve të shumtë të këtij qyteti. Gjithashtu loja e çertifikatave u organizua dhe për të gjithë ata banorë të fshatrave që të kishin mundësi për të votuar në qytet. Sipas tij nga zyrat e gjendjes civile nuk janë shpërndarë çertifikata të falsifikuara. Duka është shprehur se duhet të jetë policia ajo që të hetojë saktësinë e tyre apo edhe falsitetin. Ky është një deklarim që vjen menjëherë pasi opozita ka hedhur akuza të shumta për manipulim të votave në këtë qytet. Ata kanë deklaruar se listat që kanë dalë në ditën e votimit nuk janë të ngjashme me listat paraprake, dhe se aty nuk janë bërë përmirësime, por janë hequr dhe lëvizur nga qendrat e tyre, shumë nga votuesit e identifikuar si votues të djathtë. Mësohet se në këtë qytet janë hequr nga listat e votimit një numër i konsiderueshëm votuesish, që kanë ndikuar dhe në rezultatet përfundimtare. Pohimi i një fakti të tillë lidhur me listat duket se është vetëm një pjesë e atij skandali që ka ndodhur me to në ditën e votimit. Kodi Zgjedhor parashikon se duhet të jenë titullarët e bashkisë ato që duhet të firmosin listat, por një gjë e tillë nuk ka ndodhur.

[Albo]

Durrës: Qindra qytetarë të padënuar, emrin në listat e votimit në burg

Një nga faktet e veçanta që ka provuar se emrat e votuesve janë shpërndarë me komanda kompjuterike, është ai se shumë nga familjet e Durrësit duhej të votonin në burg, atje ku nuk kanë qenë asnjëherë

Faktet

Rreth 19 500 persona nga shqyrtimet e deritanishme rezultojnë se u është ndryshuar emri në listat e votimit.

40 persona nuk kanë patur fare ditëlindjen e shënuar në listat e votimit.

Po 40 persona kanë patur të shënuar në ditëlindje vitin 0.

Për 42 persona ditëlindja është spostuar në vitin 1900

Gjithsej 202 persona që nuk kanë qenë të burgosur, kanë patur emrin në qendrën e votimit të burgut.

Partia Demokratike, dega Durrës ka vazhduar që të bëjë publike faktet që kanë të bëjnë me listat e manipuluara që janë përdorur në këtë qytet. Sipas shifrave më të fundit që janë bërë publike nga kjo parti, në qytetin e Durrësit 19 423 personave u është ndryshuar emri në listat e votimit duke krijuar një kaos total. Në lista kanë rezultuar dyzet persona që nuk kanë patur fare ditëlindje, ndërkohë që po për dyzet persona në kutinë e datëlindjes shënohej se ata kishin lindur në vitin 0000, ndërkohë që për dyzet e dy persona datëlindja është shënuar në vitin 1900. Ajo që ka bërë më shumë përshtypje nga shqyrtimi i listave që janë përdorur për votime ditën e diel dhe që ka vërtetuar se në lista janë bërë një mish-mash i vërtetë dhe se emrat janë shpërndarë me komanda të veçanta përzierje, është se në qendrën e votimit të burgut janë gjetur emra të personave që nuk kanë qenë kurrë aty. Por fakti që ka shtuar më shumë dyshimet mbi këtë përzierje, është se në burg kanë patur qendrën e votimit familje të tëra. 202 personave u është dashur që të gjenin mundësinë e tyre për të hyrë në burg dhe për të shprehur verdiktin e tyre sa për një ditë dhe pastaj të largoheshin. Një nga këto familje, ajo Allamani ka bërë prezent vetë emrin në listat e burgut e shqetësuar jo vetëm për të drejtën e votës që i është mohuar por edhe me dyshime se përse emri i tyre ndodhej në këtë listë. Ndërkohë që PD e Durrësit ka bërë të ditur se po mbledh fakte të tjera skandaloze, të cilat provojnë masakrën që i është bërë procesit zgjedhor në Durrës.

[beni67]

Une qe po iu shkruaj jam nje emigrant , megjithese me zemer jam ne Shqiperi fizikisht jam larg dhe duke qene larg e kemi te veshtire te japim nje mendim te vlefshem per sa po ndodh ne vendin tone. Une perpiqem te informohem sa me mire dhe vetem kaq.
Ja jam ulur para kompjuterit dhe po lexoj..... Disa prej anetareve te forumit na bejne predikime na japin mend dhe teorizojne deri ne pambarim. ( permend ketu Leshatorin, Pianistin, Korkodilin etj....) Disa prej tyre kalojne ne fyerje duke share persona , apo edhe grupe te tere njerezish ( gje qe nuk duhet te lejohet ne kete forum ) Nga ana tjeter po lexoja faktet qe na sjell ketu Albo . Duket mire diferenca ndermjet tyre. Duke perfunduar doja te falenderoja Albon per informacionin qe na jep per zgjedhjet.

[Albo]

Postuar më parë nga manoklla
Nje pyetje kam, ky eshte forum diskutimesh dhe debati apo forum ku postohen lajmet e gazetave? Nese vetem do lexojme gazeta,a mund te na japin administratoret adresat online te gazetave shqiptare qe ti lexojme vete drjtperdrejt lajmet? Faleminderit.

Persa i perket 'manipulimeve', e tha vete Ismail Kadareja qe 'nuk ka pasur manipulime ne Tirane". Kjo deklarate e tija ndjek ate te disa muajve me pare ku shprehej pozitvisht per punen e Edi Rames. Ja pra qe paska intelektuale shqiptare qe perkrahin Edi Ramen. Dhe jo intelektuale dosido e te tipit Inva Mula e laraska si ajo, po kapacitete si I. Kadare.

Vetem budallai diskuton pa u informuar me pare mbi situaten dhe pa u njohur me te dy anet e medaljes. Forumi informon dhe le vend edhe per komentet e anetareve mbi lajmet, pasi jo me kot e ka titullin "Tema e shtypit te dites".

Sa per prononcimet e njerezve te ndryshem, ato jane baraz me zero perpara ligjit, pasi zgjedhjet nuk behen per te dhene mendim Kadare apo kushdo se kush duhet ti fitoje, por per te dhene verdiktin e tyre gjithe shqiptaret.

Ne vend qe te shqetesoheni qe shqiptareve u mohoet e drejta kushtetuese per te hedhur voten e tyre (pak rendesi ka partia apo kandidati), ju shqetesoheni per "rezultatet". Me kete tregoni se sa pak kulture demokratike gezoni me komentet qe beni.

Albo

[Pianisti]

Edhe dicka tjeter me mbishkrimin No Coment

E Shtune, 18 Tetor 2003


HIMARA, ZBULOHET E FSHEHTA E KOMPROMISIT PD DHE PBDNJ

Ne Himare eshte cilesuar si mjaft tinezare marreveshja midis dy partive qe bene luften per kandidatin Vasil Bollano. Nje deshmitar, mjaft i vetedijshem ne ato cka deklaruar ne prokurori, ka theksuar se kjo marreveshje nuk kishte te bente thjesht me mbeshtetjen e

kandidatit per kryetar bashkie. Por se ajo shtrihej edhe me tej. Keshtu, sipas logjikes se veprimeve qe shpreh ky qytetar, Partia Demokratike do t'i jepte fitoren kandidatit per kryetar bashkie, kurse Partia e Bashkimit per te Drejtat e Njeriut dhe Omonia, do t'i jepnin fitoren kandidatitper deputet te Partise Demokratike ne legjislaturen e ardhshme. Eshte ky shkaku, i cili mbahet fshehur prej krereve te Partise Demokratike te distancohen nga revolta ekstremiste e Himares. Per kete arsye, organi i akuzes do te therrase me cilesine e deshmitareve kryetarin e pergjithshem te PBDNJ-se Vangjel Dule dhe kryetarin e Partise Demokratike te Himares Llazari. Kjo do te behet jo thjesht per te deshmuar, por edhe per t'u ballafaquar me deshmite dhe provat e shumta, te cilat tashme kane provuar skenarin e zi te mbeshtetur nga qarqe te caktuara.

Z.Luka

Marre nga KOHA JONE - E perditshme e pavarur, 18. 10. 03

[ALBA]

Skënder Barçi i shkruan nipit të tij Emin Barçi

Si u masakruan listat zgjedhore në Durrës

Duke ndjekur një debat televiziv mes z.Bamir Topi dhe nipçes tim Emin Barçi, ndjeva një revoltë dhe zemërim kur dëgjova këtë të fundit që të thoshte se ishte kurioz të dinte qoftë edhe një emër se kush nuk kishte votuar pasi nuk kishte pasur emrin. Shumë nga shikuesit ndoshta nuk kanë ndier atë që ndjeva unë ato çaste. Atyre edhe mund t`iu ishte hequr vota, por askush nga të afërmit nuk po sillej si nipi im. Para se të vërtetoj gënjeshtrën e tij dhe t'i them dy fjalë dua të tregoj se çfarë më ka ndodhur mua në listën e votimit.

Unë i dashur nipçe jam Skënder Irfan Barçi, xhaxhai yt, ish i burgosur politik nga viti 1960 deri në vitin 1978 dhe më pas i internuar deri më 1990. Gëzoj statusin e të persekutuarit që ju e dini mirë dhe banoj në një pallat në lagjen 18 në Durrës, që njihet si pallati i ish-të persekutuarve politik. Nuk kam ndërmend të flas për aktivitetin tim politik pas 1990 si nismëtar i krijimit të PD në Sukth dhe një nga të parët në Durrës. Ti i di këto nipçe. Para dy muajsh u interesova për emrin tim në listat paraprake dhe mësova se emri im nuk ishte. Me 13 shtator jam paraqitur në komunë tek komisioni që merrej me riparimin e listave dhe kam kontaktuar me z. K.Plangarica, të cilit i kam vënë para, sipas ligjit, të gjithë dokumentacionin dhe një kërkesë për t'u regjistruar në listat e votimit. Më pas jam paraqitur në KZQV e Durrësit ku jam interesuar për emrin tim. Kam marrë përgjigjen se emri ishte dërguar dhe pritej të dilte në listat e riparuara që do të ishin edhe përfundimtare. Kontakti i fundit ka qenë me datën 10 tetor në KZQV ku kam marrë përgjigje se emri im ishte në listë dhe do të votoja aty ku kam votuar edhe herë të tjera në qendrën 1441. Por ditën që shkova të votoj nuk e gjeta emrin. Protestova po më nxorën jashtë. Ti nipçe kërkove një emër dhe unë po të them se jam edhe unë, xhaxhai yt, Skënder Barçi, që mungoj në listat zgjedhore. Që ti të jesh i qetë, edhe nëse nuk e beson xhaxhain, po të jap edhe këto emra që ashtu si unë janë bashkëvuajtës të diktaturës dhe nuk kanë mundur të votojnë tani. Familja e Lutfi Varroshit 2 vetë, familja Dakoli 2 vetë, familja Shehu, familja Ylli Zalla 4 vetë, familja Jorgo Popa 2 vetë. Familja e nderuar Popa që u fut në ambasadën italiane në kohën e diktaturës, pra familja Popa 4 vetë e së bashku me ne edhe A. Baroti, S. Keçi, z. Koka - të gjithë këto banorë të pallatit ku banoj edhe unë. Për 30 vjet xhaxhait tënd i hoqën të drejtën e votës, pasi në pushtet ishte komunizmi. Ti ishe i vogël dhe nuk e kuptoje pse xhaxhait tënd i ishte hequr e drejta e votës. Tashmë që je në një pozicion të kundërtën me xhaxhain, ti e di mirë përse ai dhe bashkëvuajtës të tij nuk u lejuan të votojnë. Por nëse në diktaturë të hiqet e drejta e votës, tashmë ti ke dalë në mbrojtje të atyre veprimeve mafioze që kërkojnë të mbajnë pushtetin edhe duke përsëritur diktaturat. Me pozicionin që ke ti dhe partia që i shërben, mua më ndan një lum gjaku. Edhe ty dikur, edhe pse ke nisur ta kalosh me not këtë lum. Por për hir të gjakut dhe të persekutimit që na është bërë, të lutem vetëm për një gjë. Mos gënje nipçe se këtë nuk e kemi pasur për racë! Çorba që gëlltit të ka verbuar, por ti je në fazën që po e shijon. Ti kurrë nuk e mbajte mend xhaxhain duke votuar. Atëherë, se nuk e la partia që të detyronin ta duartrokisje dhe, tani, po ajo parti që ti i shërben. Mua më është hequr e drejta se nuk jam bërë pjesë e diktaturës, tashmë se nuk jam bërë pjesë e mafies në pushtet. Ti mund të mohosh gjithkënd nga verbëria, por jo votën e xhaxhait dhe të qindra të persekutuarve të tjerë që e kanë fituar duke u torturuar nëpër burgjet e komunizmit.

Ja pra keto jane manipulimet.

[Albo]

Ngjela: Për mua votuan 80 mijë qytetarë

Kandidati demokrat për bashkinë e Tiranës ka deklaruar se nuk do të lejojë që të nëpërkëmbet votuesi i tij. Gjithashu Ngjela deklaroi se janë evidentuar të gjithë autorët e kësaj masakre dhe ata do të përballen me drejtësinë

Spartak Ngjela ka deklaruar dje se për të kanë votuar 80 mijë zgjedhës dhe se nuk do të lejojë që trupa e tij zgjedhore, e përbërë prej 80 mijë qytetarësh, të ishte e tallur dhe e përbuzur, për shkak të një procesi tashmë të rrëzuar. "Nuk do të lejoj që të tallen me 80 mijë zgjedhësit e mi. Duhet ta dini se për mua kanë votuar 80 mijë qytetarë të Tiranës, 30 mijë prej të cilëve i kanë eleminuar dhe 10 mijë i kanë hequr nëpërmjet bandave," është shprehur Ngjela. Avokati ka deklaruar se ka evidentuar edhe shkaktarët e manipulimit duke paralajmëruar edhe falangat e Edi Ramës, siç i quajti ai segmentet që në orën 5 të pasdites së ditës së diel duke ndier humbjen, u lëshuan nëpër qendrat e votimit për të bërë presion. Sipas tij janë identifikuar plotësisht autorët e organizimit të tyre dhe krerët e drejtimit, të cilët do të paditen kur të vijë koha. Pasi ka denoncuar edhe një herë gjendjen e vështirë në të cilën gjendet KZQV e Tiranës, e cila edhe pse po vazhdon punën, gjendet në një situatë absurde ku më shumë se 70 për qind e kutive të mbëritura, janë të pavlefshme. Spartak Ngjela ka deklaruar se tashmë beteja për votën dhe të drejtën themelore qytetare, është bërë deviza kryesore e tij dhe mbarë opinionit vendas e të huaj.

[Albo]

Njësia 3: Më shumë se 1200 votues të kthyer mbrapsht

Bëhet e ditur se në këtë njësi bashkiake janë identifikuar të gjithë ata persona që nuk kanë votuar, të cilëve u është marrë numri i pasaportës. Në këtë njësi janë hequr pa vendim KZQV-je 769 persona dhe janë shtuar 496 të tjerë

Më shumë se 1200 persona të cilët janë kthyer mbrapsht nga qendrat e votimit, janë evidentuar deri tani në njësinë bashkiake numër 3 në Tiranë ku kandidon Bektash Pojani. Këta emra janë të gjithë të identifikuar dhe u janë marrë edhe numrat e pasaportave dhe dëshmitë penale se janë votues të PD-së. Po kështu, janë hequr në këtë njësi pa vendim KZQV-je 769 emra, ndërsa po pa vendim KZQV-je janë shtuar 496 persona. Strukturat e opozitës i kanë dërguar dy herë letër KQZ-së për të shtuar disa emra në listat përfundimtare, por kjo ka qenë e pamundur pasi ky institucion në vend të shtimit të emrave të tyre ka bërë zhvendosje të mëdha me listat në minutat e fundit pa pyetur askënd. Ndërkohë përfaqësuesit e PD-së kanë mbajtur shënim të gjithë emrat të cilët janë hequr padrejtësisht nga listat, pa vendim KZQV-je, por edhe që janë shtuar artificialisht nëpër qendrat e ndryshme të votimit. Shifra përbën 10 për qind të trupës zgjedhore të njësisë dhe nga vetë zgjedhësit dëshmohet se heqja e emrit të tyre nuk ka qenë e rastësishme. Në këtë mënyrë një pikëpyetje e madhe ngrihet dhe qendron fort mbi KQZ-në dhe rolin e kreut të këtij institucioni, Ilirjan Celibashit. Opozita edhe dje është shprehur se tashmë nuk mund të flitet më për një proces votimi, por për një vjedhje masive të votave.


--------------------------------------------------------------------------------

Njësia 1: Më shumë se 26 për qind e votuesve demokratë nuk kanë votuar

Njësia numër 1 është evidentuar për të disatën herë dje si zona problematike mbi të cilën ende mungojnë rezultatet e zgjedhjeve si dhe shfaqen probleme të shumta me dorëzimin e kutive që sipas atyre që i sjellin në KZQV i kanë patur nëpër apartamentet e veta. Kandidati demokrat Dilaver Laçi konfirmon të dhënat e vëzhguesve dhe komisionerëve të opozitës se atje më shumë se 28 për qind e votuesve simpatizantë të PD-së nuk e kanë gjetur emrin në listat e votimit dhe për pasojë iu është hequr e drejta e votimit. Ndonëse në Kodin Zgjedhor në nenin 91 pika 1 gërma "g" përcaktohet shprehimisht që fletët e votimit të përdorura, ato të pavlefshme, të kontestuarat, të dëmtuarat dhe të vlefshmet duhet të ndodheshin brenda në kutitë e votimit. Gati të gjitha fletët e papërdorura edhe tani ndodhen në kuti kartoni pa asnjë masë sigurie të shoqëruara dhe me vulat jashtë kutive, lënë shteg hapur për falsifikimin e procesit të zgjedhjeve. Kështu është vepruar (me fletë votimi të papërdorura jashtë kutisë) në 26 qendra votimi.

Më e patolerueshme është lënia jashtë kutive të votimit e fletëve të votimit, të nënshkruara nga kryetari dhe nënkryetari i KQV dhe të vulosura nga sekretari. Si shembull për këtë janë 31 fletë votimi të qendrës së votimit nr. 1694 të cilat ndodheshin jashtë kutisë duke dhënë kështu shkak për manipulimin. Kur në tabelën rezultateve të kësaj qendre votimi nuk bëhet fare fjalë për këto fletë votimi të gatshme për t'u përdorur. Në disa kuti votimi u gjendën tabela të rezultateve të panënshkruara nga 2 ose më shumë anëtarë të komisionit dhe në disa të tjera mungonte vula e qendrës së votimit. Këtu përmendim qendrat e votimit nr. 1697 dhe nr. 1698, pra sipas Kodit Zgjedhor nenit 109, pika 1, gërma "f" që është një dispozitë imperative, këto dokumenta nuk janë të vlefshëm për pasojë dhe rezultatet e nxjerra nga këto tabela nuk janë zyrtare. Gjatë verifikimit të bërë rezulton se në kundërshtim me nenin 109, pika 1, gërma "gj" janë gjendur vula, lista e zgjedhësve, proces-verbalet e qendrës së votimit jashtë kutisë së votimit. Duke patur parasysh faktin që të gjitha fletët e votimit të papërdorura ndodhen jashtë kutive këto krijojnë një precedent të rrezikshëm për shtimin e votave në favor të subjekteve kandidatë në zgjedhje. Në një pjesë të kutive të votimit nuk janë gjetur tabelat origjinale të rezultateve, por kopje të tyre siç është rasti i qendrës së votimit 1704. Në disa tabela rezultatesh ka korrigjime të tilla që i bëjnë të dhënat të palexueshme siç është rasti i endrës së votimit nr. 1694.


--------------------------------------------------------------------------------

Njësia 10: Votat e vlefshme 1600 më pak se rezultatet përfundimtare

PD fiton në bllok tek zona e Musa Ulqinit

Rillogaritja e rezultatit nxjerr fitues Kreshnik Hashorvën, në zonën më të majtë të Tiranës, ku është deputet Musa Ulqini. Numri i votave të vlefshme është 1600 më pak se ai i rezultateve të publikuara. Ja përse Musa Ulqini nxitoi të shpallte rezultatet e manipuluara

Në njësinë bashkiake numër dhjetë, pas numërimit të votave në KZQV-në e Tiranës, konstatohet se numri i votave që janë cilësuar si të vlefshme, me numrin e votave që përbëjnë rezultatet përfundimtare, ka një diferencë të ndjeshme. Kështu numri i votave në rezultatin përfundimtar është rritur me 1600 të tilla, çka të bën të mendosh se ato janë shtuar qëllimisht në favor të kandidatit socialist për këtë njësi. Në këtë zonë kanë kandiduar Fatmira Veizi për Partinë Socialiste dhe Kreshnik Hashorva për Partinë Demokratike. Por ky rezultat është nxjerrë nga tabelat, të cilat nuk ndodhen në kutitë e votimit, por që janë dhënë dorazi. Nëse sheh me kujdes tabelën e rezultatit që i është përcjellë dorazi KQZ-së, verifikohet lehtësisht numri i votave të shtuara. Kështu numri i fletëve të vlefshme është 9472, ndërsa votat e vlefshme vetëm 7844. Nuk dihet se si diferenca e krijuar nuk ka përbërë për komisionerët socialistë çudinë dhe shkeljen ligjore, por tashmë ky rezultat deklarohet si përfundimtar nga ata, dhe kandidatja socialiste Veizi është në pritje të shpalljes zyrtare të fitores. Nënkryetarja e KZQV-së së njësisë bashkiake numër 10, Shpresa Breçani dhe komisionerët e tjerë, thanë se do të bëhen publike në bazë të procesverbaleve falsifikimet, manipulimet dhe absurditete nga më të ndryshmet të shoqëruara me dëshmi autentike të cënimit të procesit zgjedhor nga socialistët. Edhe vetë stafi i kandidatit të opozitës Kreshnik Hashorva është duke mbledhur fakte të reja që provojnë falsitetin e procesit.


--------------------------------------------------------------------------------

Kamëz, socialistët bllokojnë rezultatin

Kryetari i degës së Partisë Demokratike për Tiranën, Vili Minarolli, tha se komisionerët socialistë vazhdojnë që të mos numërojnë votat, por të shtyjnë pafundësisht publikimin e të dhënave në këtë bashki. "Kryetari i ri i këtij komisioni vazhdon që të veprojë në gjurmët e të parit," tha Minarolli

"Komisionerët socialistë janë kthyer tashmë në një problem të përditshëm si nga ana e institucioneve shtetërore, ashtu edhe për strukturat e opozitës me bllokimet dhe tentativat e shumta për të ndërhyrë në rezultatet e zonave të veçanta siç është Kamza." Kështu ka deklaruar kryetari i degës së Partisë Demokratike për Tiranën, Vili Minarolli. Ai tha se denoncon shkeljet flagrante të ligjit nga ana e komisionerëve të Partisë Socialiste. Sipas tij këto shkelje po bëhen duke filluar që nga komisionerët e niveleve të ulëta si KZQV dhe deri tek komisionerët e KQZ-së. "Në Bashkinë e Kamzës procesi mbetet i bllokuar prej katër ditësh, ndërkohë që KZQV ka shpallur fitues kandidatin e Partisë Demokratike. Sipas ligjit është kërkuar rinumërimi i votave nga Partia Socialiste dhe nga komisionerët socialistë të KZQV-së së Kamzës, por socialistët nuk paraqiten dhe kryetari që kërkon rinumërimin, jep dorëheqje," theksoi Minarolli. Sipas tij edhe pse caktohet kryetari i ri nga subjekti PS, të njëjtin avaz ndjek edhe ai. Minarolli tha se edhe pse KQZ, e cila e ka vendimin e KZQV, e cila ka gjithashtu dhe kërkesën e komisionerëve të PS për rinumërim të votave, ata nuk paraqiten, nuk ndërhyjnë qëllimisht për të vonuar procesin. Por kryetari i PD për Tiranën thotë se një situatë e ngjashme paraqitet dhe në njësinë bashkiake numër gjashtë të kryeqytetit. Minarolli u shpreh se kryetari i këtij komisioni po shkel ligjin përsa i përket numërimit të votave. "Nuk e di se mbi bazën e çfarë të dhënash vepron zëdhënësi i KQZ-së, kur deklaron rezultatin në minibashkinë 6, në një kohë që KQZ nuk e ka marrë në shqyrtim atë," thekson Minarolli. "Është kërkuar rinumërimi i votave në njësinë bashkiake Nr. 6 dhe KZQV, që e ka detyrë ligjore për ta bërë një gjë të tillë, nuk pranon të veprojë sipas ligjit. Pra, nga njëra anë kërkohet rinumërimi i votave i humbësit socialist dhe nuk marrin pjesë në këtë proces komisionerët socialistë, nga ana tjetër sipas ligjit kërkohet rinumërimi i votave për të vënë në dukje abuzimet, falsitetin dhe gjithçka të parregullt në qendrat e votimit, tashmë të dokumentuara dhe nuk vendosin për të rinumëruar votat," theksoi Minarolli.