Manipulimet e zgjedhjeve!

[Albo]

Kreu i PD merr pjesë në byronë politike të Partive Popullore.

Berisha denoncon Tiranën e Durrësin në Bruksel

Nevila Përndoj

TIRANE - Në kulmin e kontestimeve të opozitës për zgjedhjet e zhvilluara në Tiranë dhe Durrës, lideri i opozitës Sali Berisha i ka hipur avionit dhe është nisur për Bruksel. Për dy ditë rresht, kryetari i demokratëve do të marrë pjesë në mbledhjen e radhës së byrosë politike të Partive Popullore Europiane. Zyrtarë të lartë të Partisë Demokratike deklaruan dje për “Shekullin” se gjatë kësaj mbledhjeje Berisha do të shfrytëzojë mundësinë që të evidentojë para pjesëmarrësve edhe manipulimin që, sipas tij, u bë në zgjedhjet e 12 Tetorit në qytetin e Tiranës dhe Durrësit. Evidentimi i parregullsive nga kryetari demokrat kësaj here do të shërbejë edhe për një arsye tjetër jo pak të vlefshme për vetë PD. Pak muaj më parë, Partia Demokratike u anëtarësua në Partitë Popullore Europiane me kushtin që ajo të njihte rezultatin e zgjedhjeve të 12 Tetorit. Për rrjedhojë, Berisha pritet të faktojë arsyet se pse partia që ai kryeson nuk do të njohë rezultatin në qytetin e Tiranës dhe Durrësit. Kreu i PD-së gjatë punimve të byrosë do të njohë aleatët e tij politikë perëndimorë me parregullsitë, sipas tij, që pati në listat e zgjedhësve. Berisha kërkon që të sensibilizojë një pjesë të rëndësishme të tyre, që janë edhe në pushtet në disa shtete evropiane me qëllim që në deklaratat e Komisionit Evropian dhe Parlamentit Evropian të evidentohen parregullsitë e zgjedhjeve në dy qytetet kryesore, Tiranë dhe Durrës. Para largimit të tij për në Bruksel, Berisha ka mbledhur sekretariatin e Partisë Demokratike. Takimi i menjëhershëm i tij u zhvillua pas deklaratës së Misionit të Vëzhguesve Ndërkombëtarë për Zgjedhjet. Mësohet se gjatë takimit, Berisha ka porositur lidershipin demokrat për të bërë gati të gjitha provat dhe për t’ia servirur më pas përfaqësuesve ndërkombëtarë. Madje pak orë para largimit të tij nga Shqipëria, Berisha ka zhvilluar edhe një sërë takimesh me përfaqësues të ndërkombëtarëve dhe e gjitha kjo ka përfshirë një hark kohor prej 60 minutash. Me largimin e tij, stafeta e evidentimit të asaj që ata e cilësojnë parregullsi në zgjedhje, do t’i kalojë zyrtarëve të lartë të PD të cilët pritet të zbardhin “faktet” e tyre jo vetëm në takimet me ndërkombëtarët por edhe në deklaratat që ata do të japin për median.

[Albo]

Ngjela: Denoncim 12 tetorit ne Prokurori

Kandidati i PD per Bashkine e Kryeqytetit takon Prokurorin e Tiranes, si dhe nendrejtorin e sherbimit sekret: "Ka diferenca ne listat e zgjedhesve te KZQV dhe KQZ.

Rreth 70 % e kutive te votimit jane te pavlefshme"

Armando META

Spartak Ngjela deklaron se ka nisur betejen ligjore, ne lidhje me rezultatet e votimit per garen e Bashkise se Tiranes. Sic eshte bere e ditur nga shtabi elektoral i PS, kandidati socialist Edi Rama, ka korrur nje fitore mjaft te thelle ndaj rivalit te tij demokrat Spartak Ngjela ne garen per Bashkine e Tiranes. Por, ky i fundit deklaron se rezultati eshte manipuluar nga socialistet ne favor te Rames. Ngjela deklaron se ka ndermerre nje beteje ligjore kunder zgjedhjeve te 12 tetorit ne Tirane, ne kohen qe kryetari i PD Sali Berisha ka deklaruar se partia qe ai drejton nuk e njeh rezultatin e zgjedhjeve ne Kryeqytet. Pikenisja e betejes ligjore, sipas Ngjeles, ka qene nje takim i zhvilluar dje me Prokurorin e Tiranes, Vexhi Mucmata, si dhe me nendrejtorin e SHISH, Ylli Alushi. "Kam denoncuar ne Prokurorine e Tiranes diferencen mes listes se shpallur nga Komisionet Zgjedhore te Qeverisjes Vendore te Tiranes (KZQV) dhe atyre te sjella diten e votimit nga Komisioni Qendror i Zgjedhjeve (KQZ). Jane me qindra mijera mbeshtetes te mi, te cilet kane mbetur pa votuar, per shkak te ketyre diferencave ne listat e votuesve. Une nuk mund te braktis votuesit e mi. Tani jam ne nje beteje legale", ka deklaruar Ngjela. Ky i fundit ka bere te ditur se, po dje ka zhvilluar edhe nje takim me nendrejtorin e SHISH, te cilit i ka kerkuar qe ky institucion te grumbulloje te dhena per te vertetuar nese listat jane manipuluar. Ngjela beri te ditur se i ka deklaruar nendrejtorit te SHISH se, eshte i kenaqur qe ky institucion nuk eshte perzier ne aferen e listes se zgjedhesve dhe ka mbajtur qendrim korrekt gjate procesit te votimit. "I kerkova nendrejtorit te SHISH, qe te kerkoje ndihmen edhe te sherbimeve partnere lidhur me kete ceshtje, per te gjetur te verteten e ketyre shkeljeve dhe me pas te informoje edhe Presidentin e Republikes, Alfred Moisiu", ka nenvizuar Ngjela. Sipas tij, te gjitha keto levizje po behen, sepse diten e votimeve "eshte shkelur ligji me listat zgjedhore dhe pergjegjes per kete ceshtje eshte KQZ". Ngjela deklaron se, 70% e kutive te votimit ne Tirane jane te pavlefshme gje qe, sipas tij, do te thote se "procesi i votimit i 12 tetorit ne Tirane eshte i pavlefshem". "Nese respektohet ligji, procesi ka rene. Shkeljet do t'ia paraqese edhe KQZ. Ligji nuk mund te shkelet. KQZ duhet te sanksionoje pavlefshmerine e zgjedhjeve te 12 tetorit ne Tirane", ka deklaruar Ngjela. PD, ne menyre te vazhdueshme, qe nga dita e zgjedhjeve ka shprehur shqetesimin per "parregullsi te qellimshme ne listat e zgjedhesve", sic i ka vleresuar ajo, vecanerisht ne Tirane, duke u shprehur se nuk do ta pranoje rezultatin e zgjedhjeve per Kryeqytetin.

[Albo]

PD: Ministri i Rendit po përgatitet të rrëmbejë kutitë e votimit në Peshkopi

Nevila Përndoj

TIRANE - “Ministri i Rendit Luan Rama po përgatitet të rrëmbejë kutitë e votimit nga KZQV e Peshkopisë”, -tha dje drejtori i Marrëdhënieve me Publikun në PD, Arjan Vasjari. “Njoftohemi se ministri i Rendit Luan Rama po përgatit forcat speciale për të rrëmbyer kutitë e votimit nga KZQV-të në Bashkinë e Peshkopisë. PD denoncon ashpër këtë akt banditesk dhe paralajmëron ministrin e Rendit Luan Rama për të gjitha pasojat që mund të shkaktohen nëse bandat e tij me uniformë shtetërore do të prekin kutitë e votimit në Bashkinë e Peshkopisë. Nuk jam i informuar se sa vota plus jemi në Peshkopi, por është një garë e mbaruar dhe e përfunduar plotësisht”, -tha Vasjari. Pavarësisht se ende KZQV e Peshkopisë nuk ka dhënë rezultatin përfundimtar, paraprakisht është deklaruar nga partia më e madhe opozitare, se kjo bashki është fituar nga PD. “Diferenca është shumë e madhe dhe pikërisht për këtë fakt ata janë duke përgatitur këtë lloj skenari. Është një fitore zyrtare e konfirmuar që natën e parë. Edhe një herë e përsëris se pikërisht për këtë fakt, Rama do të bëjë atë që ka ndërmend, sepse Ylber Cenga, kandidati socialist në Bashkinë e Peshkopisë është i përzgjedhuri i tij pasi ka paguar 120 milionë lekë në atë post”, -tha Vasjari

[Albo]

“Në Tiranë, Durrës dhe Shkodër, nga 10 deri në 25 për qind të votuesve janë përjashtuar qëllimisht nga votimi, gjë që solli fitoren e PS në Durrës dhe në Tiranë”, denoncoi Berisha, përpara se të kërkonte mbështetjen e eurodemokratëve

Kreu i PD evidenton problemet me listat dhe të tjera shkelje në procesin e zgjedhjeve

Berisha gjen mbështetje në Bruksel
Eurodemokratët të shqetësuar nga faktet e paraqitura

Nga korrespondenti ynë në Bruksel, Ernest Bunguri

Një vizitë e shkurtër, por jo pa rezultat, ajo e Sali Berishës, kryetarit të Partisë Demokratike, dje në Bruksel.

“Nuk kam përgatitur asnjë takim personal, pasi duhet të kthehem shpejt në Tiranë ku më presin shumë punë”, i përgjigjet Berisha pyetjes së gazetës “Panorama” mbi takimet me eurodeputetë të ndryshëm si dhe mbi denoncimin e pritshëm mbi problemet zgjedhore. I ftuar në mbledhjen e Byrosë Politike të Partisë Popullore Evropiane (PPE), me statusin e anëtarit vëzhgues, pasi Shqipëria është akoma larg integrimit, kryetari i PD-së pret radhën për të paraqitur një pjesë të raportit të pregatitur nga PD-ja mbi zhvillimet e zgjedhjeve të dy ditëve më parë. Ndërkohë, një buzëqeshje majtas, një shtrëngim duarsh djathtas, tek-tuk nis dhe ndonjë bisedë me kolegët evropianë demokratë, të cilët, kokë më kokë, informohen mbi zhvillimet e zgjedhjeve të fundit në Shqipëri.

Komunikimi me ndërkombëtarët është i rëndësishëm. “Eshtë pikërisht presioni i këtyre të fundit që bëri që të paktën policia të sillej në mënyrë korrekte, përveç disa rasteve sporadike”, sqaron Besnik Mustafaj, sekretar i marrëdhënieve me jashtë pranë PD-së, që shoqëron kryetarin e tij gjatë vizitës në Bruksel. Së bashku me ta, Avni Islami, anëtar i degës së PD-së në Bruksel, Shkëlqim Hoxha, kryetar i degës së PD-së në Bruksel dhe Avni Kojeli, anëtar i kësaj të fundit. Një grup i pregatitur mirë, jo vetëm për komunikimin, por për një detyrë tjetër akoma më të rëndësishme: mbështetja e demokratëve evropianë, por jo vetëm, në njohjen dhe dënimin e parregullsive para dhe gjatë votimit të së dielës.

Analiza e PD-së

”Përveç faktit që kësaj radhe fitorja e partisë time ishte tejet e suksesshme, zhvillimi i zgjedhjeve të së dielës u minua sërish nga shumë probleme dhe parregullsi”, filloi t’u tregonte eurodemokratëve Berisha, në sallën e Parlamentit Evropian. E kështu me radhë : “Shkelje në Kodin Zgjedhor nga socialistët në pushtet; bllokimi i financimit të fushatës, përveçse për socialistët, deri një javë përpara zgjedhjeve; injorimi i mesazhit të Presidentit të Parlamentit Evropian, Pat Koksit; shkelja e ligjit për policinë”… për të ardhur në pikën më të nxehtë: manipulimi me listat. “Në Tiranë, Durrës dhe Shkodër, nga 10 deri në 25 për qind të votuesve janë përjashtuar qëllimisht nga votimi, gjë që solli fitoren e socialistëve në Durrës dhe në Tiranë”, denoncoi më tej Sali Berisha, përpara se të kërkonte mbështetjen e eurodemokratëve të pranishëm në sallë, me anë të një komisioni anketimi që duhet të vijë në Shqipëri për të vërtetuar gjithçka u tha më sipër. “Ju, si qytetarë ndërkombëtarë, duhet të vini dhe të shihni me sytë tuaj që institucionet dhe funksionarët në Shqipëri vetëm japin përshtypjen se bëjnë një punë sipas standardeve evropiane, por në të vërtetë nuk ndodh kështu”, propozoi kryetari i PD-së në mbyllje të fjalës së tij.

Mbështetja e eurodeputetëve

Përveç të tjerash, cilësimi si “kryekontrabandist” i kryebashkiakut të Durrësit në fjalimin e Sali Berishës ka prekur eurodemokratët në pikën e dobët të këtyre të fundit. Disa prej tyre kanë reaguar, duke u ndalur në shembujt e kriminalitetit dhe kontrabandës shqiptare në vendet fqinje si Italia, si dhe në shqetësimin e përhapjes të këtyre fenomeneve dhe në vende të tjera evropiane. “Ka disa mënyra për t’i ndihmuar demokratët shqiptarë”, ka propozuar Ulfrid Martens, presidenti i radhës i Partisë Popullore Evropiane, për të vazhduar: “Pasi të jemi njohur me raportin e z.Berisha, së pari, duhet të informojmë urgjentisht grupin e PPE-së pranë Këshillit Evropian. Së dyti, pas raportit të PD-së shqiptare do të organizojmë një komunikim gjatë Byrosë Politike të PPE-së në mbledhjen e dhjetorit. Së fundmi, do të organizojmë një komision anketimi që do të vizitojë Shqipërinë, nën kompetencën e grupit të iniciativës për Ballkanin Perëndimor pranë PPE-së”, përfundon Presidenti Martens.

Partia Demokratike shqiptare dhe kryetari i saj gjetën mbështetjen e duhur në Bruksel. “Na ngelet vetëm të kthehemi në Tiranë për të hartuar raportin, si dhe për të vazhduar urgjentisht punën që ngelet për t’u bërë për denoncimin e parregullsive të së dielës”, shpjegon Besnik Mustafaj.


Schmitt: Të ndërhyjmë urgjentisht në Shqipëri

Përveç të tjerash, grupi i PPE-së në Këshillin e Evropës duhet gjithashtu të merret me këtë çështje. Gjërat që ndodhin në Shqipëri: kriminaliteti i organizuar apo shfrytëzimi i qenieve njerëzore, në mënyrën më barbare është padiskutim një nga shkeljet më flagrante të të drejtave të njeriut. Kohë më parë, unë e kam kritikuar Berishën mbi sjelljen e Partisë Demokratike, sjellje kjo që nuk i korrespondonte imazhit tonë. Por sot, miqtë tanë demokratë shqiptarë, po bëjnë një luftë të hidhur dhe të vështirë, dhe kanë marrë dhe mësimet e duhura që atëherë. Tani që kushtet janë të përmbysura, me socialistët në pushtet, Shqipëria është shumë larg Evropës. Nga ana tjetër, jemi ne që lëmë të zhvillohen këto parregullsi dhe lëmë vetëm dhe miqtë tanë demokratë. Duhet ndërhyrë urgjentisht. Shqetësimet tona personale na bëjnë të harrojmë çfarë ngjet në Ballkan. Ne shohim pa kokëçarje qeverisjen e post-komunistëve në Ballkan, si dhe rezultatet e tyre jo demokratike. Dhe, pikërisht këtu mund të ndërhyjnë partitë evropiane, ndër të cilat, roli i PPE-së është që menjëherë pas prezantimit të raportit të PD-së shqiptare, të shkojmë dhe të konstatojmë problemet në vend.


Reagon një eurodemokrat austriak
Duhet të korrigjojmë ata që sillen si mafiozë

Reagimi nuk duhet të vijë vetëm nga PPE-ja, por duhet të marrim kontakt dhe me euroliberalët dhe me Partinë Socialiste Evropiane. Kjo, për të mos dhënë përshtypjen e një aksioni të një politike partizane nga PPE-ja, në mënyrë që eurosocialistët të rrezikojnë të deklarohen solidarë me socialistët shqiptarë që do të ndihen të sulmuar. Eshtë shumë e rëndësishme që t’ju bëjmë të njohur edhe partive të tjera politike, që bëhet fjalë për një problem të përbashkët. Duhet të sulmojmë dhe të korrigjojmë ata që sillen si mafiozë në Shqipëri. Nëse nuk marrim masat e duhura për të luftuar këtë lloj mafieje, kjo rrezikon të shndërrohet në një sfidë akoma më të madhe, dhe nga ana tjetër nuk do të kemi asnjë shans për të integruar Shqipërinë. Siç dihet, Italia është tashmë e prekur nga kriminaliteti dhe kontrabanda shqiptare që nuk tërhiqet përpara armëve. Prandaj dhe duhet gjetur një marrëveshje mes të gjithë europarlamentarëve, të majtë apo të djathtë, për të pregatitur një mesazh, i cili do të tregojë se është Evropa e tërë që nuk e pranon këtë lojë, pa dhënë përshtypjen që është vetëm një aksion i një politike partizane vetëm e PPE-së.


59-vjetori
Berisha feston datëlindjen në Bruksel

Kryetari i Partisë Demokratike, Sali Berisha, ka pasur dje datëlindjen dhe si rrallëherë është detyruar të festojë larg familjes së tij. Ai është gjendur në Bruksel në 59-vjetorin e tij, ku së bashku me drejtorin e departamentit të PD-së për marrëdhëniet me jashtë, Besnik Mustafajn evidentuan fakte të manipulimeve të zgjedhjeve lokale që sapo përfunduan.

[Albo]

Ngjela: Zgjedhjet në Tiranë drejt ripërsëritjes

Kandidati demokrat për bashkinë e Tiranës tha se po punon për të mbrojtur të drejtën e qytetarëve për të votuar dhe se ka qenë në Prokurori për të denoncuar këtë rast. Ai u shpreh se zgjedhjet në kryeqytet do të zhvillohen përsëri

Spartak Ngjela tha dje se ka filluar që të punojë për të promovuar manipulimin e bërë gjatë zgjedhjeve të së dielës. Ai tha se zgjedhjet janë drejt ripërsëritjes pasi qytetarëve u është mohuar e drejta e votës. Ngjela u shpreh se ka patur një takim në Prokurorinë e Përgjithshme, ku ka bërë denoncimin për listat e parregullta që janë paraqitur nga KZQV e Tiranës dhe atyre që ka sjellë ditën e votimit KQZ-ja. Avokati ka theksuar se listat e KQZ kanë qenë ato që kanë krijuar konfuzionin e përgjithshëm, kurse ato të KZQV kanë qenë të rregullta. "E bëra denoncimin se janë qindra mijëra zgjedhës të mi që më kërkojnë qëndrimin që do të mbaj. I kam qetësuar duke u thënë se kemi fushatë legale. Këtë denoncim do e formalizoj menjëherë me gjithë të dhënat sepse numri i simpatizantëve që do të dalë i saktë është mijëra vetë të regjistruar me emra të saktë që janë shprehur në qendrat tona," është shprehur Ngjela. Dje Ngjela ka takuar dhe nënkryetarin e SHISH, të cilit i ka kërkuar që të vërë këtë shërbim në funksionim për të hedhur dritë mbi të vërtetën e listave. Ngjela ka vlerësuar paraprakisht se ky shërbim nuk ka ndërhyrë në këtë çeshtje. "Njëkohësisht i kërkova bashkëpunimin me shërbimet partnere që ndodhen këtu, të cilat kam përshtypjen se deri diku e kanë zbardhur këtë enigmë që deri diku është krim i rëndë për ata që e kanë kryer dhe unë do ta çoj deri në fund," deklaroi Ngjela.


--------------------------------------------------------------------------------

Numërimi i votave

"Deri tani sipas të dhënave që përfaqësuesi im aty më ka deklaruar jemi në një gjendje katastrofike, 70 përqind e kutive të votimit janë të pavlefshme. Rreth 79 përqind e fletëve të papërdorura nuk gjenden, pasi janë hedhur në kuti. Për mua procesi ka falimentuar. I bëj thirrje elektoratit tim dhe gjithë atyre që votuan se nëse do veprojë ligji, procesi është rrëzuar. A do të respektohet apo jo Ligji? Hallkë e dytë pas KZQV-së është KQZ-ja. Atje do të jem vetë. Do të jem vetë në KQZ për t'ia paraqitur të gjitha shkeljet që po evidentohen rast pas rasti në KZQV sipas burimeve të përfaqësuesit tim. Nga ana tjetër i kujtoj zotit Celibashi se ligji nuk mund të shkelet. Nuk mund të veprohet dot si për zonën 60," tha Ngjela. Ai tha se është i gatshëm që të mbrojë të drejtën e qytetarëve për të votuar dhe se do ta bëjë këtë me çdo kusht. "Kushtetueshmërinë, cënimi i së cilës krijon pështjellime shoqërore, ka të drejtë ta mbrojë çdo njeri. Një nga ata jam edhe unë. Jam i bindur se KQZ-ja do sanksionojë pavlefshmërinë e votimeve të 12 tetorit për Tiranën për këto arsye madhore. Masakër e madhe me heqjen nga lista të personave për të votuar që besoj e kalojnë 10 mijë vetë, të cilët nuk e kanë patur fare emrin dhe po kaq të hallakatur me kast. Dhe aspekti i dytë një proces votimi që rezulton nul nga ana dokumentare në kutitë e votimit. Shumë shpejt jemi para zgjedhjeve të reja në Tiranë. Betejën do ta fitojmë," përfundoi Ngjela.

[Albo]

Fjalimi i Berishes ne Bruksel.

Nano i privoi shqiptarët nga zgjedhjet e lira

Sali Berisha

Të djelën që kaloi u zhvilluan në Shqipëri zgjedhjet lokale. Megjithë fitoren realisht të çmuar të Partisë Demokratike në këto zgjedhje unë erdha sot në Bruksel i dëshpëruar dhe zemërthyer. Kjo sepse kombi im, qytetarët shqiptarë nuk mundën të votojnë të lirë si qytetarë europianë. Qeveria e Fatos Nanos sërisht i privoi ata nga një proces zgjedhor i lirë dhe i ndershëm. Pas zgjedhjeve të fundit parlamentare gjerësisht të manipuluara, Parlamenti Europian miratoi unanimisht një rezolutë kushtuar kryesisht reformës elektorale në Shqipëri. OSBE nëpërmjet pranisë së saj në Tiranë, u angazhua intensivisht për këtë reformë dhe solli në Shqipëri ekspertët më të mirë ndërkombëtarë të të drejtës elektorale. Pas një pune të madhe dy vjeçare u arrit të kompletohej kjo reformë dhe qershorin që kaloi u votua me konsensus Kodi i ri zgjedhor i vendit, që përmbushte plotësisht standartet e Kodit të Venecias.

Mirëpo, pas miratimit të këtij kodi, qershorin që kaloi, Kryeministri Fatos Nano përmbysi kodin Zgjedhor konsensual në nenet kryesore që garantonin një proces zgjedhor të lirë dhe të ndershëm. Ai disbalancoi KQZ-në me qëllim që të shkruante rezultatin që donte nga zgjedhjet. Kryeministri Nano përjashtoi tërësisht opozitën nga vendimmarrja në KQZ duke dhunuar Nenin 122 të Kodit Zgjedhor dhe Marrëveshjen ndërpartiake të 12 majit. Ai mori për partinë e tij, pesë anëtarë të KQZ-së duke i lënë opozitës vetëm dy anëtarë nga tre anëtarë që me ligj i takonin asaj.

Po kështu kryeministri Nano në dhunim të Kodit Elektoral dhe Kodit të Venecias që kërkojnë barazi dhe transparencë në financimin e fushatës elektorale, madje që sanksionojnë anullimin e zgjedhjeve në raste diferencash të rëndësishme në financimin e fushatës zgjedhore, bllokoi totalisht deri në javën e fundit të fushatës fondet e parashikuara me ligj për opozitën, ndërkohë që ai dhe ministrat e tij po duke dhunuar ligjin elektoral përdorën për fushatën e tyre burime shtetërore dhe qeveritare. Përveç këtyre kryeministri Nano me një akt normativ anuloi ligjin konsensual për policinë në zgjedhje.

Për të gjitha këto, OSBE, institucionet e tjera ndërkombëtare dhe vendet mike bënë çdo përpjekje për të garantuar zbatimin e Kodit Elektoral, por kryeministri Nano u dëshmua totalisht i pa korigjueshëm.

Presidenti i Parlamentit Europian që vizitoi Shqipërinë javën e fundit para zgjedhjeve u njoh gjerësisht me këto qëndrime të qeverisë shqiptare. Ai me të drejtë shtroi pyetje: “A mendojnë këta njerëz për ta integruar Shqipërinë në Europë, apo jo!”. Presidenti Karamanlis në kuadrin e nismës së Partive Popullore Europiane për demokracinë në Ballkanin perëndimor dërgoi përfaqësuesin e tij për të konstatuar gjendjen në vend.

Ditën e zgjedhjeve 5 – 25% e zgjedhësve u përjashtuan nga votimi në Tiranë, Durrës, Shkodër, pra, në qytetet e mëdha ku konkuronin si kandidatë të PS për kryetar Bashkie përfaqësuesit më të rrezikshëm të Mala Vitës apo mafies shqiptare. Në Tiranë Edvin Rama është përfaqësues kryesor i kartelit shqiptar të drogës. Në Durrës, Lefter Koka është përfaqësuesi i klanit më të fuqishëm të ekonomisë kriminale në Shqipëri, analog me klanin “Zemun” të Beogradit, i njohur brenda dhe jashtë vendit si kontrabandisti numër një në Shqipëri dhe në Shkodër, Gjergj Liqejza pothuajse ekuivalent i tij. Këta përfaqësues të mafies më të rrezikshme në Europë përjashtuan nga e drejta e votimit nëpërmjet KQZ-së dhjetra dhe mijëra zgjedhës shqiptarë vetëm e vetëm që të merrnin mandatet e krybashkiakëve.

Në Shkodër për shkak të diferencës tejet të lartë midis Partisë Demokratike dhe Partisë Socialiste fitoi Partia Demokratike dhe kandidati i saj. Kurse në Tiranë dhe Durrës heqja nga listat e votimit të 5 – 25% të zgjedhësve sipas lagjeve si dhe shumat marramendëse që u shpërndanë nga paret e pista bënë që në këto qytete të dominojnë përfaqësuesit e Mala Vitës.

Ne kërkojmë përsëritjen e zgjedhjeve në këto qytete. Në bashkëpunim me ekspertë ndërkombëtarë po shqyrtojmë dosjen e plotë të manipulimeve në këto zona. Sa po ta përfundojmë këtë shqyrtim do t’iu sjellim raportin përfundimtar me lutjen dhe kërkesn që t’iu bëhet i ditur të gjitha partive simotra. Unë kërkoj ndihmën tuaj, të grupeve parlamentare të Partive Popullore Europiane në Parlamentin Europian, në Këshillin e Europës, në OSBE, që kombi im të votojë si komb i lirë dhe të ndëshkohen ata që dhunojnë të drejtën e votës të qytetarëve shqiptarë.

Unë gjithashtu ju bëj thirrje që ju zoti President të dërgoni sa më shpejt në Shqipëri një mision faktmbledhës. Unë ju siguroj se do të gjeni aty “të zyrtarizuar” të gjithë ekzotikën e botës së nëndheshme, do të gjeni qeveritarë kontrabandistë, ministra me magazina doganore private jashtë kontrollit doganor, anëtarë qeverie që ftojnë gazetarët në pritje dhe sillen si Idiaminë duke i rrahur ata me grushta. Do të gjeni qeveritarë dhe drejtues institucionesh që jashtë vendit dhe me të huajt sillen xhentilë dhe si qytetarë të mirë ndërkombëtarë, kurse brenda vendit sillen si zuzarë të vërtetë.

Përveç këtyre, ky mision faktmbledhës do të gjejë qeveritarë dhe zyrtarë që flasin pandërprerje për integrimin e Shqipërisë në Europë dhe standartet europiane por që në të vërtetë aplikojnë dhe zbatojnë çdo ditë standarte Mugabe.

Angazhimi i Parlamentit Europian për të ndihmuar Shqipërinë dhe shqiptarët, unë mendoj se ka rëndësi parësore jo vetëm për kombin tim, por edhe për rajonin dhe Europën që vuajnë rrjedhojat e eksportit të kësaj qeverisjeje”.

[Albo]

Dosja e “Dushkut” në Tiranë

Ndërkohë që KZQV e Tiranës po punon për nxjerrjen dhe publikimin e të dhënave mbi rezultatin e zgjedhjeve në Tiranë, KQZ po rrit presionin ndaj anëtarëve të këtij institucioni me kërcënimin për gjobëvënie, për shkak të kalimit të afatit ligjor të përpunimit dhe nxjerrjes së të dhënave. Situata ndërkaq është tepër e acaruar në KZQV ku ende mësohet se disa kuti votimi nuk po mbërrijnë ende nga njësia numër 1 dhe ajo numër 10. Megjithatë pas një kërkese zyrtare të drejtuar dje KQZ-së për shtyrjen e aftit ka filluar përpunimi i të dhënave të para në KZQV e Tiranës për rezultatin zgjedhor në Tiranë mes kandidatëve Ngjela e Rama. Sipas dokumentacionit me të dhënat operative të orëve të para të shqyrtimit të kutive të votimit, faktohet ajo që opozita ka paralajmëruar tashmë disa ditë me radhë për një "masakër elektorale". Nga verifikimi i dokumentacionit në njësitë 2, 3, 4, 5, 7, 8, 9, 10 dhe 11 del se mbi 70 përqind e kutive të votimit nuk kanë procesverbale brenda tyre. Më shumë se 80% e tyre nuk kanë brenda kutive të votimit fletët e papërdorura dhe të dëmtuara si dhe ato të pavlefshme. Nuk gjenden vulat e KQV-ve brenda kutive të votimit. Në shumë prej tyre mungojnë kodet e sigurisë që mbyllin kutitë e votimit duke i bërë të pahapshme. Në raste të tjera ndryshojnë kodet e vëna në kuti me kodin çelës që është dhënë nga KQZ. Në shumë e shumë njësi dhe kuti votimi vihen re se procesverbalet janë fotokopje dhe të firmosuar nga më pak se 7 komisionerë. Në kutitë e votimit që janë vonuar më shumë si ato të njësisë 4 në Kinostudio etj. , është vënë re një shkrim i kujdesshëm kaligrafik, i cili nuk justifikon tensionin e punës dhe rrethanat me të cilat janë mbushur procesverbalet pas disa herë numërimi të qindra fletëve të votimit. Një e dhënë tjetër është se nga numri i përgjithshëm i votuesve vetëm një e treta e tyre janë lejuar të votojnë duke i bërë kështu rezultatet tepër të dyshimta në kontekst të legjitimitetit të tyre. Një rast tjetër i rrallë është se vihet re se përkrahësit e PD-së kanë votuar në masë të madhe Partinë Demokratike si subjekt por po kaq masivisht paskan votuar për Ramën dhe jo Ngjelën, gjë e cila në përmasat e dokumentuara në të dhënat operative është jashtë logjikës dhe realitetit.

Nuk ka një llogaritje përfundimtare të të dhënave, por me të dhënat e përpunuar dhe fluksin e tyre të vazhdueshëm në KZQV si dhe në bazë të të dhënave të lajmëruara me telefon, Rama dhe Ngjela kanë një diferencë më të madhe se 15 mijë vota mes tyre në favor të Ramës.


--------------------------------------------------------------------------------

Njësia bashkiake numër 2

Numri total i votuesve 45 mijë persona, lejuar për të votuar vetëm 16 mijë. Votuar 1/3 e popullsisë.

Sipas të dhënave operative, në këtë njësi në QV numër 1716, tek kutia e votimit nuk janë gjendur fletët e papërdorura, nuk janë gjendur fletët e dëmtuara dhe as ato të pavlefshme ndërkohë që nga 772 zgjedhës janë lejuar të votojnë më pak se 330 persona ku diferenca mes Ramës e Ngjelës sigurisht që shkon në favor të Ramës me dyfishin e votave ndërkohë që ky numër nuk korrespondon me diferencën mes subjekteve politike. Vihet re se në QV numër 1712 me 704 zgjedhës është deklaruar se ka një vlefshmëri prej 368 votash ndërkohë që ka mospërputhje të votave reale të numëruara për subjektet dhe kandidatët. Del se numri i votuesve në këtë qendër është më i vogël se fletët e vlefshme. Po kështu në QV numër 1726 me 511 zgjedhës në të cilën kanë votuar vetëm 286 prej tyre, por që pas numërimit del se kanë votuar edhe më pak njerëz me një diferencë prej 7 vetash. Po kështu rasti i QV-së numër 1744 me 503 votues ndër të cilët janë shpallur të vlefshme të gjitha votat e tyre me pjesëmarrje 100%. Ndërkohë nga numërimi i votave del se ka kontestime të palëve për votat e vlefshme dhe në procesverbal është shënuar një 453/485, gjë e cila nuk lë të kuptosh se si mund të jetë një hamendje e tillë vlefshmërie që lëviz nga 453 votat tek 485. Por më e rëndësishme është se fletët e pavlefshme nuk ndodhen gjëkundi. QV numër 1735 me 1065 zgjedhës ka probleme me fletët e votimit të vlefshme, ku diferenca mes votuesve 416 me 393. QV numër 1738 me 866 zjedhës ku kanë votuar vetëm gjysma e tyre janë gjetur më në fund vulat, por sigurisht jashtë kutive të votimit.


--------------------------------------------------------------------------------

Njësia numër 3

Numri i zgjedhësve në këtë njësi arrin në rreth 29 mijë vetë, ndërkohë që janë lejuar për të votuar vetëm rreth 9500 të tillë. Diferenca mes Ramës dhe Ngjelës është rreth 3 mijë vota ndërkohë që mes subjekteve PD-PS është vetëm 1 mijë të tilla. Në qendrën e votimit numër 1752 me 620 votues marrin pjesë vetëm 250 persona, por duke iu referuar fletëve të gjetura në kuti nga KZQV rezultati del me diferencë në votim me më pak se 237 zgjedhës. Në qendrën e votimit numër 1766 me 1296 zgjedhës nuk ka asnjë procesverbal. Për të gjitha qendrat e votimit nga numri 1749 e deri në 1780 asnjë kuti votimi nuk ka fletët e papërdorura, ato të pavlefshme si dhe ato të dëmtuara.


--------------------------------------------------------------------------------

Njësia numër 4 Kinostudio

Zona më problematike e evidentuar nga kontestimet dhe verifikimet e KZQV-së. Nga rreth 39 mijë zgjedhës, janë lënë të votojnë vetëm 10 mijë. Kutia e fundit është dorëzuar vetëm para dy ditëve në KZQV pas një ngujimi të 7 komisionerëve tek shkolla 'Bajram Curri'. Konstatimi tregon se në qendrën e votimit numër 1782 me 1638 zgjedhës, kanë votuar vetëm 374. Mungojnë në të gjitha rastet fletët e çdo lloji, por këtu kemi edhe mosfirmosje të procesverbalit nga 2 anëtarë. Qendra e votimit 1783 me 1502 zgjedhës, ku kanë votuar vetëm 531 zgjedhës mungon kodi i sigurisë dhe ka një firmë mangut. Në qendrën e votimit numër 1784 me 1883 votues, kanë votuar vetëm 552 persona, ka një mungesë totale në lista e 150 vetëve. Në qendrën e votimit numër 1785 me 1523 zgjedhës, kanë votuar gjithsej vetëm 473 persona, dhe mungon tabela e rezultateve. Në qendrën e votimit numër 1786 me 1586 votues, kanë votuar vetëm 473 persona dhe mungon tabela e rezultatit si dhe nuk kanë firmosur tre persona të komisionit. Në qendrën e votimit numër 1787 me 985 votues, kanë votuar vetëm 265 vetë. Vazhdojnë problemet në qendrat e votimit me numra nga 1788 e deri tek 1813 me probleme të shumta në mungesë të tabelave të rezultateve, mungesës së firmës së komisionerëve të ndryshëm, përfshirë në raste të shumta edhe kryetarin apo zv/kryetarin, mungesë e kodeve të sigurisë në kutitë e votimit, kontestime të rezultateve të nxjerra pas një votimi të mangët e kështu me radhë. Kjo njësi bashkiake ka patur problemet më të rënda me ecurinë e procesit dhe kryetarja e KZQV-së Liljana Bejleri ka marrë kutitë e votimit në dorëzim me një akt humanizmi ndaj të ngujuarve tek shkolla 'Bajram Curri' duke deklaruar mospërgjegjësinë e saj për gjendjen e kutive të votimit të dorëzuara në KZQV me shumë vonesë.


--------------------------------------------------------------------------------

Njësia bashkiake numër 11 Laprakë

Në njësinë numër njëmbëdhjetë nga 34 mijë zgjedhës kanë votuar 17 mijë të tillë. Në të gjithë qendrat e votimit mungojnë fletët e papërdorura, ato të pavlefshme dhe ato të dëmtuara. Vetëm në një rast janë kthyer si fletë të pavlefshme 13 të tilla. Në qendrën e votimit numër 2001 kutitë nuk kanë proces verbale. Gjithashtu ato nuk kanë kode sigurie. Në qendrën e votimi numër 2006 me 1032 zgjedhës janë lejuar që të votojnë vetëm 153 persona, ndërkohë që tabelat e rezultateve janë dorëzuar dorazi ndërsa ligji përcakton rreptësisht se ato duhen të jenë brenda kutive të votimit. Në qendrën e votimit me numër 2007 me 813 zgjedhës, nga të cilët kanë votuar vetëm 353 të tillë, mungojnë tabelat e rezultateve. Në qendrën e votimit numër 2011 me 814 votues, kanë votuar 306 persona dhe në të cilën mungon tabela e rezultateve, e cila është dhënë dorazi. Në qendrën e votimit numër 2018 mungon procesverbali dhe kodi i sigurisë, nga 1016 zgjedhës kanë votuar vetëm 345. Në qendrën e votimit numër 2026 kutitë e votimi kanë qenë të hapura dhe nuk ka patur asnjë tabelë rezultatesh. Edhe këtu nga 1103 votues kanë votuar vetëm 317.

Po kështu në qendrën e votimit numër 2028 me 884 zgjedhës mungojnë të gjitha sa kemi përshkruar më lart plus tabela e rezultateve dhe të dhënat janë dhënë dorazi në KZQV. Janë lejuar të votojnë vetëm 358 persona. Duhet thënë se në këtë qendër nuk ka asnjë numër të pjesëmarrësve në votime.

Lapraka ka shënuar një rast ekstrem të manipulimit. Në qendrën e votimit numër 2003 të Laprakës është gjetur tabela e rezultateve të qendrës së votimit numër 2007. Kjo ka vënë pikëpyetje mbi faktin se kutitë mund të kenë qëndruar vetëm në një ambient dhe ka hedhur dyshime se ato mund të jenë mbledhur në një ambient të përbashkët ku është punuar me qetësi në to.


--------------------------------------------------------------------------------

Njësia numër 5

Në këtë njësi kanë votuar rreth 14 mijë votues nga 44 mijë të tillë që ka ajo. Në qendrën e votimi numër 1821 mungon procesverbali. Ndërkohë që në asnjë qendër votimi nuk janë kthyer fletët e papërdorura, ato të dëmtuara, ose ato që kanë dalë të pavlefshme. Në asnjë nga procesverbalet nuk është shënuar numri i personave që kanë votuar ose totali i pjesëmarrësve të tyre. Vetëm në qendrën e votimit numër 1845 është paraqitur numri i atyre që kanë votuar dhe që është 159. Ndërkohë që në këtë qendër duhet të kishin votuar rreth 516 votues.

Në qendrën e votimi me numër 1855 me 405 zgjedhës pa asnjë të dhënë tjetër ndërkohë që sipas tabelës së votimit del se kanë votuar rreth 277 persona.


--------------------------------------------------------------------------------

Njësia bashkiake numër 7

Në këtë njësi bashkiake është realizuar një mohim votash për më shumë se tre të katërtat e votuesve. Kështu nga 36 mijë votues janë lejuar që të votojnë rreth 8 mijë persona. Në qendrën e votimit me numër 1883 me 298 zgjedhës ku vlefshmëria e votave nuk shkon më shumë se 24 të tilla. Në qendrën e votimit numër 1900 me 664 zgjedhës, kanë marrë pjesë në votime 253 persona nga të cilat të vlefshme janë 251 vota. Në qendrën e votimit numër 1896 me 1197 zgjedhës nuk ka asnjë të dhënë pasi nuk ekziston fare procesverbali. Në qendrën e votimit me numër 1908, me 952 zgjedhës, pjesëmarrja është 633 persona nga të cilët kanë hedhur vota të vlefshme sipas procesverbalit vetëm 345 persona. Në qendrën e votimit numër 1914 me 907 zgjedhës, procesverbali ka qenë i falsifikuar. Në të gjithë këto qendra nuk ka patur fletë votimi të papërdorura që janë kthyer mbrapa. Ndërkohë në tre qendra votimi bëhet i ditur numri i votuesve, kurse në pesë prej tyre bëhen të ditura votat e vlefshme.


--------------------------------------------------------------------------------

Njësia numër 8

Në total në këtë zonë duhej të votonin rreth 25 mijë zgjedhës, por numri i votuesve ka arritur në rreth 8 mijë persona. Në qendrën e votimit numër 1930 me 1073 zgjedhës rezulton të mungojë procesverbali dhe kodi i sigurisë. Kodi i sigurisë duhet të jetë i shtuar në procesverbalin që futet brenda kutisë së votimit kur mbaron numërimi i votave. Mosshënimi i kodit e bën kutinë lehtësisht të manipulueshme, sepse nëse ke lidhjet e duhura me KQZ mund të marrësh çfarëdo lloj kodi dhe ta rimbyllësh kutinë për t'u dukur çdo gjë në rregull në sipërfaqe. Mungesa e kodeve të sigurisë brenda proces-verbaleve ka qenë e theksuar dhe në shumë raste në kutitë e votimit që dorëzohen brenda KZQV-së dhe po t'i shtohet kësaj edhe mbajtja në ambientet e KQZ-së për disa ditë me radhë të shumë kutive të votimit, atëherë procesi vihet nën reflektim dhe aspak nën siguri. Në qendrën e votimit numër 1931 me 489 zgjedhës, me një pjesmarrje në votim prej 171 vetësh janë deklaruar të vlefshme më shumë se 340 fletë votimi. Në qendrën e votimit numër 1934 me 813 zgjedhës, me 314 pjesëmarrës, s'ka përputhshmëri të numrit të votuesve me fletët e gjetura në kuti.


--------------------------------------------------------------------------------

Njësia numër 10

Përsëri një nga njësitë më problematike. Duhej të merrnin pjesë në votime rreth 18 mijë votues, por nuk ka asnjë të dhënë se cili është numri i atyre që janë lejuar të votojnë. Kjo për arsye se kutitë e 19 qendrave të votimit kanë ardhur në bllok dhe janë lënë pa shoqërues tek korridori i KZQV-së duke mos i dhënë mundësi kësaj të fundit të marrë në shqyrtim dokumentacionin e hollësishëm. Kështu nga të 19 qendrat e votimit mungojnë të dhënat për fletët e pavlefshme, për ato të dëmtuara, për ato të kthyerat si dhe për numrin e votuesve. Vetëm për qendrën e votimit numër 1989 ekziston një e dhënë sipas të cilës nga 590 zgjedhës duket të kenë marrë pjesë 338 persona, por dhe kjo shifër e dalë prej të dhënave që shkruhen sipas votave të deklaruara që kanë marrë kandidatët në këtë qendër votimi, nuk ka asnjë proces verbal apo gjë tjetër ligjore që provon shprehjen e vullnetit të lirë të zgjedhësve.


--------------------------------------------------------------------------------

Njësia numër 9

Në njësinë bashkiake numër nëntë gjithashtu nuk është kthyer pas asnjë nga fletët e votimit të papërdorura, të dëmtuara ose të pavlefshme. Në këtë njësi paraqiten një sërë problemesh përsa u përket kutive të votimit. Kështu në qendrën e votimit numër 1948 kutitë e votimit nuk janë marrë në dorëzim. Në këtë qendër kanë marrë pjesë në votime 282 votues dhe nga këto 92 vota i ka marrë Ngjela, kurse 228 i ka marrë Rama, një numër votash që ka dalë mbi ato që kanë votuar. Po kështu edhe në qendrën e votimit numër 1957 kutitë e votimit nuk janë marrë në dorëzim. Kurse në qendrën 1963 kutitë janë cilësuar si të parregullta nga nuk janë shënuar fare. Në qendrën numër 1970 nuk ka fare tabelë rezultati, ndërkohë që kodi i sigurisë është dorëzuar dorazi, gjë e palejueshme me ligj. Në këtë qendër Rama ka marrë 213 vota, kurse Ngjela ka marrë 135. Në qendrën e votimit numër 1974 kutitë e votimit nuk kanë firma të komisionerëve demokratë. Vetëm në gjashtë raste prej 30 qendrave të votimi bëhet i ditur dhe numri i votuesve, dhe po në gjashtë raste bëhet i ditur numri i atyre votave që kanë rezultuar të vlefshme. Në total në këtë njësi duhej të votonin rreth 30 mijë votues, ndërkohë që aty kanë votuar për dy kandidatët kryesorë reth 10 mijë votues, ose një e treta e tyre. Nga këto të shënuar si të rregullt në process-verbale janë vetëm 1990 votues.

[Albo]

Berisha ngre Brukselin kundër zgjedhjeve

Brukseli, komision hetimi për zgjedhjet

Parlamenti Evropian: Një komision hetimi në Shqipëri për zgjedhjet dhe ndërhyrje në Këshillin e Evropës. Bashkohen me opozitën shqiptare shumica e eurodeputetëve dhe personaliteteve të politikës evropiane. Sukses i paparashikuar i vizitës urgjente të Berishës në Bruksel

Erisa Zykaj
Korrespondente nga Brukseli

"Kam ardhur me një keqardhje të madhe në zemër, pasi populli shqiptar nuk ka mundur të votojë, ashtu siç i takon të votojë një populli evropian". Këto kanë qenë fjalët e hapjes së deklaratës së liderit të opozitës shqiptare, Sali Berisha, përpara grupit të partisë më të madhe në Parlamentin Evropian, partisë popullore evropiane (PPE). Ai së bashku me z.Besnik Mustafaj, kanë ardhur në Bruksel për të informuar mbi parregullsitë që janë shfaqur gjatë zgjedhjeve lokale të së dielës së kaluar. Berisha u ka shpjeguar anëtarëve të Partisë Popullore Evropiane pikat kryesore, në të cilat qeveria socialiste nuk ka respektuar kodin elektoral. "Ne kemi punuar për dy vjet me radhë për të kryer reformën zgjedhore dhe pikërisht para zgjedhjeve, Kryeministri i Shqipërisë vendosi të anullonte disa pasazhe të këtij kodi," - është shprehur Berisha. Ai ka shtuar se ndryshimi i kodit elektoral është bërë i tillë, që të favorizonte fitoren e socialistëve. Ai ka sqaruar nga ana tjetër se kryeministri shqiptar ka bllokuar financimin për partitë e tjera për fushatën elektorale deri javën e fundit para zgjedhjeve, duke favorizuar hapur financimin për Partinë Socialiste. "Nga ana tjetër, qeveria ka ndryshuar edhe ligjin mbi policinë" ka deklaruar përpara anëtarëve të këtij grupi Sali Berisha. Ai u ka transmetuar kolegëve të Partisë Popullore edhe mesazhin e dhënë nga presidenti i Parlamentit Evropian, Pat Cox në Shqipëri. Mesazhin e këtij të fundit në Tiranë, Berisha e ka përcjellur me këto fjalë: Si mendon mazhoranca që të mund të integrojë Shqipërinë në Bashkimin Evropian, duke ndjekur një politikë të tillë?

Në fund të kësaj pyetjeje, ai nuk ka hezituar të rradhisë incidentet e ndodhura gjatë ditës së zgjedhjeve në Tiranë, Durrës, Shkodrës, duke treguar edhe raste konkrete si zgjedhjen në krye të bashkisë së Durrësit të një prej kontrabandistëve më të madhenj. "10 deri në 25% e votuesve nuk kanë mundur të votojnë, për shkak të problemeve të shumta me listat elektorale. Prandaj dhe socialistët kanë mundur të fitojnë" ka thënë ai.

Berisha ka kërkuar ndihmën e Partisë Popullore Evropiane për formimin e një komisioni ankete në Shqipëri mbi parregullsitë në zgjedhje. "Ju duhet të vini vetë dhe të shihni se si prezantohet qeverisja socialiste se si institucionet shqiptare që duken se bëjnë një punë të mirë përpara syve të ndërkombëtarëve, nuk e meritojnë as emrin që mbajnë" është shprehur Berisha. "Nëse ju nuk na ndihmoni, atëherë Shqipëria do ta paguajë shumë shtrenjtë, madje edhe fqinjët e Shqipërisë, kryesisht në lidhje me eksportimin e kriminalitetit, duke shpërndarë kështu imazhin e një regjimi të prapambetur".


--------------------------------------------------------------------------------

Martens: Komision Hetimi në kuadrin e inisiativës për Ballkanin Jugor

Por përgjigjja e kthyer nga kryetari i Partisë Popullore Evropiane, Vilfried Martens, ka qenë shumë e angazhuar dhe madje më bujare sesa ç`pritej. "Zoti Berisha, ju na thatë që do të hartoni një raport për këtë çështje dhe ne dëshirojmë që ta kemi në dorë këtë raport para mbledhjes së dhjetorit të byrosë politike" është shprehur kryetari i Partisë Popullore Martens. "Ndërsa përsa i përket një ankete të mundshme, ne mund të organizojmë një komision parlamentar hetimi në kuadrin e politikës së inisiativës për Ballkanin e Jugut dhe ta dërgojmë në Shqipëri me misionin që kërkuat" ka siguruar kryetari Martens.

Nga ana tjetër, përgjigjja e kryetarit është përforcuar nga dy parlamentarë të tjerë Koenin dhe Schmit. "Ne nuk duhet të krijojmë thjesht vetëm një komision ankete me inisiativën e partisë tonë. Ne duhet të bindim dhe Partinë Socialiste, liberalët ashtu si dhe partitë e tjera, për të krijuar një komision hetimi në nivelin evropian, pasi bëhet fjalë për një problem të përbashkët. Ne nuk mund të tolerojmë që influenca e mafias që kanë qenë tashmë prezente në jug të Shqipërisë të shtrihet edhe në veri të vendit" ka thënë eurodeputeti Koenin. Ai ka shpjeguar se kjo është një sfidë shumë e rëndësishme për Bashkimin Evropian, pasi problemet aktuale që hasen në Shqipëri do të pengojnë integrimin e vendit në këtë organizatë. Madje eurodeputeti austriak Koenin i është referuar edhe rrezikut të përhapjes së kontrabandës dhe krimit rreth fqinjëve të Shqipërisë, duke përmendur Italinë. "Nuk është vetëm partia jonë që nuk pranon këtë, por Evropa e tërë nuk e pranon këtë" ka përfunduar ai.

Schmit nga ana e tij, ka sugjeruar që Partia Popullore Evropiane duhet të ankohet në gjirin e Partisë Popullore Evropiane në Këshillin e Evropës, pasi kriminaliteti i organizuar në Shqipëri është një nga shkeljet më flagrante të të drejtave të njeriut. "Unë e kam mbajtur një pozicion pak kritik ndaj Berishës në të kaluarën, por besoj se aktualisht po tregohet që Partia Demokratike ka nxjerrë mësime nga e kaluara dhe po konstatoj se Partia Demokratike Shqiptare po përballet me një situatë shumë të vështirë. Ne nuk duhet t'i lëmë miqtë tanë politikë vetëm. Ne duhet të ndërhyjmë, pasi bëhet fjalë për një problem që na prek të gjithëve," ka përfunduar Schmidt. Komisioni i hetimit do të diskutohet, pasi anëtarët e Partisë Popullore Evropiane të njihen me raportin e opozitës shqiptare në dhjetor.

[Pianisti]

Te nderuar bashkatdhetare kudo qe jeni, ketu ne Gjermani ku jam dhe une, apo te Amerike e Zelande te Re, flasim e nuk flasim me gjyshet e mamate, vellezerit e motrat qe kemi ne Shqiperi, e keqja jone qendron ne ate qe ne si shqiptare jemi emocionale dhe jo racionale. Ne gjykojme si na thote babi, mami apo gjyshja, te gjithe jemi larg dhe ushqim "politik" kemi vetem gazetat e perditshme shqiptare, qe cfare thote njera nuk e thote tjetra per nje dukuri apo ngjarje te dites. Edhe gazetaret i kemi emocionale, edhe politikanet por edhe zgjedhesit qe i votojne keto politikanet

[Pianisti]

...tane po ashtu jane, emocionale nga koak deri te kembet. Poshte korrupsjoni thote njeri "korrupsioni" duhet te mendoj une, e gjithe pikeveshtrimi yne fokusohet ne ate gje, por ama jemi ne gje perseri mendojme ne nemyre emocionale dhe themi korrupsionin (keshtu shkruhet ne shqip) e kane vetem ato te partise tjeter, aspak ata tonet, ne i kemi lideret e bekuar dhe me te paster ne bote!Ne ndjejme mall shume per ate Shqiperine tone te shtrenjte dhe kapemi e rrutullohemi kaq shume pas nje lajmi, saqe fillojme edhe ta vuajme personalisht, te qenurit ndryshe nga c'eshte thene aty ne ate gazeten tone te dashur partiake. E duam shume ate partine, me teper e duam se e do babi apo mami dhe jo se ne jemi marre ndonjehere me nje analize te thelle se cfare ka bere kjo partia jone e zemres, parti per te cilen ne do te flijonim aore te tera ne kompjuter per te gjetur nje artikull ne gazetat e Tiranes. Sepse ato i kemi te vetmet informacione, shumica e postimve te kesaj teme, por edhe tema eshte marre nga gazetat tona te dashura, qe i duam aq shume e na mbajne gjalle shpirtin tone politik. Ne kacafytemi me njeri tjetrin per Tiranen dhe Durresin, njera thote u manipulaun zgjedhjet, sikur te kete qene komisionere ne ndonje KQZV ne Shqiperi, nderkohe qe edhe OSBE apo USA japin sinjle te mira per zhvillimin e ketyre zgjedhjeve, duke i cilesuar si nje hap te rendesishem perpara drejt intengrimit ne strukturat euroatlantike. Kacafytemi per nje ose te me shume te meta te ketyre zgjedhjeve, (e meta kryesore qendron ne vete shqiptaret ne te qenurin e tyre jashte mase emocionale) te meta qe sipas deklaratave te institucioneve vezhguese te ketyre zgjdhjeve nuk perbjen aspak nderiim te vullnetit te popullit dhe harrojme te meten kryesore te kesaj kohe, prostitucionin politik te kastes sone politike. A ka ndonje moment ne zemren dhe trurin e "shqiptarit" Sali Berisha ku ndjenja e pendeses dhe kerkimi te falur Shqiperise per masakren Himarjote te jete prezente? A eshte e mundur qe nje lider qe gjithnje vlet per atdhetarizem ( megjithese atdhedashuria nuk tregohet me fjale) dhe qe shan e bertet per kundershtaret e tij te vjeter, si te shitur te greku, serbi apo etj. etj. te beje nje aleance zgjedhore me nje parti qe de facto eshte greke dhe mbron tashme hapur interesat greke, me nje parti qe ka ne gjirin e saj dhelpera dhe skile te tille si Vangjel Dule apo Bollano e te tjere greker shqiptare, qe edhe kur flasin shqip te duhet nje perkthyes apo kriminele te paguar qe vijne nga Greqia. Turp per ju dhe ato qe ideuan kete marrevshje z. Berisha (shpresoj qe te mos ta marre personalisht asnjeri ketu te Forumi, pra te mos jemi emocionale) edhe njehere treguat se fjalet e atdhedashurise suaj jane vecse karta te djegura politike, te cilat dalin sa here qe keni nevoje per pak mbeshtetje edhe nga te te varfrit emigrante ne Evrope apo Amerike, sepse me Shqiperine ju prekni ate qe eshte me e vyer ne zemren dhe mendjen tone, pra shtepine, qytetet, femijerine dhe rinine tone, varret e te pareve dhe token ku do te prehemi kur te mbarojme ditet tona. Dhe qe per hire te disa votave te pista me PBDNJ, te harrojme origjinen dhe t'i themi Vangjel Dules ok, ne vend qe te tregojme se jemi shqiptare dhe se me mire me PS, sesa me grekun, kjo tregon se jemi akoma ne kohen e ndarjes se posteve ne ndonje restorant lluksoz ne Tirane, ku kendohet pa pike problemi muzike greke dhe serbe, ne vend te asaj shqiptare.
Te nderuar miq, kudo qe jeni, mos votoni me per askend, vetem te gjithe se bashku te ikin atje ne vendin tone, dhe t'i marrin ata politikanet tane e t'i zhveshim perpara gjithe popullit dhe pastaj t'i heshim ne lume, qe te lahen nga papastertite qe u kane zene lekuren e tyre politike, te majte apo te djathte, asnjeri nuk eshte me i mire se tjetri, secili ka mekatet e veta, por dikush mundohet te punoje dhe tjetri flet per atdhedashuri duke hapur kembet te bordellet greke te Tiranes te z. Dule apo te ambasades Greke, duke i bere keshtu peshqesh shteit fqinje edhe nje krahine tjeter shqiptare, qe Greqia me ane te Deklarates se Ministrise se Jashtme kerkon te shpallet minoritare.
Shpresoj qe te mos kem irrituar ndonje demokrat, apo socialist, apo ambjentalist grek ketu ne forum, po flas vetem me shqiptaret qe nuk harrojne se jane te tille, jo vetem nga emri, por edhe nga te qenurit SHQIPTAR. Shpresoj qe KQZ te shpalle te pavlefshem qofte votimin e te dieles ne Himare, qofte marreveshjen e turpshme PD-PBDNJ(Greqi). Kete te fundit me mire uroj qe ta zhvlftesojne ne rradhte te pare ata shqiptare te vertete demokrate, qe jane anetare te PD dhe pastaj ata te PS apo te partive te tjera, pra shqiptaret e vertete! Zoti na ruajte nga greket e rinj, nga ata qe nuk dine te lexojne dhe te shkruajne vecse Hellas, te cilet ndodhen edhe ne gjrin tone.
Te faleminderit o Shqiperi qe me linde ne token tende e qe nuk me leve si grek, serb, apo cdo specie tjeter fqinje, qe akoma edhe sot nuk e harron helmin ndaj shqiptareve, a thua nuk ishim ne ato, qe i rpitem te tere keta fqinje mistrece.
Ju pershendes te gjitheve dhe ju uroj gjithe te mirat nga Gjermania! Pianisti